ჭდე: Premier League

ანგარიშის გამოცნობა („ჩელსი“-„ლივერპული“): გამარჯვებულები დაჯილდოვდნენ

Posted on by ბექა დოგრაშვილი

როგორც მოგეხსენებათ, Fanebi.Com-ზე მიმდინარეობს მატჩების შედეგების გამოცნობის კონკურსი. ჩვენი პორტალის მომხმარებლები, რომლებიც ზუსტად გამოიცნობენ ჩვენს მიერ შემოთავაზებული შეხვედრის ანგარიშს, Europe-Bet-ის ანგარიშზე სიმბოლური ბონუსებით დაჯილდოვდებიან.

ამ კვირაში ჩვენს მიერ შემოთავაზებული  „ჩელსი“-„ლივერპულის“ მატჩის შედეგი ორმა მომხმარებელმა გამოიცნო: luka berianidze, irakli machitidzze

შესაბამისად, ორივე მომხმარებელს Europe-Bet-ის ანგარიშზე დაერიცხა ბონუსი.

კონკურსის წესი: http://fanebi.com/chelsi-liverpuli-gamoitsani-matchis-shedegi-da-dajildovdi/#.UsEirfvgyKZ
მატჩის ბმული: http://fanebi.com/chelsim-liverpuli-mdzime-brdzolashi-daamartskha/#.UsEjWvvgyKY

 

„ჩელსიმ“ „ლივერპული“ მძიმე ბრძოლაში დაამარცხა

Posted on by ბექა დოგრაშვილი

ინგლისის პრემიერლიგის XIX ტურის ცენტრალური მატჩი „სტემფორდ ბრიჯზე“ გაიმართა, სადაც ლონდონის „ჩელსიმ“ „ლივერპულს“ უმასპინძლა და მეტოქე ანგარიშით 2:1 დაამარცხა, თუმცა მასპინძლები აგებდნენ.

ანგარიში შეხვედრის მე-4 წუთზე „წითლების“ მცველმა მარტინ შკრტელმა გახსნა, რომელმაც ფილიპე კოუტინიოს მიერ სტანდარტის შესრულების შემდეგ, მეტოქის საჯარიმო მოედანზე შექმნილი არეულობით ისარგებლა. მე-17 წუთზე ედენ აზარმა 20 მეტრის მანძილიდან დარტყმით ანგარიში გაათანაბრა. 35-ე წუთზე მასპინძლები სულაც წინ გავიდნენ: ახლო მანძილიდან სამუელ ეტოომ გაიტანა და საბოლოო ანგარიში დააფიქსირა – 2:1.

„ჩელსიმ“ ამ გამარჯვებით 40 ქულას მოუყარა თავი მესამე პოზიციაზე დარჩა. მეხუთე ადგილამდე ჩამოქვეითებულ „ლივერპულს“ კი კვლავ 36 ქულა აქვს.

ინგლისის პრემიერლიგა
XIX ტური
„ჩელსი“-„ლივერპული“ 2:1 (2:1)

„ჩელსი“: ჩეხი, ივანოვიჩი (კოული 30′), კეჰილი, ტერი, ასპილიკუეტა, დავიდ ლუისი, ლამპარდი (ობი მიკელი 46′), ვილიანი, ოსკარი, აზარი, ეტოო (ტორესი 86′).
მთავარი მწვრთნელი: ჟოზე მოურინიო.
„ლივერპული“: მინიოლე, ჯონსონი (ასპასი 84′), შკრტელი, აგერი, სახო (ტურე 90′), ლუკასი, ალენი (სმიტი 60′), ჰენდერსონი, სტერლინგი, სუარესი, კოუტინიო.
მთავარი მწვრთნელი: ბრენდან როჯერსი.
გოლები: აზარი 17′, ეტოო 35′ – შკრტელი 4′.
გაფრთხილებები: ტერი 47′, დავიდ ლუისი 50′, კეჰილი 79′, ოსკარი 90+4′ – ჯონსონი 40′, ლუკას ლეივა 90+5′.
მთავარი მსაჯი: ჰოვარდ უები.

ბექა დოგრაშვილი

„ჩელსი“-„ლივერპული“ (სასტარტო შემადგენლობები)

Posted on by ბექა დოგრაშვილი

ინგლისის პრემიერლიგის XIX ტურის ცენტრალური მატჩი „სტემფორდ ბრიჯზე“ შედგება, სადაც ლონდონის „ჩელსი“ „ლივერპულს“ მიიღებს.

უკვე ცნობილია მონაწილე გუნდების სასტარტო შემადგენლობები:

„ჩელსი“: ჩეხი, ივანოვიჩი, კეჰილი, ტერი, ასპილიკუეტა, დავიდ ლუისი, ლამპარდი, ვილიანი, ოსკარი, აზარი, ეტოო.

„ლივერპული“: მინიოლე, ჯონსონი, შკრტელი, აგერი, სახო, ლუკასი, ალენი, ჰენდერსონი, სტერლინგი, სუარესი, კოუტინიო.

მატჩი თბილისის დროით 20:00 საათზე დაიწყება და მას ჰოვარდ უები განსჯის.

ბექა დოგრაშვილი

მოურინიო: „იმედია, სუარესმა მცირე ტრავმა მიიღო და ჩვენთან ვერ ითამაშებს“

Posted on by ბექა დოგრაშვილი

ინგლისის პრემიერლიგის XIX ტურის ცენტრალური მატჩი „სტემფორდ ბრიჯზე“ შედგება, სადაც ლონდონის „ჩელსი“ „ლივერპულს“ უმასპინძლებს. „პენსიონერების“ მთავარმა მწვრთნელმა ჟოზე მოურინიომ მოახლოებული შეხვედრის შესახებ ისაუბრა და ხუმრობით ისურვა, რომ ლუის სუარესი მცირეოდენი ტრავმის გამო თამაშს ვერ შეძლებს. ურუგვაელ ფეხბურთელს დაზიანება არ მიუღია, თუმცა პორტუგალიელ სპეციალისტს მისი უქმობის იმედი მაინც აქვს.

„იქნებ „მანჩესტერ სიტისთან“ გამართულ მატჩში სუარესმა მცირეოდენი ტრავმა მიიღო? სერიოზულ დაზიანებას არ ვუსურვებ. მხოლოდ მცირე, ოთხდღიანი ტრავმაც საკმარისია, რომ ჩვენს წინააღმდეგ თამაში ვერ შეძლოს“, – მოურინიოს სიტყვები ბრიტანულმა „დეილი მეილმა“ გამოაქვეყნა.

მატჩი „ჩელსისა“ და „ლივერპულს“ შორის კვირას, თბილისის დროით 20:00 საათზე დაიწყება.

ბექა დოგრაშვილი

პელეგრინი: „მნიშვნელოვანია წლის სატურნირო ცხრილის სათავეში დასრულება“

Posted on by ბექა დოგრაშვილი

ინგლისის პრემიერლიგის XVIII ტურის ცენტრალური მატჩი „ეტიჰადზე“ შედგა, სადაც „მანჩესტერ სიტიმ“ „ლივერპული“ მიიღო და მეტოქე ანგარიშით 2:1 დაამარცხა. ამ დროისთვის „ქალაქელები“ გათამაშების სატურნირო ცხრილში მეორე ადგილს იკავებენ და მხოლოდ ერთი ქულით ჩამორჩებიან ლიდერ „არსენალს“. მერსისაიდული გუნდის დამარცხების შემდეგ „სიტის“ მთავარმა მწვრთნელმა მანუელ პელეგრინიმ თავისი ფეხბურთელების მიმართ საქებარი სიტყვები არ დაიშურა.

„მთავარია, რომ ჩვენი ხასიათი გამოვავლინეთ და გამარჯვებით დავასრულეთ მატჩი, რომელსაც ანგარიშით 0:1 ვაგებდით. სანამ „ლივერპული“ ანგარიშს გახსნიდა, ჩვენ გოლის გატანის სამი შანსი გვქონდა, თუმცა პირველებმა მეტოქე გუნდის ფეხბურთელებმა გაიტანეს. ამის შემდეგ რთული იყო შეტევების გაგრძელება, რადგან „ლივერპულის“ კონტრშეტევები ჩვენთვის დიდ ხიფათს წარმოადგენდა, თანაც მერსისაიდელებს ეს კარგად გამოსდით. ვფიქრობ, ჩვენთვის მნიშვნელოვანი იქნება მიმდინარე წლის სატურნირო ცხრილის სათავეში დასრულება“, – პელეგრინის სიტყვები BT Sport-მა გამოაქვეყნა.

ბექა დოგრაშვილი

ბრენდან როჯერსი: „ვამაყობ ჩემი გუნდით“

Posted on by ბექა დოგრაშვილი

ინგლისის პრემიერლიგის XVIII ტურის ცენტრალური მატჩი „ეტიჰადზე“ შედგა, სადაც „მანჩესტერ სიტის“ „ლივერპული“ ეწვია. შეხვედრა საინტერესოდ წარიმართა. ანგარიში 24-ე წუთზე ფილიპე კოუტინიომ გახსნა, 31-ე წუთზე ვენსან კომპანიმ გაათანაბრა, ტაიმის ბოლო წუთზე კი ალვარო ნეგრედომ „ქალაქელები“ დააწინაურა და მატჩის საბოლოო წერტილიც დააფიქსირა – 2:1.

მარცხის მიუხედავად, მატჩის შემდეგ მერსისაიდული გუნდის მთავარმა მწვრთნელმა ბრენდან როჯერსმა თავისი ფეხბურთელები შეაქო.

„ჩემი გუნდით ვამაყობ. მეტად ქარიზმატული ფეხბურთი ვაჩვენეთ. „ლივერპულმა“ მშვენიერი გოლი გაიტანა და კიდევ სამჯერ შეეძლო ამის გაკეთება. სამწუხაროდ, დავმარცხდით, მაგრამ გუნდმა შესანიშნავი თამაში აჩვენა, რაც დადებით განწყობას გვიქმნის“, – აღნიშნა მერსისაიდელთა დამრიგებელმა.

სხვათა შორის, ბრიტანულ პრესაში ხმა დაირხა, „ლივერპულის“ ხელმძღვანელობა როჯერსს ახალ კონტრაქტს უმზადებსო. მოქმედი ხელშეკრულება, რომელიც 2012 წლის ზაფხულში გაფორმდა, თვრამეტ თვეში იწურება. თავად როჯერსმაც რამდენჯერმე განაცხადა, რომ „ენფილდზე“ დარჩენის სურვილი აქვს.

ბექა დოგრაშვილი

მაიკლ ოუენმა პრემიერლიგის ლიდერები შეაფასა

Posted on by ბექა დოგრაშვილი

„ლივერპულის“, მადრიდის „რეალისა“ და „მანჩესტერ იუნაიტედის“ ყოფილმა თავდამსხმელმა მაიკლ ოუენმა ინგლისის პრემიერლიგის მიმდინარე გათამაშების ლიდერებზე გააკეთა კომენტარი. ინგლისელის თქმით, ლონდონის „არსენალი“ პრემიერლიგაში კონკურენციის გაწევას ვერ შეძლებს. შეგახსენებთ, რომ არსენ ვენგერის გუნდი სატურნირო ცხრილს ჯერჯერობით  35 ქულით ლიდერობს და უახლოეს მადევრებს – „ლივერპულსა“ და ლონდონის „ჩელსის“ მხოლოდ 2 ქულით უსწრებს.

„არსენალი“
„მიუხედავად იმისა, რომ „მანჩესტერ სიტისთან“ „არსენალს“ წარუმატებელი მატჩი ჰქონდა, ლონდონელები ლიდერობას დამსახურებულად აგრძელებენ. ჩემი აზრით, ლონდონურ გუნდს არ ჰყავს იმ რაოდენობის უმაღლესი დონის მოთამაშე, რომ ჩემპიონობისთვის იბრძოლოს. ზოგიერთი მუდმივად მეუბნება, რომ მესუთ იოზილი მსოფლიო დონის მოთამაშეა, თუმცა ამ არასტაბილურობით გამოჩნდა მისი რეალური სახე. მას შემთხვევეითი გამობრწყინებები ახასიათებს, ისიც არაფრით გამორჩეულ მატჩებში“.

„ლივერპული“
„ჩემი აზრით, „ლივერპულმა“ დაიმსახურა ტიტულის კანდიდატთა შორის მოხსენიების უფლება. დიდი ხნის განმავლობაში „წითლები“ ლიდერებს უკან იყვნენ. გავრცელებული ინფორმაციით, ზამთრის სატრანსფერო პერიოდში ბრენდან როჯერსს სოლიდურ თანხას გამოუყოფენ. რა თქმა უნდა, არ ვარ წინააღმდეგი, თუ სეზონის ბოლოს პირველ ადგილზე სწორედ „ლივერპული“ იქნება“.

„ჩელსი“
„სეზონის დაწყებამდე ვფიქრობდი, რომ ჩემპიონატს „ჩელსი“ მოიგებდა, თუმცა ახლა ეს რთული შესაფასებელია. ეს გუნდი უმაღლესი დონის თავდამსხმელის ნაკლებობას განიცდის. ჟოზე მოურინიოს რამდენიმე ტიპიური 10-ნომრიანი ჰყავს: მატა, ოსკარი, შიურლე, ვილიანი და აზარი. მათ ნებისმიერი დაცვის გარღვევა შეუძლიათ. ფერნანდო ტორესის, დემბა ბას და სამუელ ეტოოს უმაღლესი დონის მიუხედავად, მათ ვერ იპოვეს გუნდში თავიანთი ადგილი. მოურინიო, რა თქმა უნდა, შეცდა, როდესაც რომელუ ლუკაკუ იჯარის წესით „ევერტონში“ გაანათხოვრა. იანვარში გუნდს გაძლიერების შესაძლებლობა კი ექნება, მაგრამ სეზონის შუა პერიოდში უმაღლესი დონის ფეხბურთელის დამატება იშვიათად ხდება. აქვე ისიც უნდა ვთქვა, რომ არ უნდა გაგვიკვირდეს, თუ მოურინიოს თავკაცობით „ჩელსი“ კიდევ ერთ ტიტულს მოიგებს. ეჭვი არ უნდა შეგვეპაროს, რომ „განსაკუთრებულს“ თავისი სახელის გამართლება შეუძლია“.

„მანჩესტერ იუნაიტედი“
„მოიესი ფელაინის ყიდვით მყისიერ ეფექტს ელოდა. მარუანს დიდად ვაფასებ, მაგრამ მგონია, რომ ის ვერ ერგება „მანჩესტერ იუნაიტედს“. „ევერტონიდან“ ბარკლის გადმოყვანა უმჯობესი იქნებოდა. ამის მიუხედავად, ეჭვიც არ მეპარება, რომ მოიესი კლუბთან ერთად წარმატებას მიაღწევს“.

„მანჩესტერ სიტი“
„ამ დროისთვის „მანჩესტერ სიტი“ ტურნირის საუკეთესო გუნდია. „ქალაქელები“ ჩემპიონობის მთავარი პრეტენდენტები არიან“.

„ტოტენჰემი“
„მგონია, რომ გარეტ ბეილის გაყიდვით ნაშოვნი ფული „ტოტენჰემის“ ხელმძღვანელობამ უყაირათოდ გახარჯა. გუნდმა უკან გადადგა ნაბიჯი. თუ უნდათ, რომ ჩემპიონთა ლიგის საგზური მოიპოვონ, მაშინ თამაშის ხარისხი უნდა გააუმჯობესონ. ძალზედ მნიშვნელოვანია, თუ ვინ შეცვლის ანდრე ვილაშ-ბოაშს. „დეზებისთვის“ ეს გადამწყვეტი იქნება“.

ბექა დოგრაშვილი

„ლივერპულმა“ „ტოტენჰემს“ „უაით ჰართ ლეინზე“ კოშმარი მოუწყო

Posted on by ბექა დოგრაშვილი

ინგლისის პრემიერლიგის XVI ტურში „ტოტენჰემ ჰოთსპურმა“ „ლივერპული“ მიიღო და გამანადგურებელი ანგარიშით 0:5 დამარცხდა. მატჩს ინგლისის ეროვნული ნაკრების მთავარი მწვრთნელი როი ჰოჯსონიც დაესწრო, რომელიც ერთხანს მერსისაიდულ გუნდსაც თავკაცობდა. სტადიონზე იყო „ლივერპულის“ ლეგენდარული ფეხბურთელი და ყოფილი მწვრთნელი კენი დალგლიშიც.

შეხვედრის პირველი ნახევარი მერსისაიდული გუნდის უპირატესობით წარიმართა. „წითლები“ გაცილებით ორგანიზებულად, გუნდურად და გააზრებულად მოქმედებდნენ. შედეგად, ბრენდან როჯერსის გუნდმა პირველი ტაიმი ანგარიშით 2:0 მოიგო. შეხვედრის მე-18 წუთზე ანგარიში ლუის სუარესმა გახსნა. გოლი ჩრდილოლონდონური გუნდის მცველების უხეშ შეცდომას მოჰყვა. ჯორდან ჰენდერსონმა ურუგვაელი თავდამსხმელი ხელსაყრელ პოზიციაზე გაიყვანა, „ლივერპულის“ საუკეთესო ბომბარდირმა მეტოქე გუნდის ერთი მცველი ჩამოიტოვა და ახლო მანძილიდან დარტყმით გოლიც გაიტანა. სხვათა შორის, სტივენ ჯერარდის არყოფნაში კაპიტნის სამკლავური სწორედ სუარესს ჰქონდა მორგებული. როგორც მოგეხსენებათ, ინგლისელ ნახევარმცველს ტრავმა აწუხებს, რის გამოც 4-6 კვირა უქმობა მოუწევს. გატანილი გოლის შემდეგ „ლივერპულს“ უპირატესობა არ დაუთმია, პირიქით – აქტიური პრესინგის ხარჯზე „ტოტენჰემი“ გააზრებული შეტევის განხორციელებას ვერ ახერხებდა. შეხვედრის მე-40 წუთზე „ლივერპულის“ მორიგი შეტევის დროს უგო ლორისმა ორჯერ გადაარჩინა თავისი გუნდი, თუმცა ფრანგ მეკარეს მცველებმა მხარი ვერ აუბეს, რითაც ჰენერსონმა ისარგებლა და სქაუზერების უპირატესობა განამტკიცა.

როგორც ჩანს, შესვენებაზე ანდრე ვილაშ-ბოაშმა თავისი გუნდი აზრზე მოიყვანა სცადა, თუმცა დღეს „ლივერპული“ მეტოქეს ყველა კომპონენტში სჯობდა. „დეზებმა“ მატჩში გარდატეხის შეტანა ვერ შეძლეს. ამას ისიც დაემატა, რომ შეხვედრის 63-ე წუთზე „ტოტენჰემის“ ბრაზილიელმა ნახევარმცველმა პაულინიომ სუარესს ფეხი მკერდის არეში ჩაარტყა, რის გამოც პირდაპირ წითელი ბარათით დაისაჯა. თითქოს მასპინძლები საბოლოოდ შეეგუენ მარცხს. მერსისაიდელებმა კი კიდევ სამჯერ გაიხარეს: 75-ე წუთზე ახალგაზრდა ჯონ ფლანაგანმა ლამაზი დარტყმით დააგვირგვინა „წითლების“ სწრაფი შეტევა. 84-ე წუთზე სუარესმა ლორისს თავზე გადაუგდო ბურთი და დუბლი გაიფორმა. ურუგვაელმა ფეხბურთელმა ბომბარდირთა დავაში პოზიციები გაიმყარა და ახლა აღნიშნულ სიას 17 გატანილი გოლით ლიდერობს. სუარესმა 89-ე წუთზე უკვე რაჰიმ სტერლინგს გაატანინა – 0:5.

დღეს „უაით ჰართ ლეინზე“ ერთი გუნდი თამაშობდა – „ლივერპული“ და ასეთი თამაშით როჯერსის გუნდს ნამდვილად შეუძლია დასახული მიზნის მიღწევა. „ტოტენჰემის“ უმოტივაციო თამაშზე კი დღევანდელი შეხვედრის შედეგიც მეტყველებს, „დეზების“ მცველები დღეს ვერანაირ კრიტიკას ვერ უძლებდნენ.

ამ გამარჯვებით „ლივერპულმა“ 33 ქულას მოუყარა თავი და სატურნირო ცხრილის მეორე პოზიცია დაიბრუნა. „ტოტენჰემს“ კი 27 ქულა დარჩა და მე-7 ადგილამდე დაქვეითდა.

ინგლისის პრემიერლიგა
XVI ტური
„ტოტენჰემ ჰოთსპური“–„ლივერპული“ 0:5 (0:2)
გოლები: სუარესი 18′, 84′, ჰენდერსონი 40′, ფლანაგანი 75′, სტერლინგი 89′
გაფრთხილებები:  დოუსონი 27′, უოკერი 43′, ჰოლტბი 66′.
გაძევება: პაულინიო 63′.

ბექა დოგრაშვილი

სუარესი პრემიერლიგაში ბედნიერია

Posted on by ბექა დოგრაშვილი

ინგლისის პრემიერლიგის XIV ტურში „ლივერპულსა“ და „ნორვიჩ სიტის“ შორის გამართული მატჩი მერსისაიდული გუნდის დამაჯერებელი გამარჯვებით, ანგარიშით 5:1 დასრულდა. შეხვედრის გმირად „წითლების“ თავდამსხმელი ლუის სუარესი მოგვევლინა, რომელმაც პოკერი შეასრულა და ერთი საგოლე გადაცემაც მიითვალა. ამ შედეგით ურუგვაელმა ფეხბურთელმა 13 გოლს მოუყარა თავი და ბომბარდირთა დავას სათავეში ჩაუდგა.

კითხვას, შეუძლია თუ არა „ლივერპულს“ დასახული მიზნის მიღწევა და ჩემპიონთა ლიგის საგზურის მოპოვება, სუარესი ასე პასუხობს:

„დიახ. ვფიქრობ, შეგვიძლია ჩვენს წინაშე დასახული მიზნების მიღწევა“.

წუხანდელი მატჩის შესახებ ურუგვაელმა ფეხბურთელმა ასეთი კომენტარი გააკეთა:

„ყველაზე მთავარი ის არის, რომ გავიმარჯვეთ. გუნდს მივეშველე და ამით ბედნიერი ვარ. ეს შედეგი ძალზედ მნიშვნელოვანი იყო, რადგან წინა მატჩი წაგებული გვქონდა და კარგადაც ვერ ვითამაშეთ. საშინაო მატჩებში გაცილებით ძლიერები ვართ და ვალდებულები ვართ, სახლში მოვიგოთ“.

სუარესი ამბობს, რომ „ლივერპულში“ ბედნიერია, პრემიერლიგა კი მსოფლიოს მასშტაბით საუკეთესო ტურნირია.

„ჩემი მთავარი მიზანი „ლივერპულის“ გაძლიერებაა. გოლების გატანა თავდამსხმელის ძირითადი საქმიანობაა და თუ მე ეს გამომივა, მაშინ გავიმარჯვებთ და ქულებს დავაგროვებთ, რაც მოწინავე პოზიციების დაკავებაში დაგვეხმარება.

პრემიერლიგაში ბედნიერი ვარ, რადგან ეს მსოფლიოს მასშტაბით საუკეთესო ტურნირია. არ ვიცი, რამდენად ვიბრძოლებთ ტიტულისთვის, მაგრამ გვინდა, რომ სატურნირო ცხრილში მაღალი პოზიციები დავიკავოთ“, – სუარესის სიტყვები „ლივერპულის“ ოფიციალურმა ვებ-გვერდმა გამოაქვეყნა.

ბექა დოგრაშვილი

ჯანო ანანიძემ წელს ბოლო მატჩი ჩაატარა

Posted on by ბექა დოგრაშვილი

დღეს, რუსეთის პრემიერლიგის მე-18 ტურში „როსტოვმა“ მოსკოვის „ცსკა“-ს უმასპინძლა. „ყვითელ-ლურჯთა“ რიგებში ჯანო ანანიძემ წლის ბოლო მატჩი ჩაატარა. ქართველმა ფეხბურთელმა მატჩი ძირითად შემადგენლობაში დაიწყო და ჩვეულებისამებრ, ერთ-ერთი გამორჩეულიც იყო. ჯანოს შეხვედრის მეორე ტაიმის დასაწყისში გოლის გატანაც მართებდა, თუმცა ახლო მანძილიდან ბურთს ფეხი ხეირიანად ვერ მოარტყა, არადა, მეკარე კარის კუთხეს ვეღარ იცავდა. სიმართლე რომ ვთქვათ, „როსტოვს“ გოლის გატანის ბევრი შანსი მიეცა, თუმცა ყველაზე რეალური სწორედ ჯანოს მომენტი იყო. მასპინძლები გაცილებით აქტიურად გამოიყურებოდნენ, ბურთს აკონტროლებდნენ და უტევდნენ, „ცსკა“-ს ფეხბურთელები კი ძირითადად თავდაცვით იყვნენ დაკავებულნი. ანანიძე 82-ე წუთზე შეცვალეს. ქართველ ფეხბურთელს მოედნის დატოვებისას აშკარად ეტყობოდა გაფუჭებული მომენტის გამო სინანული. საბოლოო ჯამში, შეხვედრა უგოლოდ დასრულდა. მატჩის საუკეთესო ფეხბურთელთა გამოსავლენად მოწყობილ გამოკითხვაში გულშემატკივრებმა ჯანოს მესამე ადგილი არგუნეს.

მიუხედავად იმისა, რომ წლის ბოლომდე კიდევ ერთი მატჩია დარჩენილი, თამამად შეგვიძლია ვთქვათ, რომ ჯანო ანანიძემ „როსტოვის“ შემადგენლობაში წელს ბოლო მატჩი ჩაატარა. მომდევნო ტურში „როსტოვი“ მოსკოვის „სპარტაკს“ მასპინძლობს. „სახალხო გუნდის“ მფლობელმა ლეონიდ ფედუნმა განაცხადა, თუ გინდათ, რომ თქვენთან იჯარით მყოფებმა – ჯანო ანანიძემ და არტიომ ძიუბამ ითამაშონ, მაშინ მილიონი (ვალუტა არ დაუკონკრეტებია) გადაგვიხადეთო. „როსტოვი“ თანხის გადახდას არ აპირებს, შესაბამისად ანანიძე და ძიუბა მათ საკუთრებასი მყოფი კლუბის წინააღმდეგ ვერ ითამაშებენ. აღსანიშნავია ისიც, რომ ჯანომ რამდენჯერმე გამოთქვა „როსტოვში“ სეზონის ბოლომდე დარჩენის სურვილი. ანანიძეს საიჯარო ხელშეკრულება 1 წლის ვადით აქვს გაფორმებული, თუმცა არ არის გამორიცხული, „სპარტაკმა“ ის ზამთრის შესვენებისას დაიბრუნოს.

ცნობისთვის, ჯანომ „როსტოვის“ რიგებში 15 მატჩი ჩაატარა და ერთი გოლი გაიტანა.

ბექა დოგრაშვილი

„მანჩესტერ იუნაიტედმა“ „არსენალი“ ვან პერსის გოლით დაამარცხა

Posted on by ბექა დოგრაშვილი

ინგლისის პრემიერლიგის მე-12 ტურის ცენტრალური მატჩი „ოლდ ტრაფორდზე“ შედგა, სადაც „მანჩესტერ იუნაიტედმა“ ლონდონის „არსენალი“ მიიღო. შეხვედრას ინგლისის ეროვნული ნაკრების მთავარი მწვრთნელი როი ჰოჯსონიც დაესწრო. რა თქმა უნდა, მატჩს ტრიბუნიდან ადევნებდა თვალყურს „წითელი ეშმაკების“ ყოფილი თავკაცი სერ ალექს ფერგიუსონი. შეხვედრა მასპინძლებმა უფრო აქტიურად დაიწყეს, სტუმრები კი თავიანთ შანსს კონტრშეტევებზე ელოდნენ.

ანგარიში 27-ე წუთზე გაიხსნა: მასპინძელთა მიერ შეტევის მარცხენა ფლანგიდან კუთხურის შესრულებისას, რობინ ვან პერსი „არსენალის“ ფეხბურთელებმა უყურადღებოდ დატოვეს, რითაც ჰოლანდიელმა თავდამსხმელმა ისარგებლა და თავური დარტყმით თავის ყოფილი გუნდს გოლი გაუტანა, რაც ემოციურადაც აღნიშნა.

გატანილი გოლის შემდეგ, გარკევული პერიოდის განმავლობაში მასპინძლებმა ტერიტორიული უპირატესობა დათმეს და საკუთარი საჯარიმოს მისადგომები საიმედოდ გადაკეტეს, მიმართავდნენ აქტიურ პრესინგს და ლონდონელებს მატჩის სადავეების ხელთ გდების საშუალებას არ აძლევდნენ, მეტიც – მთელი პირველი ტაიმის განმავლობაში სტუმრებს მეტოქის კარში არ დაურტყამთ, „არსენალის“ ფეხბურთელები მათთვის დამახასიათებელ ლაღ ფეხბურთს ვერ გვიჩვენებდნენ. პირველი 45 წუთი „წითელი ეშმაკების“ მინიმალური უპირატესობით დასრულდა – 1:0.

შეხვედრის მეორე ნახევარში საერთო სურათი შეიცვალა. ლონდონელები გააქტიურდნენ, ტერიტორიულ უპირატესობას დაეუფლნენ, თუმცა ამან შედეგი ვერ გამოიღო, პირიქით – გოლის გატანის კარგი შანსი მასპინძლებს მიეცათ: მე-60 წუთზე მეტოქის საჯარიმო მოედანზე მყოფმა უეინ რუნიმ ცრუ მოძრაობით ერთი მცველი ჩამოიშორა და ფაქტობრივად მეკარესთან პირისპირ აღმოჩნდა, მაგრამ ხელსაყრელი ადგილიდან ბურთი კარს ააცილა. დარჩენილ დროში „არსენალი“ ქულის გადარჩენას ეცადა, თუმცა ამაოდ.

საბოლოო ჯამში, „მანჩესტერ იუნაიტედმა“ მოახერხა პირველ ტაიმში დაფიქსირებული შედეგის შენარჩუნება და საჭირო 3 ქულა ჩაიწერა. სატურნირო ცხრილის ლიდერი დამარცხდა და შეწყდა ლონდონელთა კიდევ ერთი სერია – აქამდე პრემიერლიგის მიმდინარე სეზონის ყველა შეხვედრაში ჰქონდა „არსენალს“ გოლი გატანილი.

რაც შეეხება სატურნირო ცხრილში მდგომარეობას, „არსენალი“ 25 ქულით პირველ ადგილზე დარჩა, თუმცა მეორეადგილოსან „ლივერპულთან“ სხვაობა 2 ქულამდე შემცირდა. „მანჩესტერ იუნაიტედის“ აქტივში 20 ქულაა, რითაც ის „ევერტონთან“ და „ტოტენჰემ ჰოთსპურთან“ მეხუთე-მეშვიდე პოზიციებს ინაწილებს.

ინგლისის პრემიერლიგა
XII ტური
„მანჩესტერ იუნაიტედი“–„არსენალი“ 1:0 (1:0)

„მანჩესტერ იუნაიტედი“: დე ხეა, ვიდიჩი (კლევერლი 46′), ევრა, ევანსი, სმოლინგი, ჯონსი, კერიკი, კაგავა (გიგზი 78′), ვალენსია, ვან პერსი (ფელაინი 85′), რუნი.
მთავარი მწვრთნელი: დევიდ მოიესი.
„არსენალი“: შჩესნი, სანია, ვერმალენი, გიბსი, კოსელნი, არტეტა (გნაბრი 82′), ფლამინი (უილშირი 61′), რემსი, კაზორლა (ბენდტნერი 78′), იოზილი, ჟირუ.
მთავარი მწვრთნელი: არსენ ვენგერი.
გოლი: ვან პერსი 27′.
გაფრთხილებები: ჯონსი 41′, რუნი 75′ – სანია 31′, ფლამინი 44′, უილშირი 81′.
მთავარი მსაჯი: მაიკლ ოლივერი.

ბექა დოგრაშვილი

„არსენალი“ – „ლივერპული“: სასტარტო შემადგენლობები

Posted on by Alix

როგორც მოგეხსენებათ, დღეს, თბილისის დროთ 21 საათსა და 30 წუთზე ინგლისის პრემიერლიგის მე-10 ტურის ცენტრალური შეხვედრა გაიმართება – „ემირეითს სთედიუმზე“ ერთმანეთს ლონდონის „არსენალი“ და „ლივერპული“ დაუპირსპირდებიან.

წარმოგიდგენთ ორივე გუნდის სასტარტო შემადგენლობას:

„არსენალი“: შესნი, სანია, მერტესაკერი, კოშელნი, ბიგსი, როსიცკი, არტეტა, რემზი, კასორლა, იოზილი, ჟირუ

„ლივერპული“: მინოლე, ფლანაგანი, ტურე, შკრტელი, სახო, სისოკო, ლუკასი, ჯერარდი, ჰენდერსონი, სტარიჯი, სუარესი