Rafael van der Vaart – Fanebi.Com – ფეხბურთი, კალათბურთი, რაგბი, სხვა

ვან დერ ვარტმა პროფესიული კარიერა დაასრულა

Posted on ნოემბერი 5, 2018 by ბექა დოგრაშვილი

ცნობილმა ჰოლანდიელმა ფეხბურთელმა რაფაელ ვან დერ ვარტმა პროფესიული კარიერა დაასრულა.

35 წლის ნახევარმცველი ზაფხულში დანიურ “ესბიერში” გადავიდა, თუმცა ტრავმიანობის გამო მხოლოდ ოთხი მატჩის ჩატარება შეძლო.

რაფაელ ვან დერ ვარტმა პროფესიული კარიერა 2000 წელს ამსტერდამის “აიაქსში” დაიწყო, შემდეგ კი “ჰამბურგის”, მადრიდის “რეალის”, “ტოტენჰემ ჰოთსპურის”, “ბეტისისა” და “მიდტიულანდის” ღირსებას იცავდა. ორჯერ მოიგო ჰოლანდიის ჩემპიონატი, ერთხელ ქვეყნის თასი, გახდა ესპანეთის სუპერთასის მფლობელიც.

რაფაელ ვან დერ ვარტმა ჰოლანდიის ნაკრებში 109 მატჩი ჩაატარა და 25 გოლი გაიტანა. ის 2010 წელს მსოფლიოს ჩემპიონატის ვერცხლის მედლის მფლობელი გახდა.

ვან დერ ვაარტმა წითელ ბუცებზე უარის თქმით 1,6 მლნ ევრო გამოიმუშავა

Posted on დეკემბერი 12, 2016 by ბექა დოგრაშვილი

“ბეტისის” ყოფილმა ნახევარმცველმა რაფაელ ვან დერ ვაარტმა კონტრაქტში ჩაწერილი უჩვეულო პუნქტის წყალობით ჯიბე გვარიანად გაისქელა.

Football Leaks-ის ცნობით, ჰოლანდიელ ნახევარმცველსა და “ბეტისს” შორის გაფორმებულ ხელშეკრულებაში ერთი კონკრეტული პუნქტი წითელი ფერის ბუცებს ეთმობოდა. წითელი, როგორც მოგეხსენებათ, “ბეტისის” დაუძინებელი მტრის – “სევილიას” ფერია და ვან დერ ვაარტს კონტრაქტში ჩაუწერეს, თუ წითელი ბუცების ჩაცმაზე უარს იტყვი, კვირაში 115 ათას ევროს მიიღებო. ჰოლანდიელმაც შემთხვევით ისარგებლა, წითელი ბუცების ჩაცმაზე უარი თქვა და მხოლოდ ამ იოლი ხერხით კონტრაქტის ამოწურვამდე 1,6 მილიონი ევრო გამოიმუშავა.

ვან დერ ვაარტი კარიერას ესპანეთის პრიმერადივიზიონში გააგრძელებს

Posted on ივნისი 16, 2015 by ბექა დოგრაშვილი

ჰოლანდიელი ნახევარმცველი რაფაელ ვან დერ ვაარტი კარიერას ესპანეთის პრიმერადივიზიონში გააგრძელებს. 32 წლის ფეხბურთელმა “ბეტისთან” სამწლიან კონტრაქტს მოაწერა ხელი. მას ოფიციალურად დღეს წარადგენენ.

ვან დერ ვაარტი ანდალუსიურ კლუბს თავისუფალი აგენტის სტატუსით შეუერთდა. ფეხბურთელს “ჰამბურგთან” შრომითი ხელშეკრულება ამა წლის 30 ივნისს ეწურება.

შეგახსენებთ, რომ ვან დერ ვაარტისთვის ესპანეთი უცხო არ არის. იგი 2008-დან 2010 წლამდე მადრიდის “რეალის” ღირსებას იცავდა.

როგორც მოგეხსენებათ, “ბეტისმა” სეგუნდადივიზიონი მოიგო და ახალი სეზონიდან პრიმერადივიზიონში ითამაშებს.

ზლატანი ვან გალს: „დამეკარგე აქედან, წადი და წერილების წერა განაგრძე“

Posted on მაისი 4, 2014 by ბექა დოგრაშვილი

ხელში ჩაგვივარდა ერთ-ერთი უცხოური გაზეთიდან ამონარიდი, რომელშიც ზლატან იბრაჰიმოვიჩი ლუი ვან გალის შესახებ საუბრობს. როგორც გაზეთიდან ვგებულობთ, ქვემოთ მოყვანილი ამბავი 2004 წელს მოხდა, როდესაც იბრაჰიმოვიჩიც და ვან გალიც „აიაქსში“ მუშაობდნენ. ზლატანს ჰოლანდიელ სპეციალისტთან კარგი დამოკიდებულება რომ არ აქვს, ეს საყოველთაოდ ცნობილი ფაქტია. შვედმა თავდამსხმელმა ერთ-ერთ ინტერვიუში ვან გალი დიქტატორს შეადარა და მის შესახებ თქვა, რომ იუმორის გრძნობა არ აქვს.

მოცემული გაზეთის ამონარიდში იბრაჰიმოვიჩი ვან გაალზე საუბრობს:

„ის ტექნიკური დირექტორი იყო და ფანქრის დახმარებით მიხსნიდან, სად უნდა მერბინა.
მე მას ვუთხარი: „შენი მოსმენა არ მჭირდება, დაბრუნდი ოფისში და წერილები წერე!“
რაფაელ ვან დერ ვარტთან დავა მქონდა და ვან გალს ვუთხარი: „თუ ეს ბიჭი ითამაშებს, მე არ გავალ მოედანზე“.
მან თამაში მიბრძანა, მე კი ვუპასუხე: „დამეკარგე აქედან!“ (ნათარგმნია ცენზურის გათვალისწინებით). ერთი კვირის შემდეგ უკვე „იუვენტუსში“ ვთამაშობდი. ახლობლების მდგომარეობას უნდა განიცდიდე, ვან გალი არ განიცდის“.

ბექა დოგრაშვილი

ვან დერ ვარტი: „რონალდუ „ოქროს ბურთს“ იმსახურებს“

Posted on ნოემბერი 27, 2013 by ბექა დოგრაშვილი

„ჰამბურგისა“ და ჰოლანდიის ნაკრების ნახევარმცველი რაფაელ ვან დერ ვარტი თვლის, რომ წელს „ოქროს ბურთს“ მადრიდის „რეალის“ თავდამსხმელი კრიშტიანო რონალდუ იმსახურებს. ჰოლანდიელმა ფეხბურთელმა აღნიშნა, რომ ბევრი ახალგაზრდა მოთამაშე ბაძავს რონალდუს.

„ალბათ, ყველა ახალგაზრდა ფეხბურთელს, მათ შორის „ჰამბურგის“ მოთამაშეებსაც, სურს, რომ რონალდუს მსგავსი იყოს. ზოგიერთები თვლიან, რომ ის მოედანზე ქედმაღლურად იქცევა, მაგრამ გასახდელში რონალდუ საკმაოდ მოკრძალებული და მშვიდი ადამიანია. ის გასაოცარი ფეხბურთელია და „ოქროს ბურთს“ იმსახურებს“, – ვან დერ ვარტის სიტყვებს Goal.com-ი ციტირებს.

30 წლის ჰოლანდიელმა ფეხბურთელმა კოლუმბიის ნაკრების წინააღმდეგ გამართულ ამხანაგურ მატჩში კოჭის მყესები გაიწყვიტა. ვან დერ ვარტი იმედოვნებს, რომ მოედანს მალე დაუბრუნდება.

„თავს გაცილებით უკეთ ვგრძნობ, ვიდრე რამდენიმე დღის წინ. დღეს ბევრად კარგად ვარ და ვიმედოვნებ, რომ მოედანს მალე დავუბრუნდები“, – აღნიშნა ვან დერ ვარტმა.

ბექა დოგრაშვილი