ჭდე: England Premier League

ჩეხმა, „ჩელსი“ „ლივერპულზე“ გამოცდილიაო

Posted on by ბექა დოგრაშვილი

ლონდონის „ჩელსის“ კიპერმა პეტრ ჩეხმა განაცხადა, რომ ინგლისის ჩემპიონობისთვის ბრძოლაში მისი გუნდის გამოცდილება შეიძლება მნიშვნელოვანი უპირატესობა აღმოჩნდეს.

დღევანდელობიდან გამომდინარე, პრემიერლიგის მოგების ყველაზე რეალურ კანდიდატად „ლივერპული“ ითვლება, რომელმაც გუშინ უშუალო კონკურენტი „მანჩესტერ სიტი“ ანგარიშით 3:2 დაამარცხა. „ჩელსის“ მეორე ადგილი აქვს დაკავებული და ლიდერს 2 ქულით ჩამორჩება. მესამე „მანჩესტერ სიტია“, რომელსაც „ჩელსიზე“ 5 ქულით ნაკლები აქვს. გარდა ამისა, „ქალაქელებს“ ორი მატჩით ნაკლები აქვთ ჩატარებული. „ჩელსი“ 27 აპრილს „ენფილდზე“ ითამაშებს და შესაძლოა, იმ მატჩმა გადაწყვიტოს საჩემპიონო ბედი.

„ლივერპულისგან“ არავინ არაფერს არ მოელოდა. სწორედ ამიტომ თამაშობენ ისინი ზეწოლის გარეშე. ვნახოთ, როგორ გაუმკლავდებიან მერსისაიდელები ბოლო ტურის მატჩებს. ისინი საოცრად კარგად თამაშობენ, თუმცა ჩვენც აქვე ვართ.

ისიც გვესმის, რომ „მანჩესტერ სიტიმაც“ უნდა დაკარგოს ქულა, თუმცა თუ დარჩენილ შეხვედრებს მოგებით დავასრულებთ, შანსი ნამდვილად გაგვიჩნდება.

ჩვენ გვყავს ფეხბურთელები, რომლებიც უფრო მეტი მატჩის ჩატარებას მიეჩვივნენ. ახალგაზრდა, ენთუზიაზმით სავსე გუნდი ზეწოლის გარეშე თამაშობს. ვეცდებით, რომ დარჩენილი შეხვედრები მოვიგოთ, შემდეგ კი ვნახოთ, რა მოხდება“, – ჩეხის სიტყვები London Evening Standard-მა გამოაქვეყნა.

ბექა დოგრაშვილი

სტივ ჯერარდი: „დარჩენილი მატჩები ჩვენთვის ფინალის ტოლფასია“

Posted on by ბექა დოგრაშვილი

ინგლისის პრემიერლიგის 34-ე ტურში „ლივერპულმა“ ჩემპიონობისთვის უშუალო კონკურენტ „მანჩესტერ სიტის“ უმასპინძლა და დრამატულ ბრძოლაში ანგარიშით 3:2 დაამარცხა, რითაც ჩემპიონობისკენ დიდი ნაბიჯი გადადგა. თუ მერსისაიდული გუნდი დარჩენილ ოთხივე შეხვედრას გამარჯვებით დაასრულებს, ჩემპიონიც გახდება, მიუხედავად კონკურენტების შედეგებისა.

გუშინდელი მნიშვნელოვანი მატჩის შემდეგ „ლივერპულის“ კაპიტან სტივენ ჯერარდს სიხარულისგან ცრემლებიც კი წასკდა და ეს არც არის გასაკვირი, მას ხომ ინგლისის ჩემპიონატი ამ დრომდე არ მოუგია?! „წითლების“ ლიდერმა შემდეგ თანაგუნდელები შემოიკრიბა და მომდევნო შეხვედრისთვის აამხედრა.

ჯერარდის თქმით, დარჩენილი ოთხი მატჩი „ლივერპულისთვის“ ფინალის ტოლფასია.

„ემოციური მატჩი იყო, თუმცა სიმშვიდე უნდა შევინარჩუნოთ. კიდევ ოთხი მნიშვნელოვანი მატჩი გველის. შესაძლოა, ეს ჩვენს მიერ გაკეთებული უმთავრესი საჩემპიონო განაცხადი იყოს.

მატჩი უსასრულოდ დიდხანს გაგრძელდა. ეს ჩემი ყველაზე ხანგრძლივი 90 წუთი იყო. მეგონა, რომ დრო უკან მიდიოდა.

ახლა კიდევ ოთხი მატჩი გვაქვს სათამაშო. თითოეული შეხვედრა ფინალის ტოლფასია. ბევრი ამბობდა, რომ „სიტისთან“ მატჩი მთავარი იქნებოდა, მაგრამ ასე არ არის. ახლა „ნორვიჩთან“ ჩასატარებელ შეხვედრაზე მნიშვნელოვანი არაფერი არაა. ჯერ არაფერი მოგვიგია“, – ციტირებს ჯერარდის სიტყვებს „ბი ბი სი“.

„ლივერპული“ დარჩენილ ოთხ ტურში შემდეგ გუნდებს დაუპირისპირდება: „ნორვიჩ სიტი“ (სტუმრად), ლონდონის „ჩელსი“ (შინ), „კრისტალ პალასი“ (სტუმრად), „ნიუკასლ იუნაიტედი“ (შინ).

შეგახსენებთ, რომ „ლივერპულმა“ ინგლისის ჩემპიონატი უკანასკნელად 1989-90 წლების სეზონში მოიგო.

ბექა დოგრაშვილი

ფაულერი: „ლივერპულს“ პრემიერლიგის მოგება შეუძლია“

Posted on by ბექა დოგრაშვილი

„ლივერპულის“ ყოფილი თავდამსხმელი რობი ფაულერი თვლის, რომ მერსისაიდულ გუნდს ინგლისის პრემიერლიგის მოგების კარგი შანსი აქვს.

„ლივერპულს“ მიმდინარე სეზონში ტიტულის მოგება შეუძლია. გუნდმა ამჟამინდელი ფორმა უნდა შეინარჩუნოს. თუ რომელიმე მისი კონკურენტი წაიფორხიალებს, „ლივერპული“ მზად უნდა იყოს, რომ შანსები გამოიყენოს. სტარიჯი-სუარესი თავდასხმის შესანიშნავი წყვილია, სასიამოვნოა მათი თამაშის ცქერა. ჯერარდი ფენომენალური მოთამაშეა. მას მოედანზე ყველაფრის გაკეთება შეუძლია და ყველა პოზიციაზე თამაშიც ძალუძს“, – ფაულერის სიტყვებს „ტუტომერკატო“ ციტირებს.

შეგახსენებთ, რომ „ლივერპულს“ პრემიერლიგის სატურნირო ცხრილში 68 ქულით მეორე პოზიცია აქვს დაკავებული და სულ ერთი ქულით ჩამორჩება ლიდერ „ჩელსის“.

ბექა დოგრაშვილი

რატომ სურს „მანჩესტერ იუნაიტედის“ ქომაგთა ნაწილს დღევანდელ დერბიში დამარცხება

Posted on by ბექა დოგრაშვილი

როგორც მოგეხსენებათ, დღეს ინგლისის პრემიერლიგის 28-ე და 29-ე ტურების გამოტოვებული მატჩები ჩატარდება. დიდ ინტერესს იწვევს „ოლდ ტრაფორდზე“ გასამართი შეხვედრა — „მანჩესტერ იუნაიტედი“ თანაქალაქელ „მანჩესტერ სიტის“ მიიღებს. შექმნილი რეალობიდან გამომდინარე, „წითელი ეშმაკების“ მთავარ სასეზონო მიზნად ჩემპიონთა ლიგის ზონაში მოხვედრა უნდა ითვლებოდეს. ამ მხრივ, უკეთეს მდგომარეობაშია „მანჩესტერ სიტი“, რომელიც 63 ქულით სატურნირო ცხრილის მესამე პოზიციას იკავებს, თუმც მანუელ პელეგრინის გუნდს გათამაშების ლიდერ „ჩელსიზე“ სამი მატჩით ნაკლები აქვს ჩატარებული და ჩემპიონობის რეალურ შანსსაც ინარჩუნებს. მეორე ადგილი 65 ქულით „ლივერპულს“ აქვს დაკავებული, „ჩელსის“ კი აქტივში 69 ქულა აქვს.

დღეს გასამართი დერბი ინგლისში ერთ-ერთ მთავარ თემად ითვლება. ფეხბურთის გულშემატკივრები სხვადასხვა პროგნოზებს აკეთებენ, თუმცა საინტერესოა „მანჩესტერ იუნაიტედის“ ზოგიერთი ქომაგის პოზიცია. სოციალურ ქსელში გამოქვეყნებული კომენტარებით თუ ვიმსჯელებთ, „წითელი ეშმაკების“ გულშემატკივართა ნაწილს დღევანდელ დერბიში „სიტის“ გამარჯვება სურს, რათა „ქალაქელები“ საჩემპიონო ბრძოლაში დაწინაურდნენ და „იუნაიტედის“ მოსისხლე მტერი „ლივერპული“ უკან მოიტოვონ. მართალია, „წითელი ეშმაკების“ ქომაგებს არც „სიტი“ ეხატებათ გულზე, თუმც „ლივერპულის“ მიმართ მათი ზიზღი იმდენად დიდია, რომ დღეს „მანჩესტერის“ ქომაგთა ნაწილს მათი საყვარელი გუნდის მარცხი და შესაბამისად, სატურნირო ცრილში მერსისაიდული გუნდის დაქვეითება ურჩევნიათ.

მატჩი „მანჩესტერ იუნაიტედსა“ და „მანჩესტერ სიტის“ შორის დღეს, თბილისის დროით 23:45 საათზე დაიწყება და მას 29 წლის არბიტრი მაიკლ ოლვერი განსჯის.

ბექა დოგრაშვილი

ვენგერი: „ეს ჩემი კარიერის ერთ-ერთი ყველაზე ცუდი დღე იყო“

Posted on by ბექა დოგრაშვილი

ინგლისის პრემიერლიგის 31-ე ტურში ლონდონის „ჩელსისა“ და „არსენალს“ შორის გამართული მატჩი „პენსიონერთა“ დამაჯერებელი გამარჯვებით, ანგარიშით 6:0 დასრულდა. ამ სამარცხვინო მარცხზე პასუხისმგებლობა სრულად აიღო საკუთარ თავზე „მეთოფეთა“ მთავარმა მწვრთნელმა არსენ ვენგერმა, რომლისთვისაც ეს „არსენალის“ თავკაცის პოსტზე მე-1000 მატჩი გახლდათ.

როგორც გაზეთ „თაიმსის“ ჟურნალისტმა ოლივერ ქეიმ გვაცნობა, ვენგერი მატჩისშემდგომ პრესკონფერენციაზე იმ მიზეზით არ მივიდა, რომ მას გუნდის ავტობუსზე აგვიანდებოდა. თუმცა, ფეხბურთის ფრანგმა სპეციალისტმა „ბი ბი სის“ კორესპოდენტთან მაინც გააკეთა მცირე კომენტარი.

„ჩელსისთან“ მარცხი ჩემი ბრალია. ჩემს თავზე სრულად ვიღებ პასუხისმგებლობას. არა მგონია, აზრი ჰქონდეს ჩვენს მიერ დღეს დაშვებულ შეცდომებზე საუბარს.

ეს ჩემი კარიერის ერთ-ერთი ყველაზე ცუდი დღეა. პირველ 20 წუთში ყველაფერი ვნახეთ, თუმცა მას შემდეგაც ბევრი რამ მოხდა. ასეთი გამოცდისთვის გუნდს მთელი კვირის განმავლობაში არ ამზადებენ.

იმედგაცრუებულები ვართ, თუმცა მომდევნო მატჩის მოგება გვინდა“, – აღნიშნა ვენგერმა.

ბექა დოგრაშვილი

„ჩელსიმ“ ვენგერს საიუბილეო მატჩი ჩაუმწარა

Posted on by ბექა დოგრაშვილი

ბევრი ვერ წარმოიდგენდა, რომ ინგლისის პრემიერლიგის 31-ე ტურში ლონდონის „ჩელსისა“ და „არსენალს“ შორის გამართული მატჩი ერთი გუნდის ამხელა უპირატესობით წარიმართებოდა. ეს არსენ ვენგერის თავკაცობით „მეთოფეთა“ მე-1000 შეხვედრა იყო. ფეხბურთის ფრანგ სპეციალისტს ჟოზე მოურინიო არასდროს ჰყოლია დამარცხებული და ამის გაკეთებას აღნიშნულ საიუბილეო მატჩზე აპირებდა, მაგრამ ნურას უკაცრავად! შეიძლება ითქვას, რომ „ჩელსიმ“ დღევანდელ შეხვედრაში გამარჯვება საწყისს 17 წუთში გაინაღდა.

მე-5 წუთზე ანდრე შიურლეს მიერ წამოწყებული სწრაფი კონტრიერიში სამუელ ეტოომ დააგვირგვინა, რომელმაც მალევე ტრავმა მიიღო და შესაცვლელი შეიქნა. შოკირებულ „არსენალს“ აზრზე მოსვლა იმავე შიურლემ არ აცალა და მე-7 წუთზე ვოიცეხ შჩესნის კარის ბადე მეორედ შეარხია. მატჩის მე-15 წუთზე მთავარმა არბიტრმა ანდრე მარინერმა უხეში ტექნიკური შეცდომა დაუშვა. ერთ-ერთ ეპიზოდში ალექს ოქსლეიდ-ჩემბერლენმა საკუთარ საჯარიმო მოედანზე განზრახ ხელით ითამაშა და სტუმართა კარის მიმართულებით გამოცდილმა მსაჯმა თერთმეტმეტრიანი დარტყმა დანიშნა, თუმცა მარინერს აერია, თუ ვინ დაარღვია თამაშის წესი და წითელი ბარათი ოქსლეიდ-ჩემბერლენის ნაცვლად, კირან გიბსს უჩვენა. „მეთოფეებმა“ არბიტრის ვერდიქტი გააპროტესტეს და მიუთითეს, რომ ხელით ოქსლეიდ-ჩემბერლენმა ითამაშა, თუმცა მსაჯმა გადაწყვეტილება არ შეცვალა. პენალტი ზუსტად ედენ აზარმა შეასრულა და მე-17 წუთისთვის ტაბლოზე უკვე გამანადგურებელი ანგარიში ენთო — 3:0. ამის შემდეგ მასპინძლები ცოტაოდენ დამშვიდნენ, სტუმრებმაც სული მოითქვეს, თუმცა დროებით… 42-ე წუთზე ფერნანდო ტორესის პასით ოსკარმა ანგარიშში სხვაობა კიდევ უფრო გაზარდა — 4:0.

მეორე ტაიმში მატჩის სცენარი არ შეცვლილა, უპირატესობას კვლავ „პენსიონერები“ ფლობდნენ. 66-ე წუთზე ოსკარმა დუბლი გაიფორმა. ერთ წუთში ახალგაზრდა ბრაზილიელი ნახევარმცველის ნაცვლად მოედანზე „ჩელსის“ ახალწვეული მოჰამედ სალაჰი გამოვიდა. ეგვიპტელი ფეხბურთელი აქტიურად ჩაერთო თამაშში და 71-ე წუთზე გოლი მანაც გაიტანა — 6:0.

საბოლოო ჯამში, „ჩელსიმ“ „არსენალი“ ანგარიშით 6:0 დაამარცხა. აი, ასე ჩაუმწარდა საიუბილეო მატჩი არსენ ვენგერს.

მიმდინარე წელს „არსენალი“ ასე სამარცხვინოდ უკვე მეორედ დამარცხდა. მანამდე „მეთოფეები“ „ენფილდზე“ დაეცნენ, როდესაც „ლივერპულთან“ ანგარიშით 1:5 განადგურდნენ.

პირველადგილოსან „ჩელსის“ აქტივში 69 ქულა აქვს, მესამე პოზიციაზე მყოფ „არსენალს“ კი 62 ქულა დარჩა.

ინგლისის პრემიერლიგა
31-ე ტური
„ჩელსი“ — „არსენალი“ 6:0 (4:0)

„ჩელსი“: ჩეხი, კეჰილი, ტერი, ივანოვიჩი, ასპილიკუეტა, დავიდ ლუისი (ობი მიკელი 72′), მატიჩი, ოსკარი (სალაჰი 67′), შიურლე, აზარი, ეტოო (ტორესი 10′).
მთავარი მწვრთნელი: ჟოზე მოურინიო.
„არსენალი“: შჩესნი, სანია, მერტეზაკერი, კოსელნი (ჯენკონსონი 46′), გიბსი, არტეტა, როსიცკი, კაზორლა, ოქსლეიდ-ჩემბერლენი (ფლამინი 46′), პოდოლსკი (ვერმალენი 24′), ჟირუ.
მთავარი მწვრთნელი: არსენ ვენგერი
გოლები: ეტოო 5′, შიურლე 7′, აზარი 17′ (პენ), ოსკარი 42′, 66′, სალაჰი 71′.
გაფრთხილება: როსიცკი 52′.
გაძევება: გიბსი 15′.
მთავარი მსაჯი: ანდრე მარინერი.

ბექა დოგრაშვილი

დევიდ მოიესის შედეგის საოცარი დამთხვევა

Posted on by ბექა დოგრაშვილი

„მანჩესტერ იუნაიტედის“ მთავარმა მწვრთნელმა დევიდ მოიესმა შარშანდელი მაჩვენებელი თითქმის ზუსტად გაიმეორა.

შარშან მოიესის ხელმძღვანელობით ლივერპულის „ევერტონს“ პრემიერლიგის 29-ე ტურის შემდეგ აქტივში 48 ქულა, 46 გატანილი და 35 მიღებული გოლი ჰქონდა.

წელს მოიესის თავკაცობით „მანჩესტერ იუნაიტედს“ პრემიერლიგის 29-ე ტურის შემდეგ აქტივში 48 ქულა, 46 გატანილი და 34 მიღებული გოლი აქვს.

ირონიად ნუ მიიღებთ, თუ ვიტყვით, რომ მოიესს პირადი პროგრესი აქვს — შარშანდელთან შედარებით მისმა გუნდმა ერთი ბურთით ნაკლები გაუშვა.

ბექა დოგრაშვილი

რუნი: „ეს ჩემი კარიერის ერთ-ერთი ყველაზე ცუდი დღე იყო“

Posted on by ბექა დოგრაშვილი

ინგლისის პრემიერლიგის 30-ე ტურის ცენტრალური შეხვედრა „ოლდ ტრაფორდზე“ გაიმართა, სადაც „მანჩესტერ იუნაიტედმა“ „ლივერპული“ მიიღო და ანგარიშით 0:3 განადგურდა. მატჩის შემდეგ „წითელი ეშმაკების“ თავდამსხმელი უეინ რუნი დაფიქსირებული შედეგით იმედგაცრუებას ვერ მალავდა.

„ეს მთელი ჩემი საფეხბურთო კარიერის ერთ-ერთი ყველაზე ცუდი დღე იყო. ძნელია, ამას შეეგუო, თუმცა „ლივერპულს“ პატივი უნდა მივაგოთ, მეტოქემ ძალიან კარგად ითამაშა.

არავის არ სურს საკუთარ მოედანზე დამარცხება, მით უფრო ისე, როგორც ჩვენ დაგვემართა“, – რუნის სიტყვები „სქაი სპორტსმა“ გამოაქვეყნა.

ბექა დოგრაშვილი

ჯერარდი: „პრემიერლიგის მოსაგებად ვიბრძვით“

Posted on by ბექა დოგრაშვილი

„ლივერპულის“ კაპიტანმა სტივენ ჯერარდმა განაცხადა, რომ „მანჩესტერ იუნაიტედის“ დამარცხებით მერსისაიდულმა გუნდმა ინგლისის ჩემპიონობაზე საფუძვლიანი პრეტენზია გამოთქვა.

„მანჩესტერ იუნაიტედი“ ფანტასტიური გუნდია. პრემიერლიგის გუნდების სტადიონებიდან „ოლდ ტრაფორდზე“ სტუმრად თამაში ერთ-ერთი ყველაზე რთულია. მოედანზე მატჩის დაწყებიდან დასრულებამდე დომინანტი ჩვენი გუნდი იყო და მოოედანი ცოტა იმედგაცრუებულმაც დავტოვერთ, რადგან მეტის გატანა შეგვეძლო. ვაჩვენეთ, რომ საჩემპიონო ტიტულზე პრეტენზია გვაქვს და ბოლომდე ვიბრძოლებთ“, – განუცხადა სტივ ჯერარდმა „სქაი სპორტსის“ ჟურნალისტს.

შეგახსენებთ, რომ პრემიერლიგის 30-ე ტურში „ლივერპულმა“ სტუმრად „მანჩესტერ იუნაიტედი“ ანგარიშით 3:0 გაანადგურა. ჯერარდმა თერთმეტმეტრიანი დარტყმებით დუბლი გაიფორმა, ერთი გოლი კი ლუის სუარესის ანგარიშზეა.

„ენფილდროუდელებს“ სატურნირო ცხრილში მეორე ადგილი აქვთ დაკავებული და ლიდერ ლონდონის „ჩელსის“ 4 ქულით ჩამორჩებიან.

ბექა დოგრაშვილი

„ლივერპულმა“ „ოლდ ტრაფორდზე“ „მანჩესტერ იუნაიტედი“ დასცა

Posted on by ბექა დოგრაშვილი

ინგლისის პრემიერლიგის 30-ე ტურის ცენტრალური მატჩი „ოლდ ტრაფორდზე“ გაიმართა, სადაც „მანჩესტერ იუნაიტედმა“ „ლივერპული“ მიიღო. როდესაც ერთმანეთს ეს გუნდები ხვდებიან, ნაკლები მნიშვნელობა ექცევა იმას, თუ რა პოზიციები უკავიათ გუნდებს სატურნირო ცხრილში, ვინაიდან ეს მატჩი გაცილებით პრინციპულ ხასიათს ატარებს. შეხვედრის მნიშვნელობიდან გამომდინარე, თამაში, ტრადიციულად, მეტად მჭიდრო ბრძოლაში წარიმართა. შესაბამისად, ბევრი იყო ჯარიმა, პირველ ტაიმში მარუან ფელაინის სისხლიც კი ადინეს. ფეხბურთელები არც საკუთარ თავს და არც მეტოქე გუნდის მოთამაშეებს არ ინდობდნენ. მჭიდრო ბრძოლის მიუხედავად, განსაკუთრებით ფრთხილად მოქმედებდნენ შეხვედრის საწყის წუთებში.

მატჩის პირველ ნახევარში სათამაშო უპირატესობას „წითელი ეშმაკები“ ფლობდნენ, თუმცა სათქმელია, რომ ბრენდან როჯერსის ფეხბურთელები ტაქტიკურად კარგად იყვნენ მომზადებულნი, პოზიციურადაც მშვენივრად ირჯებოდნენ და მასპინძელთა შანსებიც მინიმუმამდე მცირდებოდა. სამაგიეროდ, სტუმრებმა განახორციელეს რამდენიმე მწვავე შეტევა. განსაკუთრებით აქტიურად ირჯებოდა სუარესი-სტარიჯის დუეტი. ურუგვაელი თავდამსხმელის ერთ-ერთი გალაშქრების დროს კი მასპინძელთა ბრაზილიელ მცველ რაფაელს საკუთარ საჯარიმო მოედანზე ბურთი ხელზე მოხვდა, რაც მთავარ არბიტრს ყურადღების გარეშე არ დაუტოვებია. მარკ კლატენბურგმა თერთმეტმეტრიანი ნიშნულისკენ მიუთითა. ბურთთან „ლივერპულის“ კაპიტანი სტივენ ჯერარდი მივიდა და 34-ე წუთზე ანგარიშიც გაიხსნა — 0:1. ტაიმი მერსისაიდული გუნდის მინიმალური გამარჯვებით დასრულდა.

შეხვედრის მეორე ნახევარი „მანჩესტერ იუნაიტედისთვის“ კოშმარულად დაიწყო. 46-ე წუთზე სტუმართა უელსელი ნახევარმცველი ჯო ალენი ფილ ჯონსმა საკუთარ საჯარიმო მოედანზე წააქცია. კლატენბურგმა უყოყმანოდ მეორე პენალტი დანიშნა. თერთმეტმეტრიანის შესრულება ამჯერადაც ჯერარდმა ითავა და კვლავ გაიტანა — 0:2. მასპინძელთა მდგომარეობა კიდევ უფრო დამძიმდა. სამართლიანობა მოითხოვს აღინიშნოს, რომ ხუთ წუთში მერსისაიდელთა მცველმა გლენ ჯონსონმა საკუთარ საჯარიმო მოედანზე ხელით ითამაშა, თუმცა არბიტრმა მომენტი უყურადღებოდ დატოვა. სამაგიეროდ, 78-ე წუთზე მასპინძელთა კარის მიმართულებით მესამე პენალტი დაინიშნა. მომენტის განმეორებით ჩვენებაზე გამოჩნდა, რომ ნემანია ვიდიჩს სტარიჯი არ წაუქცევია, თუმცა კლატენბურგმა თამაშის წესის დარღვევა მიიჩნია, სერბი მცველი გააძევა და თერთმეტმეტრიანი დარტყმა დანიშნა. ჯერარდის დარტყმული ამჯერად კარის ძელს მოხვდა. რიცხობრივ უმრავლესობაში დარჩენილმა „ლივერპულმა“ სათამაშო უპირატესობა იგდო ხელთ. გაფუჭებული პენალტიდან ორიოდე წუთში სტარიჯი მართლაც წააქციეს „წითელი ეშმაკების“ საჯარიმოში, თუმცა კლატენბურგმა მომენტი უყურადღებოდ დატოვა. „ლივერპულმა“ მესამე გოლი მაინც გაიტანა. შედეგიანი კომბინაცია მეკარესთან ერთი ერთზე გასულმა სუარესმა დააგვირგვინა. მართალია, მასპინძლები თამაშგარე მდგომარეობის დაფიქსირებას მოითხოვდნენ, მაგრამ არბიტრმა გოლი ჩათვალა — 0:3.

ამრიგად, „ოლდ ტრაფორდზე“ „ლივერპულმა“ „მანჩესტერ იუნაიტედი“ დიდებულ სტილში გამანადგურებელი ანგარიშით 3:0 დაამარცხა. მერსისაიდელებმა 62 ქულას მოიყარეს თავი და სატურნირო ცხრილის მეორე პოზიციას დაუბრუნდნენ. რაც შეეხება დევიდ მოიესის გუნდს, „მანჩესტერ იუნაიტედი“ 48 ქულით მეშვიდე ადგილზე დარჩა.

ინგლისის პრემიერლიგა
30-ე ტური
„მანჩესტერ იუნაიტედი“ — „ლივერპული“ 0:3 (0:1)

„მანჩესტერ იუნაიტედი“: დე ხეა, ვიდიჩი, ევრა, რაფაელი, ჯონსი, კერიკი, ფელაინი (კლევერლი 76′), იანუზაი (უელბეკი 76′), ვან პერსი, რუნი, მატა (ფერდინანდი 87′).
მთავარი მწვრთნელი: დევიდ მოიესი.
„ლივერპული“: მინიოლე, ჯონსონი, აგერი, შკრტელი, ფლანაგანი, ჯერარდი (ლუკას ლეივა 86′), ალენი, ჰენდერსონი, სტერლინგი (კოუტინიო 72′), სუარესი, სტარიჯი (ასპასი 90+2′).
მთავარი მწვრთნელი: ბრენდან როჯერსი.
გოლები: ჯერარდი 34′ (პენ), ჯერარდი 46′ (პენ), სუარესი 84′.
გამოუყენებელი პენალტი: ჯერარდი 78′ (ძელი).
გაფრთხილებები: რაფაელი 32′, ვიდიჩი 71′ — ფლანაგანი 31′, ჯერარდი 37′, შკრტელი 54′.
გაძევება: ვიდიჩი 78′.
მთავარი მსაჯი: მარკ კლატენბურგი.

ბექა დოგრაშვილი

მოიესი: „ფავორიტი „ლივერპულია“

Posted on by ბექა დოგრაშვილი

ინგლისის პრემიერლიგის 30-ე ტურის ცენტრალური მატჩი „ოლდ ტრაფორდზე“ გაიმართება, სადაც „მანჩესტერ იუნაიტედი“ „ლივერპულს“ მიიღებს. „წითელი ეშმაკების“ მთავარმა მწვრთნელმა დევიდ მოიესმა განაცხადა, რომ დამდეგ შეხვედრაში ფავორიტად მერსისაიდული გუნდი მიიჩნევა, თუმც მისი ფეხბურთელები სასურველი შედეგის მისაღწევად და სატურნირო ცხრილში მდგომარეობის გამოსასწორებლად ძალ-ღონეს არ დაიშურებენ.

„დამდეგ მატჩში ფავორიტის როლს „ლივერპული“ ირგებს. მერსისაიდული გუნდი ძალიან კარგ სეზონს ატარებს, თუმცა ჩვენ ყველაფერს გავაკეთებთ იმისთვის, რომ გავიმარჯვოთ. უნდა აღვნიშნო ისიც, რომ ის პოზიცია არ გვიკავია, რასაც ჩვენგან მოელიან, თუმც წინ საინტერესო მატჩები გველის“, – ციტირებს მოიესის სიტყვებს „ბი ბი სი“.

ცნობისთვის, მატჩი „მანჩესტერ იუნაიტედსა“ და „ლივერპულს“ შორის კვირას, თბილისის დროით 17:30 საათზე დაიწყება და მას მარკ კლატენბურგი განსჯის.

ბექა დოგრაშვილი

პრემიერლიგის თებერვლის თვის საუკეთესო ფეხბურთელი და მწვრთნელი დაასახელეს

Posted on by ბექა დოგრაშვილი

ინგლისის პრემიერლიგის თებერვლის თვის საუკეთესო ფეხბურთელისა და მწვრთნელის ვინაობა დასახელდა.

თვის საუკეთესო მოთამაშედ „ლივერპულის“ თავდამსხმელი დანიელ სტარიჯი დასახელდა. ინგლისელმა ფეხბურთელმა თებერვალში ჩატარებულ ოთხ მატჩში ხუთი გოლი გაიტანა და ორი საგოლე გადაცემა მიითვალა.

თვის საუკეთესო მწვრთნელად „ვესტ ჰემის“ თავკაცი სემ ელერდაისი დასახელდა. მისი ხელმძღვანელობით აღმოსავლეთლონდონურმა გუნდმა თებერვლის თვეში ოთხიდან ოთხი გამარჯვება მოიპოვა, 31 ქულა დააგროვა და სატურნირო ცხრილში მე-10 პოზიცია დაიკავა. „ვესტ ჰემმა“ თებერვალში ცხრა გოლი გაიტანა და მხოლოდ ერთი გაუშვა. ელერდაისი მეხუთედ გახდა პრემიერლიგის თვის საუკეთესო მწვრთნელი, თუმც პირველად უკანასკნელი შვიდი წლის განმავლობაში.

ბექა დოგრაშვილი