ჭდე: ერიკ თოჰირი

“ინტერის” პრეზიდენტი: “ჩვენ მსოფლიოს საუკეთესო კლუბთა ათეულში დავბრუნდებით”

Posted on by ბექა დოგრაშვილი

მილანის “ინტერის” პრეზიდენტმა ერიკ თოჰირმა, რომელიც კლუბს 2013 წლის ოქტომბრიდან მართავს, განაცხადა, რომ “ნერიაძური” უახლოეს მომავალში მსოფლიოს საუკეთესო კლუბთა ათეულში მოხვდება.

“კვლავ ვფიქრობ იმაზე, რომ “ინტერი” მსოფლიოს საუკეთესო კლუბთა ათეულში უნდა იყოს, თუმცა ამისთვის დრო არის საჭირო. ყველამ კარგად ვიცით, რომ რობერტო მანჩინი ნამდვილი პროფესიონალია, ის მუყაითად მუშაობს იმისთვის, რომ კარგი გუნდი შექმნას.

უკანასკნელი რამდენიმე მატჩია, გოლს ბოლო წუთებზე ვუშვებთ, თუმცა გუნდის თავდაჯერებულობა მატულობს. ფეხბურთელებმა კონცენტრაცია 94-ე წუთამდე უნდა შეინარჩუნონ, თუნდაც ანგარიშით 2:0 იგებდნენ. ეს ფეხბურთია და აქ ყველაფერი ხდება, ამიტომაც არის სპორტის ყველაზე მიმზიდველი სახეობა.

თუ გვინდა, რომ “ინტერი” კვლავ გახდეს დიდი კლუბი, პირველ რიგში – გუნდს მხარი უნდა დავუჭიროთ”, – განაცხადა თოჰირმა მილანური კლუბის ოფიციალური ტელეარხის ეთერში.

შეგახსენებთ, რომ “ინტერი” დღეს ევროპის ლიგის მეთექვსმეტედფინალურ ეტაპზე გლაზგოს “სელტიკთან” განმეორებით მატჩს გამართავს. პირველი შეხვედრა ფრედ, ანგარიშით 3:3 დასრულდა.

 

ეტოო და მოურინიო „ინტერში“ ბრუნდებიან?

Posted on by ბექა დოგრაშვილი

ლონდონის „ჩელსის“ თავდამსხმელი სამუელ ეტოო ზაფხულში, სავარაუდოდ, კლუბს დატოვებს. ბრიტანული „დეილი მირორის“ ცნობით, 33 წლის ფეხბურთელი „პენსიონერებთან“ კონტრაქტის გახანგრძლივებას არ აპირებს. გამოცემის თანახმად, კამერუნელი ფორვარდის თავისთან ხილვა მილანის „ინტერის“ ხელმძღვანელობას სურს და მხარეებს შორის მოლაპარაკება უკვე დაწყებულა კიდეც.

შეგახსენებთ, რომ ეტოო „ნერაძურის“ ღირსებას 2009-დან 2011 წლამდე იცავდა. ამ პერიოდის განმავლობაში მან 101 მატჩი ჩაატარა, 53 გოლი გაიტანა და 22 შედეგიანი გადაცემაც მიითვალა. ეტოომ „ინტერში“ ექვსი ტიტული მოიგო, რომელთა შორის ჩემპიონთა ლიგისა და საკლუბო მსოფლიოს ჩემპიონატის თასებიც გახლავთ.

ამავე დროს, Football Italia იუწყება, რომ მილანური კლუბის ინდონეზიელი მფლობელი ერიკ თოჰირი „ინტერში“ ჟოზე მოურინიოს დაბრუნებასაც აპირებს. სხვათა შორის, პორტუგალიელმა სპეციალისტმა რამდენჯერმე განაცხადა, რომ „ნერაძურიში“ კარიერის საუკეთესო წლები გაატარა და ოდესმე „სან სიროზე“ დაბრუნდება. შეგახსენებთ, რომ მოურინო „ინტერს“ 2008-დან 2010 წლამდე თავკაცობდა. ამ დროის განმავლობაში პორტუგალიელმა მწვრთნელმა გუნდთან ერთად ხუთი ტიტული მოიგო.

ბექა დოგრაშვილი

ერიკ თოჰირი: „ინტერს“ უმაღლესი დონის მოთამაშე სჭირდება“

Posted on by ბექა დოგრაშვილი

მილანის „ინტერის“ მფლობელმა ერიკ თოჰირმა კლუბის სატრანსფერო გეგმებზე ისაუბრა. მისი თქმით, „ნერიაძურის“ უმაღლესი დონის ფეხბურთელი სჭირდება. შეგახსენებთ, რომ მილანელებს მომდევნო სეზონში „მანჩესტერ იუნაიტედის“ ამჟამინდელი მცველი ნემანია ვიდიჩი შეუერთდება.

„ახალი მოთამაშე გვჭირდება. ჯეკო, მორატა, ტორესი? ეს პრესაში გავრცელებული ჭორებია. ჩვენ უმაღლესი დონის ფეხბურთელი გვინდა, რომელიც ახალ დონეზე გადაგვიყვანს. ევრა? არც მასთან კონტაქტზე არ გავსულვართ. სანია? მან ინგლისში დარჩენა არჩია. არადა, ცენტრალური დაცვის ფეხბურთელი ნამდვილად გვჭირდება“, – თოჰირის სიტყვებს Football Italia ციტირებს.

 

მორატი: „ინტერში“ დაბრუნება ქერა ლამაზმანთან ერთად გაქცევას ემგვანებოდა“

Posted on by ბექა დოგრაშვილი

მილანის „ინტერის“ ყოფილმა მფლობელმა მასიმო მორატიმ კლუბში დაბრუნების ალბათობა გამორიცხა.

„კლუბის პრეზიდენტის პოსტზე დაბრუნება სიგიჟის ტოლფასი იქნებოდა. შესაძლოა, ეს ნაბიჯი ერთ დღეს ჩემმა შვილმა გადადგას, თუმცა მე ამას ნამდვილად არ ვიზამ.

ჩემი „ინტერში“ დაბრუნება ქერა ლამაზმანთან ერთად გაქცევას ემგვანებოდა. მოხარული ვარ, რომ კლუბის პარტნიორად ვითვლები. „ინტერი“ ჩემს გულში დარჩა და თოჰირს წარმატებას ვუსურვებ“, – იტალიელი ბიზნესმენის სიტყვები Goal.com-მა გამოაქვეყნა.

მასიმო მორატი „ინტერს“ 1995-დან 2013 წლამდე ედგა სათავეში. შარშან კლუბი ინდონეზიელმა ბიზნესმენმა ერიკ თოჰირმა შეიძინა.

ბექა დოგრაშვილი

ერიკ თოჰირი: „ჩვენ ძანეტის ნებისმიერ გადაწყვეტილებას პატივს ვცემთ“

Posted on by ბექა დოგრაშვილი

ორიოდე დღის წინათ გაუწყებდით, რომ ლონდონის „ჩელსის“ მთავარ მწვრთნელ ჟოზე მოურინიოს თავის გუნდში მილანის „ინტერის“ ვეტერანი ფეხბურთელის, ხავიერ ძანეტის ხილვა მოუნდა. პორტუგალიელი სპეციალისტის სურვილს „ნერიაძურის“ პრეზიდენტი ერიკ თოჰირი გამოეხმაურა და აღნიშნა, რომ საქმე ისე წარიმართება, როგორც თავად ძანეტის მოესურვება.

„ძანეტი ჩვენი გუნდის ლეგენდაა, ჩვენ მის ნებისმიერ გადაწყვეტილებას პატივს ვცემთ. უახლოეს თვეებში განვიხილავთ, გააგრძელებს ის კარიერას თუ კლუბის დირექტორი გახდება“, – ციტირებს თოჰირის სიტყვებს Goal.com-ი.

ძანეტიმ, რომელმაც 2010 წელს მოურინიოს თავკაცობით ერთბაშად სამი ტიტული მოიგო, აღნიშნა, რომ პორტუგალიელ სპეციალისტთან ამ დრომდე კარგ ურთიერთობას ინარჩუნებს.

„მოურინიოსთან შესანიშნავი ურთიერთობა მაქვს. ხშირად ვსაუბრობს, მაგრამ ამ თემაზე არასდროს არ გვილაპარაკია. მჯერა, „ინტერის“ ქომაგებმა იციან, რას ვგრძნობ ჩვენი კლუბის მიმართ. ჩემი თავისთვის ხშირად მითქვამს, რომ „ინტერი“ ჩემი ცხოვრებაა… მინდა, რომ აქ დავრჩე. მეტი არც არაფერია სათქმელი.

მას შემდეგ, რაც ფეხბურთელი ვარ, ერთი ურყევი პოზიცია მაქვს: ორი შესაძლებლობაა – ან უნდა ითამაშო სასტარტო შემადგენლობაში, ან შეცვლაზე შეხვიდე. შესაძლებლობა მაქვს, გუნდს სარგებლობა კიდევ მოვუტანო, თუმცა ვფიქრობ, ისედაც ყველაფერი სწორი მიმართულებით მიდის“, – განაცხადა ხავიერ ძანეტიმ.

ბექა დოგრაშვილი

ერიკ თოჰირი: „ვიდიჩის „ინტერში“ ტრანსფერი 90 პროცენტით განხორციელებულია“

Posted on by ბექა დოგრაშვილი

მილანის „ინტერის“ პრეზიდენტმა ერიკ თოჰირმა დაადასტურა ინფორმაცია, რომ „მანჩესტერ იუნაიტედის“ ცენტრალური მცველი ნემანია ვიდიჩი კარიერას „მილანის „ინტერში“ გააგრძელებს. შეგახსენებთ, რომ 32 წლის სერბ მცველს სეზონის ბოლოს „წითელ ეშმაკებთან“ კონტრაქტი ეწურება. ფეხბურთელმა უკვე ოფიციალურად დაადასტურა, რომ ინგლისურ კლუბთან ხელშეკრულებას აღარ გაახანგრძლივებს.

„რაც შეეხება ვიდიჩს, ტრანსფერი 90 პროცენტით განხორციელებულია. როდესაც ყველაფერი გადაწყდება, ოფიციალურ განცხადებას გავაკეთებთ“, – აღნიშნა თოჰირმა.

ინდონეზიელმა ბიზნესმენმა „ინტერის“ ამჟამინდელი მდგომარეობის შესახებაც გააკეთა კომენტარი.

„ბოლო ორი მატჩი კარგად ჩავატარეთ. გუნდი კარგ ფორმაშია, კარგად დაბალანსებული და შეკრულია. ვალტერ სამუელის წყალობით დაცვის ხაზი კიდევ უფრო გაძლიერდა. კარგი დროება გვიდგას, მაგრამ ფეხბურთელებზე ზეწოლის განხორციელებას არ ვაპირებ. იმედი მაქვს, დამდეგ შეხვედრებში კარგ შედეგებს ვაჩვენებთ. ერნანესის შეძენამდე შეტევის მხოლოდ ერთი ვარიანტი გვქონდა, ახლა უკვე ცენტრიდან შეტევაც შეგვიძლია“, – აღნიშნა თოჰირმა.

ბექა დოგრაშვილი

ძანეტი, მილიტო და კამბიასო სეზონის ბოლოს „ინტერს“ დატოვებენ?

Posted on by ბექა დოგრაშვილი

Football Italia-ის ცნობით, არ არის გამორცხული, მიმდინარე სეზონის ბოლოს მილანის „ინტერი“ ერთბაშად სამმა არგენტინელმა ფეხბურთელმა დატოვოს. საუბარია ხავიერ ძანეტიზე, ესტებან კამბიასოსა და დიეგო მილიტოზე.

კლუბის ახალი მფლობელი ერკ თოჰირი გუნდის რეორგანიზაციას გეგმავს, რასაც შესაძლოა, აღნიშნული მოთამაშეები შეეწირნონ.

40 წლის ძანეტი, რომელიც „ინტერის“ ღირსებას 1995 წლიდან იცავს, კარიერის დასრულებაზე ფიქრობს. აღნიშნულ საკითხზე გადაწყვეტილების მიღებას „ნერიაძურის“ კაპიტანი ზაფხულში აპირებს. 34 წლის მილიტოს „ინტერთან“ მოქმედი ხელშეკრულება მიმდინარე წლის ივნისის თვეში ეწურება, ახალ შრომით ხელშეკრულებას კი ჯერჯერობით არ სთავაზობენ. რაც შეეხება კამბიასოს, ის შესაძლებელია, დარჩეს კლუბში, თუმც ხელფასი გაუნახევრდება. ამ დროისთვის, მას ჯამაგირის სახით წელიწადში 4,5 მილიონი ევრო აქვს.

ბექა დოგრაშვილი

ერიკ თოჰირი: „ინტერის“ გარდაქმნას 2-3 წელიწადი დასჭირდება“

Posted on by ბექა დოგრაშვილი

მილანის „ინტერისთვის“ მიმდინარე წელიწადი ძალზედ ცუდად დაიწყო: გუნდი ჯერ სერია A-ს გათამაშებაში რომის „ლაციოსთან“ დამარცხდა, შემდეგ კი იტალიის თასზე „უდინეზესთან“ წააგო და ტურნირს გამოეთიშა. ორივე შეხვედრა ანგარიშით 0:1 დასრულდა.

„ნერაძურის“ პრეზიდენტი ერიკ თოჰირი გულს არ იტეხს და იმის შესახებ საუბრობს, თუ როგორ აპირებს კლუბის განვითარებას.

„ნორმალურია, როცა გულშემატკივრები ზედიზედ ორ მატჩში დამარცხების გამო უკმაყოფილებას გამოთქვამენ. მეც უკმაყოფილო ვარ, რადგან თავადაც გულშემატკივარი გახლავართ.

ვთვლი, რომ ამ გუნდს კარგი პერსპექტივა აქვს, თუმცა სასურველი ბალანსი უნდა ვიპოვოთ.

რამდენიმე მოთამაშეს ვაკვირდებით. მოლაპარაკებები გრძელდება და მოხარულნი ვიქნებით, თუ ამ ფეხბურთელებს დავიმატებთ.

გუნდის გარდასაქმნელად შექმნილი გეგმის განხორციელებას 2-3 წელიწადი დასჭირდება. გარდამავალ პერიოდში ვიმყოფებით. იმედი მაქვს, რომ „ინტერი“ უკეთ ათამაშდება.

ვალტერ მაცარი გუნდისთვის იდეალური მწვრთნელია. ერთმანეთს სრულად ვენდობით“, – თოჰირის სიტყვები მილანური კლუბის ოფიციალურმა ვებ-გვერდმა გამოაქვეყნა.

„ინტერი“ მორიგ მატჩს სერია A-ს XIX ტურში „კიევოს“ წინააღმდეგ გამართავს. შეხვედრა 14 იანვარს, ჩვენი დროით 00:00 საათზე აიღებს სტარტს.

ბექა დოგრაშვილი

ხავიერ ძანეტი: „დავასრულებ თუ არა კარიერას მიმდინარე სეზონის ბოლოს?“

Posted on by ბექა დოგრაშვილი

მილანის „ინტერის“ კაპიტანმა ხავიერ ძანეტიმ კლუბის ახალი ხელმძღვანელობის შესახებ ისაუბრა. მოგეხსენებათ, გასული სეზონის ბოლოს „ნერაძურის“ მთავარი მწვრთნელის პოსტზე ვალტერ მაცარი დაინიშნა. მოგვიანებით კი, ინდონეზიელმა ბიზნესმენმა ერიკ თოჰირმა მასიმო მორატისგან კლუბი იყიდა.

„ეს წელი დავიწყეთ ახალ მწვრთნელთან ერთად, რომელიც ცდილობს, რომ ჩვენამდე მოიტანოს თავისი იდეები. ვმუშაობთ, რომ მის გეგმებს მივყვეთ. სწორ გზას ვადგავართ, მაგრამ გასაკეთებელი კიდევ ბევრია. მთავარი მიზანი საჩემპიონო რბოლაში დაბრუნებაა.

პრეზიდენტი თოჰირი ნათელი იდეების მქონე პიროვნებაა. იმედი გვაქვს, რომ „ინტერს“ მაღალ პოზიციაზე დავაბრუნებთ. ვცდილობთ, რომ გუნდი ახალ დონეზე გადავიყვანოთ. მადლობას ვუხდი კლუბის ქომაგებს, რომლებიც მუდმივად მხარს გვიჭერენ. მინდა, რომ მათ ყოველივე საუკეთესო ვუსურვო“, – აღნიშნა ძანეტიმ.

40 წლის არგენტინელი ფეხბურთელი სხვა თემებსაც შეეხო, მათ შორის იმასაც, თუ როდის აპირებს ბუცების ლურსმანზე დაკიდვას.

„რა არის ჩემი საიდუმლო? ვცდილობ, ჩემს თავს დავუმტკიცო, რომ კვლავ შემიძლია, თანაგუნდელებს დავეხმარო. საკმაოდ სერიოზული ტრავმა მქონდა, მაგრამ ახლა ჯანმრთელად ვარ.

ვიმედოვნებ, რომ 2014 წელი ბედნიერი იქნება ჩემთვის და ჩემი ოჯახისთვის. იმედი მაქვს, სეზონის ბოლოს „ინტერი“ გარკვეულ წარმატებას მიაღწევს, რაც ყოველ ჩვენთაგანს გაახარებს.

დავასრულებ თუ არა კარიერას მიმდინარე სეზონის ბოლოს? ჯერ არ გადამიწყვეტია. ახლა ვფიქრობ, რომ შემიძლია, მოედანზე გუნდს სარგებელი მოვუტანო, თუმცა სეზონის ბოლოს კლუბის მეპატრონეებს მაინც შევხვდები. მინდა თუ არა, რომ კვლავ ვითამაშო? დიახ, მინდა, მაგრამ წინ კიდევ ექვსი თვეა და მანამდე შეიძლება ბევრი რამ მოხდეს“, – ხავიერ ძანეტის სიტყვები „ინტერის“ ოფიციალურმა ვებ-გვერდმა გამოაქვეყნა.

ბექა დოგრაშვილი

ერიკ თოჰირი: „მილანურ დერბის ცოცხლად პირველად ვუყურებ“

Posted on by ბექა დოგრაშვილი

იტალიის სერია А-ს მე-17 ტურის ცენტრალური მატჩი „ჯუზეპე მეაცაზე“ შედგება, სადაც „ინტერი“ თანაქალაქელ „მილანს“ მიიღებს. „ნერიაძურის“ ახალმა მფლობელმა ერიკ თოჰირმა იმედი გამოთქვა, რომ საინტერესო მატჩი გამოვა. მისი თქმით, დერბის სტადიონიდან მიადევნებს თვალყურს და არა – ტელევიზიის საშუალებით.

„გუნდის შედეგებზე არ ვღელავ, რადგან სამწვრთნელო შტაბს და ფეხბურთელებს ვენდობი. „მილანთან“ მატჩი გველის. არ ვიქნები ორიგინალური, თუ ვიტყვი, რომ საინტერესო შეხვედრას ველი. ტელევიზიის საშუალებით არაერთხელ მიმიდევნებია მილანური დერბისთვის თვალყური. ამ მატჩს ცოცხლად პირველად ვუყურებ. იმედი მაქვს, შეხვედრას „ინტერი“ მოიგებს, თუმცა ეს ადვილი არ იქნება“, – თოჰირის სიტყვები Football Italia-მ გამოაქვეყნა.

ცნობისთვის, მატჩი „ინტერსა“ და „მილანს“ შორის კვირას, თბილისის დროით 23:45 საათზე დაიწყება. როგორც მოგეხსენებათ, „ნერიაძურის“ ქომაგებმა „ნაპოლის“ წინააღმდეგ გამართულ მატჩში ნეაპოლელთა მიმართ გამოვლენილი აგრესიის გამო დისკვალიფიკაცია მიიღეს. მათ მილანურ დერბიში დასწრების უფლება არ ექნებათ, თუმცა აღნიშნული გადაწყვეტილება შეიძლება შეიცვალოს. საბოლოო განაჩენს ფედერალური სასამართლო დღეს გამოიტანს.

ბექა დოგრაშვილი

„ინტერის“ მფლობელი: „მესის შესაძლო ტრანსფერი უნდა განვიხილოთ“

Posted on by ბექა დოგრაშვილი

„კორიერე დელო სპორტის“ ცნობით, მილანის „ინტერის“ მფლობელმა ერიკ თოჰირმა ხუმრობით განაცხადა, რომ ზამთრის სატრანსფერო პერიოდში „ბარსელონადან“ ლიონელ მესის გადმობირებას შეეცდება.

„ვნახოთ. ეს საკითხი უნდა განვიხილოთ. ჯერ კლუბის ხელმძღვანელებს უნდა ვესაუბრო“, – განაცხადა „ინტერის“ მფლობელმა.

ცნობისთვის, „ინტერი“ თოჰირის თვალწინ შვეიცარიის მეორე დივიზიონის კლუბ „კიასოსთან“ გამართულ ამხანაგურ მატჩში ანგარიშით 0:1 დამარცხდა.

 

ხავიერ ძანეტი – კარიერის დასრულება ჯერ ადრეა

Posted on by ბექა დოგრაშვილი

მილანის „ინტერის“ ახალი მფლობელი ერიკ თოჰირი „ნერიაძურის“ 40 წლის მცველ ხავიერ ძანეტისთან კონტრაქტის გახანგრძლივებას აპირებს. გავრცელებული ინფორმაციის თანახმად, არგენტინელი ფეხბურთელი შემოთავაზებას დასთანხმდება.

ამის შესახებ იტალიური გამოცემა „ლა გაძეტა დელო სპორტი“ წერს.

ამასთან, „ინტერი“ მზად არის, ძანეტის ნებისმიერ მომენტში შესთავაზოს კლუბის ვიცე-პრეზიდენტის ან ტექნიკური დირექტორის პოსტი.

თავად არგენტინელი ფეხბურთელი აცხადებს: „კარიერის დასრულებაზე არ ვფიქრობ. მომავალში ჩემს თავს ვხედავ როგორც „ინტერის“ დირექტორად და არა – როგორც მწვრთნელად“

უახლოეს მომავალში ძანეტი „ნერიაძურის“ ახალ მფლობელთან ამ საკითხის განხილვას აპირებს.

შეგახსენებთ, რომ მიმდინარე წლის ოქტომბრის თვეში ინდონეზიელმა ბიზნესმენმა ერიკ თოჰირმა მასიმო მორატისგან ოფიციალურად შეისყიდა „ინტერის“ აქციათა დიდი ნაწილი.

ბექა დოგრაშვილი