ჭდე: Manchester United F.C.

დღეს „მანჩესტერ იუნაიტედისთვის“ ღირსშესანიშნავი დღეა. ზუსტად 104 წლის წინათ, 1910 წლის 19 თებერვალს „წითელი ეშმაკების“ სტადიონი „ოლდ ტრაფორდი“ გაიხსნა. სწორედ ამ დღეს გაიმართა პირველი მატჩი, რომელშიც „მანჩესტერ იუნაიტედმა“ „ლივერპული“ მიიღო და ანგარიშით 3:4 დამარცხდა.

მატჩზე დამსწრე ჟურნალისტი სტადიონს ასე აღწერდა: „ყველაზე ლამაზი, ყველაზე ფართო და ყველაზე საოცარი არენა, რომელიც ოდესმე მინახავს. მსოფლიოს მასშტაბით უბადლო საფეხბურთო მოედანია. ეს „მანჩესტერ იუნაიტედისთვის“ პატივია. სანამ აქ ითამაშებენ, მათ სასწაულების ჩადენა შეეძლებათ“.

დღესდღეობით „ოლდ ტრაფორდი“, რომელსაც მეორენაირად „ოცნებების თეატრს“ უწოდებენ, 75 ათასზე მეტ ადამიანს იტევს. დიდი ბრიტანეთის მასშტაბით სიდიდით მეორე არენაა (პირველი ლონდონის „უემბლის“ სტადიონია), ევროპის მასშტაბით კი – მეცხრე. მიღებული აქვს უეფას ელიტარული 5 ვარსკვლავი, რომელიც ინგლისში „ოლდ ტრაფორდთან“ ერთად მხოლოდ „უემბლის“ აქვს. სტადიონმა მიიღო 1966 წლის მსოფლიოს ჩემპიონატისა და 1996 წლის ევროპის ჩემპიონატის მატჩები, უმასპინძლა 2003 წლის ჩემპიონთა ლიგის ფინალურ შეხვედრას, გაიმართა 2012 წლის ოლიმპიური თამაშების საფეხბურთო მატჩები. „ოლდ ტრაფორდს“ ეკუთვნის ინგლისის პრემიერლიგაში გულშემატკივართა დასწრების რეკორდიც. 2007 წლის 31 მარტს „მანჩესტერ იუნაიტედსა“ და „ბლექბერნ როვერსს“ შორის გამართულ შეხვედრას 76 098 ადამიანი დაესწრო, რაც ამ დრომდე პრემიერლიგის საუკეთესო მაჩვენებელია.

ბექა დოგრაშვილი