ბილბაოს “ატლეტიკის” ნახევარმცველმა იკერ მუნიაინმა, რომელიც მძიმე ტრავმის მიღების შემდეგ ჯერ არ გამოჯანმრთელებულა, “რეალ სოსიედადის” წინააღმდეგ გამართულ ბასკურ ჯახს ტელევიზორის საშუალებით მიადევნა თვალყური. ფეხბურთელმა სოციალურ ქსელში ფოტოც გამოაქვეყნა.
შეგახსენებთ, რომ “სოსიედადსა” და “ატლეტიკს” შორის გამართული მატჩი უგოლოდ დასრულდა.
ესპანეთის ჩემპიონატის 36-ე ტურში “ბარსელონამ” საკუთარ მოედანზე “რეალ სოსიედადი” ანგარიშით 2:0 დაამარცხა. კატალონიური გუნდის რიგებიდან გოლები ნეიმარმა და პედრომ გაიტანეს.
“ბარსელონას” ლიდერმა ლიონელ მესიმ პრიმერადივიზიონში პირველად დიდი ხნის შემდეგ გოლის გატანა ვერ შეძლო. არგენტინელმა ფეხბურთელმა ლა ლიგაში გოლი უკანასკნელად 5 აპრილს ვერ გაიტანა, როდესაც “ბარსელონამ” “სელტა” ანგარიშით 1:0 დაამარცხა. ესპანეთის ჩემპიონატის მიმდინარე გათამაშებაში მესიმ 40 გოლი გაიტანა და 18 საგოლე გადაცემა გააკეთა.
სამაგიეროდ, დღევანდელ მატჩში გატანილი გოლი ნეიმარისთვის მიჯრით მეექვსე გახლავთ. ეს ბრაზილიელი ფეხბურთელისთვის კატალონიური გუნდის რიგებში მოწყობილი საუკეთესო სერიაა. აქვე აღსანიშნავია, რომ ნეიმარისთვის აღნიშნული გოლი “ბარსას” ფორმით 50-ე გატანილი ბურთია. ბრაზილიელ გარემარბს “ბლაუგრანას” შემადგენლობაში სულ 88 მატჩი აქვს ჩატარებული.
“რეალ სოსიედადის” ნახევარმცველმა ესტებან გრანერომ განაცხადა, რომ კლუბის თავკაცის, დევიდ მოიესის მუშაობის მეთოდი ლონდონის “ჩელსის” მთავარი მწვრთნელის, ჟოზე მოურინიოს სტილს აგონებს. შეგახსენებთ, რომ გრანერო მადრიდის “რეალში” მოურინიოს თავკაცობით 2010-დან 2012 წლამდე თამაშობდა.
“თითოეულ მწვრთნელს ახასიათებს თავისებურება, თითოეულ მწვრთნელს მუშაობის საკუთარი მეთოდი აქვს, თუმცა მოიესი და მოურინიო იდეებსა და პროფესიონალიზმში ერთმანეთს ძალიან ჰგვანან. ორივეს სურს, რომ ფეხბურთელებისთვის ყოველივე საუკეთესო გასცეს. მოურინიომ “რეალს” დიდება დაუბრუნა. მე მისგან ბევრი რამ ვისწავლე, კიდევ უფრო განვვითარდი. მან მადრიდული კლუბი ევროპაში ყველაზე ძლიერ გუნდად აქცია”, – განაცხადა გრანერომ.
ესპანეთის თასის მერვედფინალურ ეტაპზე “რეალ სოსიედადსა” და “ვილიარეალს” შორის გამართულ მატჩში ბასკთა მთავარი მწვრთნელი დევიდ მოიესი მსაჯის მიმართ ნაჩვენები უხამსი ჟესტის გამო გააძევეს.
ამის შემდეგ ფეხბურთის შოტლანდიელი სპეციალისტი ოსტატურად გადაახტა ბარიერს და ტრიბუნაზე დაიკავა ადგილი. ამით ისარგებლეს გულშემატკივრებმა და მოიესს ჩიფსი შესთავაზეს, არც მწვრთნელი დამდგარა უარზე და გულისხმიერი ფანების მიერ შეთავაზებულ პროდუქტს მადიანად შეექცა.
მატჩი “სოსიედადსა” და “ვილიარეალს” შორის ფრედ, ანგარიშით 2:2 დამთავრდა. წყვილის პირველი შეხვედრა ვალენსიელთა გამარჯვებით 1:0 დასრულდა და ტურნირის მეოთხედფინალშიც სწორედ ისინი გავიდნენ.
ესპანეთის პრიმერადივიზიონის XVII ტურში “რეალ სოსედადმა” საკუთარ მოედანზე “ბარსელონა” მიიღო და მატჩის მეორე წუთზე ჟორდი ალბას ავტოგოლის წყალობით ანგარიშით 1:0 დაამარცხა. აღსანიშნავია, რომ კატალონიური გუნდის მთავარმა მწვრთნელმა ლუის ენრიკემ “ბლაუგრანას” ლიდერები – ლიონელ მესი და ნეიმარი სათადარიგოთა შორის დატოვა, თუმცა შეხვედრის მეორე ტაიმში მოედანზე მათი გამოყვანა მაინც მოუწია.
სათქმელია, რომ პრიმერადივიზიონში “სოსიედადს” საკუთარ მოედანზე “ბარსელონასთან” 2007 წლის შემდეგ არ წაუგია და კატალონიურ გუნდთან გამართული ბოლო ხუთი საშინაო მატჩიდან ოთხი სულაც გამარჯვებით დაასრულა.
ამ გამარჯვებით ბასკებმა აქტივში 18 ქულას მოუყარეს თავი და სატურნირო ცხრილში მე-13 პოზიციამდე აღზევდნენ. “ბარსელონა” 38 ქულით მეორე ადგილზეა.
ესპანეთის პრიმერადივიზიონი
XVII ტური
“რეალ სოსიედადი” — “ბარსელონა” 1:0 (1:0)
“რეალ სოსიედადი”: რული, დე ლა ბელია, ინიგო მარტინესი, ანსოტეგი, კარლოს მარტინესი, გრანერო, ბერგარა, გ. კასტრო (ფინბოგასონი 65′), ხაბი პრიეტო, კანალესი (ბერშიჩე 90+3′), ველა (რუბენ პარდო 89′).
მთავარი მწვრთნელი: დევიდ მოიესი.
“ბარსელონა”: ბრავო, ალბა, მასკერანო, მატიე (დანი ალვესი 69′), მონტოია, ბუსკეტსი, ინიესტა, ჩავი, პედრო (ნეიმარი 57′), მუნირი (მესი 46′), სუარესი.
მთავარი მწვრთნელი: ლუის გარსია.
გოლი: ალბა 2′ (ა.გ.).
გაფრთხილებები: ველა 39′, ინიგო მარტინესი 43′, გრანერო 51′, ფინბოგასონი 89′, ბერგარა 90+2′ — მატიე 34′, დანი ალვესი 76′, ალბა 89′, ნეიმარი 90+3′.
მთავარი მსაჯი: კარლოს დელ სერო გრანდე (მადრიდი).
ესპანეთის პრიმერადივიზიონის XIII ტური სან-სებასტიანში გაიხსნა, სადაც ადგილობრივმა “რეალ სოსიედადმა” “ელჩე” მიიღო და კარლოს ველას ჰეთ-თრიკის წყალობით ანგარიშით 3:0 გაანადგურა.
ეს “სოსიედადის” თავკაცის პოსტზე დევიდ მოიესის მეორე მატჩი და პირველი გამარჯვებაა. შეგახსენებთ, რომ მისი ხელმძღვანელობით გუნდმა პირველი შეხვედრა სტუმრად “დეპორტივოსთან” ჩაატარა და მეტოქეს უგოლოდ დაშორდა.
ამ მოგების წყალობით ბასკურმა გუნდმა აქტივში 13 ქულა დააგროვა და სატურნირო ცხრილში მე-13-ადგილოსან “ეიბარს” გაუთანაბრდა. რაც შეეხება “ელჩეს”, გუნდს 10 ქულით მე-19 პოზიცია უკავია.
ესპანეთის პრიმერადივიზიონი
XIII ტური
“რეალ სოსიედადი” — “ელჩე” 3:0 (2:0)
გოლები: ველა 3′, 31′, 53′.
გაფრთხილებები: ანსოტეგი 5′, კანალესი 14′ — ადრიან გონსალესი 28′, გარი როდრიგესი 62′, ვიქტორ როდრიგესი 76′, სისმა 82′.
“რეალ სოსიედადის” მთავარი მწვრთნელის პოსტზე დევიდ მოიესის სადებიუტო მატჩი მეტნაკრებად წარმატებული გამოდგა. მისი გუნდი გასვლაზე ლა კორუნიის “დეპორტივოსთან” უგოლოდ დაზავდა. ამრიგად, ბასკებმა უკანასკნელი შვიდი თვის მანძილზე კარი მშრალად პირველად შეინახეს.
აღსანიშნავია, რომ მატჩის მიმდინარეობის დროს “დეპორტივოს” მწვრთნელი გაგულისდა და მოიესთან რაღაცის გაპროტესტება დაიწყო, თუმცა შოტლანდიელი სპეციალისტი სიტყვიერ ბრძოლაში არ ჩაერია და ოპონენტს ჟესტით დამშვიდებისკენ მოუწოდა. მოიესმა ესპანური ენა არ იცის და სავარაუდოდ, მან მეტოქე გუნდის მწვრთნელის სიტყვები ვერც გაიგო.
“რეალ სოსიედადის” ახალი მთავარი მწვრთნელი დევიდ მოიესი აცხადებს, რომ ესპანეთში საფეხბურთო მატჩების დაწყების გვიანი დრო მისთვის ერთგვარი კულტურული შოკი აღმოჩნდა. პრიმერადივიზიონის XII ტურში მისი გუნდი “დეპორტივოს” ესტუმრება — მატჩი შაბათს, ადგილობრივი დროით 22:00 საათზე დაიწყება (თბილისის დროით 01:00 საათზე).
“შესაძლოა, ინგლისში ამ დროს უკვე ეძინოთ. ნამდვილად არ ვარ ასეთ დროს მიჩვეული, თუმცა აქ სწორედ ახალი კულტურის გასაცნობად ჩამოვედი. რამდენადაც მე ამიხსნეს, ესპანეთში ჩვეულებრივი ფაქტია მატჩების საღამოს ათ საათზე დაწყება. რას ვიზამთ, ახალ გრაფიკს უნდა შევეგუო.
ჩემთვის ბევრს ნიშნავს ის, რომ ხალხი ქუჩაში ჩერდება და მესალმება. ესპანეთსა და დიდ ბრიტანეთში თვლიან, რომ სწორი არჩევანი გავაკეთე. სანაკრებო პაუზა ძალზედ წაგვადგა. ჩემს ფეხბურთელებთან დიდი დრო გავატარე. ისინი ყურადღებით ისმენენ ახალ ინფორმაციას. ცოტას კი ვნერვიულობ, თუმცა გუნდში ყველანი კარგ განწყობაზე არიან. დარწმუნებული ვარ, ჩვენს გუნდს შეუძლია, რომ სატურნირო ცხრილში ზემოთ აიწიოს”, – ციტირებს მოიესის სიტყვებს “როიტერი”.
ესპანეთს პრიმერადივიზიონის X ტურში “რეალ სოსიედადსა” და “მალაგას” შორის გამართული მატჩის (0:1) შემდეგ ბასკთა კლუბის მთავარი მწვრთნელი იაგობა არასატე პოსტიდან გაათავისუფლეს.
“რეალ სოსიედადმა” ჩატარებული 10 შეხვედრიდან მხოლოდ ერთი მატჩის მოგება შეძლო. გუნდს მხოლოდ 6 ქულა აქვს და გასავარდნ ზონაში იმყოფება.
გარდა ამისა, “რეალ სოსიედადმა” უეფას ევროპის ლიგის საკვალიფიკაციო ეტაპზე “კრასნოდარის” ბარიერი ვერ დაძლია (1:0, 0:3) და ტურნირის ჯგუფურ ეტაპზე ვერ მოხვდა.
მადრიდის “ატლეტიკო“ „რეალ სოსიედადის“ თავდამსხმელ ანტუან გრიზმანის შეძენასთან ახლოსაა.
Goal.com-ის თანახმად, მადრიდელები მზად არიან, ფრანგი ფეხბურთელის სანაცვლოდ 25 მილიონი ევრო გაიღონ. 23 წლის ფორვარდის შესაძლო ტრანსფერთან დაკავშირებით მოლაპარაკებები თვეზე მეტია, მიმდინარეობს და მხარეები თითქმის საბოლოო შეთანხმებამდეც მივიდნენ.
ტრანსფერი ოფიციალურად უახლოეს დღეებში უნდა დადასტურდეს.
ანტუან გრიზმანმა ესპანეთის პრიმერადივიზიონის გასულ გათამაშებაში 35 მატჩი ჩაატარა და 16 გოლი გაიტანა.
ჩილეს ნაკრების მეკარე კლაუდიო ბრავო „ბარსელონაში“ ითამაშებს. ინფორმაციას ამის შესახებ კატალონიური კლუბის ოფიციალური ვებგვერდი აქვეყნებს.
მხარეებს შორის შეთანხმება უკვე მიღწეულია. ბრავო „ბარსასთან“ ოთხწლიან კონტრაქტს მოაწერს ხელს. კატალონიურმა კლუბმა 31 წლის კიპერის სანაცვლოდ 12 მილიონი ევრო გაიღო.
შეგახსენებთ, რომ ჩილელი მეკარე ბოლო რვა წლის განმავლობაში „რეალ სოსიედადის“ ღირსებას იცავდა.
ამჟამად კლაუდიო ბრავო მსოფლიოს ჩემპიონატზეა, სადაც მისი ნაკრები მერვედფინალურ ეტაპზე ბრაზილიას დაუპირისპირდება.
შეგახსენებთ იმასაც, რომ „ბარსელონამ“ მიუნხენგლადბახის „ბორუსიადან“ კიდევ ერთი კიპერი მარკ-ანდრე ტერ შტეგენი უკვე დაიმატა.
ესპანეთის პრიმერადივიზიონის 32-ე ტურში მადრიდის „რეალმა“ სტუმრად „რეალ სოსიედადი“ ანგარიშით 4:0 გაანადგურა. მატჩის შემდეგ გამართულ პრესკონფერენციაზე „სამეფო კლუბის“ მთავარმა მწვრთნელმა კარლო ანჩელოტიმ „რეალის“ მიმართ საქებარი სიტყვები არ დაიშურა.
„ჩემი გუნდის მიერ ნაჩვენებ თამაშს მაღალ ქულას დავუწერდი, კარგად და ჭკვიანურად ვითამაშეთ. მატჩი მაღალ ტემპში დავიწყეთ და კარგი თამაში გამოვიდა. ბედნიერი ვარ. მე მყავს გუნდი, რომელიც ბრძოლისთვის მზად არის და ამით ვამაყობ.
ამ გამარჯვებამ ძალა შეგვმატა. გუნდი მშვენიერ ფორმაშია. სატურნირო ცხრილში ლიდერები არ ვართ, მაგრამ ჩემპიონობისთვის ბოლომდე ვიბრძოლებთ“, – ანჩელოტის სიტყვები „მარკამ“ გამოაქვეყნა.
მუხლის მცირეოდენი ტრავმის გამო გუშინდელ შეხვედრაში არ უთამაშია კრიშტიანუ რონალდუს. გოლები ასიერ ილიარამენდიმ, გარეტ ბეილმა, პეპემ და ალვარო მორატამ გაიტანეს.
ბექა დოგრაშვილი
