“სევილიამ” “ბორდოსთან” 29 წლის მცველ მარიანო ფერეირას ტრანსფერთან დაკავშირებით შეთანხმებას მიაღწია. ინფორმაციას ანდალუსიური კლუბი ოფიციალურად ადასტურებს.
მარიანო “სევილიაში” სამედიცინო შემოწმებას გაივლის, რის შემდეგაც კლუბთან სამწლიან კონტრაქტს გააფორმებს. ფრანგები ბრაზილიელი ფეხბურთელის სანაცვლოდ 20 მილიონ ევროს მიიღებენ.
მარიანომ საფრანგეთის ჩემპიონატის გასულ გათამაშებაში 31 მატჩი ჩაატარა, ერთი გოლი გაიტანა და სამი შედეგიანი გადაცემა გააკეთა.
ცნობილია იმ მსაჯთა ვინაობა, რომლებიც თბილისში გასამართ უეფას 2015 წლის სუპერთასის მატჩს განსჯიან. შეხვედრის მთავარი არბიტრი 36 წლის შოტლანდიელი რეფერი უილიამ კოლამი იქნება. მან ჩემპიონთა ლიგის გასულ გათამაშებაში ექვსი მატჩი განსაჯა, მათ შორის “მონაკოსა” და ტურინის “იუვენტუსს” შორის ტურნირის მეოთხედფინალურ ეტაპზე გამართული შეხვედრა. კოლამს 2016 წლის ევროპის ჩემპიონატის საკვალიფიკაციო ეტაპზე სამ მატჩში აქვს ნამსაჯი. გარდა ამისა, 29 წლის ასაკში მან 19 წლამდე ფეხბურთელთა შორის ევროპის ჩემპიონატის ფინალურ შეხვედრაში იმსაჯა, რომელიც იტალიისა და გერმანიის ნაკრებებს შორის ჩატარდა.
კოლამი საერთაშორისო კატეგორიის მსაჯი 2006 წელს გახდა. მას უეფას ტურნირებზე 67 მატჩი აქვს განსჯილი.
ხაზის მსაჯი: დამიენ მაკგრეითი (ირლანდია);
ხაზის მსაჯი: ფრენსის კონორი (შოტლანდია);
მეოთხე მსაჯი: გრემ ჩემბერსი (შოტლანდია);
მსაჯის დამატებითი თანაშემწე: ბობი მედენი (შოტლანდია);
მსაჯის დამატებითი თანაშემწე: კევინ კლენსი (შოტლანდია).
უეფას სუპერთასის მატჩი “ბარსელონასა” და “სევილიას” შორის 11 აგვისტოს, “დინამო არენაზე” ჩატარდება. შეხვედრა 22:45 საათზე დაიწყება.
“სევილიამ” ოფიციალურად დაადასტურა ჩირო იმობილეს ტრანსფერი.
25 წლის იტალიელი ფეხბურთელი ანდალუსიურ კლუბში სამედიცინო შემოწმებას ორშაბათს გაივლის.
იმობილე “სევილიაში” იჯარის წესით მომავალი წლის ზაფხულამდე ითამაშებს. კონტრაქტში ჩაიწერა პუნქტი, რომლის მიხედვითაც, მომავალი სეზონის ბოლოს ესპანურ კლუბს ფეხბურთელის სრულად გამოსყიდვის უფლება მიეცემა. ამისთვის “სევილიამ” 10 მილიონი ევრო უნდა გადაიხადოს.
გასული სეზონი ფეხბურთელმა დორტმუნდის “ბორუსიაში” გაატარა. მან გერმანიის ბუნდესლიგის გასულ სეზონში 24 მატჩი ჩაატარა, სამი გოლი გაიტანა და ერთი საგოლე გადაცემა გააკეთა. იმობილეს “ბორუსიასთან” მოქმედი კონტრაქტი 2019 წლის 30 ივნისს ეწურება.
საქპატენტი საზოგადოებისთვის განმარტებას აკეთებს, თუ რა ქმედებებია კანონით აკრძალული უეფას 2015 წლის სუპერთასის მატჩთან დაკავშირებით.
კანონით აკრძალულია უეფას ლოგოს უნებართვო გამოყენება, პროდუქციაზე დატანა და გაყიდვა, მატჩის უნებართვოდ საჯარო ჩვენება. “დინამო არენას” მიმდებარე ქუჩებზე, ვერის პარკის და მეიდნის მიმდებარე ქუჩებზე, სადაც გულშემატკივართა შეკრების ადგილებია, უეფას ოფიციალური სპონსორების გარდა ყველა სხვა კომპანიის ნებისმიერი სარეკლამო აქტივობა, ნებისმიერი ტიპის გარე ვაჭრობა და კაფე-ბარებისა და მაღაზიების მიერ უეფას მატჩის სარეკლამო მიზნით გამოყენება ასევე კანონით აკრძალულია.
იმ პირების მიმართ, რომლებიც უეფას ლოგოს უნებართვოდ გამოიყენებენ, სანქციები გატარდება – კერძოდ, აღკვეთა, 3 ათას ლარამდე ჯარიმა და საქონლის კონფისკაცია.
უეფას ნებართვის გარეშე კანონით აკრძალულია 2015 წლის სუპერთასის მატჩზე დასაწრები ბილეთების გასაყიდად შეთავაზება ან ნებისმიერ კომერციულ ღონისძიებაში გამოყენება, რასთან დაკავშირებითაც, უეფას მოთხოვნის შესაბამისად, შექმნილი ჯგუფები, რომელიც დაკომპლექტებულია საქართველოს შინაგან საქმეთა სამინისტროს და ქ. თბილისის მერიის თანამშრომლებით. ისინი ახორცილებენ სუპერთასის მატჩის ბილეთების ნებართვის გარეშე გასაყიდად შეთავაზების ფაქტების გამოვლენას და აღკვეთას, მათ შორის ინტერნეტსივრცეშიც. კანონდამრღვევს სანქციის სახით გაყიდული ბილეთის ღირებულების ოთხმაგი ოდენობა დაეკისრება, ბილეთი კი გაუქმდება.
დნეპროპეტროვსკის “დნიპროს” ნახევარმცველი ევგენი კონოპლიანკა კარიერას ესპანეთის “სევილიაში” გააგრძელებს. 25 წლის უკრაინელმა ფეხბურთელმა ანდალუსიურ კლუბთან ოთხწლიან კონტრაქტს მოაწერა ხელი.
ხელშეკრულებაში კონოპლიანკას გამოსასყიდი თანხაც ჩაიწერა, რომელიც 40 მილიონ ევროს შეადგენს. ეს იმას ნიშნავს, რომ თუ სხვა რომელიმე კლუბს მისი შეძენა მოუნდება, სწორედ ეს თანხა უნდა გადაიხადოს. ტრანსფერის სხვა დეტალები ჯერჯერობით არ ხმაურდება.
ევგენი კონოპლიანკა “დნიპროს” ღირსებას 2006 წლიდან იცავდა. ფეხბურთელმა გასულ სეზონში უკრაინული კლუბის ფორმით ყველა ტურნირზე ერთად 42 მატჩი ჩაატარა, რვა გოლი გაიტანა და შვიდი საგოლე გადაცემა გააკეთა.
უეფას ინტელექტუალური საკუთრების უფლებების დაცვის მიზნით საქპატენტი საინფორმაციო კამპანიას იწყებს, რომლის მიზანია საზოგადოებას განემარტოს ის ქმედებები, რომელიც კანონით აკრძალულია. დღეს უეფას სუპერთასის მატჩთან დაკავშირებით საქპატენტში პრესკონფერენცია გაიმართა.
იმ პირების მიმართ, რომლებიც უეფას ლოგოს უნებართვოდ გამოიყენებენ, სანქციები გატარდება – კერძოდ, აღკვეთა, 3 ათას ლარამდე ჯარიმა და საქონლის კონფისკაცია. ასევე აკრძალულია მატჩის ბილეთების უკანონოდ
გაყიდვა და ნებართვის გარეშე მატჩის საჯარო ჩვენება.
“კანონით აკრძალულია უეფა-ს ლოგოს უნებართვო გამოყენება, პროდუქციაზე დატანა და გაყიდვა, უნებართვოდ მატჩის საჯარო ჩვენება, მატჩის ბილეთების გაყიდვა ან გათამაშება. “დინამო არენას” მიმდებარე ქუჩებზე, ვერის პარკის და მეიდნის მიმდებარე ქუჩებზე, სადაც გულშემატკივართა შეკრების ადგილებია, უეფა-ს ოფიციალური სპონსორების გარდა ყველა სხვა კომპანიის ნებისმიერი სარეკლამო აქტივობა, ნებისმიერი ტიპის გარე ვაჭრობა და კაფე-ბარებისა და მაღაზიების მიერ უეფა-ს მატჩის სარეკლამო მიზნით გამოყენება ასევე კანონით აკრძალულია”, – ვკითხულობთ საქპატენტის განცხადებაში.
საქართველოს ფეხბურთის ფედერაცია უეფას სუპერთასის ბილეთებთან დაკავშირებით ახალ ინფორმაციას ავრცელებს. როგორც გამოქვეყნებულ განცხადებაში ვკითხულობთ, ბილეთების გაყიდვა არც მიმდინარე კვირაში და არც მომავალი კვირის დასაწყისში არ დაიწყება.
უცვლელად გთავაზობთ სფფ-ის მიერ გამოქვეყნებულ განცხადებას:
“მეგობრებო, მოკლედ გაგაცნობთ ამჟამინდელ სიტუაციას:
გრძელდება სამუშაო შეხვედრები სფფ-ში და სხვადასხვა უწყებებთან. ჩვენს მიერ უეფაში გაგზავნილი კონცეფცია მოწონებული და დადასტურებულია. მიმდინარეობს მოსამზადებელი სამუშაოები ბილეთების სალაროებში გაყიდვის მიმართულებით. მაქსიმუმი კეთდება იმისთვის, რომ გულშემატკივრებს მაქსიმალურად კომფორტულ პირობებში მივაწოდოთ ბილეთები.
ამასთან, სფფ-ის წარმომადგენლები შეხვდებიან biletebi.ge-ს წარმომადგენლებს და გადმოიბარებენ გაყიდული ბილეთების მონაცემებს (მყიდველების შესახებ ინფორმაციას და ა.შ.).
არც მიმდინარე კვირაში და არც მომავალი კვირის საწყის დღეებში, ბილეთების გაყიდვა არ დაიწყება.
მოსამზადებელი სამუშაოების დასრულების შემდეგ, გულშემატკივარს უკვე ექნება სრული, ამომწურავი ინფორმაცია ყველა დეტალზე. გულშემატკივრებს ვთხოვთ, დაეყრდნონ მხოლოდ ოფიციალურ ინფორმაციას.
შეგახსენებთ, რომ სალაროში გაიყიდება ქართველი გულშემატკივრისთვის განკუთვნილი 22 ათასი ბილეთი.
გისურვებთ წარმატებებს”.
მოგეხსენებათ, ოფიციალურად, დღეს დილიდან უეფას სუპერთასზე დასასწრები ბილეთების გაყიდვა დაიწყო, რომელთა შეძენა მსურველებს საიტ Biletebi.ge-ზე შეუძლიათ. თუმცა, დილიდანვე საიტზე პრობლემები შეიქმნა, ამის გამო ბილეთების შეძენას აქამდე უამრავი მომხმარებელი ვერ ახერხებს. აღნიშნულ პრობლემასთან დაკავშირებით საიტის ერთ-ერთი წარმომადგენელი ტელეკომპანია „რუსთავი 2“-ს ვებსაიტს გაესაუბრა.
„მაქსიმალურად ვცდილობთ, ფილტრი მაინც დავაყენოთ და ნაწილ ნაწილ შევუშვათ ხალხი.
წამში მოდის 10 ათასზე მეტი ტრანზაქცია, ამას „ამაზონის“ სერვერი თუ გაუძლებს მხოლოდ“, – განუცხადა Biletebi.ge-ს წარმომადგენელმა „რუსთავი 2“-ს.
გარდა ამისა, ავად რესპოდენტის თქმით, ამჟამად ჯერჯერობით უცნობია, თუ როდის აღდგება საიტის მუშაობა.
“სევილიას” მთავარმა მწვრთნელმა უნაი ემერიმ “ბარსელონას” ჩემპიონთა ლიგის მოგება მიულოცა.
“ფინალი დასრულდა. ერთმანეთს თბილისში შევხვდებით. გილოცავ, “ბარსელონა”! წინ, “სევილია”! – დაწერა სოციალურ ქსელში უნაი ემერიმ.
შეგახსენებთ, რომ ანდალუსიურმა გუნდმა ევროპის ლიგა მოიგო და უეფას სუპერთასისთვის ჩემპიონთა ლიგის მომგებ “ბარსელონას” შეხვდება. აღნიშნული შეხვედრა თბილისში, “დინამო არენაზე”, 11 აგვისტოს გაიმართება.
“სევილიამ” კლუბის მთავარ მწვრთნელ უნაი ემერისთან კონტრაქტი გაახანგრძლივა.
ახალი ხელშეკრულება 2017 წლის 30 ივნისამდე იქნება ძალაში.
შეგახსენებთ, რომ უნაი ემერი “სევილიას” 2013 წლის ზამთრიდან თავკაცობს. მან გუნდთან ერთად ზედიზედ ორჯერ მოიგო უეფას ევროპის ლიგა.
უეფას ტექნიკურმა ჯგუფმა ევროპის ლიგის 2014/15 წლების სეზონის სიმბოლური გუნდი შეადგინა. აღსანიშნავია, რომ საუკეთესოთა შორის დნეპროპეტროვსკის “დნიპროს” ოთხი მოთამაშე მოხვდა, თუმცა, სამწუხაროდ, მათ შორის არ არის ჯაბა კანკავა, რომელმაც ტურნირზე 13 მატჩი ჩაატარა, ერთი გოლი გაიტანა და შვიდი ყვითელი ბარათი მიიღო.
ევროპის ლიგის სეზონის სიმბოლური გუნდი ასე გამოიყურება:
მეკარეები: დენის ბოიკო (“დნიპრო”), სერხიო რიკო (“სევილია”);
მცველები: დუგლასი (“დნიპრო”), ფაუზი გულიამი (“ნაპოლი”), ტიმოტე კოლოძეიჩაკი (“სევილია”), რაულ ალბიოლი (“ნაპოლი”), ალეიქს ვიდალი (“სევილია”);
ნახევარმცველები: ბორხა ვალერო (“ფიორენტინა”), კევინ დე ბრუინი (“ვოლფსბურგი”), ევერ ბანეგა (“სევილია”), მარეკ ჰამშიკი (“ნაპოლი”), გჟეგოჟ კრიხოვიაკი (“სევილია”), რუსლან როტანი (“დნიპრო”), სტეფან მბია (“სევილია”);
თავდამსხმელები: ალანი (“ზალცბურგი”), კარლოს ბაკა (“სევილია”), გონსალო იგუაინი (“ნაპოლი”), ევგენი კონოპლიანკა (“დნიპრო”).
შეგახსენებთ, რომ უეფას ტექნიკური კომისიის ერთ-ერთი წევრი ალექს ფერგიუსონი გახლავთ.
უეფას ჩემპიონთა ლიგის 2015/16 წლების გათამაშებაში ხუთი ესპანური კლუბი მიიღებს მონაწილეობას. ეს მას შემდეგ გახდა ცნობილი, რაც ევროპის ლიგის ფინალურ მატჩში “სევილიამ” უკრაინული “დნიპრო” ანგარიშით 3:2 დაამარცხა.
როგორც მოგეხსენებათ, ახალი სეზონიდან ევროპის ლიგის გამარჯვებულ გუნდს ავტომატურად ენიჭება ჩემპიონთა ლიგის საგზური. აქედან გამომდინარე, მართალია, “სევილია” ესპანეთის პრიმერადივიზიონში მეხუთე ადგილზე გავიდა, თუმცა ევროპის ლიგის მოგებისთვის ჩემპიონთა ლიგის ჯგუფურ ეტაპზე მაინც ითამაშებს.
ესპანეთიდან “სევილიას” გარდა ჩემპიონთა ლიგას ჯგუფური ეტაპიდან შეუერთდებიან “ბარსელონა”, მადრიდის “რეალი” და “ატლეტიკო”. “ვალენსია” ტურნირზე პლეიოფიდან ჩაერთვება.
