ჭდე: Primera División

პრიმერადივიზიონში ცენტრალურ მცველებს შორის ყველაზე ნაკლებად პეპე ჯარიმდება

Posted on by ბექა დოგრაშვილი

მადრიდის “რეალის” ცენტრალური მცველი პეპე ესპანეთის პრიმერადივიზიონში მოთამაშე კოლეგებთან შედარებით ყველაზე ნაკლებად არღვევს თამაშის წესებს. გაზეთ “მარკას” თანახმად, ლა ლიგის XV ტურის შემდეგ პორტუგალიელი ფეხბურთელი, რომელიც საკმაოდ ხისტი ხასიათით გამოირჩევა, მხოლოდ ხუთჯერ ჰყავთ დაჯარიმებული.

პეპეს პრიმერადივიზიონის მიმდინარე გათამაშებაში ყვითელი ბარათი ამ დრომდე არ აქვს მიღებული, როცა მის თანაგუნდელ სერხიო რამოსს თამაშის წესი ოცჯერ დაურღვევია და ხუთჯერ გაფრთხილებაც მიუღია.

ცნობისთვის, პეპეს ესპანეთის პრიმერადივიზიონის მიმდინარე გათამაშების 12 მატჩში აქვს მონაწილეობა მიღებული.

 

სპეციალურ სასხურ ხელსაწყოს პრიმერადივიზიონშიც გამოიყენებენ

Posted on by ბექა დოგრაშვილი

მთავარი არბიტრებისთვის განკუთვნილ სპეციალურ სასხური ხელსაწყოს ესპანეთის ჩემპიონატშიც გამოიყენებენ.

შეგახსენებთ, რომ აღნიშნულ ხელსაწყოს ბრაზილიაში მიმდინარე მსოფლიოს ჩემპიონატზე მომუშავე მსაჯები იმისთვის იყენებენ, რომ საჯარიმო დარტყმის შესრულების დროს ბურთისა და ცოცხალი კედლის ადგილი დააფიქსიროს. ფიფას პრეზიდენტმა ზეპ ბლატერმა განაცხადა, რომ სპეციალური სასხური ხელსაწყოს დანერგვამ გაამართლა.

ესპანეთის პრიმერადივიზიონის ხელმძღვანელებმა გადაწყვიტეს, რომ აღნიშნული ტექნოლოგია ჩემპიონატში ახალი სეზონიდან დანერგონ.

სპეციალურ სასხური ხელსაწყოს გამოყენების სურვილი თავად ესპანელმა არბიტრებმაც გამოთქვეს.

 

პრიმერადივიზიონის სეზონის სიმბოლური გუნდი

Posted on by ბექა დოგრაშვილი

ესპანეთის პროფესიული ფეხბურთის ლიგამ პრიმერადივიზიონის 2013-14 წლების სეზონის სიმბოლური გუნდი შეადგინა, რომელშიც მადრიდის „ატლეტიკოს“ ფეხბურთელები ჭარბობენ.

სეზონის სიმბოლური გუნდის ასე გამოიყურება:

მეკარე: ტიბო კურტუა („ატლეტიკო“);
მცველები: ხუანფრანი („ატლეტიკო“), ემერიკ ლაპორტი („ბილბაო“), დიეგო გოდინი („ატლეტიკო“); ფილიპე ლუისი („ატლეტიკო“);
ნახევარმცველები: ანდერ იტურასპე („ბილბაო“), კოკე („ატლეტიკო“), ივან რაკიტიჩი („სევილია“), გაბი („ატლეტიკო“);
თავდამსხმელები: დიეგო კოსტა („ატლეტიკო“), კრიშტიანუ რონალდუ („რეალი“).

 

შეთქმულების ტური პრიმერადივიზიონში

Posted on by ბექა დოგრაშვილი

თითქოს ესპანეთის პრიმერადივიზიონში ვიღაც შეთქმულებას აწყობს, რომ ჩემპიონატმა მაქსიმალური ინტრიგა ბოლომდე შეინარჩუნოს. თითქოს გათამაშების ლიდერები წინასწარ ვიღაცას დაეწყევლოს, რომ 36-ე ტურში ვერცერთი მათგანი გამარჯვებას ვერ მოიპოვებდა. ჯერ იყო და „ბარსელონა“ „ნოუ კამპზე“ დაუზავდა გავარდნის ზღვარზე მყოფ „ხეტაფეს“ — 2:2, შემდეგ „ატლეტიკომ“ დათმო შეხვედრა „ლევანტესთან“ — 0:2. მადრიდის „რეალი“ კი ძლივს გადაურჩა საშინაო მარცხს „ვალენსიასთან“. „სანტიაგო ბერნაბეუზე“ გამართულ შეხვედრაში „ღამურები“ ორჯერ იგებდნენ, თუმცა „სამეფო კლუბმა“ ორივეჯერ მოახერხა ანგარიშის გათანაბრება.

44-ე წუთზე ანგარიში სტუმართა ფრანგმა მცველმა ჟერემი მატიემ გახსნა. 59-ე წუთზე მას სერხიო რამოსმა უპასუხა, რომელმაც კრიშტიანუ რონალდუს პასი შეირგო, თუმცა ექვს წუთში დანი პარეხომ „ღამურები“ კვლავ დააწინაურა. მსაჯის მიერ კომპენსირებულ დროში კრიშტიანუ რონალდუმ ქუსლით ანგარიში კვლავ გაათანაბრა და საბოლოო შედეგი დააფიქსირა — 2:2. სხვათა შორის, ეს „რეალისთვის“ მიმდინარე ჩემპიონატში მე-100 გოლი გახლდათ. აღსანიშნავია, რომ ბოლო ხუთი სეზონია, „სამეფო კლუბი“ ჩემპიონატში არანაკლებ 100 გოლს იტანს.

ამ მოულოდნელი შედეგების შემდეგ სატურნირო ცხრილი ასე გამოიყურება: „ატლეტიკოს“ აქტივში 88 ქულა აქვს და ერთპიროვნულ ლიდერობას ინარჩუნებს, მადევარ „ბარსელონას“ 3 ქულით ნაკლები აქვს. 83 ქულით მესამე ადგილზე „რეალია“, რომელსაც მის წინ მყოფ გუნდებზე ერთი მატჩით ნაკლები აქვს ჩატარებული. ასე რომ, ჩემპიონობისთვის ბრძოლა გრძელდება.

ესპანეთის პრიმერადივიზიონი
36-ე ტური
„რეალი“ — „ვალენსია“ 2:2 (1:0)
გოლები: სერხიო რამოსი 59′, რონალდუ 90+2′ — მატიე 44′, პარეხო 65′.
გაფრთხილებები: დი მარია 51′ — კეიტა 70′, დიეგო ალვესი 80′, ფეგული 90+4′.

ბექა დოგრაშვილი

ტრილერი „სანტიაგო ბერნაბეუზე“

Posted on by ბექა დოგრაშვილი

ესპანეთის პრიმერადივიზიონის 29-ე ტურის ცენტრალური მატჩი „სანტიაგო ბერნაბეუზე“ გაიმართა, სადაც მადრიდის „რეალმა“ „ბარსელონა“ მიიღო. შეხვედრა მეტად დრამატულ ბრძოლაში წარიმართა, მაყურებელმა კი შვიდი გატანილი გოლი იხილა.

ანგარიში მე-7 წუთზე გაიხსნა, როდესაც ლეო მესიმ ანდრეს ინიესტა მახვილგონივრული გადაცემით ხელსაყრელ პოზიციაზე გაიყვანა და ესპანელმა ნახევარმცველმაც მარცხენა ფეხით პირველი გოლი გაიტანა.

მადრიდელებმა ანგარიში მე-20 წუთზე გაათანაბრეს: ანხელ დი მარიას მიერ ჩამოწოდებულ ბურთს მეტოქის საჯარიმო მოედანზე კარიმ ბენზემა გამოეხმაურა, რომლის თავური დარტყმაც ვიქტორ ვალდესისთვის აუღებელი აღმოჩნდა. ზუსტად ოთხ წუთში იმავე დი მარიამ ბენზემას მეორე საგოლე პასი გაუკეთა, ამჯერად ფრანგმა თავდამსხმელმა ფეხით გაიტანა. საერთოდაც, დი მარია ორივე გუნდის შემადგენლობიდან პირველ ტაიმში ერთ-ერთი საუკეთესო იყო.

„სამეფო კლუბი“ დაწინაურდა და თითქოს მადრიდელებმა გამარჯვებისა ირწმუნეს, თუმცა ეს ნაადრევად მოუვიდათ. ტაიმის დასრულებამდე სამიოდე წუთით ადრე „რეალის“ საჯარიმო მოედანზე ნეიმარი-მესის მიერ გათამაშებული კომბინაცია ამ უკანასკნელის გოლით დაგვირგვინდა და ანგარიშიც გათანაბრდა — 2:2. გუნდები შესვენებაზე საყაიმო ანგარიშით გავიდნენ.

მეორე ტაიმი 10 წუთის განახლებული იყო, როდესაც მთავარმა არბიტრმა უნდიანო მალიენკომ „ბარსელონას“ კარის მიმართულებით თერთმეტმეტრიანი დარტყმა დანიშნა, თუმცა მომენტის განმეორებით ჩვენებაზე ნათლად გამოჩნდა, რომ დანიელ ალვესმა კრიშტიანუ რონალდუ საჯარიმო მოედნის გარეთ წააქცია. პენალტი თავად დაზარალებულმა შეასრულა და „რეალი“ კვლავ დაწინაურდა — 3:2.

ზუსტად 10 წუთში თერთმეტმეტრიანი დარტყმა უკვე მასპინძელთა კარის მიმართულებით დაინიშნა. სერხიო რამოსმა ხელსაყრელ პოზიციაზე გასული ნეიმარი წააქცია, რისთვისაც ესპანელი მცველი მოედნიდან გააძევეს. პენალტი ზუსტად ლეო მესიმ დაარტყა და ანგარიში კვლავ გათანაბრდა.

მატჩის დასრულებამდე 6 წუთით ადრე არბიტრმა კიდევ ერთი თერთმეტმეტრიანი დანიშნა, კვლავ მადრიდელთა კარის მიმართულებით. ამჯერად ინიესტას წინააღმდეგ ჩაბი ალონსომ დაარღვია თამაშის წესი. პენალტის შესრულება კვლავ მესიმ ითავა და ანგარიში 3:4 გახდა. ამრიგად, მესი ჰეთ-თრიკი გაიფორმა და გახდა „ბარსელონას“ პირველი მოთამაშე, რომელმაც „სანტიაგო ბერნაბეუზე“ ერთ მატჩში  სამი გოლი გაიტანა. გარდა ამისა, არგენტინელი ფეხბურთელი კატალონიური გუნდის პირველი ფეხბურთელია, რომელმაც „რეალთან“ ჰეთ-თრიკი ორჯერ გაიფორმა. მესი „ელ კლასიკოს“ საუკეთესო ბომბარდირიც შეიქნა, მის ანგარიშზე 21 გატანილი ბურთია.

საბოლოო ჯამში, „ბარსელონამ“ „სანტიაგო ბერნაბეუზე“ „რეალი“ დაძაბულ ბრძოლაში ანგარიშით 4:3 დაამარცხა და საჭირო 3 ქულა მოიპოვა.

ამ ყველაფრით იხეირა მადრიდის „ატლეტიკომ“, რომელმაც თავისი მატჩი მოიგო და სატურნირო ცხრილს 70 ქულით ჩაუდგა სათავეში. ამდენივე ქულა აქვს მეორეადგილოსან „რეალს“. ლიდერებს ერთი ქულით ჩამორჩება მესამე პოზიციაზე მყოფი „ბარსელონა“.

 

ესპანეთის პრიმერადივიზიონი
29-ე ტური
„რეალი“—„ბარსელონა“ 3:4 (2:2)

„რეალი“: დიეგო ლოპესი, სერხიო რამოსი, პეპე, მარსელო, კარვახალი, ჩაბი ალონსო, მოდრიჩი (მორატა 90′), ბეილი, დი მარია (ისკო 85′), რონალდუ, ბენზემა (ვარანი 66′).
მთავარი მწვრთნელი: კარლო ანჩელოტი.
„ბარსელონა“: ვალდესი, დანი ალვესი, პიკე, ალბა, მასკერანო, ფაბრეგასი (ალექსის სანჩესი 78′), ინიესტა, ჩავი, ბუსკეტსი, ნეიმარი (პედრო 69′), მესი.
მთავარი მწვრთნელი: ხერარდო მარტინო.
გოლები: ბენზემა 20′, 24′, რონალდუ 55′ (პენ) — ინიესტა 7′, მესი 42′, 65′ (პენ), 84′ (პენ).
გაფრთხილებები: დი მარია 35′, პეპე 43′, ალონსო 85′, რონალდუ 86′, მოდრიჩი 88′ — ფაბრეგასი 43′, ბუსკეტსი 66′.
გაძევება: სერხიო რამოსი 63′.
მთავარი მსაჯი: ალბერტო უნდიანო მალიენკო.

ბექა დოგრაშვილი

პრიმერადივიზიონში სამხელისუფლებიანობა დამყარდა

Posted on by ბექა დოგრაშვილი

ესპანეთის პრიმერადივიზიონის 23-ე ტურში „ბარსელონა“ „სევილიას“ ესტუმრა და მეტოქე ანგარიშით 4:1 დაამარცხა, თუმცა მატჩს მასპინძლები იგებდნენ. თამაში ძლიერი წვიმის თანხლებით მიმდინარეობდა.

ანგარიში მე-15 წუთზე „სევილიას“ მცველმა ალბერტო მორენომ გახსნა. კატალონიურმა გუნდმა თამაშში გარდატეხის შეტანა მოახერხა და საბოლოოდ, გამარჯვებაც მოიპოვა. სტუმრები პირველივე ტაიმი დაწინაურდნენ, ჯერ ალექსის სანჩესმა გაიტანა, შემდეგ კი ლიონელ მესიმ. აღსანიშნავია, რომ სანჩესმა გოლი თამაშგარე მდგომარეობიდან გაიტანა, თუმცა მსაჯებმა ეს ვერ შენიშნეს. მეორე ტაიმში „ბარსელონას“ არგენტინელმა ლიდერმა დუბლი გაიფორმა. საბოლოო შედეგი 88-ე წუთზე ფრანჩესკ ფაბრეგასმა დააფიქსირა — 4:1.

„ბარსელონამ“ აქტივში 57 ქულა მოაგროვა და მადრიდის „რეალთან“ და „ატლეტიკოსთან“ ერთად სატურნირო ცხრილს სათავეში ჩაუდგა. „სევილია“ 31 ქულით მეშვიდე პოზიციაზე დარჩა.

ესპანეთის პრიმერადივიზიონი
23-ე ტური
„სევილია“—„ბარსელონა“ 1:4 (1:2)

გოლები: მორენო 15′ — ალექსის სანჩესი 34′, მესი 44′, 56′, ფაბრეგასი 88′.
გაფრთხილებები: კარისუ 39′, ფიგეირაში 70′, ჩერიშევი 71′ — სონგი 20′, პედრო 59′, ვიქტორ ვალდესი 68′.

ბექა დოგრაშვილი

დანი ალვესმა კატალონიელთა ქომაგობა დაიწუნა

Posted on by ბექა დოგრაშვილი

ესპანეთის პრიმერადივიზიონის 22-ე ტურში „ბარსელონამ“ „ვალენსიას“ უმასპინძლა და სენსაციურად, ანგარიშით 2:3 დამარცხდა. მატჩის შემდეგ კატალონიელთა ბრაზილიელმა მცველმა დანიელ ალვესმა ქომაგობა დაიწუნა.

„საკუთარ თავში დარწმუნებულნი ვართ. როდესაც გუნდი გამუდმებით იგებს და მოულოდნელად დამარცხდება, ეს ძალიან რთული გადასატანია, მაგრამ „ბარსელონას“ ძალაში ეჭვი არავის შეეპაროს.

რაც შეეხება ქომაგობას, გულშემატკივრებმა გუნდს უფრო აქტიურად უნდა დაგვიჭირონ მხარი. ხანდახან მგონია, რომ სახლიდან ძალიან შორს ვთამაშობთ“, – დანი ალვესის სიტყვებს სპორტული ინტერნეტ-პორტალი Sport.es ციტირებს.

ბექა დოგრაშვილი

„ბარსელონამ“ 2012 წლის აპრილის შემდეგ შინ პირველად წააგო

Posted on by ბექა დოგრაშვილი

ესპანეთის პრიმერადივიზიონის 22-ე ტურში „ბარსელონამ“ „ვალენსიას“ უმასპინძლა და სენსაციურად, ანგარიშით 2:3 დამარცხდა. კატალონიურმა გუნდმა 2012 წლის 21 აპრილის შემდეგ „კამპ ნოუზე“ პირველად წააგო. არადა, მასპინძლები მე-7 წუთზე ალექსის სანჩესმა დააწინაურა. 44-ე წუთზე დანი პარეხომ ანგარიში გაათანაბრა. 48-ე წუთზე „ღამურები“ წინ გაიჭრნენ, თავი ამჯერად პაბლო პიატიმ გამოიჩინა. 54-ე წუთზე თერთმეტმეტრიანი დარტყმით ლეო მესიმ წონასწორობა აღადგინა. მატჩს საბოლოო წერტილი კი 59-ე წუთზე ფრანსისკო ალკასერმა დასვა. აღსანიშნავია, რომ 78-ე წუთზე მასპინძლები რიცხობრივ უმცირესობაში დარჩნენ, მოედნიდან ჟორდი ალბა გააძევეს. სათქმელია ისიც, რომ „ბარსელონამ“ პირველად წააგო ოფიციალური მატჩი, რომელშიც მესიმ გოლის გატანა მოახერხა.

„ბარსელონას“ წაგებით დღეს „რეალსა“ და „ატლეტიკოს“ შეუძლიათ, ისარგებლონ და სატურნირო ცხრილში კატალონიური გუნდი უკან მოიტოვონ. შეგახსენებთ, რომ ამ დროისთვის „ბარსას“ და „ატლეტიკოს“ აქტივში 54-54 ქულა აქვთ, მესამეადგილოსან „რეალს“ კი – 53.

„ატლეტიკო“ „რეალ სოსიედადს“ მიიღებს, „რეალი“ კი ბილბაოს „ატლეტიკს“ ესტუმრება.

ესპანეთის პრიმერადივიზიონი
XXII ტური
„ბარსელონა“–„ვალენსია“ 2:3
გოლები: სანჩესი 7′, მესი 54′ (პენ) – დანი პარეხი 44′, პიატი 48′, პაკო ალკასერი 59′.
გაფრთხილებები: ალბა 52′, მასკერანო 79′ – დანი პარეხო 45+1′, რიკარდო კოშტა 53′, დიეგო ალვეში 90+4′.
გაძევება: ალბა 78′.

ბექა დოგრაშვილი

სიმეონე: „მიუხედავად 400 მლნ. ევროიანი სხვაობისა, „ატლეტიკომ“ „ბარსას“ ბრძოლა გაუმართა“

Posted on by ბექა დოგრაშვილი

ესპანეთის პრიმერადივიზიონის XIX ტურის ცენტრალური მატჩი „ვისენტე კალდერონზე“ შედგა, სადაც მადრიდის „ატლეტიკომ“ „ბარსელონა“ მიიღო. შეხვედრა უგოლოდ დასრულდა. შესაბამისად, გუნდებმა პირველი წრის ბოლო ტურის შემდეგ აქტივში 50-50 ქულა მოაგროვეს და გათამაშებას კვლავაც ლიდერობენ.

„ატლეტიკოს“ მთავარმა მწვრთნელმა დიეგო სიმეონემ წუხანდელი შეხვედრა ჭადრაკს შეადარა.

„ბარსელონას“ დიდ პატივს ვცემთ, მაგრამ ჩვენს შორის 400 მლნ. ევროიანი განსხვავებაა. მიუხედავად ამისა, ჩვენ მათ სერიოზული ბრძოლა გავუჩაღეთ. ეს არის ფეხბურთელთა ჯგუფი, რომელიც ყოველ მატჩში სულს და გულს დებს, ამიტომაც გრძელდება ჩვენი ოცნება შეხვედრიდან შეხვედრამდე.

ვეთანხმები მოსაზრებას, რომ ეს შეხვედრა ჭადრაკის თამაშს წააგავდა. ზოგიერთი მატჩი ანგარიშით 0:0 სრულდება, რადგან თამაში ტაქტიკური სვლებითა და გადაადგილებებით არის დატვირთული, რაც დიდ პროფესიონალიზმს მოითხოვს. პუბლიკას გოლების ხილვა სურდა… ჩვენ კი ვცდილობდით, რომ ინტელექტუალური ფეხბურთი გვეთამაშა. „ბარსამ“ ბოლო რამდენიმე მატჩი დიდი უპირატესობით მოიგო. კატალონიელებს ჩვენთანაც ჰქონდათ გოლების გატანის შანსი, მაგრამ ვერ შეძლეს და მე ამით ბედნიერი ვარ“, – ციტირებს სიმეონეს სიტყვებს ესპანური პრესა.

ბექა დოგრაშვილი

ყველა გზა ლეოსთან მიდის

Posted on by ბექა დოგრაშვილი

ესპანეთის პრიმერადივიზიონის XIX ტურის ცენტრალური შეხვედრა დღეს, „ვისენტე კალდერონზე“ შედგება, სადაც მადრიდის „ატლეტიკო“ „ბარსელონას“ მიიღებს. გათამაშების ლიდერთა მატჩზე დასასწრები ბილეთების შოვნა უკვე შეუძლებელია. ესპანელი ჟურნალისტები უბილეთოდ დარჩენილ ინჩასებს თანაუგრძნობენ და იუწყებიან, რომ მატჩზე მოხვედრის ერთადერთი საშუალება მოლოდინია, რომ სეზონური აბონემენტის მქონე რომელიმე ქომაგი სტადიონზე არ მივა. თუმცა, რომელი ჭკუათმყოფელი ამჯობინებს ამ შეხვედრის შინ ყურებას?

დაბრუნება — ნახევარ საათში გაგიჟებული მსოფლიო
მიმდინარე სეზონი ლეო მესისთვის ცოტა უცნაურია. არგენტინელმა ფეხბურთელმა უკვე სამჯერ მოასწრო ტრავმის მიღება, რის გამოც ორი თვე და 12 მატჩი გამოტოვა. ამის მიუხედავად, მესიმ ორიოდე დღის წინათ, „ხეტაფესთან“ გამართულ სათასო მატჩში ტრიუმფალური დაბრუნება მოიწყო და შეხვედრის ბოლო 30 წუთში ორი გოლი გაიტანა.

შესრულებულმა დუბლმა ლეო „ბარსელონას“ ბომბარდირთა სათავეში მოაქცია, მატჩის შემდეგ კი ნამდვილი სიგიჟე დაიწყო. ლიდერის დაბრუნებით გახარებულმა თანაგუნდელებმა მესის გასახდელში ცეკვა მოუწყვეს, არგენტინელ ფეხბურთელთან ერთად ფოტოები გადაიღეს და სოციალურ ქსელში გამოაქვეყნეს. „მონსტრი დაბრუნდა!“ – ასეთი კომენტარი დატოვა ალექს სონგმა ერთ-ერთ სურათზე.

ჭკუიდან ქომაგებიც გადავიდნენ. „ბარსელონას“ ოფიციალური ვებ-გვერდი იუწყებოდა, რომ დუბლის შესრულების მომენტში მესის გვარი „ტვიტერზე“ 24 ათასჯერ დაიწერა, მთლიანად მატჩის მიმდინარეობისას კი – 300 ათასჯერ.

კატალონიურ გამოცემა „ელ მუნდო დეპორტივოს“ ზედიზედ სამი დღის განმავლობაში პირველი გვერდიდან მესის სურათი არ ჩამოუშორებია. არგენტინულმა გაზეთმა „ოლემ“ კი ერთი დღით გამოცემის სახელწოდება შეცვალა და „ლეო“ დაირქვა. მესის მხოლოდ ნახევარი საათი დასჭირდა იმისთვის, რომ საფეხბურთო მსოფლიო კიდევ ერთხელ გაეგიჟებინა.

ყველა ესპანელი ჟურნალისტი არ არის დარწმუნებული, რომ დღევანდელ მატჩში ლიონელ მესი სასტარტო წუთებიდანვე მოედანზე იქნება. ზოგიერთი ფიქრობს, რომ გარისკვას სჯობს, მესი მხოლოდ საჭიროების შემთხვევაში ათამაშონ, თუმცა სპორტულ ჟურნალისტთა უმეტესობა დარწმუნებულია, რომ ლეო ძირითად შემადგენლობაში იქნება. სავარაუდოდ, სასტარტო განაცხადში მოხვდება ნეიმარიც, რომელმაც „ხეტაფესთან“ გამართული შეხვედრა მცირე დაზიანების გამო გამოტოვა.

სტატისტიკას თუ დავუჯერებთ, მესიმ დღეს აუცილებლად უნდა გაიტანოს. მისთვის „ატლეტიკო“ ყველაზე სასურველი მეტოქეა. ესპანეთის ჩემპიონატში არგენტინელმა ფეხბურთელმა მადრიდული კლუბის წინააღმდეგ 14-ჯერ ითამაშა და 17 გოლი გაიტანა. გარდა ამისა, მესიმ „ატლეტიკოს“ ქომაგთა დამწუხრება სათასო დაპირისპირებაში სამჯერ მოახერხა.

შეხვედრა — სიმულანტი სიმეონე
ცალკე ინტრიგას იწვევს დღეს მონაწილე გუნდთა არგენტინელი თავკაცების დუელი. საუბარია „ბარსას“ მთავარ მწვრთნელ ხერარდო მარტინოსა და „ატლეტიკოს“ დამრიგებელ დიეგო სიმეონეზე.

ესპანელი ჟურნალისტებისთვის მიცემულ ინტერვიუში სიმეონემ 1987/88 წლების სეზონში მომხდარი ერთი საინტერესო შემთხვევა გაიხსენა. თურმე, „ნიუელს ოლდ ბოისსა“ და „ველესს“ შორის გამართულ მატჩში სიმეონემ მარტინოსთან ორთაბრძოლისას სიმულაციას მიმართა, რის გამოც ხერარდო მოედნიდან გააძევეს. მოგვიანებით წითელი ბარათი თავად დიეგომაც მიიღო, თუმცა მისმა გუნდმა მატჩი ანგარიშით 2:1 მოიგო.

აი, მწვრთნელის რანგში სიმეონეს ხერარდოსთვის არასდროს არ მოუგია. ეს მწვრთნელები სეზონის სტარტზე ორჯერ შეხვდნენ ერთმანეთს ესპანეთის სუპერთასისთვის გაჩაღებულ ორრაუნდიან დაპირისპირებაში. ორივე შეხვედრა ფრედ დასრულდა, თუმცა გასვლაზე გატანილი გოლის წყალობით ტიტული კატალონიელებს დარჩათ. ვნახოთ, ვინ აჯობებს დღეს. მატჩი ჩვენი დროით 23:00 საათზე დაიწყება და მას 36 წლის არბიტრი ანტონიო მატეუ განსჯის.

ბექა დოგრაშვილი

პრიმერადივიზიონის რომელ კლუბს აქვს ყველაზე დიდი მოედანი?

Posted on by ბექა დოგრაშვილი

საფეხბურთო წესების თანახმად, სათამაშო მოედნის ზომები შეიძლება ერთმანეთისგან განსხვავებული იყოს. დღევანდელი დებულებით გვერდითი ხაზის ზომა 90-120 მეტრი, კარის ხაზის ზომა კი – 45-90 მეტრი უნდა იყოს. საინტერესოა, ესპანეთის პრიმერადივიზიონში მოთამაშე კლუბებიდან, რომელს აქვს ყველაზე დიდი მოედანი.

გასაკვირია, მაგრამ პრიმერადივიზიონში ყველაზე დიდი მოედანი არც მადრიდის „რეალს“ და არც „ბარსელონას“ არ ეკუთვნის.

ესპანეთის პროფესიული ფეხბურთის ლიგის თანახმად, ყველაზე დიდი მოედანი „ელჩეს“ აქვს. „მანუელ მარტინეს ვალეროს“ სტადიონის მოედნის ზომებია 108×70 მეტრზე. სიდიდით მეორე ადგილზეა „ბეტისის“ არენა „ბენიტო ვილამარინის“ მოედანი – 107×68 მეტრზე. მესამე–მეოთხე პოზიციებს იყოფენ „ხეტაფეს“ სტადიონ „კოლიზეუმ ალფონსო პერესისა“ და „რეალ სოსიედადის“ სტადიონ „ანოეტას“ მოედნები, რომელთა ზომებია 105×70 მეტრზე.

ყველაზე პატარა მოედნები „რაიო ვალეკანოსა“ და „ოსასუნას“ არენებზეა – შესაბამისად, 100×65 მეტრზე და 105×67.5 მეტრზე.

„სანტიაგო ბერნაბეუს“, „კამპ ნოუს“, „ვისენტე კალდერონის“ და პრიმერადივიზიონში მოთამაშე უმეტეს კლუბთა სტადიონების მოედნებს ფიფას მიერ რეკომენდირებული ზომები აქვს: 105×68 მეტრზე.

ბექა დოგრაშვილი

ნეიმარმა „ბარსელონა“ მადრიდს დააშორა

Posted on by ბექა დოგრაშვილი

ესპანეთის პრიმერადივიზიონის XVI ტურში „ბარსელონამ“ „ვილიარეალი“ მიიღო და მეტოქე ანგარიშით 2:1 დაამარცხა. კატალონიელთა რიგებიდან დუბლი გაიფორმა ბრაზილიელმა თავდამსხმელმა ნეიმარმა. სტუმართაგან თავი გამოიჩინა მცველმა მატეო მუსაკიომ.

ნეიმარმა პირველი გოლი თერთმეტმეტრიანი დარტყმის შედეგად გაიტანა. პენალტის დანიშვნის მიზეზი მარიოს მიერ საკუთარ საჯარიმო მოედანზე ხელით თამაში გახდა. მეორე ტაიმის დასაწყისში მუსაკიომ კუთხურიდან ჩამოწოდების შემდეგ ანგარიში გაათანაბრა, თუმცა ნეიმარმა 68-ე წუთზე მეორე გოლი გაიტანა და კატალონიურ გუნდს 3 ქულა მოუტანა.

ამ გამარჯვებით „ბარსელონამ“ 43 ქულას მოუყარა თავი და სატურნირო ცხრილის სათავეში პოზიცია გაიმყარა. შეგახსენებთ, რომ ამავე ტურში მადრიდის „რეალმა“ სტუმრად „ოსასუნასთან“ ფრედ, ანგარიშით 2:2 ითამაშა, რითაც მესამეადგილოსან „სამეფო კლუბსა“ და „ბარსელონას“ შორის სხვაობა 5 ქულამდე გაიზარდა. მეორე პოზიციაზე 40 ქულით მადრიდის „ატლეტიკო“ გახლავთ, რომელიც დღეს „ვალენსიას“ მიიღებს.

რაც შეეხება „ვილიარეალს“, „ყვითელი წყალქვეშა ნავი“ მე-5 პოზიციაზე დარჩა.

ესპანეთის პრიმერადივიზიონი
XVI ტური
„ბარსელონა“–„ვილიარეალი“ 2:1
გოლები: ნეიმარი 30′ (პენ), 68′ – მუსაკიო 48′.
გაფრთხილებები: ნეიმარი 85′ – ტრიხორესი 38′.

ბექა დოგრაშვილი