ჭდე: ჩელსი

წუხელ, ინგლისის ლიგის თასის მეოთხე რაუნდზე ლონდონის “ჩელსი” “სტოკ სიტისთან” პენალტების სერიაში დამარცხდა და გათამაშებას გამოეთიშა. გუნდს პრემიერლიგის სატურნირო ცხრილში 11 ქულით მე-15 პოზიცია უკავია. აშკარაა, ინგლისის მოქმედი ჩემპიონი ღრმა კრიზისშია. ავი ხმები იმასაც ამბობენ, რომ “ჩელსის” ფეხბურთელები მთავარ მწვრთნელ ჟოზე მოურინიოს აუმხედრდნენ და გუნდის ცუდი შედეგებიც მათი შეთქმულების შედეგია. წუხელ ამის შესახებ მოურინიოსაც ჰკითხეს, რომელმაც განაცხადა, რომ ასეთი ლაპარაკი ფეხბურთელების უპატივცემულობაა.

“თქვენ ფიქრობთ, რომ ფეხბურთელები ჩემ გვერდით არ არიან? თქვენ ფიქრობთ, რომ ფეხბურთელები მოსაგებად ყველაფერს არ აკეთებენ? ცუდია. ჩემთვის კი არ არის ცუდი, ცუდია ფეხბურთელებისთვის, ეს მათი უპატივცემულობაა და არა ჩემი. ჩემთვის ფანტასტიური სიტუაცია იქნებოდა, “ჩელსის” მოთამაშეები ჩემ წინააღმდეგ რომ ყოფილიყვნენ. ვიტყოდი, რომ შედეგი არ გვაქვს, რადგან ფეხბურთელები ჩემ წინააღმდეგ არიან.

რასაც ზოგიერთი წერს და ლაპარაკობს, ძალიან ცუდია მოთამაშეებისთვის. იმ ადამიანებს შორის, ვინც ამას ამბობს, ზოგიერთი ყოფილი ფეხბურთელია. ალბათ, ჰგონიათ, რომ ჩემი ფეხბურთელები მათ ჰგვანან, რადგან შესაძლოა, მათ ასეთი რამის გაკეთება უწევდათ, მაგრამ ჩემი მოთამაშეები ამას არ იზამენ, ჩემი ფეხბურთელები მოსაგებად ყველაფერს აკეთებენ”, – განაცხადა მოურინიომ წუხელ გამართულ პრესკონფერენციაზე.

ლონდონის “ჩელსიში” ჟოზე მოურინიოს წყალი რომ შეუდგა, ამაზე ბრიტანული და არაბრიტანული პრესა უკვე დიდი ხანია, წერს. დასავლეთლონდონელებს პრემიერლიგის ათი ტურის შემდეგ აქტივში მხოლოდ 11 ქულა აქვს, რაც გუნდის ანტირეკორდია. კონსპირაციული თეორიის მომხრეები იმასაც ამბობენ, რომ ფეხბურთელებს მოურინიოსთან დაპირისპირება აქვთ და ცუდად განზრახ თამაშობენ, რათა რომან აბრამოვიჩმა პორტუგალიელი სპეციალისტი “სტემფორდ ბრიჯიდან” მიაბრძანოს. ამასობაში “ჩელსი” სატურნირო ცხრილში მე-15 პოზიციამდე დაქვეითდა და აშკარაა, რაღაც ზომებია მისაღები.

ავტორიტეტული ბრიტანული გამოცემა “დეილი მეილი” წერს, რომ მოურინიოს გუნდი დამდეგ შაბათს შინ “ლივერპულს” დაუხვდება და თუ ისევ დამარცხდება, შესაძლოა, პორტუგალიელი მწვრთნელი მატჩის შემდეგვე გაათავისუფლონ.

იმავე წყაროს ცნობით, “ჩელსიში” დაბრუნება კარლო ანჩელოტის სურს. სახელდება ხოსეპ გვარდიოლას კანდიდატურაც, რომლის მოთაფვლასაც აბრამოვიჩი 2012 წელს ცდილობდა, თუმცა მაშინ კატალონიელმა სპეციალისტმა მიუნხენის “ბაიერნის” გაძღოლა არჩია. მესამე ვარიანტად დიეგო სიმეონე მოიაზრება. დროებით მწვრთნელად გუს ჰიდინკის კანდიდატურას განიხილავენ, რომელიც “ჩელსის” 2009 წელს ხელმძღვანელობდა და დანიშვნიდან სამ თვეში გუნდს ინგლისის თასი მოაგებინა.