ბარსა – გვერდი 15 – Fanebi.Com – ფეხბურთი, კალათბურთი, რაგბი, სხვა

El Confidencial: „მანჩესტერ სიტი“ მზადაა, მესის სანაცვლოდ 200 მილიონი გაიღოს

Posted on მარტი 7, 2014მარტი 7, 2014 by ბექა დოგრაშვილი

ესპანური El Confidencial-ის თანახმად, „მანჩესტერ სიტი“ „ბარსელონას“ თავდამსხმელ ლიონელ მესის შესაძლო ტრანსფერთან დაკავშირებით ოფიციალურ წინადადებას ამზადებს.

წყაროს ცნობით, ინგლისური კლუბი მზად არის, არგენტინელი ფეხბურთელის სანაცვლოდ 200 მილიონი ევრო გაიღოს.

ამასთან ერთად, „მანჩესტერ სიტი“ იმისთვისაც მზადაა, რომ მესის წელიწადში 25 მილიონი ევრო გადაუხადოს და ის მსოფლიოს მასშტაბით ყველაზე მაღალანაზღაურებად მოთამაშედ აქციოს.

მესის გადაბირებაზე „პარი სენ-ჟერმენიც“ ფიქრობს, თუმცა ფრანგულ კლუბს საფრანგეთში არსებული საგადასახადო კანონის გამო ტრანსფერის გაჩარხვა უფრო გაუჭირდება.

წყაროს თანახმად, „მანჩესტერ სიტისა“ და „პარი სენ-ჟერმენის“ წარმომადგენლები „ბარსელონას“ თავდამსხმელის მამასთან, ხორხე მესისთან კონტაქტზე უკვე გავიდნენ. შეგახსენებთ იმასაც, რომ ლეო მესი კატალონიურ კლუბთან კონტრაქტის გახანგრძლივების თაობაზე მოლაპარაკებას აწარმოებს.

ბექა დოგრაშვილი

ვილაშ-ბოაში: „ჩემი ოცნებაა „რეალში“ ან „ბარსელონაში“ მუშაობა“

Posted on მარტი 2, 2014 by ბექა დოგრაშვილი

ლონდონის „ჩელსისა“ და „ტოტენჰემ ჰოთსპურის“ ყოფილმა თავკაცმა ანდრე ვილაშ-ბოაშმა განაცხადა, რომ სხვადასხვა კლუბებისგან შემოთავაზებები აქვს და საზოგადოება მას მალე კვლავ იხილავს მთავარი მწვრთნელის ამპლუაში.

შეგახსენებთ, რომ დეკემბრის თვეში პორტუგალიელი სპეციალისტი „ტოტენჰემის“ მთავარი მწვრთნელის პოსტიდან გაათავისუფლეს. მას შემდეგ ვილაშ-ბოაში უმუშევარია, თუმცა თავად ანდრე მომავალს ოპტიმისტურად უყურებს და გრანდიოზულ გეგმებსაც სახავს.

„რეალი“ და „ბარსელონა“ მსოფლიოს მასშტაბით საუკეთესო კლუბები არიან. პირველ მათგანს ყველაზე მეტი ტიტული აქვს მოგებული, მეორე კი თანამედროვე ფეხბურთის მოდის განმსაზღვრეალია. პეპ გვარდიოლამ კატალონიურ გუნდში დიდი მემკვიდრეობა დატოვა. ჩემნაირი ახალგაზრდა მწვრთნელისთვის ასეთ კლუბებში მუშაობა ოცნების ახდენის ტოლფასია.

მინდა, რომ საკუთარი თავი სხვა ლიგებში გამოვცადო, ყველაფერი თავიდან დავიწყო და უცხო ქვეყნებიც გავიცნო. რამდენიმე კლუბი უკვე დამიკავშირდა კიდეც. მუშაობას ივნისში დავუბრუნდები, შეიძლება ეს უფრო ადრეც მოხდეს“, – ვილაშ-ბოაშის სიტყვები Football Espana-მ გამოაქვეყნა.

ბექა დოგრაშვილი

კალდერონი: „ფერგიუსონს სურდა, რომ რონალდუ „ბარსელონაში“ გადასულიყო“

Posted on მარტი 1, 2014 by ბექა დოგრაშვილი

მადრიდის „რეალის“ ყოფილმა პრეზიდენტმა რამონ კალდერონმა განაცხადა, რომ თავის დროზე კრიშტიანუ რონალდუს მიმართ ინტერესს „ბარსელონა“ იჩენდა, „მანჩესტერ იუნაიტედის“ ყოფილ თავკაც ალექს ფერგიუსონს კი სურდა, რომ პორტუგალიელი სწორედ კატალონიურ გუნდში გადასულიყო.

„ფერგიუსონს უნდოდა, რომ რონალდუ არა „რეალში“, არამედ „ბარსელონაში“ გადასულიყო. არც თავად კატალონიელები იყვნენ ამ ტრანსფერის განხორციელების წინააღმდეგნი, თუმცა უარი კრიშტიანუმ თქვა.

სწორედ ამიტომ გადმოვიდა რონალდუ ჩვენთან. ამით ყველა კმაყოფილი დარჩა: „მანჩესტერ იუნაიტედმა“ 80 მილიონი ფუნტი ჩაიჯიბა, ჩვენ მსოფლიოს მასშტაბით საუკეთესო ფეხბურთელი დავიმატეთ, კრიშტიანუმ კი ის მიიღო, რაც სურდა. მისნაირ ფეხბურთელებს მხოლოდ ფული კი არა, დიდება აინტერესებთ. ასეთი მოთამაშეები იმ გუნდს ეძებენ, რომელიც ტიტულების მოგების შესაძლებლობას მისცემს“, – კალდერონის სიტყვებს Goal.com-ი ციტირებს.

ბექა დოგრაშვილი

ხერარდო მარტინო: „იმ გუნდს უფრო გაუჭირდება, რომელსაც უბურთოდ თამაში მოუწევს“

Posted on თებერვალი 18, 2014 by ბექა დოგრაშვილი

დღეს უეფას ჩემპიონთა ლიგის მერვედფინალური ეტაპი გაიხსნება. ყურადღების ცენტრშია „მანჩესტერ სიტისა“ და „ბარსელონას“ შორის „ეტიჰადზე„ გასამართი შეხვედრა. კატალონიური გუნდის მთავარმა მწვრთნელმა ხერარდო მარტინომ ხაზი გაუსვა ინგლისელთა ძლიერ მხარეებს და იმის შესახებაც ისაუბრა, თუ როგორ აპირებს მისი გუნდი მეტოქის განეიტრალებას.

„ეს დაპირისპირება ფინალის ღირსია. კარგი იქნებოდა, მათ ცოტა მოგვიანებით რომ შევხვედროდით, თუნდაც მეოთხედფინალურ ეტაპზე. „სიტი“ შეუდარებლად გამოიყურება როგორც პრემიერლიგაში, ასევე ევროთასებზე.

არჩევანი არ უნდა გავაკეთოთ გატანასა და არგაშვებას შორის. პირველ რიგში, უნდა ვითამაშოთ ისე, როგორც გვიყვარს და როგორც შეგვიძლია. თუ გოლს გავიტანთ, ამაზე კარგი რა უნდა იყოს?! „მანჩესტერ სიტი“ ბევრ რამეში წააგავს „ბარსელონას“ შესაძლოა, ინგლისელები უფრო მარტივად თამაშობენ, მაგრამ ბურთს შესანიშნავად აკონტროლებენ. ვფიქრობ, იმ გუნდს უფრო გაუჭირდება, რომელსაც უბურთოდ თამაში მოუწევს.

„მანჩესტერ სიტი“ ამ დროისთვის პლანეტის ერთ-ერთი წამყვანი კლუბია. მათ სხვადასხვა ხერხებით შეუძლიათ ხიფათის შექმნა. კარგად უტევენ როგორც პირველი, ასევე მეორე ტემპით, შეუძლიათ თამაში როგორც ცენტრში, ასევე ფლანგებზე, მშვენივრად თამაშობენ „მეორე სართულზე“, სახიფათოდ ასრულებენ სტანდარტებს და იტანენ ბევრ გოლს. მეტოქის გასანეიტრალებლად ბურთის ფლობა იქნება საჭირო“, – მარტინოს სიტყვები უეფას ოფიციალურმა ვებ-გვერდმა გამოაქვეყნა.

მატჩი „მანჩესტერ სიტისა“ და „ბარსელონას“ შორის დღეს, თბილისის დროით 23:45 საათზე აიღებს სტარტს და მას შვედი არბიტრი იონას ერიქსონი მოემსახურება.

ბექა დოგრაშვილი

პელეგრინი: „ბარსელონა“ მხოლოდ მესი არ არის“

Posted on თებერვალი 18, 2014 by ბექა დოგრაშვილი

როგორც მოგეხსენებათ, დღეს უეფას ჩემპიონთა ლიგის მერვედფინალური ეტაპი გაიხსნება. „ეტიჰადზე“ „მანჩესტერ სიტი“ „ბარსელონას“ უმასპინძლებს. მატჩისწინა პრესკონფერენციაზე „ქალაქელთა“ მთავარმა მწვრთნელმა მანუელ პელეგრინიმ აღნიშნა, რომ კატალონიური გუნდი საკმაოდ ძლიერი მეტოქეა და ეს არამხოლოდ ლიონელ მესის დამსახურებაა.

„მთავარია, დავრჩეთ იმ გუნდად, რომელიც პრემიერლიგაში თამაშობს, შევინარჩუნოთ ჩვენი სტილი და ინდივიდუალიზმი. შეიძლება სხვა ფეხბურთელებიც იხილოთ, მაგრამ ისევ ის გუნდი ვიქნებით, ისევ იმავე სტილით მოთამაშე. „ბარსელონა“ მხოლოდ მესი არ არის, თუმც არგენტინელი მსოფლიოს მასშტაბით საუკეთესო ფეხბურთელია“, – განაცხადა პელეგრინიმ.

მატჩი „მანჩესტერ სიტისა“ და „ბარსელონას“ შორის დღეს, თბილისის დროით 23:45 საათზე დაიწყება და მას შვედი არბიტრი იონას ერიქსონი განსჯის. უკვე ცნობილია ისიც, რომ ინგლისელებს ტრავმის გამო გუნდის ლიდერი სერხიო აგუერო დააკლდებათ.

ბექა დოგრაშვილი

მოურინიო: „ეს ბოლო წლების ყველაზე ცუდი „ბარსელონაა“

Posted on თებერვალი 18, 2014 by ბექა დოგრაშვილი

დღეს უეფას ჩემპიონთა ლიგის მერვედფინალური ეტაპი გაიხსნება. დიდ ინტერესს იწვევს „მანჩესტერ სიტისა“ და „ბარსელონას“ შორის გასამართი მატჩი.

აღნიშნულ შეხვედრასთან დაკავშირებით კომენტარი გააკეთა ლონდონის „ჩელსის“ მთავარმა მწვრთნელმა ჟოზე მოურინიომ.

„ისტორიულად „ბარსელონა“ „მანჩესტერ სიტისთან“ ფავორიტად მიიჩნეოდა, მაგრამ ეს ის „ბარსელონა“ აღარ არის , რასაც ადრე ვუყურებდით.

მათ ლეო მესის სახით განსაკუთერებული მოთამაშე ჰყავთ, გუნდში სხვა კარგი ფეხბურთელებიც თამაშობენ, მაგრამ ეს ბოლო წლების ყველაზე ცუდი „ბარსელონაა“. „სიტის“ გამარჯვების შანსი აქვს“, – მოურინიოს სიტყვები itv-მ გამოაქვეყნა.

მატჩი „მანჩესტერ სიტისა“ და „ბარსელონას“ შორის დღეს, ჩვენი დროით 23:45 საათზე დაიწყება და მას შვედი არბიტრი იონას ერიქსონი განსჯის.

ბექა დოგრაშვილი

„ბარსელონას“ დამაჯერებელი გამარჯვება, მესის რეკორდი

Posted on თებერვალი 16, 2014 by ბექა დოგრაშვილი

ესპანეთის პრიმერადივიზიონის 24-ე ტურში „ბარსელონამ“ „რაიო ვალეკანო“ მიიღო და მეტოქე ანგარიშით 6:0 გაანადგურა. ლეო მესიმ დუბლი გაიფორმა, კინკილა გოლები ადრიანო კორეას, ალექსის სანჩესის, პედრო როდრიგესისა და ნეიმარის ანგარიშზეა. სხვათა შორის, მესიმ რეკორდი დაამაყარა. მან საკლუბო კარიერაში 337-ე გოლი გაიტანა. ერთ გუნდში მიღწეული ასეთი წარმატება
ესპანეთში აქამდე არავის არ ჰქონდა. არგენტინელმა თავდამსხმელმა პრიმერადივიზიონის 263 მატჩში მიიღო მონაწილეობა და 228 გოლი გაიტანა. საშუალოდ, მესი მატჩში 0,87 გოლს იტანს.

„ბარსელონამ“ 60 ქულა მოაგროვა და სატურნირო ცხრილში პირველ ადგილზე გადაინაცვლა, თუმცა ამდენივე ქულა აქვს მადრიდის „ატლეტიკოს“. მესამეადგილოსან „რეალს“ 57 ქულა და ერთი მატჩით ნაკლები აქვს ჩატარებული.

ესპანეთის პრიმერადივიზიონი
XIV ტური
„ბარსელონა“ — „რაიო ვალეკანო“ 6:0 (2:0)

გოლები: ადრიანო კორეა 2′, მესი 36′, 68′, სანჩესი 53′, პედრო 56′, ნეიმარი 89′.

ესპანეთის თასის ფინალში „ელ კლასიკო“ შედგება

Posted on თებერვალი 13, 2014 by ბექა დოგრაშვილი

ესპანეთის სამეფო თასის ნახევარფინალურ ეტაპზე „სოსიედადსა“ და „ბარსელონას“ შორის განმეორებითი მატჩი შედგა. შეგახსენებთ, რომ პირველი შეხვედრა კატალონიურმა გუნდმა ანგარიშით 2:0 მოიგო.

სან-სებასტიანში გამართულ მატჩში ანგარიში 27-ე წუთზე „ბარსელონამ“ გახსნა: სწრაფი კონტრშეტევა ლიონელ მესიმ 18 მეტრის მანძილიდან დარტყმით დააგვირგვინა. მასპინძლებმა ანგარიშის გათანაბრება მატჩის დასრულებამდე სამი წუთით ადრე მოახერხეს. გოლი ანტონი გრიზმანის ანგარიშზეა. საბოლოოდ, შეხვედრა ფრედ, ანგარიშით 1:1 დასრულდა და „ბარსელონამ“ ფინალში თამაშის უფლება მოიპოვა, სადაც მადრიდის „რეალს“ დაუპირისპირდება. ფინალური მატჩი 19 აპრილს შედგება.

ესპანეთის თასი
ნახევარფინალი (II მატჩი)
„სოსიედადი“ — „ბარსელონა“ 1:1 (0:1)

გოლები: გრიზმანი 87′ — მესი 27′.
გაფრთხილებები: ველა 31′, გასტანიაგა 52′, ზურუტუზა 56′ — ბუსკეტსი 26′, ფაბრეგასი 89′.

პრიმერადივიზიონში სამხელისუფლებიანობა დამყარდა

Posted on თებერვალი 10, 2014თებერვალი 10, 2014 by ბექა დოგრაშვილი

ესპანეთის პრიმერადივიზიონის 23-ე ტურში „ბარსელონა“ „სევილიას“ ესტუმრა და მეტოქე ანგარიშით 4:1 დაამარცხა, თუმცა მატჩს მასპინძლები იგებდნენ. თამაში ძლიერი წვიმის თანხლებით მიმდინარეობდა.

ანგარიში მე-15 წუთზე „სევილიას“ მცველმა ალბერტო მორენომ გახსნა. კატალონიურმა გუნდმა თამაშში გარდატეხის შეტანა მოახერხა და საბოლოოდ, გამარჯვებაც მოიპოვა. სტუმრები პირველივე ტაიმი დაწინაურდნენ, ჯერ ალექსის სანჩესმა გაიტანა, შემდეგ კი ლიონელ მესიმ. აღსანიშნავია, რომ სანჩესმა გოლი თამაშგარე მდგომარეობიდან გაიტანა, თუმცა მსაჯებმა ეს ვერ შენიშნეს. მეორე ტაიმში „ბარსელონას“ არგენტინელმა ლიდერმა დუბლი გაიფორმა. საბოლოო შედეგი 88-ე წუთზე ფრანჩესკ ფაბრეგასმა დააფიქსირა — 4:1.

„ბარსელონამ“ აქტივში 57 ქულა მოაგროვა და მადრიდის „რეალთან“ და „ატლეტიკოსთან“ ერთად სატურნირო ცხრილს სათავეში ჩაუდგა. „სევილია“ 31 ქულით მეშვიდე პოზიციაზე დარჩა.

ესპანეთის პრიმერადივიზიონი
23-ე ტური
„სევილია“—„ბარსელონა“ 1:4 (1:2)

გოლები: მორენო 15′ — ალექსის სანჩესი 34′, მესი 44′, 56′, ფაბრეგასი 88′.
გაფრთხილებები: კარისუ 39′, ფიგეირაში 70′, ჩერიშევი 71′ — სონგი 20′, პედრო 59′, ვიქტორ ვალდესი 68′.

ბექა დოგრაშვილი

ფაბრეგასი: „არსენალის“ ყველა მატჩს ვუყურებ“

Posted on თებერვალი 7, 2014თებერვალი 7, 2014 by ბექა დოგრაშვილი

„ბარსელონას“ ნახევარმცველი ფრანჩესკ ფაბრეგასი გამოტყდა, რომ ლონდონის „არსენალის„ მატჩებს რეგულარულად ადევნებს თვალურს. 26 წლის კატალონიელმა ფეხბურთელმა იმედი გამოთქვა, რომ „მეთოფეები“ ტიტულის მოპოვებას შეძლებენ.

„არსენალის“ ყველა მატჩს ვუყურებ. მიხარია, რომ მათი საქმეები კარგად მიდის, კვლავ მოექცნენ სატურნირო ცხრილის სათავეში. ვეღარ ვითმენ, ისე მინდა, რომ „არსენალმა“ ტიტული დაისაკუთროს. ეს ამბავი ძალიან გამახარებს“, – კატალონიელი ფეხბურთელის სიტყვები goal.com-მა გამოაქვეყნა.

შეგახსენებთ, რომ ფაბრეგასი „არსენალის“ ღირსებას 2003-დან 2011 წლამდე იცავდა.

ბექა დოგრაშვილი

„ბარსელონამ“ „სოსიედადი“ ბუსკეტსისა და კურიოზული გოლების წყალობით დაამარცხა

Posted on თებერვალი 6, 2014თებერვალი 6, 2014 by ბექა დოგრაშვილი

ესპანეთის სამეფო თასის ნახევარფინალურ ეტაპზე „ბარსელონასა“ და „რეალ სოსიედადს“ შორის გამართული მატჩი კატალონიელთა უპირატესობით წარიმართა და მათივე გამარჯვებით, ანგარიშით 2:0 დასრულდა. აღსანიშნავია, რომ შეხვედრას მხოლოდ 38 505 გულშემატკივარი დაესწრო. დიდი უპირატესობის მიუხედავად, მასპინძლებმა ანგარიში მხოლოდ 44-ე წუთზე გაიტანეს, როცა კუთხურის შესრულების შემდეგ ბასკთა საჯარიმოში არეულობა შეიქმნა, ბურთი სერხიო ბუსკეტს მიუვიდა და მასაც ახლო მანძილიდან გატანა არ გასჭირვებია. სტუმართა ვითარება მცველ ინიგო მარტინესის გაძევებამ კიდევ უფრო დაამძიმა. მეორე გოლი საკმაოდ კურიოზული გამოდგა: ფრანჩესკ ფაბრეგასის გადაცემის შემდეგ ალექსის სანჩესი მეკარესთან პირისპირ გავიდა, თუმცა მისი დარტყმული კარის ძელს მოხვდა, შემდეგ გორკა ელუსტონდომ ბურთი მოიგერია, რომელიც პირდაპირ მეკარე ენიაუტ ზუბიკარაის მოარტყა და კარში შეგორდა — 2:0.

განმეორებითი მატჩი 13 თებერვალს შედგება

ესპანეთის თასი
ნახევარფინალი
„ბარსელონა“ — „სოსიედადი“ 2:0 (1:0)

გოლები: ბუსკეტსი 44′, ზუბიკარაი 60′ (ა.გ.)
გაფრთხილებები: ბუსკეტსი 26′, მასკერანო 36′, მესი 73′ — ველა 40′, ელუსტონდო 57′, გასტანიაგა 62′, ზუბიკარაი 86′, სალდუა 89′.
გაძევება: ინიგო მარტინესი 44′.

პიკეს „ბარსელონას“ პრეზიდენტობა უნდა

Posted on თებერვალი 4, 2014 by ბექა დოგრაშვილი

ესპანეთის ნაკრების მცველი ჟერარ პიკე გამოტყდა, რომ „ბარსელონას“ პრეზიდენტობაზე ოცნებობს. ფეხბურთელი ამბობს, რომ ბიზნესით დიდი ხნის წინათ დაინტერესდა და საკუთარ თავს ფუნქციონერის როლშიც ხედავს.

„ბარსელონას“ პრეზიდენტობა მინდა, თუმცა ეს მალე არ მოხდება. 10 წლის ასაკში ფეხბურთელობა მსურდა. როგორც ხედავთ, ეს ოცნება ამიხდა. პრეზიდენტობა მინდა იმიტომ, რომ ეს ჩემი კლუბია და ვიცი, რა ხდება შიდა სამზარეულოში, თანაც თავის დროზე ჩემი ბაბუა „ბარსელონას“ ვიცე-პრეზიდენტი იყო. ამ კლუბის სულისკვეთებით ბავშვობიდან ვარ გამსჭვალული.

ფეხბურთი მიყვარს. ის ჩემთვის ცხოვრებაში პირველ ადგილზეა, თუმც ჩემი ინტერესები ბიზნესზეც ვრცელდება. ამ კუთხით „ბარსელონაში“ მუშაობა საინტერესო იქნებოდა“, – პიკეს სიტყვები JotDown-მა გამოაქვეყნა.

ბექა დოგრაშვილი