პოლონეთის ნაკრებთან განცდილი მარცხის შემდეგ, საქართველოს ეროვნული ნაკრების კაპიტანმა, ჯაბა კანკავამ კომენტარი გააკეთა.
ჯაბა კანკავა: „მინდა, თემურს ნაკრების სახელით მადლობა გადავუხადო. ოთხი გოლი არ უნდა გაგვეშვა, მაგრამ პირველმა ორმა გოლმა ყველაფერი გადაწყვიტა.“
პოლონეთთან დღევანდელი მატჩის შემდეგ, სავარაუდოდ, თემურ ქეცბაია საქართველოს ნაკრებს დატოვებს. თავად ბატონი თემურის ბოლო კომენტარები, გულშემატკივრების უკმაყოფილება, გუნდის შედეგები – ყოველ შემთხვევაში, ეს ყველაფერი ამის ალბათობას კიდევ უფრო ზრდის.
თუმცა, გუნდის შედეგი უკეთესობისკენ მხოლოდ მწვრთნელის წასვლით რომ იცვლებოდეს, თავის პოსტს, ალბათ, თავად თემურ ქეცბაია აქამდეც დატოვებდა. მსგავსი ცვლილება წარმატების გარანტი არასდროს არის, თუმცა, რასაკვირველია, მცირედით მაინც იმედის მომცემია. რამდენად იმედის მომცემია თემურ ქეცბაიას წასვლა, თუ შესაძლო კანდიდატებს შორის რეალურად არავინ დასახელებულა? ან საერთოდ, ვინ მოახერხებს ნაკრებში არსებული ამჟამინდელი სიტუაციის უკეთესობისკენ შეცვლას? გამოცდილებამ გვიჩვენა, რომ არსებითად სიტუაცია უცხოელი სპეციალისტის მუშაობის დროსაც არ იცვლებოდა. ალენ ჟირესი, კლაუს ტოპმელერი და ექტორ რაულ კუპერი – ეს სამი სპეციალისტი „ჯვაროსნებს“ ხუთწლიან პერიოდში თავკაცობდა. ნაკრებისთვის ხუთ წელიწადში სამი სხვადასხვა მწვრთნელის თავკაცობით მუშაობა კი ნამეტანია. არადა, ერთი შეხედვით, სამივე ამ სპეციალისტს გუნდის პროგრესირებაში თავისი დიდი წვლილის შეტანა შეეძლო. სამივე მათგანს არც გამოცდილება აკლია, არც წარსულში მიღწეული კარგი შედეგები (განსაკუთრებით კუპერს, რომელიც „ვალენსიასთან“ ერთად ჩემპიონთა ლიგის ფინალშიც გასულა). რა თქმა უნდა, სამივე მწვრთნელის მუშაობის პერიოდში იყო ერთი მატჩი, რომელშიც გუნდი კარგად გამოიყურება და ძლიერ მეტოქესთან შედეგს აღწევდა, თუმცა, სამწუხაროდ, ეს „ერთი წარმატებული მატჩი“ „ერთ წარმატებულ მატჩად დარჩა“ და სხვა მსგავსი შეხვედრები ნაკრებს კონკრეტულად ერთი მწვრთნელის პერიოდში არ ჩაუტარებია.
2009 წელს თემურ ქეცბაიას მოსვლის შემდეგ გულშემატკივარს მცირე იმედი გაუჩნდა. როგორც აღვნიშნე, პრაქტიკამ აჩვენა, რომ სახელოვანი მწვრთნელის დანიშვნა ნაკრებისთვის საკმარისი არ იყო, შესაბამისად, საპასუხისმგებლო მისიის დაკისრება ადგილობრივი სპეციალისტვისთვის უფრო პრიორიტეტული გახდა, რომელიც როგორც ქვეყანას, ასევე მის მოთამაშეებს კარგად იცნობდა. ასეთ მწვრთნელად, პირველ რიგში, სწორედ თემურ ქეცბაია მოიაზრებოდა. გასაკვირი ამაში არაფერია – ქართველმა სპეციალისტმა საკლუბო დონეზე „ანორთოსისთან“ მართლაც შთამბეჭდავ შედეგს მიაღწია და კვიპროსული გუნდი ჩემპიონთა ლიგის ჯგუფურ ეტაპზე გაიყვანა. ქეცბაიას მოსვლისთანავე გუნდის თამაშში პროგრესი შეინიშნა და რამდენიმემატჩიანი წაუგებელი სერიაც გვქონდა. შესაძლოა, საბედნიეროდ, შეიძლება, პირიქითაც, მაგრამ ხორვატიასთან თბილისური მატჩი გულშემატკივრებს ახლაც ახსოვთ. საბედნიეროდ, იმიტომ, რომ ქეცბაიას გუნდმა 2011 წლის 26 მარტს ევროპის ერთ-ერთი გამორჩეული ნაკრები დაამარცხა, რითაც ქომაგებს კიდევ ერთი იმედის ნაპერწკალი აჩუქა. სამწუხაროდ კი, იმიტომ, რომ იმ მატჩის შემდეგ სიტუაცია რეგრესისკენ შეიცვალა. რამდენიმე დღეში ქართველები ისრაელში ჩავიდნენ, სადაც ანგარიშით 1:0 დამარცხდნენ. ციკლის ბოლოს სიტუაცია კიდევ უფრო გაუარესდა. საქართველო თბილისში ლატვიასთან, მოგვიანებით კი, საბერძნეთთან დამარცხდა. საბოლოოდ, ევროპის 2012 წლის შესარჩევი ეტაპი ქეცბაიას გუნდმა ათი ქულით ბოლოსწინა ადგილზე დაასრულა…
უფრო უარესი 2014 წლის მსოფლიო ჩემპიონატის საკვალიფიკაციო ჯგუფის შედეგი აღმოჩნდა. ხუთგუნდიან ჯგუფში ქართველებმა კვლავ ბოლოსწინა ადგილი დაიკავეს (ამჯერად თავის აქტივში ხუთი ქულა ჩაიწერეს). არადა, ის ეტაპი ასევე კარგად დავიწყეთ. თორნიკე ოქრიაშვილის ბელორუსის ნაკრების კარში გატანილი ჩინებული გოლის წყალობით, „ჯვაროსნებმა“ აქტივში სამი ქულა ჩაიწერეს. სამწუხაროდ, პირველ ტურში გამარჯვება ჩვენთვის ხსენებულ ციკლში ერთადერთი აღმოჩნდა. რა თქმა უნდა, აღსანიშნავია საფრანგეთის ნაკრებთან საშინაო უგოლო ფრე, თუმცა იმ მატჩის შემდეგ რამდენიმე დღეში ჩვენი ნაკრები ფინეთთან მინიმალური ანგარიშით 0:1 დამარცხდა. მანამდე ერთი წლით ადრე, ჰელსინკიში ჩატარებული მატჩი ფრედ, 1:1 დასრულდა. ის შეხვედრა ფინელებმა ათი კაცით დაასრულეს, თანაც, როდესაც მათ ერთი მოთამაშე გამოაკლდათ, საქართველო იგებდა და, შესაბამისად, გოლი კაცნაკლული გუნდისგან გაუშვა. ყველაზე დიდი მარცხი ქეცბაიას მუშაობის პერიოდში 2013 წლის ორ ივნისს დაფიქსირდა, როცა გასვლაზე ირლანდიასთან ამხანაგურ მატჩში ანგარიშით 0:4 დავმარცხდით. ამავდროულად ისიც უნდა აღვნიშნოთ, რომ იმ შეხვედრაში, მეოცე წუთიდან, გიორგი ლორიას გაძევების შემდეგ, საქართველო ათკაციანი შემადგენლობით თამაშობდა.
ასე რომ, თავისი პატარა პლიუსები ქეცბაიას მუშაობის პერიოდსაც ჰქონდა, თუმცა ამ პლიუსებზე გაცილებით მეტი მინუსიც შეინიშნება. დავით მინაშვილთან ერთ-ერთ ბოლო გადაცემაში ქეცბაიამ აღიარა, რომ იყო მატჩი, რომელიც გუნდმა უშუალოდ მისი გადაწყვეტილებების გამო წააგო.
ანალოგიური სიტუაცია, როგორც უკვე ვახსენეთ, ბატონი თემურის წინამორბედების პერიოდშიც იყო. დღევანდელი სიტუაციიდან გამომდინარე, რთულია იმის თქმა, თუ როგორი სპეციალისტი მოუხდება საქართველოს ნაკრებს. ასეთ სიტუაციაში, ალბათ, პრიორიტეტული უფრო ადგილობრივი მწვრთნელის დანიშვნა იქნება, რომელიც ნაკრების შიდა სამზარეულოში, ასე თუ ისე, ჩახედული იქნება. თუმცა, ისიც სათქმელია, რომ მსგავსი სპეციალისტების ნაკლებობას განვიცდით, თანაც, ყველა მათგანი ამ ეტაპზე დასაქმებულია და რთულია იმის თქმა, დათანხმდება თუ არა ამჟამინდელი სამუშაო ადგილის დატოვებას ძნელად შესასწორებელი სიტუაციის სანაცვლოდ…
ამავდროულად, მომგებიანი არც უცხოელი სპეციალისტის დანიშვნა უნდა იყოს, რომელსაც ადაპტაციისთვის, ნაკრების შიდა სამზარეულოს გაცნობისა და შემადგენლობის როტაციისთვის საკმაო პერიოდი დასჭირდება.
საქმე ხომ არამხოლოდ მწვრთნელშია… ნაკრებს მცოდნე სპეციალისტის გარდა, კარგი პირობები, ინფრასტრუქტურა და შეთამაშება სჭირდება…
თემურ ქეცბაიას შესაძლო წასვლით საქართველოს ფეხბურთის ფედერაციას მართლაც ბევრი საფიქრალი ექნება. ვინ უთავკაცებს ნაკრებს მომავალში და როგორი იქნება მისი პერსპექტივა? ამ კითხვაზე პასუხი, შესაძლოა, დღევანდელი მატჩის შემდეგაც კი გავიგოთ…
საქართველოსა და პოლონეთის ნაკრებების მატჩამდე ერთი დღით ადრე ჯვაროსნების დამირგებელმა თემურ ქეცბაიამ მედიის კითხვებს უპასუხა. აღსანიშნავია, რომ პრესის წარმომადგენელთა ნაწილმა პრესკონფერენცია პროტესტის ნიშნად დატოვა, რისი მიზეზიც საქართველოს ნაკრების მთავარი მწვრთნელის მიერ ბოლო დროს გაკეთებული განცხადებები იყო.
თემურ ქეცბაია: “კარგად მოგეხსენებათ, თუ როგორი რთული მატჩი გველის ხვალ. შეკრების დაწყების დღიდან ყველაფერი კარგად მიდის. გუნდში საქმისადმი კარგი დამოკიდებულებაა. სამწუხაროდ, გელაშვილმა ვარჯიშზე ტრავმა მიიღო და გუნდს ვერ დაეხამრება. ნიკა ბოლო თამაშებში ერთ-ერთი საუკეთესო იყო და მისი არყოფნა ჩვენთვის დიდი დანაკლისია. თუმცა, დარწმუნებული ვარ, რომ ბიჭები ხვალ მოსაგებად ყველაფერს გააკეთებენ. ჯგუფში ვითარება ძალიან დაიძაბა და ხვალინდელ შეხვედრაში ჩვენი მთავარი მიზანი გამარჯვების მოპოვება იქნება.
გიბრალტარის მატჩის შემდეგ ჩემი წასვლა უპასუხისმგებლო გადაწყვეტილება იქნებოდა. მე ნათქვამი მქონდა, რომ წაგების ან ფრის შემთხვევაში წავიდოდი, თუმცა ხვალ ნებისმიერი შედეგის შემთხვევაში ჩემთვის უკანაკსნელი მატჩი იქნება საქართველოს ნაკრების მთავარი მწვრთნელის პოსტზე. არ აქვს მნიშვნელობა ჩემს მაგივრად ქართველი სპეციალისტი დაინიშნება თუ უცხოელი. მთავარია, რომ ნაკრებს ძლიერი მწვრთნელი ჩაუდგეს სათავეში. აქ მუშაობის პერიოდში ყოველთვის ბოლომდე ვიხარჯებოდი, თუმცა როგორც აღმოჩნდა, ეს საკმარისი არ ყოფილა. ამიტომ, ახლა სხვა მიმართულებით უნდა წავიდე. ვფიქრობ, რომ ჩემს გადაწვყეტილებას ფეხბურთელები გაგებით მოეკიდებიან და ხვალინდელ თამაშში კარგ საჩუქარს გამიკეთებენ და სანაკრებო მოღვაწეობას პოზიტიურად დავასრულებ.
დღევანდელი პოლონეთის ნაკრები დიდი ხნის განმავლობაში ყალიბდებოდა. მათ საკმაოდ მაღალი დონის საშინაო ჩემპიონატი და კარგი რესურსები აქვთ. ამ გუნდს მოწინავე პოზიციებისთვის ბრძოლის შანსი აქვს.
ჟურნალისტებს საკმაოდ დიდი პასუხისმგებლობა ეკისრებათ. ალბათ, მათ თავიანთ მოვალეობებს ბოლომდე ვერ გაართვეს თავი. კარგია, რომ ერთმანეთის მიმართ გაქვთ სოლიდარობა, ამას მივესალმები. ანალოგიური რამ ქართულ ფეხბურთში რომ არ არის, ესაა მთავარი პრობლემა, რაც დღევანდელ მდგომარეობას განაპირობებს. პიროვნულად, არავისთან არ მაქვს პრობლემა.”
საქართველოს ეროვნლი ნაკრების ყოფილმა ფეხბურთელმა ლევან კობიაშვილი თემურ ქეცბიას ბოლო განცახდებებს ერთ-ერთი სოციალური ქსელის მეშვეობით გამოეხმაურა.
“საქართველოს ეროვნული ნაკრების მთავარი მწვრთნელი რომ იტყვის ქართული ფეხბურთი მოკვდაო, ქართულ ფეხბურთს გაპარტახებულს უწოდებს, თავის ქვეყანას და ქართველ ხალხს ეუბნება აქ სად ჩამომიყვანეთო,იმ წამსვე უნდა დატოვოს ნაკრები და წავიდეს.სხვა შემთხვევაში ფეხბურთის ფედერაცის ხელმძღვანელობამ უნდა მიიღოს გადაწყვეტილება და გაათავისუფლოს. თუ ასე არ მოიქცევა ფეხბურთის ფედერაცის ხელმძღვანელობა, ესეიგი ისინიც იზიარებენ ნაკრების მთავარი მწვრთნელის მოსაზრებას.” – წერს კობიაშვილი.
14 ნოემბერს საქართველოს ნაკრები ევროპის ჩემპიონატის საკვალიფიკაციო ეტაპის ფარგლებში პოლონეთს უმასპინძებს. შესაძლოა, აღნიშნული შეხვედრა საქართველოს ნაკრების მთავარი მწვრთნელის პოსტზე თემურ ქეცბაიასთვის უკანასკნელი აღმოჩნდეს. ჯვაროსნების დამირგებელმა გუშინ გამართულ პრესკონფერენციაზე მატჩის შემდეგ შესაძლო წასვლას ისაუბრა, შემდეგ კი იგივე ტელევიზიის ეთერითაც გაიმეორა, სადაც საკმაოდ ემოციური გამოსვლა ჰქონდა, რაც დღეს განხილვის მთავარ თემად იქცა. აღნიშნულ საკითხთან დაკავშირებით პოზიციის დაფიქსირების საშუალება ჩვენი ვებ-გვერდის მომხმარებლებსაც მივეცით.
ვახო მაქაცარია: „ერთი მწვრთნელი დამისახელეთ მსოფლიოში ვინც ამ საქართველოს ნაკრებით შედეგს დადებს. ფეხბურთელებმა ბურთის მიღება არ იციან, სირბილი არ შეუძლიათ, კარში ვერ ურტყამენ და ამათ ქეცბაია კი არა, ეშმაკიც ვერ უშველით. წადი ქეცაია, წადი ნორმალურ კლუბში და მადლობას მაინც გეტყვიან. წარმატებები თემურს, მაგარი ხარ!“
ოთო ზუკაკიშვილი: „გამიხარდება ქეცბაია თუ წავა. ის ნამდვილად იმსახურებს უკეთეს გუნდს“
დიტო ჯანელიძე: „ქეცბაიას მუშაობას მხოლოდ დადებითად ვაფასებ. მადლობის მეტი არაფერი გვეთქმის ამ კაცზე. უპრობლემოდ იშოვის კარგ გუნდს და ნაკრებიდანაც წავა. არ გვყავს კარგი ფეხბურთელები და ირლანდიასთან და შოტლანდიასთან რო წააგო მას ბრალდება. სასაცილოა.“
ლევანი დემეტრაძე: „პირდაპირი და ემოციური ადამიანია, თუმცა არაფერს ამბობს გაუგებარს. დღეს საქარტველოს ნაკრებს არაფერი არ ეშველება. ეს არის ჩვენი მაქსიმუმი და ქეცბაია კი არ აფერგიუსონი და ანჩელოტი ერთად რო ჩამოიყვანონ შედეგი იგივე იქნება“
დათო გორელაშვილი: „ყველა ნაკრების მწვრთნელობა ძალიან ძნელია და ამიტომ ბევრი არ თანმხდება. დარწმუნებული ვარ ნებისმიერ ჩემპიონტში თუ ლიგაში ქეცბაიან ძალიან კარგი შედეგები ექნება. მაგრამ, ისმის კითხვა, რატომ დათანხმდა ამ სამსახურს? „მეგონა ფეხბურთელები თავიანთ გუნდებში სტაბილურად ითამაშებენო“ – პასუხად ვერ გამოდგებოდა.
საბა საბანაძე: „საქართველოში ვერც ერთი მწვრთნელი ვერ გამოავლენს იმას თუ რა შეუძლია, რადგან იმისთვის რომ რაიმე გააკეთო მასალა უნდა გქონდეს და როცა ყენია, ანანიძე, ოქრიაშილი დუბლებში არიან თარგამაძე 24 საათი ფეისბუქზე, მჭედლიძე მუდამ სკამზე და კიდე ბევრი უბედურებაა და ერთეულები თუ არიან ძირითადში რა ამის ბრალია”
მიხეილ გვასალია: „უნდა წავიდეს ეს კაცი და საკუთარი დაცვით მენტალიტეტი სხვა გუნდს მოახმაროს. არ გვჩვევია ქართველებს დაცვითი თამაში. არ არის ეს ჩვენს გენეტიკაში. და კიდევ, ძალიან უზრდელი და უტიფარი პიროვნება არის. როგორ მოთამაშე განუმეორებელი იყო და მისნაირები სანთლით საძებნი იყო, მაგრამ როგორ მწვრთნელი…”
საქართველოს ნაკრების მთავარმა მწვრთნელმა თემურ ქეცბაიამ “დინამო არენაზე” გამართული პრესკონფერენციის დროს განაცხადა, რომ პოლონეთთან გასამართ უახლოეს შეხვედრაში მარცხის შემთხვევაში დაკავებულ თანამდებობას დატოვებდა.
მოგვიანებით კი, საზოგადოებრივ მაუწყებელს ესტუმრა, სადაც გადაცემა “არენაში” განაცხადა, რომ ნაკრებიდან პოლონელებთან მოგების შემთხვევაშიც კი სიამოვნებით დატოვებდა.
“კვიპროსში ყველაფერი დავტოვე და საქართველოში ჩამოვედი. თუმცა, როგორ მომექცა ქვეყანა? ჩამომიყვანეს სახელმწიფო პროგრამით ახლა კი ერთადერთი მწვრთნელი ვარ ვისზეც უარი თქვეს და აღარ უხდიან.
დაკავებულ თანამდებობას პოლონეთთან წაგების და ფრის შემთხვევაშიც დავტოვებ და ამას აქ საჯაროდ ვადასტურებ. ეგ კი არა მოგების შემთხვევაშიც დიდი სიამოვნებით წავალ. ოღონთ თქვენ გააკეთეთ რამე ფეხბურთისთვის და საქართველოსკენ საერთოდ აღარ გამოვიხედავ” – ამბობს ქეცბაია.
ბერძნული “ოფის” ქართველი შემტევი გიორგი მერებაშვილი სოციალურ ქსელ Facebook-ში საინტერესო პოსტს აქვეყნებს. 28 წლის ფეხბურთელი წერს, რომ მას ნაკრებში შანსი არასოდეს მისცემია.
14 ნოემბერს, საქართველოს ეროვნული ნაკრები პოლონეთის ნაკრებს დაუპირისპირდება. დღეს ცნობილი გახდა იმ ფეხბურთელთა გვარები, რომლებიც თემურ ქეცბაიამ მომდევნო მატჩისთვის გამოიძახა. ნაკრებში გამოძახებულებს შორის ვერ მოხვდა გიორგი მერებაშვილი, რომელმაც საბერძნეთის ჩემპიონატში ჩატარებულ ბოლო სამ მატჩში ორი გოლის გატანა მოახერხა.
“ერთ რამეს ვიტყვი და ძალიან გთხოვთ, რომ ზედმეტი კითხვებისგან აღარ შემაწუხოთ. ნებისმიერ ადამიანს სადაც უნდა იქ დავუჯდები და დაველაპარაკები. ნაკრებში შანსი არასოდეს მომცემია და ყველგან დავწერ, ამოვიდა უკვე ყელში. თქვენ თუ შანსს ბოლო 15-25 წუთს ეძახით და ისიც იმ ადგილას თამაშს, სადაც ყველაზე ცუდად გამომდის, ესეიგი შანსი მართლაც ვერ გამომიყენებია”, – წერს მერებაშვილი.
შეგახსენებთ, რომ მერებაშვილმა ბოლოს საქართველოს ეროვნულ ნაკრებში 2011 წლის 9 თებერვალს, სომხეთის ნაკრების წინააღმდეგ გამართულ მატჩში ითამაშა. თბილისის “დინამოს” ყოფილი ფეხბურთელი მოედანზე 50-ე წუთზე გამოჩნდა.
ევროპის 2016 წლის ჩემპონატის საკვალიფიკაციო ეტაპზე საქართველოს ეროვნულმა გუნდმა მესამე ტურის შეხვედრა სამხრეთ პორტუგალიაში ჩაატარა, სადაც გიბრალტარის ნაკრებს დაუპირისპირდა და მეტოქე ანგარიშით 3:0 დაამარცხა.
მატჩის შემდეგ “ჯვაროსნების” მთავარი მწვრთნელი უკმაყოფილო იყო იმით, რომ მისმა გუნდმა მეტი გოლი ვერ გაიტანა.
“გავიმარჯვეთ, თუმცა ჩემი გუნდის მოქმედებებით კმაყოფილი არ ვარ. პირველ ნახევარ საათში კარგად ვითამაშეთ. გასახდელში ფეხბურთელებს ვუთხარი, რომ მხოლოდ 30 წუთით კი არა, 95 წუთის განმავლობაში უნდა გვეთამაშა. მეტი უნდა გაგვეტანა, რადგან ჯერ კიდევ არ ვიცით, როგორ გადანაწილდება ამ ჯგუფში ადგილები.
გიბრალტარის ნაკრების პატივისცემის მიუხედავად, შესაძლოა, ბურთებს შორის სხვაობამ ჯგუფში ბევრი რამ გადაწყვიტოს. ვფქრობ, ჩემი ფეხბურთელები მატჩს არასწორად მიუდგნენ. ასეთ მეტოქეს მაქსიმალურად ბევრი გოლი უნდა გაუტანო. სამი ქულა ავიღეთ, რაც ჩვენი მთავარ მიზანი იყო. გიბრალტარისა და პოლონეთის ნაკრებებს შორის გამართულ მატჩს ვუყურე და ვფიქრობ, გიბრალტარელებმა დღეს უკეთ ითამაშეს.
მომდევნო შეხვედრას პოლონეთის ნაკრების წინააღმდეგ გავმართავთ და გვინდა, დადებით შედეგს მივაღწიოთ. თუ გუნდი მოედანზე ისეთივე განწყობით გავა, როგორიც შოტლანდიის ნაკრების წინააღმდეგ გამართულ მატჩში ჰქონდა, კარგ შედეგს ვაჩვენებთ. ტექნიკური თვალსაზრისით ძალიან კარგი ფეხბურთელები მყავს, თუმცა ფსიქოლოგიური კუთხთ სამუშაო გვაქვს”, – განაცხადა ქეცბაიამ.
საქართველოს ეროვნული გუნდი მომდევნო შეხვედრას 14 ნოემბერს, თბილისში, პოლონეთის ნაკრების წინააღმდეგ გამართავს.
ევროპის 2016 წლის ჩემპიონატის საკვალიფიკაციო ეტაპის მესამე მატჩს საქართველოს ეროვნულ გუნდი სამხრეთ პორტუგალიაში ჩაატარებს, სადაც ჯგუფის გამოკვეთილ აუტსაიდერ გიბრალტარის ნაკრებს დაუპრისპირდება. ყველა ფეხბურთელი, რომელიც თემურ ქეცბაიამ ამ შეხვედრისთვის გამოიძახა ჯანმრთელადაა. ქეცბაიამ და ნაკრების დებიუტანტმა ლაშა დვალმა მედიის წარმომადგენელთა შეკითხვებს უპასუხეს.
“გიბრალტართან აუცილებლად მოსაგები თამაშია და ეს ყველამ კარგად იცის, – ციტირებს ქეცბაიას სიტყვებს ფეხბურთის ფედერაციის ოფიციალური ვებგვერდი. – სამწუხარო ის არის, რომ უშუალო კონკურენტებთან ირლანდიასთან და შოტლანდიასთან ქულების აღება ვერ მოვახერხეთ და მინიმალური სხვაობით დავმარცხდით. თქვენს შეკითხვას, რა სხვაობით შეიძლება მოიგოს საქართველოს ნაკრებმა, რთულია – ვუპასუხო წინასწარ, ეს ყველაფერი თამაშის მიმდინარეობის დროს გამოჩნდება. ყველამ იცის, რომ ეს მატჩი წარმატებით უნდა დავასრულოთ და ამ შეხვედრიდან დაიწყოს მოგებები”.
ლაშა დვალი: “მადლობა მინდა გადავუხადო სამწვრთნელო შტაბს, ნდობისთვის და ნაკრებში გამოძახებისთვის. ჩემი ასაკის ფეხბურთელებისთვის უდიდესი სტიმულია ეროვნულ გუნდში მოხვედრა. სამწუხაროდ ორი თამაში წაგებული გვაქვს, გიბრალტართან კი აუცილებლად უნდა მოვიგოთ ამას ელოდება მთელი გუნდი და ყველა გულშემატკივარი”.
გიბრალტარისა და საქართველოს ნაკრებებს შორის გასამართი მატჩი დღეს, თბილისის დროით 22:45 წუთზე დაიწყება, შეხვედრის პირდაპირ რეპორტაჟს საზოგადოებრივი მაუწყებლის პირველი არხი შემოგთავაზებთ. მატჩს 32 წლის ავსტრიელი არბიტრი ჰარალდ ლეხნერი მოემსახურება.
საქართველოს ეროვნული საფეხბურთო ნაკრები სეზონის მეორე ოფიციალური მატჩისთვის გლაზგოში ემზადება. გუნდს ტრავმის გამო “ემპოლის” ფორვარდი ლევან მჭედლიძე და “ვიტესის” მცველი გურამ კაშია გამოაკლდნენ.
საკადრო პრობლემების შესახებ “ჯვაროსნების” მთავარმა მწვრთნელმა თემურ ქეცბაიამ ისაუბრა.
“ცვლილებები ყოველთვის ხდება, ეს პირველი შემთხვევა არ არის, ჩვენ ამისთვის მზად ვიყავით. სამწუხაროა, რომ ფეხბურთელები ტრავმირებულები არიან და ტრავმის გამო ვერც სანაკრებო მატჩში იღებენ მონაწილეობას და ვერც კლუბებში თამაშობენ. ეს პირველი შემთხვევა არ არის, ფეხბურთში ნორმალური მოვლენაა. აქ მყოფი ბიჭები სერიოზულად ემზადებიან. ძნელი თამაში მოგვიწევს, ადვილი მატჩი არც არავისთან გვქონია და ვეცდებით, ყველაფერი გავაკეთოთ იმისთვის, რომ კარგი შედეგით დავამთავროთ ეს შეხვედრა”, – აღნიშნა ქეცბაიამ.
შეგახსენებთ, რომ შოტლანდიისა და საქართველოს ნაკრებებს შორის გასამართი მატჩი შაბათს, თბილისის დროით 20:00 საათზე დაიწყება და მას მიროსლავ ზელინკას ხელმძღვანელობით ჩეხ მსაჯთა ბრიგადა მოემსახურება. შეხვედრის პირდაპირ რეპორტაჟს საზოგადოებრივი მაუწყებლის პირველი არხი შემოგთავაზებთ.
ზურაბ ხიზანიშვილმა გასული წლის სექტემბრის თვეში საქართველოს ნაკრები თემურ ქეცბაიასთან კონფლიქტის გამო დატოვა, თუმცა ფეხბურთელი არ გამორიცხავს, რომ ეროვნულ გუნდში კვლავ დაბრუნდეს. ხიზანიშვილს საქართველოს ნაკრებში 93 მატჩი აქვს ჩატარებული და ოცნებობს, რომ 100 შეხვედრამდე ავიდეს.
“მე მწვრთნელს განვუდექი და არა ქვეყანას. ვრჩები ჩემი ქვეყნის ერთგულად და სანამ ვთამაშობ, მანამდე არ წავალ. ვოცნებობ, რომ ნაკრებში 100 ჩატარებულ მატჩს მივაღწიო”, – ციტირებს ხიზანიშვილის სიტყვებს futbolgrad-ი.
შეგახსენებთ, რომ 33 წლის მცველი სამშობლოში დაბრუნდა და ახლა “დინამო თბილისის” ღირსებას იცავს.
ზურაბ ხიზანიშვილმა ქეცბაიას შესახებაც ისაუბრა:
“ის გენერალია, თუმცა ჯარის გარეშე ეს არაფერს ნიშნავს. ნაკრები ბევრმა ფეხბურთელმა დატოვა იმიტომ, რომ ქეცბაია ღიად აკრიტიკებდა მათ. ჩვენ ხორვატიის ეროვნული გუნდი დავამარცხეთ და რამდენიმე თვის შემდეგ მწვრთნელი ამბობს, რომ მესი არ გვყავს და ვინც გვყავს, ისინი ცუდი მოთამაშეები არიან”.
ინგლისური “ნიუკასლ იუნაიტედი” უმძიმეს მდგომარეობაშია. გუნდმა პრემიერლიგის მიმდინარე გათამაშების 5 მატჩიდან 2 მარცხით დაასრულა, 3 შეხვედრაში კი ფრედ ითამაშა და ახლა სატურნრო ცხრილის ბოლო ადგილი აქვს დაკავებული. კლუბის ფანები ასეთი მდგომარეობით აღშფოთებულნი არიან და მთავარი მწვრთნელის პოსტიდან ალან პარდიუს გათავისუფლებას მოითხოვენ. “Pardew out” – კამპანია ამ სახელწოდებით ქომაგებს უკვე დიდი ხანია, აგორებული აქვთ. ფანები აღნიშნული მოთხოვნით ონლაინ პეტიციასაც აგროვებენ. ინგლისურ პრესაში სულ უფრო აქტურად წერენ, რომ მალე პარდიუ “ნიუკასლის” თავკაცის პოსტს გამოეთხოვება. მის სავარაუდო შემცვლელებსაც ასახელებენ. კლუბის ფანების ნაწილს მთავარი მწვრთნელის თანამდებობაზე თემურ ქეცბაიას დანიშვნა სურს. ქეცბაია “კაჭკაჭთა” ღირსებას 1997-დან 2000 წლამდე იცავდა და ქომაგები ფიქრობენ, რომ ქართველს მისთვის უკვე ნაცნობ გარემოში მდგომარეობის გამოსწორება შეუძლია. ჩვენ დავუკავშირდით “ნიუკასლ იუნაიტედის” რამდენიმე ფანს, რომელთაც კლუბის თავკაცის პოსტზე ქეცბაიას ხილვა სურთ და მის შესახებ ვკითხეთ.
“ვფქრობ, ის გუნდს სულისკვეთებას დაუბრუნებდა, შიდა სამზარეულოში მდგომარეობას გამოასწორებდა. ქეცბაია “ნიუკასლ იუნაიტედს” იცნობს და ფანებსაც მისი დაბრუნების სურვილი გვაქვს”, – ამბობს სტივენ კერნსი.
— ქეცბაიას საქართველოს ნაკრებში არცთუ ისე კარგი შედეგები აქვს. თქვენ ფიქრობთ, რომ ის “ნიუკასლს” გამოადგება?
— მგონია, რომ ის ახალი იდეებით მოვიდოდა. საქართველოს ნაკრების მიმართ უპატივცემულობის გამოხატვა არ მინდა, მაგრამ ქეცბაია “ნიუკასლში” უკეთეს ფეხბურთელებთან ერთად იმუშავებდა. ის ალან პარდიუს აჯობებდა.
— რა გახსოვთ ქეცბაიას ინგლისური კარიერიდან მისი ცნობილი აღნიშვნის გარდა?
— ქეცბაია კარგი ფეხბურთელი იყო. როცა ათამაშებდნენ, თავის წილ გოლებს იტანდა. წუხდა, რომ ბობი რობსონი საკმარის სათამაშო დროს არ აძლევდა.
“ნიუკასლ იუნაიტედის” კიდევ ერთი ფანი ლაურა გოდფრი თემურ ქეცბაიას გულმხურვალე მხარდაჭერი გამოდგა:
“თქვენ, როგორც ჩანს, გიკვირთ, რომ ხალხს გუნდის თავკაცად ქეცბაიას ხილვა სურს. როგორც მახსოვს, მან გაიყვანა კვიპროსული კლუბი პირველად ჩემპიონთა ლიგაზე. იგივე გააკეთა “ოლიმპიაკოსის” თავკაცობის პერიოდში. ასე რომ, ხალხს მხოლოდ მისი სიფიცხე კი არა, მისი საფეხბურთო კარიერაც ახსოვს. საქართველოს ნაკრები ქვეჯგუფს ყოველთვის ბოლო ადგილზე ასრულებდა ხოლმე, ახლა კი პროგრესი შეინიშნება”.
ჯეიმს გოულენდი “ნიუკასლის” კიდევ ერთი ქომაგია, რომელსაც კლუბის მთავარი მწვრთნელის პოსტზე თემურ ქეცბაიას დანიშვნა სურს:
“ნიუკასლის” თავკაცის თანამდებობაზე ჩემი არჩევანი ქეცბაიაა. მას წარმატებული სამწვრთნელო კარიერა აქვს”.
— მაგრამ მას საქართველოს ნაკრებში არცთუ კარგი შედეგები აქვს…
— რა? მან მძიმე მდგომარეობაში მყოფ საქართველოს ნაკრებში დიდი სამუშაო გასწია.
თემურ ქეცბაია საქართველოს ნაკრების დატოვებაზე ფიქრობს და ვინ იცის, ეგებ პარდიუს შემცვლელად სწორედ მას დაუძახონ.
