როგორც რამდენიმე დრის წინათ მოგახსენეთ, კოპა ამერიკის ფინალური მატჩის მიმდინარეობის დროს უსიამოვნო ინციდენტი მოხდა. ჩილელმა გულშემატკივრებმა ლიონელ მესის ოჯახს შეურაცხყოფა მიაყენეს. საქმე კინაღამ ხელჩართულ ჩხუბამდე მივიდა.
Telefe Noticias-ის ჟურნალისტმა მესის აღნიშნული ინციდენტის შესახებ კომენტარის გაკეთება სთხოვა. არგენტინელი ფეხბურთელი მხოლოდ მოკლე ფრაზით შემოიფარგლა:
“მე კარგად ვარ, მადლობა”.
“მანჩესტერ იუნაიტედის” მთავარი მწვრთნელი ლუი ვან გაალი გამოტყდა, რომ “ბარსელონას” ლიდერ ლეო მესის ძალიან აფასებს.
“მესი თითქმის თითოეულ მატჩში საოცარი დონის ფეხბურთს გვიჩვენებს.
მიუხედავად უდიდესი ნიჭისა, ის ყოველთვის ძალზედ მოკრძალებულია. ვაფასებ მესის ამ თვისებას და მას დიდ პატივს ვცემ”, – ციტირებს ვან გაალის სიტყვებს საფეხბურთო პორტალი Goal.com-ი.
ლიონელ მესიმ არგენტინის ნაკრებთან ერთად ვერაფრით ვერ მოიგო ვერც კოპა ამერიკა და ვერც მსოფლიოს ჩემპიონატი. დასრულდა სამხრეთ ამერიკის პირველობა და “ოქროს ბურთის” ოთხგზის მფლობელი ამჯერადაც ვერცხლის მედლის ამარა დარჩა.
ლეო მესიმ 2015 წლის კოპა ამერიკის გათამაშებაზე ექვსი მატჩი ჩაატარა, ერთი გოლი გაიტანა და სამი საგოლე პასი გააკეთა. მას არგენტინის ნაკრებში სულ 103 შეხვედრა აქვს ჩატარებული, გაიტანა 46 ბურთი და გააკეთა 30 შედეგიანი გადაცემა.
|
ფინალური ტურნირი: |
წელი: |
მ |
გ |
პ |
შედეგი: |
| მსოფლიოს ჩემპიონატი | 2006 | 3 | 1 | 1 | მეოთხედფინალი |
| კოპა ამერიკა | 2007 | 6 | 2 | 1 | მე-2 ადგილი |
| მსოფლიოს ჩემპიონატი | 2010 | 5 | 0 | 1 | მეოთხედფინალი |
| კოპა ამერიკა | 2011 | 4 | 0 | 3 | მეოთხედფინალი |
| მსოფლიოს ჩემპიონატი | 2014 | 7 | 4 | 1 | მე-2 ადგილი |
| კოპა ამერიკა | 2015 | 6 | 1 | 3 | მე-2 ადგილი |
| სულ (კოპა ამერიკა) | 16 | 3 | 7 | ||
| სულ (მსოფლიოს ჩემპიონატი) | 15 | 5 | 3 | ||
| სულ (ორივე ტურნირი) | 31 | 8 | 10 |
მ — მატჩი;
გ — გოლი;
პ — საგოლე პასი.
კოპა ამერიკის ფინალური მატჩის მიმდინარეობის დროს უსიამოვნო ინციდენტი მოხდა. ჩილელმა გულშემატკივრებმა ლიონელ მესის ოჯახს შეურაცხყოფა მიაყენეს. არგენტინელთა კაპიტნის უფროსი ძმის, როდრიგოს მიმართულებით სხვადასხვა საგნები ისროლეს. კონფლიქტურ სიტუაციაში ჩილეში არგენტინის ელჩი ხინეს გონსალეს გარსია ჩაერია, რომელიც მესის ნათესავებს სხვა ადგილზე გადანაცვლებაში დაეხმარა.
საბოლოო ჯამში, მესის დედა სელიას, მამა ხორხესა და ძმებს – როდრიგოსა და მატიასს საკომენტატორო ჯიხურიდან მოუწიათ მატჩისთვის თვალყურის მიდევნება. “დეილი მეილის” ცნობით, ჩილელმა ქომაგებმა სერხიო აგუეროს ნათესავებიც შეურაცხყვეს.
არგენტინის ნაკრების კაპიტანმა ლიონელ მესიმ კოპა ამერიკის ფინალურ მატჩში ჩილესთან დამარცხების შემდეგ ტურნირის საუკეთესო მოთამაშის ჯილდოს მიღებაზე უარი განაცხადა.
ამ ინფორმაციას ავტორიტეტული იტალიელი სპორტული ჟურნალისტი ტანკრედი პალმერი ავრცელებს. მისი თქმით, მესის არ სურდა 2014 წლის მსოფლიოს ჩემპიონატის ფინალური მატჩის შემდეგ მომხდარი განმეორებულიყო, როდესაც არგენტინელი ფეხბურთელი ტურნირის საუკეთესო მოთამაშედ დაასახელეს, რასაც ფეხბურთის გულშემატკივართა ნაწილი კატეგორიულად არ დაეთანხმა.
“ცდილობდნენ, მესი დაერწმუნებინათ, რის გამოც დაჯილდოების ცერემონია 10 წუთით გადაიდო. ამ დროის განმავლობაში სტადიონზე ყველა გაოცებული იყო, რადგან მოედანზე არაფერი არ ხდებოდა”, – დაწერა სოციალურ ქსელში ტანკრედი პალმერიმ.
მესის უარის შემდეგ ორგანიზატორებმა ტურნირის საუკეთესო ფეხბურთელის ჯილდოს მოხსნის გადაწყვეტილება მიიღეს. შესაბამისად, წლევანდელი კოპა ამერიკის საუკეთესო მოთამაშე არ დაჯილდოებულა.
კოპა ამერიკის ექვს მატჩში ლეო მესიმ ერთი გოლი გაიტანა და სამი საგოლე გადაცემა გააკეთა.
საინფორმაციო სააგენტო AFP ერთ საინტერესო ისტორიას გადმოგვცემს. თურმე, ტყვეობაში მყოფი არგენტინელი ფერმერი ლეო მესის სახელმა იხსნა.
ფერმერი სანტიაგო მენენდესი ჰყვება, რომ იგი უცნობმა პირებმა ნიგერიაში გაიტაცეს. მისი თქმით, თავდამსხმელებმა ესპანური ენა არ იცოდნენ და მათთან კონტაქტის დასამყარებლად არგენტინის ნაკრებისა და “ბარსელონას” ლიდერ ლიონელ მესის სახელის ძახილი დაიწყო. ორი დღის შემდეგ არგენტინელი ფერმერი სრულიად უსასყიდლოდ გაათავისუფლეს.
კოპა ამერიკის წლევანდელი გათამაშების მეოთხედფინალურ ეტაპზე კოლუმბიის ნაკრების მეტოქე არგენტინის ეროვნული გუნდი იქნება. კოლუმბიელთა ნახევარმცველმა ხამეს როდრიგესმა “ალბისელესტეს” ლიდერის, ლეო მესის შესახებ ისაუბრა.
“მესი სხვა სამყაროდანაა. ის განსაკუთრებული მოთამაშეა და ჩემი მასთან შედარება უმართებულოა. ასეთი შედარება ლეოს მიმართ უსამართლო იქნება”, – ხამეს როდრიგესის კომენტარი “მუნდო დეპორტივომ” გამოაქვეყნა.
მატჩი არგენტინისა და კოლუმბიის ნაკრებებს შორის 27 ივნისს, თბილისის დროით შუაღამის 03:30 საათზე დაიწყება.
არგენტინელმა მსახიობმა მარტინ ბოსიმ “ბარსელონასა” და არგენტინის ნაკრების ლიდერის, ლიონელ მესის პაროდია გააკეთა. ვიდეოში “მესი” საკუთარ შვილზე საუბრობს, მღერის სიმღერებსა და განასახიერებს წიწილას.
გთავაზობთ ამ სახალისო ვიდეოს.
მადრიდის “ატლეტიკოს” მთავარმა მწვრთნელმა დიეგო სიმეონემ მსოფლიოს საუკეთესო ფეხბურთელი დაასახელა. არგენტინულ ტელეარხ TyC-ისთვის მიცემულ ინტერვიუში სიმეონემ განაცხადა, რომ კრიშტიანუ რონალდუსა და ლიონელ მესის შორის შედარებაც კი არამართებულია.
“მესი პირველია. არ არსებობს მასთან ახლოს მყოფი მოთამაშე. შედარება ყოველთვის უთანხმოებას იწვევს. ასეთ დროს ერთი მხარე სამართლიანი არ არის”.
სიმეონეს მესისა და დიეგო მარადონას შედარებაც სთხოვეს.
“მარადონა და მესი სხვადასხვა პერიოდსა და განსხვავებულ პოზიციებზე თამაშობდნენ. მესი უფრო მეტად დამრტყმელია, მარადონა კი მთელი მოედნის მოთამაშე იყო”, – დასძინა სიმეონემ.
“ატლეტიკოს” თავკაცმა ისიც აღნიშნა, რომ სამართლიანი არ არის, არ ჩაითვალოს მესი ყველა დროის საუკეთესო ფეხბურთელად მხოლოდ იმის გამო, რომ მას მსოფლიოს ჩემპიონატი მოგებული არ აქვს.
იტალიის ნაკრების თავდამსხმელმა ანტონიო კასანომ, რომელიც ამჟამად თავისუფალი აგენტის სტატუსით სარგებლობს, კიდევ ერთხელ გააკრიტიკა სერია A.
“ტევესი ძლიერი ფეხბურთელია, მაგრამ იტალიაში ყველაფერი ადვილია. თუ მესი სერია A-ში გადმოვა, ის სეზონში 350 გოლს გაიტანს”, – ციტირებს კასანოს სიტყვებს TuttoMercatoWeb-ი.
ანტონიო კასანომ რამდენიმე დღის წინათ განაცხადა, რომ იტალიის სერია A იმდენად სუსტი ჩემპიონატია, რომ იქ ბაბუამისიც შეძლებდა თამაშს.
კასანომ ჩემპიონთა ლიგის მიმდინარე გათამაშების ფინალურ მატჩსაც შეეხო, რომელიც ტურინის “იუვენტუსსა” და “ბარსელონას” შორის 6 ივნისს გაიმართება.
“ბარსა” ფავორიტია, მაგრამ გამარჯვება “იუვენტუსსაც” შეუძლია. ეს იმ შემთხვევაში მოხდება, თუ ტურინელები სწრაფ გოლს გაიტანენ და შემდეგ თავს საიმედოდ დაიცავენ.
მათ ყურადღებით უნდა ადევნონ თვალი მესის, რომელიც ყველა დროის საუკეთესო ფეხბურთელია”.
ბრაზილიელმა ფეხბურთელმა რიკარდო კაკამ “ბარსელონას” თავდამსხმელი ლიონელ მესი და მადრიდის “რეალის” ლიდერი კრიშტიანუ რონალდუ ერთმანეთთან შეადარა.
“მესი გენიოსია, კრიშტიანუ რონალდუ კი თანამედროვე ფეხბურთის სახე გახდა. შედეგად, წლის საუკეთესო მოთამაშის ჯილდო იმის მიხედვით ნაწილდება, თუ რომელი ფეხბურთელი მიაღწევს უფრო მეტს თავის გუნდში. სხვა შემთხვევაში, ამ ორი ფენომენალური მოთამაშისთვის ორი “ოქროს ბურთი” უნდა მზადდებოდეს.
მინდა დავამატო, რომ კრიშტიანუ რონალდუ ძალიან მომწონს, რადგან ის სრულყოფილი ფეხბურთელია. მას ყველაფრის გაკეთება შეუძლია. მე ის მეგობრის რანგშიც მიყვარს და დიდად ვაფასებ”, – კაკას სიტყვებს ESPN ციტირებს.
ტურინის “იუვენტუსის” ყოფილ თავდამსხმელ ალესანდრო დელ პიეროს “ბარსელონას” ლიდერის ლიონელ მესისა და მადრიდის “რეალის” თავდამსხმელ კრიშტიანუ რონალდუს ერთმანეთთან შედარება სთხოვეს. 40 წლის ფეხბურთელის აზრით, ამ ორ მოთამაშეს შორის არსებული კონკურენცია მათ განვითარების საშუალებას აძლევს.
“მესისა და რონალდუს შორის არსებული მეტოქეობა ორივე ფეხბურთელს პროგრესის საშუალებას აძლევს. ისინი არიან იმ კატეგორიის სპორტსმენები, რომლებიც პირველობისთვის იბრძვიან, როგორც ჯონ მაკინროი და ბიორნ ბორგი ან როჯერ ფედერერი და რაფაელ ნადალი.
არ მინდა იმაზე საუბარი, თუ ვინ არის უკეთესი. ეს იმას ჰგავს, რომ გეკითხებიან – დედა უფრო გიყვარს თუ მამა”, – დელ პიეროს კომენტარი ესპანურმა გამოცემა “ასმა” გამოაქვეყნა.
