დღეს უეფას ჩემპონთა ლიგის ჯგუფური ეტაპის მორიგი ტური გაიხსნება. “სანტიაგო ბერნაბეუზე” მადრიდის “რეალი” “ლივერპულს” უმასპინძლებს. ვრცელდება ინფორმაცია, რომ შესაძლოა, მერსისაიდული გუნდის კაპიტანმა სტივენ ჯერარდმა აღნიშნული მატჩი გამოტოვოს. ამის მიზეზად “წითლების” დატვირთული გრაფიკი სახელდება.
“ლივერპულის” მთავარმა მწვრთნელმა ბრენდან როჯერსმა განაცხადა, რომ ჯერარდისთვის დამატებითი დასვენების დღის მიცემაზე ფიქრობს.
“უნდა გადავწყვიტოთ, რა არის სტივენისთვის და გუნდისთვის პრიორიტეტული: “რეალთან” ჩასატარებელი შეხვედრა თუ შაბათს ლონდონის “ჩელსისთან” გასამართი მატჩი. თუ ჯერარდი მადრიდში არ ითამაშებს, მაშინ მიხვდებით, რა ყოფილა ჩვენთვის პრიორიტეტული”, – ციტირებს როჯერსის სიტყვებს Goal.com-ი.
მატჩი “რეალსა” და “ლივერპულს” შორის დღეს, თბილისის დროით 23:45 საათზე დაიწყება. შეხვედრას ვიქტორ კაშაის ხელმძღვანელობით უნგრელ მსაჯთა ბრიგადა განსჯის.
