“ლივერპულის” ახალმა მთავარმა მწვრთნელმა იურგენ კლოპმა კლუბის ფეხბურთელების მეუღლეებსა და გელფრენდებს მელვუდის საწვრთნელ ბაზაზე მისვლა აუკრძალა. გერმანელი სპეციალისტი ამბობს, რომ მელვუდი საოჯახო შეკრების ადგილი არ არის და ის წმინდა საფეხბურთო ლოკაციად უნდა დარჩეს. სწორედ ასეთი მიდგომა ჰქონდა კლოპს დორტმუნდის “ბორუსიაშიც”.
შეგახსენებთ, რომ იურგენ კლოპი მერსისაიდული გუნდის მთავარი მწვრთნელის პოსტზე ოქტომბრის დასაწყისში დაინიშნა. მხარეებს შორის კონტრაქტი 2017 წლამდე გაფორმდა.
მიუნხენის “ბაიერნის” თავდამსხმელმა რობერტ ლევანდოვსკიმ “ლივერპულის” მთავარი მწვრთნელის პოსტზე იურგენ კლოპის დანიშვნის შესახებ ისაუბრა.
“კლოპი იდეალურად ერგება პრემიერლიგას. მას საკუთარი პოზიტიური აზროვნებით “ლივერპულში” ბევრი რამის შეცვლა შეუძლია.
ვფიქრობ, მისი გუნდი ძალიან კარგად ათამაშდება და გაიმარჯვებს. პირადად მე კლოპს ყოველივე საუკეთესოს ვუსურვებ. გუნდს კარგად არ ვიცნობ, მაგრამ დარწმუნებული ვარ, მან იცის, თუ როგორ მიაღწიოს სასურველ შედეგს. “ლივერპული” და მთლიანად პრემიერლიგა მისთვის საუკეთესო არჩევანია”, – ციტირებს ლევანდოვსკის სიტყვებს Goal.com-ი.
“ლივერპულის” თავდამსხმელმა დანი ინგსმა ჯვარედინი იოგის ტრავმა მიიღო. ფეხბურთელი სანაკრებო შეკრებიდან დაბრუნების შემდეგ პირველივე ვარჯიშზე დაშავდა.
გავრცელებული ინფორმაციით, ტრავმის მოშუშებას ხუთიდან შვიდ თვემდე პერიოდი დასჭირდება. ამრიგად, ინგლისელი ფორვარდისთვის სეზონი დასრულებულია.
შეგახსენებთ, რომ სამშაბათს ანალოგიური ტრავმა ახალგაზრდა მცველმა ჯო გომესმაც მიიღო. “ლივერპულს” ტრავმირებულები ჰყავს ჯორდან ჰენდერსონი, რობერტო ფირმინიო და კრისტიან ბენტეკეც.
“ლივერპულის” მთავარი მწვრთნელის პოსტიდან ბრენდან როჯერსის გათავისუფლების შემდეგ მერსისაიდული კლუბის მისამართზე საინტერესო წერილი მივიდა. განმცხადებელი მზად იყო, კლუბი ჩაებარებინა, სამუშაო გამოცდილებად კი ვიდეოთამაშ FIFA 15-ში “პორტსმუთის” მთავარი მწვრთნელის პოსტზე ოთხწლიან მუშაობას და გუნდთან ერთად პრემიერლიგისა და ჩემპიონთა ლიგის მოგებას ასახელებდა.
“ლივერპულმა” განმცხადებელს პატივი დასდო და საპასუხო წერილი გაუგზავნა:
“მადლობას გიხდით საფეხბურთო კლუბ “ლივერპულის” პირველი მწვრთნელის ვაკანტურ პოსტზე თქვენი კანდიდატურის შემოთავაზებისთვის.
სამწუხაროდ, ამ ეტაპზე თქვენს ინტერესს ვერ დავაკმაყოფილებთ, ვინაიდან ჩვენ პროფესიონალურ დონეზე უფრო დიდი გამოცდილების მქონე პირს ვეძებთ. გამოცდილება, რომელიც თქვენ წარმოადგინეთ: კერძოდ, FIFA 15-ში საფეხბურთო კლუბ “პორტსმუთის” მეორე დივიზიონში ჩაბარება და ოთხ სეზონში პრემიერლიგისა და ჩემპიონთა ლიგის მოგება, არ არის ის სამუშაო გამოცდილება, რომელსაც ამ ეტაპზე ვითხოვთ.
მიუხედავად ამისა, მადლობას გიხდით დაინტერესებისთვის და მზად ვართ, მომავალშიც მივიღოთ თქვენი წინადადებები”.
შეგახსენებთ, რომ “ლივერპულის” თავკაცის პოსტზე იურგენ კლოპი დაინიშნა.
გუშინ “ლივერპულის” მთავარი მწვრთნელის პოსტზე იურგენ კლოპი დაინიშნა. დღეს ცნობილი გახდა მხარეებს შორის გაფორმებული შრომითი ხელშეკრულების დეტალები. გერმანელმა სპეციალისტმა მერსისაიდულ კლუბთან კონტრაქტი სქემით “3+1” გააფორმა. მისი წლიური ჯამაგირი ხუთი მილიონი ფუნტ სტერლინგით განისაზღვრა, თუმცა ჩემპიონთა ლიგაზე მოხვედრის ან პრემიერლიგის მოგების შემთხვევაში, ანაზღაურება შესაძლოა, გაიზარდოს.
დღევანდელ პრესკონფერენციაზე კლოპმა განაცხადა, რომ “ლივერპულს” ყველაფერი აქვს მაღალი მიზნებისთვის საბრძოლველად და ამას ლამაზი ფეხბურთის ჩვენებით აპირებს.
“პირველ რიგში, მადლობას ვუხდი “ლივერპულის” ხელმძღვანელობას ჩემი და ჩემი კოლეგების ნდობისთვის. ასევე იმისთვის, რომ მან მოგვცეს შესაძლებლობა, საკუთარი თავი სრულიად ახალ დონეზე წარმოვაჩინოთ. მათ მე წარმომიდგინეს კლუბის განვითარების თავიანთი ხედვა. სრულად ვიზიარებ მათ ამბიციასა და საქმისადმი მიდგომას.
გუნდში ბევრი ბრწყინვალე და ნიჭიერი შემსრულებელია და დარწმუნებული ვარ, რომ მიმდინარე სეზონში მაღალი ადგილისთვის ვიბრძოლებთ.
ყველამ იცის, რომ ფეხბურთში მნიშვნელოვანია გამარჯვება, თუმცა საქმე მხოლოდ მოგებაშიც არაა, ისიც საინტერესოა, თუ როგორ გაიმარჯვებ. ჩემი ფილოსოფიით, ფეხბურთი ლამაზი და ემოციური, სწრაფი და მკაცრი, სულაც უხეში უნდა იყოს. ჩემი გუნდი ყოველთვის ასი პროცენტით იხარჯება, თითოეულ მატჩში მაქსიმუმის მიღწევას ცდილობს.
მნიშვნელოვანია ახალი ფილოსოფიის დამკვიდრება, რომელიც კლუბის სტატუსს ასახავს, მისცემს სახასიათო ნიშანს და წინსვლის საშუალებას. არც ტაქტიკა უნდა დავივიწყოთ. ტაქტიკა ნათელი და ემოციური უნდა გვქონდეს.
მე აქ იმიტომ ვარ, რომ მჯერა “ლივერპულის” პოტენციალის. დღესდღეობით ჩვენ არ ვართ მსოფლიოს საუკეთესო კლუბი, მაგრამ ეს ვის ანაღვლებს? მნიშვნელოვანია ის, რომ ჩვენ გვინდა, უახლოეს პერიოდში გავხდეთ მსოფლიოს საუკეთესო კლუბი. გარკვეული პრობლემები გვაქვს, თუმცა ამას თანდათანობით მოვაგვარებთ. მშვენიერი მცველები, ნახევარმცველები და თავდამსხმელები გვყავს. აქ ოთხი წლის განმავლობაში თუ ვიქნები, ვფიქრობ, ერთ ტიტულს მაინც მოვიგებ.
თანამედროვე ფეხბურთში ყველა დიდი გუნდი ცდილობს ბურთის კონტროლს. პირველ რიგში, დაცვაში უნდა დავლაგდეთ. გვინდა, გავხდეთ ისეთი გუნდი, რომლის დამარცხებაც შეუძლებელი იქნება. ვერ ვიტყვი იმას, რომ “ტოტენჰემის” წინააღმდეგ გასამართ მატჩში ფანები სრულიად ახალ “ლივერპულს” იხილავენ, თუმცა ჩვენ ამას შევეცდებით.
“ლივერპულს” გამორჩეული ფანობა ჰყავს, “ენფილდი” კი ნამდვილი ციხე-სიმაგრეა, რომელსაც საოცარი ატმოსფერო აქვს. ერთმანეთის დახმარებით ჩვენ შევძლებთ მწვერვალების დაპყრობას”, – კლოპის კომენტარი კლუბის ოფიციალურ ვებგვერდზე გამოქვეყნდა.
“ლივერპულის” მთავარი მწვრთნელის პოსტზე იურგენ კლოპი დაინიშნა. გერმანელმა სპეციალისტმა მერსისაიდულ გუნდთან კონტრაქტს ხელი ხუთშაბათს მოაწერა, პარასკევს დილით კი მისი დანიშვნის შესახებ სპეციალური პრესკონფერენცია ჩატარდება.
როგორც მოგეხსენებათ, “ენფილდროუდელთა” თავკაცის პოსტი მერსისაიდული დერბის შემდეგ გახდა ვაკანტური. კლუბმა ბრენდან როჯერსი 4 ოქტომბერს გაათავისუფლა.
ჯერჯერობით ოფიციალურად არ ვრცელდება ინფორმაცია, თუ რა ხნით გაფორმდა შრომითი ხელშეკრულება. არაოფიციალური ცნობით, მხარეებმა სამწლიან კონტრაქტს მოაწერეს ხელი.
შეგახსენებთ, რომ იურგენ კლოპი მანამდე დორტმუნდის “ბორუსიას” ხელმძღვანელობდა. გუნდმა მისი თავკაცობით ორჯერ მოიგო გერმანიის ბუნდესლიგა, დაეუფლა ქვეყნის თასს, სამჯერ დაისაკუთრა სუპერთასი, ერთხელ კი ჩემპიონთა ლიგის ფინალამდეც უწია.
“ლივერპულმა” მთავარი მწვრთნელის პოსტიდან ბრენდან როჯერსი გაათავისუფლა.
მერსისაიდულმა გუნდმა თავკაცის გათავისუფლების შესახებ განცხადება თანაქალაქელი “ევერტონის” წინააღმდეგ ჩატარებული მატჩის (1:1) შემდეგ გაავრცელა.
“ბრენდან როჯერსს გაწეული მუშაობისა და ერთგულებისთვის მადლობას ვუხდით. მიუხედავად იმისა, რომ ეს მძიმე გადაწყვეტილებაა, ჩვენ მიგვაჩნია, რომ საუკეთესო შესაძლებლობაა მოედანზე წარმატებების მისაღწევად. გვინდა, რომ “ლივერპულს” ამბიცია და გამარჯვება დავუბრუნოთ და გვჯერა, ამის მისაღწევად ცვლილება საუკეთესო საშუალებაა. მომავალი მწვრთნელის ძებნა კვლავ მიმდინარეობს და ვიმედოვნებთ, რომ ახალ თავკაცს დროულად დავნიშნავთ”, – ნათქვამია “ლივერპულის” განცხადებაში.
შეგახსენებთ, რომ ბრენდან როჯერსი მერსისაიდულ გუნდს 2012 წლის ზაფხულიდან თავკაცობდა.
დორტმუნდის “ბორუსიას” ყოფილი თავკაცი იურგენ კლოპი და მისი თანაშემწე, ბოსნიელი მწვრთნელი ჟელკო ბუვაჩი “ლივერპულში” მუშაობის გაგრძელებასთან ახლოს არიან.
ბოსნიური გამოცემა Pravdab-ი იუწყება, რომ მხარეებმა სამწლიანი კონტრაქტის გაფორმებაზე შეთანხმებას მიაღწიეს. გარიგების სხვა დეტალები არ ხმაურდება.
ინგლისის პრემიერლიგის საწყისი შვიდი ტურის შედეგებით, მერსისაიდულ გუნდს აქტივში 11 ქულა აქვს და სატურნირო ცხრილის მე-10 პოზიცია უკავია.
“მანჩესტერ იუნაიტედის” კიპერ ვიქტორ ვალდესით “ლივერპულის” მესვეურები დაინტერესდნენ. ამ ინფორმაციას ESPN ავრცელებს.
მანამდე გავრცელებული ინფორმაციის თანახმად, 33 წლის ესპანელი მეკარის მიმართ ინტერესს ლონდონის “ჩელსიც” იჩენდა.
შეგახსენებთ, რომ ვალდესი “ბარსელონადან” “მანჩესტერ იუნაიტედში” მიმდინარე წლის იანვრის თვეში გადავიდა, თუმცა ამ დრომდე მხოლოდ ორ ოფიციალურ მატჩში მიიღო მონაწილეობა, გაუშვა ერთი გოლი.
ცნობისთვის, ვიქტორ ვალდესს “წითელ ეშმაკებთან” მოქმედი შრომითი ხელშეკრულება 2016 წლის 30 ივნისს ეწურება.
“ლივერპულის” მთავარი მწვრთნელი ბრენდან როჯერსი დარწმუნებით ამბობს, რომ ადამიანთა გარკვეულ ჯგუფს გუნდიდან მისი გაშვება სურს. შეგახსენებთ, რომ იგი “წითლებს” 2012 წლიდან თავკაცობს. ინგლისის პრემიერლიგის მიმდინარე გათამაშებაში “ლივერპულს” 11 ქულით მე-7 პოზიცია უკავია.
“ჩემი გუნდი ბრწყინვალედ მუშაობს, ფეხბურთელებთან პრეტენზია არ მაქვს, მაგრამ სრულად დარწმუნებული ვარ, არსებობს ადამიანთა გარკვეული ჯგუფი, რომელსაც არ სურს, რომ გუნდს ვთავკაცობდე.
ყველა ჩემპიონატში ერთად ჩვენ უფრო ნაკლებ მატჩში დავმარცხდით, ვიდრე “მანჩესტერ სიტი”, “ჩელსი” და “არსენალი”.
ამის მიუხედავად, შესამჩნევია ის ისტერია, რომელიც ჩვენ გარშემო გრძელდება. მე და ჩემი ფეხბურთელები დარწმუნებულნი ვართ, რომ ჩვენსას მივაღწევთ.
გუნდთან მუშაობას გავაგრძელებ, უმაღლესი დონის მოთამაშეები დაგვიბრუნდნენ. ჩვენ ერთ მუშტად შეკრული გუნდი ვართ.
ლიდერს მხოლოდ ხუთი ქულით ჩამოვრჩებით. მესმის, რას ნიშნავს აქ სამი სეზონის განმავლობაში ყოფნა: “ლივერპული” საოცარი გუნდია და მოლოდინებიც უზარმაზარია”, – როჯერსის სიტყვები Goal.com-მა გამოაქვეყნა.
“ლივერპულის” ყოფილმა თავდამსხმელმა ელ ჰაჯი დიუფმა სტივენ ჯერარდი რასიზმში დაადანაშაულა.
ინგლისელმა ფეხბურთელმა ახალ ავტობიოგრაფიულ წიგნში სენეგალელი ფორვარდი “ლივერპულის” ერთ-ერთ ყველაზე ცუდ შენაძენად მოიხსენია. გარდა ამისა, ჯერარდი წერს, რომ მარიო ბალოტელი მენტალიტეტისა და ირგვლივ მყოფი ადამიანების გამო მსოფლიო დონის ფეხბურთელი ვერასდროს გახდება.
“ყველამ დავინახეთ, ჯერარდმა როგორ გაურთულა “ლივერპულში” ყოფნა ბალოტელის. მე მარიოს ვაფრთხილებდი. “ლივერპული” არ არის ის გუნდი, რომელიც ფერადკანიან ფეხბურთელებს მიესალმება, თუ ისინი ინგლისელები არ არიან. ჯერარდს არასდროს უყვარდა შავკანიანი მოთამაშეები. “ლივერპულში” ყოფნის დროს მე მას ვუთხარი, რომ შავკანიანი და არაინგლისელი ვარ, მაგრამ მისგან ასეთ დამოკიდებულებას არ ვიმსახურებ. სანამ მერსისაიდულ გუნდში ვიყავი, იგი თვალებში ვერ მიყურებდა”, – დიუფის სიტყვებს ფრანგული ინტერნეტპორტალი Le 10 Sport-ი აქვეყნებს.
სენეგალელი ფეხბურთელი მიიჩნევს, რომ საფეხბურთო სამყაროში მას უფრო დიდ პატივს სცემენ, ვიდრე ჯერარდს და ინგლისელს სწორედ ეს შურს.
“ჯერარდი უბრალოდ ეჭვიანობს. მან ფეხბურთში ვერ მიაღწია იმას, რასაც – მე. მსოფლიოს ფეხბურთში პატივს მცემენ, ექსპერტები მუნდიალის საუკეთესო მოთამაშედ მასახელებდნენ და საუკუნის საუკეთესო ფეხბურთელთა ასეულში შევყავდი. ჩემი ქვეყნიდან სადაც არ უნდა წავიდე, ყველგან თაყვანს მცემენ. ჯერარდს კი ლივერპულის ფარგლებს გარეთ შეურაცხყოფას აყენებენ”, – დაასრულა დიუფმა.
“ლივერპულის” ყოფილმა მთავარმა მწვრთნელმა რაფაელ ბენიტესმა კომენტარი გააკეთა სტივენ ჯერარდის ახალ ავტობიოგრაფიულ წიგნში მოცემულ მონაკვეთზე, რომელშიც ესპანელ მწვრთნელსა და ინგლისელ ფეხბურთელს შორის არსებულ ურთიერთობაზეა საუბარი.
“წავიკითხე მისი სიტყვები და ვფიქრობ, რომ ის ცდება. სტივის, “ლივერპულისა” და მისი გულშემატკივრების პატივისცემის, ასევე იმის ნიშნად, რამდენად ვაფასებ ამ ფეხბურთელს, ვფიქრობ, ეს ისტორია კომენტარის გარეშე უნდა დავტოვო.
სტივიმ წიგნი გამოსცა, მე ახლა “რეალს” ვთავკაცობ და ეს ყველაფერი გაყიდვაში დაეხმარება”, – ციტირებს ბენიტესის სიტყვებს “გარდიანი”.
