ჭდე: U19

საქართველოს 19-წლამდელთა ნაკრები უკრაინასთან დამარცხდა

Posted on by Alix

დღეს საქართველოს 19-წლამდელთა ნაკრებმა უკრაინელ თანატოლებთან მორიგი ამხანაგური მატჩი ჩაატარა.

შეგახსენებთ, რომ ორი დღის წინ ქართველები უკრაინელ თანატოლებს დაუზავდნენ – შეხვედრა გატანილი გოლების გარეშე დასრულა. დღეს კი გამარჯვება უკრაინამ იზეიმა – გიორგი დევდარიანის გუნდი ანგარიშით 3:0 დამარცხდა.

წარმატებას ჩვენმა მეტოქემ კლეცის, შვედისა და წარმოშობით ქართველი მოთამაშის, „შახტარის“ ნახევარმცველის ვაჩიბერაძის გოლებით მიაღწია.

შემდეგ მატჩს საქართველოს ნაკრები ერთ თვეში ჩაატარებს – 29 მაისს ევროპის ჩემპიონატზე ჩვენი მეტოქე ესპანეთის ნაკრები იქნება.

უკრაინა U-19 – საქართველო U-19 3:0
გოლები: კლეიცი 14′, შვედი 29′, ვაჩიბერაძე 63′ (პენ)

U19 — ერთი დღე იტალიასთან შეხვედრამდე

Posted on by ბექა დოგრაშვილი

საქართველოს 19-წლამდე ნაკრები იტალიაში, ქალაქ ჯენზანოში იმყოფება და იტალიის 19-წლამდე ნაკრებთან ამხანაგური შეხვედრისთვის ემზადება. ჯენზანო რომის სიახლოვეს, სულ რაღაც 30 კილომეტრში მდებარე პატარა ქალაქია.

19-წლამდელები იტალიაში გუშინ საღამოს ჩავიდნენ. ადგილობრივი დროით 20:00 საათზე, გუნდის მთავარმა მწვრთნელმა – გიორგი დევდარიანმა ფეხბურთელები ადგილობრივ სტადიონზე მსუბუქად ავარჯიშა. ნაკრებს ადგილზე დახვდა ორი ლეგიონერი – ბელგიური „გენკის“ ქართველი შემტევი – ლუკა ზარანდია და იტალიური „ემპოლის“ ფორვარდი – რომან ჭანტურია. „ემპოლის“ ფორვარდი ტრავმას იშუშებს და მისი მატჩში მონაწილეობა თითქმის გამორიცხულია. თუმცა, ის ნაკრებთან ერთადაა და სავარჯიშო პროცესშიც მცირე დატვირთვებს იღებს.

იტალია – საქართველოს ამხანაგური მატჩი ხვალ, 25 თებერვალს, თბილისის დროით 17:30 წუთზე, ჯენზანოს სტადიონზე დაიწყება.

გამომგზავრებამდე, ნაკრების შემადგენლობაში ორი ცვლილება მოხდა. ზურაბ მალანიასა და გიორგი თევზაძის ნაცვლად, გუნდს ბექა ჭკუასელი და დემურ ჩიხლაძე შემოუერთდნენ. მალანიამ, რომელიც საქართველოს ჩემპიონატის ბოლო ტურის მატჩში „შუქურას“ შემადგენლობაში ერთ-ერთი საუკეთესო იყო, ბოლო წუთებზე მიიღო ტრავმა. გიორგი თევზაძე კი, შეუძლოდ გახდა.

საბოლოოდ, საქართველოს 19-წლამდე ნაკრები იტალიაში ასეთი შემადგენლობით იმყოფება:

მეკარეები: ოთო გოშაძე („ქასიმფაშა“, თურქეთი), ბექა ქურდაძე („საბურთალო“);

მცველები: ჯიმი ტაბიძე, გაგი მარგველაშვილი, გრიგოლ ჩაბრაძე (ყველა „საბურთალო“), გიორგი დუმბაძე („ლოკომოტივი“, თბილისი);

ნახევარმცველები: ოთარ კიტეიშვილი („დინამო“ თბილისი), გიორგი კილასონია („მეტალურგი“, რუსთავი), გიორგი ხარაიშვილი („საბურთალო“), ცოტნე მესხი („შუქურა“, ქობულეთი), გიორგი ბერიძე („ზესტაფონი“), აკაკი შულაია („მერანი“, მარტვილი), დემურ ჩიხლაძე („ლოკომოტივი“ თბილისი), ბექა ჭკუასელი („დინამო“, ბათუმი);

თავდამსხმელები: რომან ჭანტურია („ემპოლი“, იტალია), ილია კერძევაძე („სამტრედია“), ლუკა ზარანდია („გენკი“, ბელგია).

დღეს საღამოს, მატჩისწინა ვარჯიში საქართველოს ნაკრებმა კვლავ ჯენზანოს სტადიონზე ჩაატარა. უნდა აღვნიშნოთ, რომ მასპინძელთა ნაკრები დღესდღეობით ევროპაში ერთ-ერთი საუკეთესო გუნდია. როგორც ცნობილია, 96 წელს დაბადებულთა თაობა იტალიაში გამორჩეულია.

სფფ-ის პრესსამსახური
ჯენზანო, იტალია

U19 ევროშესარჩევის სტარტზე – მონტენეგროთი ვიწყებთ

Posted on by -

8 ოქტომბერს, საქართველოს 19-წლამდე ნაკრები ევროპის ჩემპიონატის საკვალიფიკაციო ეტაპის მატჩებს დაიწყებს. გიორგი დევდარიანის გუნდი სრული მობილიზებით ემზადება. მიზანი, როგორც ყოველთვის ერთია – ქულათა მაქსიმუმის დაგროვება და ელიტრაუნდში ჯგუფის პირველი ადგილით გასვლა.

სამწუხაროდ, ვერ ავცდით საკადრო პრობლემებს. ტრავმების გამო, გუნდს შესარჩევში ვერ დაეხმარებიან ნაკრების ძირითადი შემადგენლობის სტაჟიანი წევრები – გიორგი თევზაძე და ჯემალ ტაბიძე. გიორგი დევდარიანის რჩეული 18-კაციანი სია კი, ასეთია:
მეკარეები: ოთო გოშაძე („ქასიმფაშა“, თურქეთი), ბექა ქურდაძე („საბურთალო“)
მცველები: გაგი მარგველაშვილი, გრიგოლ ჩაბრაძე (ორივე „საბურთალო“), ზურაბ გელაშვილი („ტორპედო“, ქუთაისი), ზურაბ მალანია („შუქურა“, ქობულეთი)
ნახევარმცველები: გიორგი კილასონია, ოთარ კიტეიშვილი (ორივე „მეტალურგი“, რუსთავი), ლადო მოხევიშვილი („ლევანტე“, ესპანეთი), გიორგი ხარაიშვილი („საბურთალო“), გიორგი ბერიძე („დილა“, გორი)
თავდამსხმელები: ლუკა ზარანდია („გენკი“, ბელგია), აკაკი შულაია („მერანი“, მარტვილი), მათე კვირკვია („ვიტ ჯორჯია“), ილია კერძევაძე („სამტრედია“), რომან ჭანტურია („ემპოლი“, იტალია), ცოტნე მესხი („შუქურა“, ქობულეთი), გიორგი არაბიძე („ლოკომოტივი“ თბილისი)
დღეს, 15:15 წუთზე, „მიხეილ მესხის“ სტადიონის მედიაცენტრში ნაკრების მთავარი მწვრთნელი – გიორგი დევდარიანი ტურნირისწინა ოფიციალურ პრესკონფერენციას გამართავს. 15:30 წუთიდან კი, 19-წლამდე ნაკრების მატჩისწინა ოფიციალური ვარჯიში დაიწყება.
აქვე შეგახსენებთ ევროშესარჩევის განრიგს:

8 ოქტომბერი
14:00 – რუმინეთი vs კვიპროსი (სტადიონი „მიხეილ მესხი“ – 2)
16:00 – საქართველო vs მონტენეგრო (სტადიონი „მიხეილ მესხი“)

10 ოქტომბერი
14:00 – რუმინეთი vs მონტენეგრო (სტადიონი „მიხეილ მესხი“ – 2)
16:00 – კვიპროსი vs საქართველო (სტადიონი „მიხეილ მესხი“)

13 ოქტომბერი
16:00 – საქართველო vs რუმინეთი (სტადიონი „მიხეილ მესხი“)
16:00 – მონტენეგრო vs კვიპროსი (სტადიონი „მიხეილ მესხი“ – 2)

სფფ-ის პრესსამსახური

U19 გადამწყვეტი მატჩის წინ. ევროპამდე ერთი ნაბიჯია…

Posted on by -

დღეს, საქართველოს 19-წლამდე ნაკრებმა ელიტრაუნდის გადამწყვეტი მატჩის წინ ბოლოჯერ ივარჯიშა. ვასილ მაისურაძემ გუნდი ნიონში, უეფას შტაბ-ბინასთან მდებარე სპორტკომპლექს „კოლოვრეის“ სტადიონზე ავარჯიშა; იქ, სადაც ხვალინდელი შეხვედრა უნდა გაიმართოს ჯგუფის პირველადგილოსნისა და ევროპის ჩემპიონატზე გამსვლელის გასარკვევად.

სატურნირო მდგომარეობიდან გამომდინარე, საქართველოს ნაკრებს ფრეც აძლევს ხელს, თუმცა, 19-წლამდელები ასპროცენტიანი შედეგის დადებას და ტურნირის მოგებით დასრულებას გეგმავენ.

ვასილ მაისურაძე მცირე დანაკლისს მაინც ვერ ასცდა. 2 დღეა არ უვარჯიშია ლევან შენგელიას, რომელსაც კვიპროსთან თამაშის შემდეგ სიცხე ჰქონდა და მხოლოდ დღეს იძუნძულა ვარჯიშზე. ტრავმა აწუხებს გიორგი აბურჯანიას და მისი მოედანზე გასვლის საკითხი მხოლოდ თამაშის წინ გადაწყდება.

ყველა სხვა ფეხბურთელი ჯანმრთელადაა და მონდომებით ემზადება ისრაელთან სათამაშოდ. მთავარმა მწვრთნელმა დღევანდელ ვარჯიშზე მოთამაშეები დიდად არ გადატვირთა.

გულშემატკივართა დიდი ინტერესისა და ჩვენი მცდელობების მიუხედავად, მატჩის ტრანსლირება ვერ ხერხდება, რადგან შვეიცარიული მხარე მატჩის გადაღებას არ აპირებს. ჩვენის მხრივ, ვეცდებით ყველა დეტალი ოპერატიულად გაცნობოთ სფფ-ის ფეისბუქის ოფიციალური გვერდის მეშვეობით.

სფფ-ის პრესსამსახური

ლოზანა, შვეიცარია

U19 – ბოლო ტურის წინ პირველ ადგილზე, წინ გადამწყვეტი მატჩია

Posted on by ბექა დოგრაშვილი

საქართველოს 19-წლამდე ნაკრებმა ელიტრაუნდის მეორე შეხვედრაში კვიპროსელ თანატოლებთან გაილაღა. ვასილ მაისურაძის ფეხბურთელებმა მეტოქეს ხუთი ბურთი გაუტანეს და კიდევ არაერთხელ შეეძლოთ გატანა. ამ მოგების შემდეგ, ჩვენმა ნაკრებმა ისრაელს ბურთების უკეთესი სხვაობით აჯობა და ჯგუფის პირველ ადგილზეა. ისრაელმა კი, თავის მხრივ, მასპინძელ შვეიცარიას მინიმალური ანგარიშით 1:0 მოუგო და 6-6 ქულა გვაქვს.

ლოზანაში მთელი დღის განმავლობაში წვიმდა, თუმცა, მატჩის დაწყებამდე 1 საათით ადრე წვიმა შეწყდა და ფეხბურთელებს საკმაოდ ნორმალურ პირობებში, კარგ მოედანზე მოუწიათ თამაში.

საქართველოს ნაკრების უპირატესობა აშკარა იყო. ჩვენი ფეხბურთელები ყველა კომპონენტში ჯაბნიდნენ მეტოქეს. ვასილ მაისურაძის გუნდი საჭიროებისამებრ უმატებდა და აგდებდა ტემპს; იყო მრავალფეროვანი შეტევები და საკმაოდ კარგი გოლებიც გავიდა.

ანგარიში მე-14 წუთზე მათე ცინცაძემ ზუსტად შესრულებული საჯარიმო დარტყმით გახსნა. ალბათ, გულშემატკივარს ეხსომება საკვალიფიკაციო ეტაპზე უელსის კარში მათეს გატანილი ჯარიმა და ეს გოლიც ძალიან ჰგავდა წინანდელს.

ხუთ წუთში კი, ანგარიში უკვე ორამდე გაიზარდა. ლუკა ზარანდიამ კარგად უპასა ლუკა კიკაბიძეს და ნაკრების ნახევარმცველსაც გატანა არ გასჭირვებია. ამის შემდეგ, უკვე თავად ლუკა ზარანდიას ჯერი დადგა. ლუკამ ფლანგიდან ცენტრისკენ შეიწია და საჯარიმოს ხაზიდან ძლიერად გაისროლა. მეკარეს მცველი ეფარებოდა და დარტყმის მომენტს ვერ ხედავდა. ზარანდიას დარტყმულმა მეკარესაც და მცველსაც თავზე „გადაუფრინა“ – 3:0.

ტაიმის ბოლო დამატებულ წუთზე კი, ლუკა ზარანდიას შესრულებული საჯარიმოს შემდეგ, როცა ახალგაზრდა შემტევმა ბურთი მეტოქის საჯარიმოში ჩაჰკიდა, არეულობაში კვიპროსელმა ლოიციდესმა საკუთარ კარში ჩაჭრა და მსაჯის სასტვენიც გაისმა – შესვენებაზე 4-ბურთიანი უპირატესობით გავედით.

მანამდე კი, არაერთი მომენტი გვქონდა. გოლის გატანამდე მცირედი დააკლდათ ცინცაძეს, ზარანდიას, აბურჯანიას, თევზაძეს….

მეორე ტაიმი 10 წუთის დაწყებული იყო, როცა კაკაბაძე-დარციმელიას კომბინაცია გოლით ლუკა კიკაბიძემ დაასრულა – 5:0. საჯარიმო დარტყმით მეორე გოლის გატანის კარგი შანსი ჰქონდა ცინცაძეს, მაგრამ მცირედით ააცილა. ქართველები იმდენ ხანს ფლობდნენ ბურთს და ერთმანეთში ათამაშებდნენ, რომ შორიდან მაყურებელს ვარჯიშიც კი შეიძლებოდა ჰგონებოდა.

და მაშინ, როცა ყველა საფინალო სასტვენის მოლოდინში იყო, ჩვენებს მეტოქის შეტევა გაეპარათ და მეკარე ქურდაძემ მეტოქის თავდამსხმელი საჯარიმოში მოცელა. თერთმეტმეტრიანი ზუსტად პანაიოტუმ შეასრულა და საბოლოო ანგარიშიც დაფიქსირდა – 5:1.

ახლა, საქართველოს ნაკრები 2 დღე დაისვენებს და ისრაელთან გადამწყვეტი მატჩისთვის მოემზადება. სატურნირო მდგომარეობიდან გამომდინარე, ჩვენს გუნდს ფრეც აძლევს ხელს, თუმცა, ქართველი ფეხბურთელები ელიტრაუნდის ასპროცენტიანი შედეგით დამთავრებას გეგმავენ და ისრაელთან მხოლოდ მოგებაზე ფიქრობენ.

ასე რომ, ევროპის 2014 წლის ჩემპიონატამდე მხოლოდ ერთი ნაბიჯი დაგვრჩა – 30 მაისს, ისრაელთან დადებითი შედეგი. გუნდს დაუბრუნდება წინა მატჩში დისკვალიფიცირებული გიორგი პაპუნაშვილი და ვასილ მაისურაძის გუნდი სრული საბრძოლო შემადგენლობით იქნება.

აქვე, ერთი საინტერესო ფაქტიც: ბოლო მატჩის მთავარი მსაჯი რუმინელი მარიუშ ავრამი იქნება, რომელიც ვასილ მაისურაძეს, მის გუნდსა და ქართველ გულშემატკივარს საკმაოდ ცუდად ახსოვს 2012 წლის 17-წლამდელთა ევროპის ჩემპიონატიდან, როცა ნახევარფინალში, ჰოლანდიასთან, რუმინელმა მოედნიდან ნიკა ჭანტურია გააძევა და კაცნაკლული დაგვტოვა. „95-იანებმა“ ჰოლანდიასთან რევანში უკვე აიღეს და ვიმედოვნებთ, 30 მაისის მატჩში, მარიუშ ავრამი მოედანზე ყველაზე შეუმჩნეველი ფიგურა იქნება…

 

19-წლამდელთა ელიტრაუნდი. მე-3 ჯგუფი

ლოზანა, შვეიცარია. სტადიონი „ხუან-ანტონიო სამარანჩი“

საქართველო vs კვიპროსი 5:1 (4:0)

საქართველო: ქურდაძე, კაკაბაძე, გურეშიძე, ნ.ჭანტურია (კაპ), თევზაძე, ცინცაძე, აბურჯანია (შენგელია 74), გოროზია, კიკაბიძე (ბერიძე 69), ზარანდია, დარციმელია (კერძევაძე 57)

მთ.მწვრთნელი – ვასილ მაისურაძე

კვიპროსი: გეორგიუ, კარო, დჯამასი, თერაფონტოსი (ტ.კონსტანტინუ 46), კოსმასი, ფრაგკოუ (პაპაფოტისი 79), კატელარისი, ტ.კონსტანტინუ, ლოიციდესი, პანაიოტუ, მაკრისი (კატსიატი 90+3)

მთ.მწვრთნელი – იოანის კონსტანტინუ

გოლები: ცინცაძე (14), კიკაბიძე (19, 55), ზარანდია (30), ლოიციდესი (45+2 საკ. კარში), პანაიოტუ (90+3 პენ)

გაფრთხილება: კაკაბაძე

მსაჯი: დანილო გრუჟიჩი (სერბეთი)

სფფ-ის პრესსამსახური
ლოზანა, შვეიცარია

 

U19 – უკვე ლოზანაში, სრული შემადგენლობით

Posted on by -

საქართველოს 19-წლამდე ნაკრები უკვე შვეიცარიაში იმყოფება. გუნდი გერმანიიდან ლოზანაში გუშინ, ნაშუადღევს ჩავიდა. თბილისიდან ნაკრებს შეუერთდნენ გიორგი პაპუნაშვილი და მათე ცინცაძე, რომლებიც 21 მაისს, თბილისის „დინამოს“ შემადგენლობაში საქართველოს თასის მფლობელები გახდნენ.

ნაკრების საბოლოო, 18-კაციანი შემადგენლობა ასეთია:

მეკარეები: ოთო გოშაძე, ბექა ქურდაძე (ორივე „საბურთალო“)

მცველები: ნიკა ჭანტურია, გიორგი გაბაძე (ორივე „ლოკომოტივი“ თბილისი), ალექსანდრე გურეშიძე, ოთარ კაკაბაძე (ორივე „დინამო“ თბილისი), გიორგი თევზაძე, ჯემალ ტაბიძე (ორივე „საბურთალო“)

ნახევარმცველები: ლევან შენგელია, გიორგი ბერიძე (ორივე „დილა 2“, გორი), გიორგი გოროზია, გიორგი აბურჯანია, ლუკა კიკაბიძე (ყველა „ლოკომოტივი“ თბილისი), მათე ცინცაძე, გიორგი პაპუნაშვილი (ორივე „დინამო“ თბილისი)

თავდამსხმელები: ლუკა ზარანდია („ლოკომოტივი“ თბილისი), დათო დარციმელია („სევასტოპოლი“, უკრაინა), ილია კერძევაძე (“დილა 2”, გორი)

 

შეგახსენებთ, რომ 19-წლამდელებმა დასკვნითი შეკრება გერმანიაში, გარმიშ პატერკირხენში გაიარეს, სადაც ერთი ამხანაგური მატჩი გამართეს „ბაიერნის“ 19-წლამდე გუნდთან  – 1:1.

გუშინ საღამოსვე, ვასილ მაისურაძის გუნდმა ლოზანაში პირველი ვარჯიში ჩაატარა. ფეხბურთელები მობილიზებულები და კონცენტრირებულები არიან. საბედნიეროდ, ჯანმრთელობის პრობლემებსაც არავინ უჩივის.

ელიტრაუნდის მე-3 ჯგუფის გუნდები – შვეიცარია, ისრაელი, საქართველო და კვიპროსი ლოზანაში, სასტუმრო „Movenpick“- ში არიან დაბინავებული. თუმცა, ამ ეტაპზე, აქ ჯერ მხოლოდ შვეიცარიისა და საქართველოს ნაკრებები არიან. ისრაელისა და კვიპროსის დელეგაციები ხვალ, დღის განმავლობაში ჩამოვლენ.

აქვე გეტყვით, რომ საქართველოს ნაკრები პირველ მატჩს 25 მაისს, თბილისის დროით 18:00 საათზე, ლოზანაში, „ხუან-ანტონიო სამარანჩის“ სტადიონზე გამართავს. მატჩის პირდაპირი რეპორტაჟის ხილვას ქართველი გულშემატკივარი „სილქ სპორტის“ მეშვეობით შეძლებს.

სფფ-ის პრესსამსახური

ლოზანა, შვეიცარია

19-წლამდელები: ბოლო ვარჯიში თბილისში, შეკრება გერმანიაში

Posted on by ბექა დოგრაშვილი

დღეს, საქართველოს 19-წლამდე ნაკრებმა სფფ-ის ტექნიკურ ცენტრ „ბასაზე“ ბოლო ვარჯიში ჩაატარა. ვასილ მაისურაძის გუნდი გამთენიას გერმანიაში მიემგზავრება, სადაც ელიტრაუნდისწინა დასკვნით შეკრებას გაივლის.

ნაკრებში გამოძახებულ ფეხბურთელთა სია ასეთია:

მეკარეები: ოთო გოშაძე, ბექა ქურდაძე (ორივე „საბურთალო“);

მცველები: ნიკა ჭანტურია, გიორგი გაბაძე (ორივე „ლოკომოტივი“ თბილისი), ალექსანდრე გურეშიძე, ოთარ კაკაბაძე (ორივე „დინამო“ თბილისი), გიორგი თევზაძე, ჯემალ ტაბიძე (ორივე „საბურთალო“), გიორგი გაფრინდაშვილი („დილა“, გორი);

ნახევარმცველები: ლევან შენგელია, გიორგი ბერიძე (ორივე „დილა 2“, გორი), გიორგი გოროზია, გიორგი აბურჯანია, ლუკა კიკაბიძე (ყველა „ლოკომოტივი“ თბილისი), მათე ცინცაძე, გიორგი პაპუნაშვილი, არჩილ მესხი (ყველა „დინამო“ თბილისი);

თავდამსხმელები: ლუკა ზარანდია („ლოკომოტივი“ თბილისი), ალექსანდრე შერაზადაშვილი („ალკორკონი“, ესპანეთი), დათო დარციმელია („სევასტოპოლი“, უკრაინა)

ნაკრების ახალწვეული – ალექსანდრე შერაზადაშვილი გუნდს გერმანიაში შეუერთდება. 22 მაისს, პირდაპირ შვეიცარიაში ჩავლენ ნაკრების ლიდერები – მათე ცინცაძე და გიორგი პაპუნაშვილი, რადგან მათ 21 მაისს, „დინამოს“ შემადგენლობაში საქართველოს თასის ფინალი უნდა ითამაშონ.

ვასილ მაისურაძის გუნდი გერმანიის საკურორტო ქალაქ გარმიშპატერკირხენში იცხოვრებს და იქ მოემზადება. 18 მაისს, ჩვენს გუნდს ამხანაგური შეხვედრა ექნება მიუნხენის „ბაიერნის“ 19-წლამდელთა გუნდთან. ელიტრაუნდამდე მეტი ამხანაგური მატჩი აღარ იქნება. ნაკრები შვეიცარიაში 22 მაისს გაემგზავრება.

სფფ-ის პრესსამსახური

ვასილ მაისურაძის 19-წლამდელებმა “გალათასარაი” დაამარცხეს

Posted on by -

საქართველოს 19-წლამდელთა ნაკრებმა, რომელიც ამჟამად თურქეთში შეკრებაზე იმყოფება, პირველ ტესტ მატჩში “გალათასარაის” 20-წლამდელთა გუნდი 2:1 დაამარცხა – ამ ინფორმაციას საქართველოს ფეხბურთის ფედერაციის ოფიციალური Facebook გვერდი ადასტურებს. თურქთა კარის დალაშქვრა მათე ცინცაძემ (პენალტით) და გიორგი პაპუნაშვილმა მოახერხეს.

მეორე ტესტ-მატჩს ვასილ მაისურაძის გუნდი ზეგ, 7 მარტს გამართავს და “ქასიმფაშას” 20-წლამდელებს დაუპირისპირდება.

განაცხადი 19-წლამდე ევროპის ჩემპიონატის მასპინძლობისთვის

Posted on by -

რამდენიმე დღის წინ, საქართველოს ფეხბურთის ფედერაციამ უეფას ოფიციალური წერილით მიმართა, სადაც ქართული მხარე 2017 წლის უეფას 19-წლამდე ევროპის ჩემპიონატის ფინალური ეტაპის მასპინძლობის სურვილსა და ინტერესს გამოთქვამს.

„ჩვენ გვაქვს სურვილი და მზადყოფნა 2017 წლის უეფას 19-წლამდე ევროპის ჩემპიონატის ფინალური ეტაპის მასპინძლობისა. დავაგროვეთ საკმაო გამოცდილება და გვჯერა, ამ მაღალი დონის შეჯიბრებას თავს ღირსეულად გავართმევთ. ამასთან, 19-წლამდე ევროპის ჩემპიონატის საქართველოში ჩატარება ძალიან კარგი იქნება ჩვენი ფედერაციისა და მთლიანად ქვეყნისთვის“ – ნათქვამია სფფ-ის წერილში.

საპასუხო ოფიციალური წერილი უეფადან დღეს მოვიდა, სადაც ნათქვამია:
„უპირველესად, მადლობას გიხდით, რომ გამოთქვით სურვილი და ინტერესი 2017 წლის ევროპის 19-წლამდე ჩემპიონატის მასპინძლობისა. გაცნობებთ, რომ მარტიდან, უეფას ყველა წევრ ფედერაციას დაეგზავნება სპეციალური წერილი და ცირკულარი და შეძლებთ ოფიციალურად დააფიქსიროთ ჩემპიონატის მასპინძლობის სურვილი.
ამასთან, წარმოდგენილი იქნება ინფორმაცია სავალდებულო პროცედურებისა და მოთხოვნების შესრულების შესახებ და ის, თუ რა ვადებში რა მოთხოვნები უნდა შესრულდეს, რომელიც ყველა მსურველმა დადგენილ ვადებში უნდა წარმოადგინოს.“

ასე რომ, საქართველოს ფეხბურთის ფედერაცია მარტში ამის შესახებ კიდევ ერთხელ, ოფიციალურად განაცხადებს და იმედი გვაქვს, უეფა კვლავ გამოგვიცხადებს ნდობას და საქართველო 19-წლამდე ევროპის ჩემპიონატის მასპინძელი ქვეყანა გახდება.

სფფ-ის პრესსამსახური

საქართველომ უელსი გაანადგურა

Posted on by -

13 ნოემბერს, საქართველოში, სტარტი ევროპის 19-წლამდელთა ჩემპიონატის საკვალიფიკაციო ეტაპის მატჩებმა აიღო. საქართველოს ნაკრებმა “მიხეილ მესხზე” უელსის ნაკრები მიიღო და მეტოქე ყველა კომპონენტში დაჯაბნა.

ქართველებმა თამაში აქტიურად დაიწყეს. მე-6 წუთზე, ნიკა ჭანტურიას პასის შემდეგ, დავით ჯიქიამ წინ გამოსულ მეკარეს ბურთი თავზე გადაუგდო, თუმცა საბოლოოდ, ცარიელ კართან მყოფმა გოლის გატანა ვერ შეძლო. იმავე ჯიქიამ, მე-10 წუთზე შორიდან ძლიერად დაარტყა, მაგრამ ბურთი კარს მცირედით აცდა.

მაისურაძის შეგირდებმა ანგარიში 22-ე წუთზე გახსნეს – გურეშიძის პასის შემდეგ, უელსელმა მცველებმა შეუთანხმებლად იმოქმედეს, ხოლო პაპუნაშვილმა მეკარეს ბურთი თავზე გადაუგდო და ის კარის ბადეში მოაქცია.

26-ე წუთზე, უელსის ნაკრების მცველმა საკუთარ მეკარეს ცუდი პასი გაუკეთა, კიპერმა ბურთი ვერ დაიმორჩილა, ხოლო იქვე მყოფმა ჯიქიამ საქართველოს უპირატესობა ორამდე გაზარდა.

28-ე წუთზე, უელსელთა კარის მიმართულებით, ოთარ კაკაბაძემ ძლიერად გაისროლა, თუმცა კარის დარაჯმა ბურთის მოგერიება მოახერხა. მალევე, საჯარიმოში მყოფმა ჯიქიამ მახვილი კუთხიდან დაარტყა, თუმცა სტუმრებს ამჯერად ძელმა უშველა.

43-ე წუთზე, ზარანდიას ჩაწოდებულ კუთხურს ალექსანდრე გურეშიძე თავით გამოეხმაურა – 3:0. ტაიმის ბოლოს, საჯარიმოში სწრაფად შესულ ზარანდიას მეტოქე გუნდის მცველმა გოლის გატანის საშუალება არ მისცა.

ქართველებმა მეორე ტაიმიც აქტიურად დაიწყეს. 49-ე წუთზე, ჯიქიამ მეტოქე გუნდის საჯარიმოში რამდენიმე მოთამაშე მოატყუა, თუმცა არაზუსტად დაარტყა. 55-ე წუთზე, უელსელთა საჯარიმოში მყოფმა ჯიქიამ მეტოქე ბრწყინვალედ ჩამოიტოვა და გოლი გაიტანა – 4:0.

57-ე წუთზე, ჯიქია კვლავ კარგ პოზიციაში აღმოჩნდა, ის საჯარიმოს გარეთ გამოსულ მეკარეს ბურთს თავზე უგდებდა, თუმცა ობრაიანმა ის ხელით მოიგერია, რისთვისაც მსაჯმა მოედნიდან გააძევა. დანიშნული ჯარიმა უნაკლოდ შეასრულა მათე ცინცაძემ – 5:0.

78-ე წუთზე, აბურჯანიამ შენგელია მეკარესთან ერთი-ერთზე დატოვა, თუმცა ამ უკანასკნელმა გოლის გატანა ვერ შეძლო.

საბოლოო შედეგი 84-ე წუთზე დაფიქსირდა, როცა უელსელთა ფეხბურთელმა, თომას ოსალივანმა ქართველთა კარი საჯარიმო დარტყმით აიღო.

ვასილ მაისურაძე: “კმაყოფილები ვართ. არ მეგონა, მეტოქეს ასე ადვილად თუ დავამარცხებდით. აქცენტს პირველ მატჩზე ვაკეთებდით და ყველაფერი კარგად დასრულდა. ადრეც ვთქვი, რომ უელსთან და მოლდოვასთან პირველ ნომრად თამაშს ვაპირებდით. ჩვენი საყრდენები ცოტათი დაღლილები იყვნენ, ამიტომ ისეთი პრესინგი არ გამოგვივიდა, როგორიც გვსურდა. შევეცდებით, მომდევნო შეხვედრისათვის ძალები მაქსიმალურად აღვიდგინოთ. რამდენიმე წლის წინ, მოლდოვის ნაკრებთან კი ვითამაშეთ, მაგრამ მას შემდეგ დიდი დრო გავიდა, თუმცა ვფიქრობ, რომ მათ კარგი გუნდი ჰყავთ.”

ალექსანდრე გურეშიძე: “ძალიან კმაყოფილები ვართ. მინდა, ბიჭებს მადლობა გადავუხადო. ასეთ მარტივ მოგებას არ ველოდით. უელსს პირველ ნახევარში ცუდი შთაბეჭდილება არ დაუტოვებია. ვაპირებთ, რომ კიდევ უფრო მოვუმატოთ.”

გერანტ უილიამსი: “მატჩი ჩვენთვის არასასიამოვნო შედეგით დასრულდა. საქართველოს ნაკრები ძალიან კარგი გუნდია. ქართველები ბურთს კარგად გრძნობენ და მოედანზე მშვენივრად მოძრაობენ, ჩვენ კი სწორედ ამიტომ დავმარცხდით.”

საქართველო – უელსი 5:1
“მიხეილ მესხი”

საქართველო: ქურდაძე, კაკაბაძე, გურეშიძე, ჭანტურია, ცინცაძე, აბურჯანია, პაპუნაშვილი (შენგელია 64′), ჯიქია (კერძევაძე 59′), კიკაბიძე, თევზაძე, ზარანდია (ახვლედიანი 75′).
მთავარი მწვრთნელი: ვასილ მაისურაძე.

უელსი: ობრაიანი, ვიკჰემი, ჯონი, რ. ევანსი, იორვერტი, დევისი, ჯ. ევანსი (ქროუვი 58′), შიჰანი (ვიკსი 72′), რეიდი (ჯოუნსი 72′), ოსალივანი, უილიამსი.
მთავარი მწვრთნელი: გერანტ უილიამსი.

გოლები: პაპუნაშვილი 22′, ჯიქია 26′ 55′ , გურეშიძე 43′, ცინცაძე 57′ – ოსალივანი 84′.
გაფრთხილებები: პაპუნაშვილი 18′, ახვლედიანი 82′ – ოსალივანი 78′, დევისი 80′.
გაძევება: ობრაიანი 57′.
მთავარი მსაჯი: მათიას გესტრანიუსი (ფინეთი).

დიტო ჭიჭინაძე

ვასილ მაისურაძე: “აქცენტს პირველ მატჩზე ვაკეთებთ”

Posted on by -

13 ნოემბრიდან, საქართველოში, ევროპის 19-წლამდელთა ჩემპიონატის საკვალიფიკაციო ეტაპის მატჩები ჩატარდება. ტურნირის შეხვედრები “მიხეილ მესხსა” და “დინამო არენაზე” გაიმართება. საქართველოს ნაკრების მოწინააღმდეგეები მოლდოვის, ჰოლანდიისა და უელსის ნაკრებები იქნებიან.

ტურნირის დაწყების წინ, 12 ნოემბერს, “მიხეილ მესხზე” ოთხივე გუნდის მწვრთნელმა პრესკონფერენცია გამართეს.

ვასილ მაისურაძე (საქართველოს ნაკრების მთავარი მწვრთნელი): “აქცენტს პირველ მატჩზე ვაკეთებთ. ამჟამად, მხოლოდ უელსის ნაკრებთან გასამართ შეხვედრაზე ვფიქრობთ. ტურნირის ფავორიტების დასახელებისგან თავს შევიკავებ. ოთო გოშაძე დაშავდა, მაგრამ სხვა ფეხბურთელები თავს კარგად გრძნობენ.”

ჯეფ ვუდი (უელსის ნაკრების მეკარეების მწვრთნელი): “პირველი შთაბეჭდილებები დადებითია. ჩვენი მეტოქეების მსგავსად, კარგი შემადგენლობა გვყავს. იმედი მაქვს, რომ კარგი ტურნირი გამოვა.”

ვიმ ვან ზვამი (ჰოლანდიის ნაკრების მთავარი მწვრთნელი): “მართალია, სექტემბერ-ოქტომბერში მატჩები ჩავატარეთ, მაგრამ ხვალ ყველაზე მნიშვნელოვანი თამაში გველის. ამ დროისთვის, მხოლოდ მოლდოვის ნაკრებზე ვფიქრობთ. ყველა მეტოქეს პატივს ვცემთ. ჩემი აზრით, ასეთ ტურნირებზე, შესაძელებელია, ყველაფერი მოხდეს.”

იური ოსპინენკო (მოლდოვის ნაკრების მთავარი მწვრთნელი): “მოლდოვასა და საქართველოს ერთმანეთთან ბევრი რამ აკავშირებს, ამიტომ აქ თავს ისე ვგრძნობთ, როგორც საკუთარ სახლში. გვინდა, ტურნირზე ღირსეულად გამოვიდეთ.”

შეგახსენებთ, რომ საქართველოს 19-წლამდელთა ნაკრები პირველ მატჩს ხვალ, უელსის ნაკრების წინააღმდეგ გამართავს. შეხვედრა “მიხეილ მესხზე”, 14:00 საათზე დაიწყება.

დიტო ჭიჭინაძე

19-წლამდელთა პირველი ტესტ-მატჩი სერბეთთან ფრედ დასრულდა

Posted on by ბექა დოგრაშვილი

ვასილ მაისურაძის 19-წლამდე ნაკრებმა, სერბ სტუმრებთან პირველი ამხანაგური მატჩი ფრედ – 1:1 დაასრულა. შეხვედრას გორის „თენგიზ ბურჯანაძის“ სახელობის სტადიონმა უმასპინძლა.

სერბეთის ასაკობრივი ნაკრებები, ტრადიციულად, კარგი ფიზიკური მომზადებით გამოირჩევიან და ძალისმიერ ფეხბურთს თამაშობენ. ამ ფორმაციის 19-წლამდე ნაკრებში კი, რამდენიმე ისეთი ფეხბურთელი თამაშობს, რომლებიც წლევანდელ 19-წლამდელთა ევროპის ჩემპიონატზე ჩემპიონები გახდნენ.

მატჩი თანაბარ ბრძოლაში დაიწყო, თუმცა, ჩვენი ფეხბურთელები ბურთს უფრო მეტხანს აკონტროლებდნენ. მიუხედავად ამისა, პირველი გოლი საკუთარ კარში მივიღეთ. დაცვის ხაზში დაშვებული შეცდომისა და ბურთის დაკარგვის შემდეგ, სტეფან ილიჩი ბექა ქურდაძესთან პირისპირ აღმოჩნდა და გოლის გატანა არ გასჭირვებია.

ქართველებმა წონასწორობის აღდგენა 24-ე წუთზე შეძლეს, როცა გიორგი გოროზიას წაქცევისთვის დანიშნული თერთმეტმეტრიანი ზუსტად მათე ცინცაძემ შეასრულა – 1:1. ტაიმი ამ ანგარიშით დასრულდა, თუმცა, მანამდე ჩვენმა სტუმრებმა რამდენიმე სახიფათო ეპიზოდი შექმნეს საქართველოს ნაკრების კართან.

მეორე ტაიმიდან, გუნდების მწვრთნელებმა შეცვლების განხორციელება დაიწყეს. სერბები კვლავ სახიფათოდ იჩხვლიტებოდნენ. საქართველოს ნაკრები კი, მისთვის დამახასიათებელ ფეხბურთს ვერ აჩვენებდა. მატჩის ბოლოს, საჯარიმოს შესრულების შემდეგ, სერბებმა მეორე გოლის გატანა შეძლეს, თუმცა, ეს ბურთი არ ჩაითვალა, რადგან ჩვენს საჯარიმოში ერთბაშად 2 თუ 3 სერბი ფეხბურთელი თამაშგარეში იყო. რამდენიმე, მეტნაკლებად სახიფათო მომენტი ჰქონდათ ვასილ მაისურაძის ფეხბურთელებსაც, თუმცა მეტი გოლი აღარ გასულა.

მატჩისშემდგომ პრესკონფერენციაზე საკმაოდ კეთილგანწყობილი იყო სერბთა თავკაცი – ველჟკო პაუნოვიჩი, რომელმაც მადლობა გადაუხადა საქართველოს ფეხბურთის ფედერაციას კარგი დახვედრისა და თბილი მასპინძლობითვის.

„ძალიან კარგი, დინამიური და კარგად საყურებელი თამაში გამოვიდა. იმედი მაქვს, სტადიონზე მოსულმა მაყურებელმა ისიამოვნა და მინდა მათაც მადლობა ვუთხრა, რომ მოვიდნენ. ქართულ მხარესთან ჩვენ დიდი მეგობრობა გვაკავშირებს და ასეთი თამაშები ჩვენი შეთანხმების საფუძველზე იგეგმება. ვფიქრობ, მომავალი თამაში უფრო საინტერესო უნდა გამოდგეს, რადგან გუნდები უკვე კარგად იცნობენ ერთმანეთს და შესაბამისად, მატჩიც განსხვავებული იქნება. თუმცა, არ შემიძლია არ აღვნიშნო, რომ მსაჯების მოქმედებით ძალიან უკმაყოფილო ვარ…“ – განაცხადა პაუნოვიჩმა.

ამის შემდეგ კი, კომენტარი საქართველოს ნაკრების მთავარმა მწვრთნელმაც გააკეთა.

ვასილ მაისურაძე: „დაცვაში აშკარად ბევრი შეცდომა დავუშვით. სრული შემადგენლობით თავიდანვე ვერ შევიკრიბეთ და ეს მხოლოდ ბოლო 3 დღე მოვახერხეთ, რადგან ბიჭებს თავიანთ კლუბებში ეროვნული ჩემპიონატის თამაშები ჰქონდათ და ესენი, ძირითადად, დაცვის ხაზში მოთამაშე ფეხბურთელები იყვნენ. დაღლილობა აშკარად იგრძნობოდა. თუმცა, ვთვლი, რომ დასაწყისისთვის ნორმალური თამაში გამოვიდა, რადგან ამ ასაკში ევროპის მოქმედ ჩემპიონ გუნდს დავუპირისპირდით და ჩემპიონატის მონაწილე რამდენიმე ფეხბურთელი დღეს მოედანზე იყო. ძალიან კარგი გუნდია და შესაბამისად, თამაშიც რთულად წავიდა. ისიც უნდა ვთქვათ, რომ ქართველი ფეხბურთელები და ჩვენ ყველა მოკლებულნი ვართ ასეთ სწრაფ ტემპში თამაშს და ვფიქრობ, რომ მომდევნო თამაშს უკეთ ვითამაშებთ.

პენალტზე ახლა ვერაფერს გეტყვით, რადგან ჯერ ვიდეოჩანაწერი უნდა ვნახო. მსაჯობის ხარისხსა და დონეზე მე კომენტარს ვერ გავაკეთებ. არჩათვლილი გოლი დროს, ყველამ დაინახა თამაშგარე მდგომარეობა. ჩვენ რომ უცხოეთში ტურნირებზე მივდივართ, მსაჯობა ასეთი კი არა, ბევრჯერ ამაზე უარესია. ასე რომ, ძალიანაც ნუ გავიკვირვებთ, რადგან ჩვენ უარესებსაც გვიკეთებენ უცხოურ შეკრებებსა თუ თამაშებზე…“

ასე რომ, 11 ოქტომბერს, ეს გუნდები კიდევ ერთხელ დაუპირისპირდებიან ერთმანეთს და 19-წლამდე ნაკრებისთვის ეს იქნება ბოლო საერთაშორისო ამხანაგური მატჩი ნოემბრის ევროშესარჩევის დაწყებამდე.

9 ოქტომბერი, 2013. გორი, სტადიონი „თენგიზ ბურჯანაძე“

საქართველოU19 – სერბეთიU19 1:1 (ამხ)

საქართველოU19: ქურდაძე, კაკაბაძე (გაბაძე 58), თევზაძე (კუსიანი 86), ნ.ჭანტურია (კაპ), ტაბიძე, ცინცაძე, ზარანდია (კერძევაძე 46), გოროზია (შენგელია 65), ჯიქია (ახვლედიანი 46), აბურჯანია, კიკაბიძე (მზევაშვილი 58)

მთ.მწვრთნელი – ვასილ მაისურაძე

სერბეთიU19: რაიკოვიჩი, ვიკო (იოვანოვიჩი 80), მილოშევიჩი, მილინკოვიჩ-სავიჩი, მარასი (ცვეტკოვიჩი 80), ბაბიჩი, შიმიჩი (პანტიჩი 58), მაქსიმოვიჩი, ილიჩი (მანდიჩი 80), გაჩინოვიჩი (ზუკანოვიჩი 80), ანტონოვი (რიშტიჩი 67)

მთ.მწვრთნელი – ველჟკო პაუნოვიჩი

გოლები: ილიჩი (18), ცინცაძე (24 პენ)

გაფრთხილება: ტაბიძე, ვიკო, შიმიჩი, ბაბიჩი, მანდიჩი

მსაჯი: ა.კრიჭაშვილი (საქართველო)

ამ ნაკრებებს შორის მეორე ამხანაგური შეხვედრა 11 ნოემბერს, კვლავ გორში გაიმართება და დღის 3 საათზე დაიწყება.

სფფ-ის პრესსამსახური