“კალიარის” მთავარი მწვრთნელის პოსტზე ვალტერ მაცარი დაინიშნა. მხარეებს შორის გაფორმებულ შრომით ხელშეკრულებას ძალა 2024 წლის 30 ივნისის ჩათვლით ექნება.
“კალიარის” მანამდე ლეონარდო სემპლიჩი თავკაცობდა, რომელიც დაკავებული პოსტიდან 14 სექტემებრს გაათავისუფლეს. გუნდს იტალიის სერია A-ს სამი ტურის თავზე აქტივში მხოლოდ ერთი ქულა აქვს და სატურნირო ცხრილში მე-17 ადგილი უკავია.
ვალტერ მაცარი ბოლოს “ტორინოში” მუშაობდა, რომელთანაც კონტრაქტი ურთიერთშეთანხმების საფუძველზე 2020 წლის თებერვალში გაწყვიტა.
იტალიის სერია A-ს II ტურში მილანის “ინტერმა” “სასუოლო” ანგარიშით 7:0 გაანადგურა.
“ნერიაძურის” მთავარი მწვრთნელი ვალტერ მაცარი კმაყოფილი დარჩა არამხოლოდ მატჩის საბოლოო შედეგით, არამედ თამაშის ხარისხითაც.
“გასული სეზონიც ასეთივე სტილში დავასრულეთ, თუმცა მას შემდეგ გუნდი ცოტაოდენ შეიცვალა.
ფლანგის ნახევარმცველებს ვუთხარი, რომ სწრაფად და აგრესიულად ემოქმედათ.
სწორედ ასეთი ფეხბურთი მომწონს. ვთვლი, რომ იდეალური ფეხბურთი ასეთ სტილში და ტემპში თამაშით მიიღწევა”, – ციტირებს მაცარის სიტყვებს Goal.com-ი.
იტალიის სერია A-ს სატურნირო ცხრილის სანახავად გადადით ბმულზე: http://fanebi.com/cxrilebi/
მილანის „ინტერის“ მთავარ მწვრთნელ ვალტერ მაცარის ანტონიო კონტეს ირგვლის შექმნილ სიტუაციაზე კომენტარის გაკეთება სთხოვეს, თუმცა „ნერიაძურის“ თავკაცმა აღნიშნულ თემაზე საუბარი არ ისურვა. იქვე ისიც დაამატა, რომ სანაკრებო დონეზე მუშაობა არ სურს.
„ფეხბურთში ყველაფერი ხდება. თითოეული ჩვენგანი რაღაც არჩევანს აკეთებს. არ მაინტერესებს, რა ხდება სხვა კლუბებში და არც კონტეს ირგვლივ შექმნილ სიტუაციაზე მინდა კომენტარის გაკეთება.
ვისურვებდი თუ არა ნაკრებში მუშაობას? ეროვნული ნაკრების მწვრთნელის რანგში საკუთარ თავს ვერ ვხედავ. მიყვარს, როდესაც ზეწოლას ვგრძნობ. მე ჩემს ფეხბურთელებთან ყოველდღიური მუშაობა უფრო მიზიდავს“, – განაცხადა მაცარიმ.
მილანის „ინტერის“ მთავარი მწვრთნელი ვალტერ მაცარი თვლის, რომ მისი გუნდი მიმდინარე სეზონში უკეთ გამოიყურება, ვიდრე – გასულ სეზონში.
„პროგრესის ნიშნებს ვხედავ. ტაქტიკა და გუნდური მუშაობა გაუმჯობესდა. ყველაფერს გავაკეთებ, რომ კლუბმა შესაძლებლობის ფარგლებში სეზონი მაღალ პოზიციაზე დაასრულოს. სეზონის საბოლოო შედეგის ხილვის შემდეგ უფრო ადვილი იქნება სამომავლო გეგმების დასახვა.
ვისაც გუნდში დარჩენა სურს, გარკვეული მოთხოვნები უნდა დააკმაყოფილოს. ჩვენ ყველაფერს განვსაზღვრავთ. მაღალ დონეზე დასარჩენად მუდმივი კონცენტრაცია არის საჭირო. ეს ადვილი საქმე არ გეგონოთ, რამდენიმე ფეხბურთელი ამისთვის მზად არ არის“, – მაცარის სიტყვებს Goal.com-ი ციტირებს.
ბექა დოგრაშვილი
გუშინ, ტურინის „იუვენტუსთან“ უშანსოდ დამარცხების შემდეგ (1:3), მილანის „ინტერის“ მთავარი მწვრთნელის, ვალტერ მაცარის პოზიციები მნიშვნელოვნად შეირყა.
„ნერიაძურის“ მიმდინარე წელს გამარჯვება ჯერ არ მოუპოვებია, უმეტესი შეხვედრები კი მისი დამარცხებით დასრულდა. მილანური გუნდი იტალიის თასის გათამაშებიდანაც გამოვარდა. „ინტერს“ აქტივში 33 ქულა აქვს და სატურნირო ცხრილში მე-6 პოზიციაზე დაეშვა.
„სპორტ მედიასეტისა“ და „კალჩო მერკატოს“ მიერ გავრცელებული ინფორმაციის თანახმად, თუ „ნერიაძური“ უახლოეს ორ მატჩში დადებით შედეგს ვერ მიაღწევს, მაცარის მთავარი მწვრთნელის პოსტიდან გაათავისუფლებენ.
„ინტერი“ 9 თებერვალს მაჩანჩალა „სასუოლოს“ მიიღებს, 15 თებერვალს კი „ფიორენტინას“ ესტუმრება.
ბექა დოგრაშვილი
იტალიის სერია A-ს XXII ტურის ცენტრალური მატჩი ტურნიში შედგა, სადაც ადგილობრივმა „იუვენტუსმა“ მილანის „ინტერი“ მიიღო და მეტოქე ანგარიშით 3:1 დაამარცხა
ვნებათაღელვა მატჩამდე კარგა ხნითა დრე დაიწყო. სტადიონის მიმართულებით მიმავალი „ინტერის“ ავტობუსს გზაზე „ბებერი ქალბატონის“ ტიფოზები ხვდებოდნენ და სხვადასხვა საგნებს ესროდნენ. ამის გამო, არ არის გამორიცხული, „ბიანკონერი“ დასაჯონ კიდეც. რაც შეეხება უშუალოდ შეხვედრას, თამაში მაღალ ტემპში დაიწყო და მასპინძლებს პირველივე წუთზე ჰქონდათ დაწინაურების შანსი, თუმცა კარლოს ტევესს სტუმართა კიპერმა სამირ ჰანდანოვიჩმა ახლო მანძილიდან ორჯერ აუღო. მე-16 წუთზე ტურინელებმა მაინც გაიტანეს: ანდრეა პირლომ საჯარიმოში გენიალური პასი გაუკეთა უყურადღებოდ დარჩენილ სტეფან ლიხტშტაინერს და ამ უკანასკნელმაც ახლო მანძილიდან თავური დარტყმით ჰანდანოვიჩის კარის ბადე პირველად შეარხია — 1:0. ვერ ვიტყვით, რომ გაშვებული გოლის შემდეგ „ინტერი“ უპირატესობას დაეუფლა, პირიქით – „იუვენტუსის“ შეტევები უფრო მწვავედ გამოიყურებოდა. პირველი ტაიმის დასრულებამდე 5 წუთით ადრე „ინტერმა“ კარგი კონტრიერიში მოაწყო, როდესაც „იუვენტუსის“ ორი ფეხბურთელი სტუმართა გუნდის სამი მოთამაშის წინააღმდეგ აღმოჩნდა, თუმცა მეკარესთან ფაქტობრივად ერთი ერთზე გასულმა როდრიგო პალასიომ ბურთი კარს ააცილა. მატჩის პირველი ნახევარი „ბებერმა ქალბატონმა“ მინიმალური უპირატესობით მოიგო.
მეორე ტაიმი კვლავ „იუვენტუსის“ აქტურობით დაიწყო და ამან შედეგი დებიუტშივე გამოიღო: ამჯერად გოლი კუთხურს მოჰყვა, რომლის მოწოდების შემდეგაც მილანელებმა სიტუაციის განმუხტვა ვერ მოახერხეს და შეტევაში წასულმა ჯორჯო კიელინიმ ახლო მანძილიდან ჰანდანოვიჩი მეორედ დაამწუხრა. სათქმელია, რომ დისკვალიფიცირებული ჯანლუიჯი ბუფონის არყოფნაში კაპიტნის სამკლავური სწორედ კიელინის ჰქონდა მორგებული.
56-ე წუთზე არტურო ვიდალის ჯერი დადგა. „ინტერის“ დაცვა ჩავარდა. მართალია, ახლო მანძილიდან პოლ პოგბას დარტყმული ჰანდანოვიჩმა მოიგერია, მაგრამ ვიდალის დამატებაზე სლოვენიელმა მეკარემ რეაგირება ვეღარ მოახერხა და ანგარიში გამანადგურებელი გახდა — 3:0.
71-ე წუთზე „ინტერმა“ პრესტიჟის გოლის გატანა მოახერხა. გოლიც ამჯერადაც კუთხურს მოჰყვა, რის შემდეგაც ტურინელთა საჯარიმოში შექმნილი არეულობით როლანდომ ისარგებლა და ერთი ბურთი გაქვითა.
საბოლოო ჯამში, „იუვენტუსმა“ „ინტერი“ ანგარიშით 3:1 დაამარცხა და ლიდერობა განიმტკიცა. „ბებერ ქალბატონს“ აქტივში 59 ქულა აქვს და მთელი 9 ქულით უსწრებს მადევარ „რომას“, რომლის შეხვედრაც „პარმასთან“ ძლიერი წვიმის გამო გადაიდო. მეექვსეადგილოსან „ინტერს“ 33 ქულა დარჩა.
იტალიის სერია A
22-ე ტური
„იუვენტუსი“—„ინტერი“ 3:1 (1:0)
„იუვენტუსი“: სტორარი, ბარძალი (კასერესი 63′), ლიხტშტაინერი (ისლა 82′), ბონუჩი, კიელინი, პირლო, ვიდალი, ასამოა, პოგბა, ტევესი, ლორენტე (ვუჩინიჩი 86′).
მთავარი მწვრთნელი: ანტონიო კონტე.
„ინტერი“: ჰანდანოვიჩი, ჟონათანი (დამბროზიო 58′), როლანდო, კამპანიარო, ნაგატომო, ჟუანი, კუზმანოვიჩი (მილიტო 55′), ალვარესი, ტაიდერი, კოვაჩიჩი (ბოტა 66′), პალასიო.
მთავარი მწვრთნელი: ვალტერ მაცარი.
გოლები: ლიხტშტაინერი 16′, კიელინი 47′, ვიდალი 56′ — როლანდო 71′.
გაფრთხილებები: პოგბა 59′ — კუზმანოვიჩი 13′, ალვარესი 73′.
მთავარი მსაჯი: ჯანლუკა როკი.
ბექა დოგრაშვილი
მილანის „ინტერის“ კაპიტანი ხავიერ ძანეტი მიიჩნევს, რომ კლუბის ამჟამინდელი მთავარი მწვრთნელი ვალტერ მაცარი საქმის მიმართ დამოკიდებულებით ექტორ რაულ კუპერს ჰგავს, რომელიც „ნერიაძურის“ 2001/03 წლებში თავკაცობდა.
„ჯერ ნაადრევია ჩვენი გამოსვლის შეფასება. ამას სეზონის ბოლოს გავაკეთებთ. საინტერესო სეზონი უნდა გამოვიდეს, რადგან ყველა წამყვანი კლუბი გაძლიერდა. სერიოზული კონკურენცია გაჩაღდება. ვიმედოვნებ, რომ გამარჯვებულები ჩვენ გავხდებით. რაც შეეხება მაცარის, მან ჩემზე შთაბეჭდილება ჩვენი შეხვედრის პირველივე დღეს მოახდინა. მას შესანიშნავად ესმის, რასაც აკეთებს. მე მომწონს მისი მსოფლმხედველობა. ის ბევრს ფიქრობს სამუშაოზე და ქმნის გუნდს, რომელსაც გამარჯვება შეეძლება. საქმის მიმართ დამოკიდებულებით ის ექტორ კუპერს მაგონებს“, – ციტირებს ხავიერ ძანეტის სიტყვებს Football Italia.
შეგახსენებთ, რომ კუპერის თავკაცობით „ინტერმა“ ვერაფერი ვერ მოიგო.
ბექა დოგრაშვილი
იტალიის სერია A-ს მესამე ტურის ცენტრალური მატჩი მილანში გაიმართა, სადაც ადგილობრივმა „ინტერმა“ ტურინის „იუვენტუსი“ მიიღო. შეხვედრა არცთუ ისე მაღალ ტემპში დაიწყო, გუნდები განსაკუთრებულ აქცენტს დაცვაში სწორ თამაშზე აკეთებდნენ. პირველი სახიფათო ეპიზოდი მატჩის მე-13 წუთზე შეიქმნა. მილანელ ფეხბურთელთა მიერ კუთხურის ჩამოწოდების შემდეგ ტურინელებმა საკუთარი საჯარიმო მოედნიდან ბურთი ხეირიანად ვერ გამოიტანეს და იუტო ნაგატომოს ეფექტურად დარტყმის შესაძლებლობა მიეცა, ჯანლუიჯი ბუფონმა დარტყმულზე რეაგირება მოასწრო და ბურთი მოიგერია.
გუნდები დაცვაში განსაკუთრებული სიფრთხილით მოქმედებდნენ. ერთმანეთის მიმართ მჭიდროდ თამაშობდნენ და თავისუფალ ზონებს მაქსიმალურად ზღუდავდნენ. სწორედ ამის გამო იყო ის, რომ ფეხბურთელები გადაცემების გაკეთებისას ხშირად სცოდავდნენ. შეხვედრის პირველ 45 წუთში გუნდები შეტევაზე დიდი ძალებით არ გადასულან.
პირველ ტაიმში სახიფათო მომენტი „ხნიერმა ქალბატონმაც“ შექმნა. ანდრეა პირლომ მეტოქის საჯარიმოში მდგარი პოლ პოგბა შენიშნა და რბილი გადაცემაც გაუკეთა, თუმცა მეკარესთან ახლო მანძილზე მყოფ ფრანგ ფეხბურთელს დარტყმა ძლიერი არ გამოუვიდა, თანაც ბურთი პირდაპირ სამირ ჰანდანოვიჩის მიმართულებით წავიდა და ეს შანსიც დაიკარგა.
მთელი ტაიმის განმავლობაში გუნდების მთავარი მწვრთნელები ფეხზე იდგნენ და ფეხბურთელებს აქტიურად აძლევდნენ მითითებებს.
ტაიმის ბოლოს „ინტერს“ კიდევ ერთი შანსი მიეცა. სწრაფი კონტრშეტევის დაგვირგვინებას მახვილი კუთხიდან საფირ სლიტი ტაიდერი ცდილობდა, თუმცა ბუფონი ამჯერადაც მოწოდების სიმაღლეზე აღმოჩნდა და ბურთი კუთხურზე მოიგერია.
შეხვედრის პირველი ტაიმი უშედეგოდ დასრულდა.
მატჩის მეორე ნახევარი გუნდებმა შედარებით მაღალ ტემპში განვლეს.
მასპინძელთა მხრიდან ერთი-ერთი ყველაზე აქტიური როდრიგო პალასიო იყო, რომელიც ერთ მომენტში ტურინელმა მცველებმა საჯარიმო მოედანზე სრულიად უყურადღებოდ დატოვეს, ეს შენიშნა ესტებან კამბიასომ და თანაგუნდელს ჩაუწოდა, „ინტერის“ არგენტინელი თავდამსხმელის თავური დარტყმის შემდეგ ბურთი ჯიჯი ბუფონს მიუვიდა.
ტაიმის მიმდინარეობისას შეტევაში გართულ „ინტერს“ „იუვენტუსმა“ სწრაფი კონტრშეტევით უპასუხა. შეტევის მარჯვენა ფლანგი კარლოს ტევესმა უპრობლემოდ გაიარა, ცენტრში გადაინაცვლა და მეტოქის საჯარიმო მოედანზე უყურადღებოდ მყოფი არტურო ვიდალი მოძებნა, ამ უკანასკნელმა შანსი ვერ გამოიყენა – ჯერ ბურთის დაუფლება გაუჭირდა, შემდეგ კი სუსტად და არაზუსტად დაარტყა.
თანდათან ტერიტორიულ უპირატესობას მილანური კლუბი დაეუფლა, წინ შედარებით გაძლიერებული შემადგენლობით წავიდა, რაც „იუვენტუსს“ სწრაფი კონტრშეტევების წამოწყების საშუალებას აძლევდა.
„ნერიაძურის“ მთავარმა მწვრთნელმა ვალტერ მაცარიმ მოედანზე მაურო იკარდი შეუშვა და აღმოჩნდა, რომ ამ ცვლილებამ გაამართლა.
73-ე წუთზე მოედნის ცენტრალურ ხაზთან მყოფ ჯორჯო კიელინის ბურთი რიკარდო ალვარესმა აართვა, რომელმაც მეტოქის საჯარიმოში შესული იკარდი მოძებნა და თანაგუნდელი მეკარესთან ფაქტობრივად ერთი-ერთზე გაიყვანა. არგენტინელმა თავდამსხმელმა „ინტერი“ წინ გაიყვანა – 1:0.
„იუვენტუსმა“ მილანურ კლუბს სიხარული მხოლოდ ორი წუთით აცალა. ტურინელთა შეტევის მარცხენა ფლანგიდან კვადვო ასამოამ თავგზა აუბნია ჟონათანს და საჯარიმო მოედანზე ხელსაყრელ პოზიციაზე მყოფ ვიდსალს გადააწოდა ბურთი, ჩილელმა ფეხბურთელმა ერთი შეხებით ბურთი გაისწორა, მეორე შეხებით კი დაარტყა და მეკარისგან მარცხენა დაბალ კუთხეში გაახვია.
დარჩენილ 15 წუთში „იუვენტუსმა“ „ინტერს“ საკუთარი თამაში მოახვია და თავს და მატჩი ლოგიკურ დასასრულამდე მიიყვანა – 1:1.
ამრიგად, ტურის პირველი და ცენტრალური შეხვედრა ფრედ დასრულდა, გუნდემა 7-7 ქულა მოაგროვეს და სატურნირო ცხრილის პირველ-მეორე პოზიციებს იყოფენ, თუმცა დარჩენილი მატჩები ჯერ არ გამართულა. ასე რომ, ცხრილში მდგომარეობა, სავარაუდოდ, უნდა შეიცვალოს.
იტალიის სერია A
მე-3 ტური
„ინტერი“-„იუვენტუსი“ 1:1 (0:0)
„ინტერი“: ჰანდანოვიჩი, ჟონათანი, კამპანიარო, ნაგატომო, რანოკია, ჟუანი, კამბიასო, გუარინი, ალვარესი (კოვაჩიჩი 81′), ტაიდერი (იკარდი 68′), პალასიო.
მთავარი მწვრთნელი: ვალტერ მაცარი.
„იუვენტუსი“: ბუფონი, ბარძალი, ლიხტშტაინერი (ისლა 46′), ბონუჩი, კიელინი, პირლო (პადოინი 87′), ვიდალი, ასამოა, პოგბა, ტევესი, ვუჩინიჩი (კვალიარელა 72′).
მთავარი მწვრთნელი: ანტონიო კონტე.
გოლები: იკარდი 73′ – ვიდალი 75′.
გაფრთხილებები: კამპანიარო 15′, რანოკია 62′ – ლიხტშტაინერი 17′, ვიდალი 61′.
მთავარი მსაჯი: დანიელე ორსატო.
ამ უქმეებზე ევროპის მასშტაბით ერთ-ერთი ყველაზე საინტერესო მატჩი მილანში შედგება, სადაც ადგილობრივი „ინტერი“ ტურინის „იუვენტუსს“ უმასპინძლებს. სტარტი იტალიის მოქმედ ჩემპიონსაც კარგი აქვს და მილანურ კლუბსაც, რომელმაც გასულ სეზონში მხოლოდ მე-9 ადგილი დაიკავა და ევროთასებზე ასპარეზობის უფლება ვერ მოიპოვა. ამის მიუხედავად, „ინტერი“ მაინც ითვლება სკუდეტოს მოპოვების ერთ-ერთ მთავარ ფავორიტად. „იუვენტუსმა“ წინა ორი მატჩიდან ორივე გამარჯვებით დაასრულა, გაიტანა 5 და მიიღო 1 გოლი. „ინტერმაც“ ორივე შეხვედრა მოიგო, 5 გოლი გაიტანა და კარი მშრალად შეინახა.
„ფრე კარგი შედეგი იქნებოდა, თუმცა იმას არ ვამბობ, რომ საყაიმო ანგარიშით მოხარული ვიქნები. მინდა, რომ „ინტერმა“ თავისი დონის შესაბამისი ფეხბურთი აჩვენოს. ასეთ შემთხვევაში, შედეგიც მისაღები იქნება. დაცვაში საიმედოდ უნდა ვითამაშოთ. გუნდი ითამაშებს იმ ტაქტიკით და ფეხბურთელებით, რომელთაც „იუვენტუსისთვის“ პრობლემების შექმნა შეუძლიათ“, – ეს სიტყვები „ინტერის“ თავკაც ვალტერ მაცარის ეკუთვნის.
„ყოველი მატჩი გამოცდაა, თუმცა ცხადია, რომ სეზონის ერთ-ერთი ყველაზე მნიშვნელოვანი შეხვედრა გველის, რადგან „იუვენტუსი“ ჩვენი პირდაპირი კონკურენტია“, – ამბობს „ინტერის“ ნახევარმცველი ფრედი გუარინი გაზეთ „ტუტოსპორტისთვის“ მიცემულ ინტერვიუში. – ისეთი კლუბი, როგორიც „ინტერია“, ევროპაში უნდა ასპარეზობდეს. მატჩიდან მატჩში უნდა დავამტკიცოთ, რომ გუნდს გამარჯვების სურვილი აქვს. ახლა გვაქვს იმის ჩვენების საშუალება, თუ რა ისწავლა გუნდმა ვალტერ მაცარის გაკვეთილებისგან“.
მაცარი ის მწვრთნელია, რომელმაც გასულ სეზონში „ნაპოლი“ იტალიის ჩემპიონატის მეორე ადგილზე გაიყვანა. „ინტერის“ პრეზიდენტმა მასიმო მორატიმ ის იტალიის სამხრეთიდან ქვეყნის ჩრდილოეთ ნაწილში მიიწვია და ანდრეა სტრამაჩიონის ადგილი დაუთმო.
„იუვენტუსშიც“ კარგად უწყიან, რომ „ხნიერ ქალბატონს“ „ინტერის“ სახით ძლიერი კონკურენტი ჰყავს.
„ახლა „ინტერი“ იმ მდგომარეობაშია, რომელშიც ჩვენ ვიყავით ორი წლის წინათ, – აღნიშნავს „მედიასეტისთვის“ მიცემულ ინტერვიუში „იუვეს“ მცველი შტეფან ლიხტშტაინერი, რომელმაც ის პერიოდი გაიხსენა, როცა „ბიანკონერიმ“ იტალიის ჩემპიონატი მეშვიდე პოზიციაზე დაასრულა. – ვიცით, რომ მეტოქე მაქსიმალურად მოტივირებული იქნება, თუმცა არც ჩვენი გუნდი აპირებს რამის დათმობას“.
„ინტერს“ ჩვენი გზის გავლა შეუძლია. გუნდი განახლდა, ძალიან კარგი თავკაცი დაინიშნა. ეს დამატებითი მიზეზია, რომ მეტოქის მიმართ პატივისცემა გამოვიჩინოთ “, – განაცხადა ჯანლუიჯი ბუფონმა.
ხუთშაბათის ვარჯიშზე, „იუვენტუსის“ საერთო ჯგუფს შეუერთდა მირკო ვუჩინიჩი, რომელიც სანაკრებო მატჩში დაშავდა. გავრცელებული ინფორმაციით, ის „ინტერის“ წინააღმდეგ გასამართ შეხვედრაში სათამაშოდ მზად უნდა იყოს.
ცნობისთვის, მატჩი „ინტერსა“ და „იუვენტუსს“ შორის დღეს, ჩვენი დროით 20:00 საათზე აიღებს სტარტს.
ბექა დოგრაშვილი
იტალიის სერია A-ს მე-3 ტურის ცენტრალური მატჩი მილანში შედგება, სადაც ადგილობრივი „ინტერი“ ტურინის „იუვენტუსს“ დაუხვდება. „ნერიაძურის“ მთავარი მწვრთნელი ვალტერ მაცარი ამბობს, რომ „ხნიერ ქალბატონთან“ გასამართი მატჩი მისი გუნდისთვის კარგი გამოცდა იქნება. მისი თქმით, „ინტერმა“ ყურადღება, პირველ რიგში, ხარისხიან თამაშს უნდა მიაქციოს.
„იტალიაში ხალხი რეზულტატს უყურებს, თუმცა მე ყურადღებას თავად ფეხბურთზე ვაკეთებ. ჩემთვის მნიშვნელოვანია ის, თუ როგორ თამაშობს გუნდი. ფრე კარგი შედეგი იქნებოდა, თუმცა იმას არ ვამბობ, რომ საყაიმო ანგარიშით მოხარული ვიქნები. მინდა, რომ „ინტერმა“ თავისი დონის შესაბამისი ფეხბურთი აჩვენოს. ასეთ შემთხვევაში, შედეგიც მისაღები იქნება. დაცვაში საიმედოდ უნდა ვითამაშოთ. გუნდი ითამაშებს იმ ტაქტიკით და ფეხბურთელებით, რომელთაც „იუვენტუსისთვის“ პრობლემების შექმნა შეუძლიათ“, – ამბობს „ინტერის“ თავკაცი.
მაცარიმ გაკვირვება გამოთქვა იმ ჭორზე, რომლის მიხედვითაც, მასსა და ტურინული გუნდის მთავარ მწვრთნელ ანტონიო კონტეს შორის კონფლიქტი არსებობს.
„არ ვიცი, ჩვენს შორის რა მოხდა. თუ ამის გარკვევა გნებავთ, თავად მას ჰკითხეთ. ისეთი არაფერი მითქვამს, რომ კონტეს შეურაცხყოფად მიეღო. ერთადერთი რამ, რაც თავის დროზე ვთქვი, ის იყო, რომ „იუვენტუსი“ „ნაპოლის“ სათამაშო მოდელს იყენებდა. ეს კომპლიმენტი იყო და არა – კრიტიკა. კონტეს წყენინება არ მინდოდა“, – დაასრულა მაცარიმ.
ცნობისთვის, მატჩი „ინტერსა“ და „იუვენტუსს“ შორის ხვალ, თბილისის დროით 20:00 საათზე დაიწყება.
ბექა დოგრაშვილი
