რამდენიმე დღის წინათ მოგიყევით, როგორ ჩაიშალა 15 წლის ასაკში ლიონელ მესის ლონდონის “არსენალში” გადასვლის ამბავი, თუმცა არგენტინელი ფეხბურთელი ერთადერთი ვარსკვლავი არ არის, ვისი გადაბირებაც “მეთოფეებს” შეეძლოთ. Fanebi.com-ი მოგითხრობთ, როგორი შემადგენლობა შეიძლება დღეს “არსენალს” ჰყოლოდა.
ჯანლუიჯი ბუფონი:
2011 წლის ზაფხულში ბუფონს აქტიურად აკავშირებდნენ “არსენალთან”. გავრცელებული ინფორმაციით, თუ “იუვენტუსი” იტალიელ მეკარეს კარისკენ მიუთითებდა, ბუფონი ჩრდილოლონდონურ გუნდში გადასასვლელად მზად იყო, თუმცა “ბებერმა სინიორამ” გამოცდილი კიპერის შენარჩუნება გადაწყვიტა და ტრანსფერიც არ შედგა.
მიკა რიჩარდსი:
ბოლო რამდენიმე წელია, რიჩარდსის საქმეები კარგად არ მიდის, თუმცა იყო დრო, როდესაც მის გადაბირებაზე არსენ ვენგერი სერიოზულად ფიქრობდა. “არსენალს” მარჯვენა მცველის პრობლემა ჰქონდა და ამ პოზიციაზე ერთ-ერთ ვარიანტად სწორედ რიჩარდსი განიხილებოდა.
ჟერარ პიკე:
“არსენალი” ახლოს იყო პიკეს ტრანსფერის განხორციელებასთან, თუმცა კატალონიელ მცველს ინგლისში მუშაობს ნებართვა არ მისცეს და გარიგებაც ჩაიშალა.
ვენსან კომპანი:
კომპანი ჯერ კიდევ მშობლიური “ანდერლეხტის” ღირსებას იცავდა, როდესაც მას თვალი არსენ ვენგერმა დაადგა. ფეხბურთის ფრანგი სპეცალისტი კომპანის სოლ კემპბელის შემცვლელად მოიაზრებდა, თუმცა “ანდერლეხტმა” ბელგიელი მცველი 5 მილიონ ფუნტად დააფასა, რისი გადახდის საშუალებაც მაშინ “არსენალს” არ აღმოაჩნდა.
რობერტო კარლოსი:
გავრცელებული ცნობით, როდესაც რობერტო კარლოსს მადრიდის “რეალთან” კონტრაქტი ამოეწურა, ბრაზილიელ მცველს “არსენალში” გადასვლის სურვილი ჰქონდა თუმცა საბოლოო ჯამში, ის თურქულ “ფენერბაჰჩეში” გადაბარგდა.
ლეო მესი:
“არსენალი” სერიოზულად იყო დაინტერესებული ლიონელ მესის დამატებით, როცა არგენტინელი მხოლოდ 16 წლის გახლდათ, თუმცა ლეოს ინგლისში სამუშაო ვიზა არ მისცეს და გარიგებაც ჩაიშალა.
იაია ტურე:
კოტ დივუარელმა ფეხბურთელმა 2003 წლის ივლისში “არსენალის” წინასასეზონო მოსამზადებელ მატჩში მიიღო მონაწილეობა. ტურემ ვენგერის მოწონება კი დაიმსახურა, თუმცა ამ შემთხვევაშიც სამუშაო ვიზასთან დაკავშირებულმა პრობლემამ იჩინა თავი. “არსენალმა” ფეხბურთელის აყვანა და იჯარის წესით გასხვისება მოინდომა, თუმცა თავად იაიამ ამაზე უარი თქვა და დონეცკის “მეტალურგს” მიაშურა. ასე დაკარგა “არსენალმა” “მანჩესტერ სიტის” დღევანდელი ლიდერი.
ჩაბი ალონსო:
“ლივერპულის” თავკაცის პოსტზე მუშაობის პერიოდში რაფა ბენიტესს გარეტ ბერის დამატება სურდა, რაც ჩაბი ალონსოს შეშფოთებას იწვევდა. ბასკ ნახევარმცველს კარიერის გაგრძელების ალტერნატულ გზად “არსენალი” მოევლინა. აღნიშნული ტრანსფერი 15 მილიონ ფუნტად ფასდებოდა, თუმცა ბენიტესმა ბერი ვერ დაიმატა და შესაბამისად, ვერც ალონსო აღმოჩნდა “არსენალში”.
კრიშტიანუ რონალდუ:
2002 წლის ნოემბერში კრიშტიანუ რონალდუ “არსენალის” საწვრთნელ ბაზაზე მიიწვიეს და კლუბის მაისურიც ჩააცვეს. ვენგერი სერიოზულად გახლდათ დაინტერესებული პორტუგალიელი ფეხბურთელის დამატებით და მზად იყო, მის სანაცვლოდ 6 მილიონი ევრო გაეღო, თუმცა… 2003 წლის ზაფხულში ლისაბონის “სპორტინგსა” და “მანჩესტერ იუნაიტედს” შორის გამართულ ამხანაგურ მატჩში (3:1) კრიშტიანუ რონალდუმ თავი შესანიშნავად წარმოაჩინა და ალექს ფერგიუსონის ყურადღება მიიპყრო. მალევე “წითელმა ეშმაკებმა” პორტუგალიურ კლუბს ფეხბურთელის სანაცვლოდ 12.24 მილიონი ფუნტი შესთავაზეს და რონალდუ “ოლდ ტრაფორდზე” აღმოჩნდა.
ზლატან იბრაჰიმოვიჩი:
19 წლის იბრაჰიმოვიჩმა ვენგერის ყურადღება მიიქცია და შვედი ფეხბურთელი “არსენალში” მიიწვიეს, სადაც გარკვეული დრო დაჰყო. “არსენალში” სურდათ, რომ ფეხბურთელს გუნდთან ერთად ევარჯიშა, რათა მისი შესაძლებლობები უკეთ შეეფასებინათ, თუმცა იბრას არ მოეწონა, რომ კლუბმა მას მაშინვე არ გაუფორმა კონტრაქტი და ლონდონის დატოვება გადაწყვიტა.
დიდიე დროგბა:
ვენგერს ნათქვამი აქვს, რომ 100 ათას ევროდ “ლე მანიდან” დროგბას გადმობირება შეეძლო, თუმცა მაშინ ფრანგმა სპეციალისტმა მიიჩნია, რომ კოტ დივუარელი ფეხბურთელი “არსენალისთვის” მზად არ იყო.
არსენ ვენგერის რეაქცია ამ სტატიის წაკითხვის შემდეგ
გვაპატიე, არსენ.
