ჭდე: მსაჯები

19-20 ივლისს ახალ თბილისში მდებარე სპორტულ კომპლექსში უმაღლესი და პირველი ლიგების არბიტრებისა და ასისტენტების ფიზმომზადების ტესტები ჩატარდა.

21 ივლისიდან, უმაღლესი ლიგის მსაჯები ურეკში 1 კვირიან შეკრებაზე გაემგზავრებიან. 27 ივლისიდან კი ხუთდღიან მზადებას პირველლიგელები გაივლიან. უმაღლესი ლიგის მსაჯების ლექცია-სემინარებს ოთხი დღის განმავლობაში უეფას მსაჯთა კონვენციის კოორდინატორი იორნ ვესტ ლარსენი დაესწრება. ის საფეხბურთო წესებში მომხდარ ცვლილებებზე ისაუბრებს.

სფფ-ის პრესსამსახური

საქალაქო სასამართლოში საფეხბურთო თაღლითობისთვის დაკავებული მსაჯების სასამართლო პროცესი თითქმის 5 საათს გაგრძელდა.

პროკურატურა, აღმკვეთი ღონისძიების სახით, წინასწარ პატიმრობას ითხოვდა, დაცვის მხარემ კი გირაოს შუამდგომლობა დააყენა.

სასამართლომ კომერციული მოსყიდვის ბრალდებით დაკავებული ქართველი არბიტრებისთვის წინასწარი აღმკვეთი ღონისძიების შესახებ იმსჯელა და რვავე მსაჯს წინასწარი ორთვიანი პატიმრობა შეუფარდა.

შეგახსენებთ, რომ საქართველოს ფეხბურთს ფედერაციამ რვავე არბიტრს სამსაჯო საქმიანობა სამუდამოდ აუკრძალა.

შინაგან საქმეთა სამინისტროს ანტიკორუფციული სააგენტოს თანამშრომლებმა, კომერციული მოსყიდვის ფაქტზე, საქართველოს ფეხბურთის ფედერაციის მსაჯთა და მსაჯთა დამკვირვებელთა კომიტეტის ეროვნული კატეგორიის არბიტრები – 1977 წელს დაბადებული ოთარ ხ, 1979 წელს დაბადებული ირაკლი უ, 1972 წელს დაბადებული მამუკა უ, 1975 წელს დაბადებული თეიმურაზ ხ, ასევე, პირველი კატეგორიის არბიტრები – 1975 წელს დაბადებული ალექსანდრე გ, 1984 წელს დაბადებული ზვიად ა, ეროვნული კატეგორიის ასისტენტი – 1974 წელს დაბადებული ონისე მ. და „ფიფა“-ს არბიტრი, 1986 წელს დაბადებული თორნიკე გ. დააკავეს.

გამოძიებამ დაადგინა, რომ დაკავებული პირები 2500-დან 5000 აშშ დოლარამდე თანხის სანაცვლოდ წინასწარ ურიგდებოდნენ მოქალაქეებს მათი მსაჯობით ჩასატარებელ თამაშებში ფეხბურთელთა დასაჯარიმებელი ყვითელი და წითელი ბარათების რაოდენობაზე, რასაც ზედმიწევნით ზუსტად ასრულებდნენ. ამ სქემით ბრალდებულები აღნიშნულ მოქალაქეებს საშუალებას აძლევდნენ წინასწარ შეპირებული ჯარიმების რაოდენობის მიხედვით გაკეთებული ფსონით მოგება მიეღოთ.

გამოძიება ჯგუფურად ჩადენილი კომერციული მოსყიდვის ფაქტზე მიმდინარეობს (საქართველოს სისხლის სამართლის კოდექსის 221-ე მუხლის მე-4 ნაწილის „ა“ ქვეპუნქტით, რაც სასჯელის სახით 4-დან 6 წლამდე თავისუფლების აღკვეთას ითვალისწინებს). გამოძიების ხელთ არსებული მონაცემებით, ანალოგიური სქემით მოქმედებენ სხვა მსაჯებიც, რომელთა მიმართ გამოძიება გრძელდება. გამოძიებას აწარმოებს შსს-ს ანტიკორუფციული სააგენტო.