იტალიის ნაკრები 2016 წლის ევროპის ჩემპიონატის მოსამზადებელი პერიოდის ფარგლებში შოტლანდიის ეროვნულ გუნდთან ამხანაგურ მატჩს გამართავს. შეხვედრა 29 მაისს შედგება.
ევრო-2016-მდე დასკვნით მატჩს “სკუადრა აძურა” 6 ივნისს ფინეთის ნაკრებთან გამართავს.
შეგახსენებთ, რომ ევროპის ჩემპიონატის ჯგუფურ ეტაპზე იტალიელები ბელგიელებთან, ირლანდიელებთან და შვედებთან ითამაშებენ.
იტალიის ნაკრების მთავარმა მწვრთნელმა ანტონიო კონტემ და კაპიტანმა ჯანლუიჯი ბუფონმა “ოქროს ბურთის” გამოკითხვას ბოიკოტი გამოუცხადეს. Football Italia-ს ცნობით, ამ პროტესტის მიზეზი ის გახდა, რომ ფიფამ ბუფონი 23 პრეტენდენტს შორის არ შეიყვანა.
შეგახსენებთ, რომ 2015 წელს ჯანლუიჯი ბუფონმა იტალიის ჩემპიონატი მოიგო და ჩემპიონთა ლიგის ფინალშიც ითამაშა.
გავრცელებული ინფორმაციით, კონტესა და ბუფონს პროტესტი გამოხატვა იტალიის ფეხბურთის ფედერაციიდან ურჩიეს.
იტალიიდან “ოქროს ბურთის” გამოკითხვაში მხოლოდ ჟურნალისტმა კონდო პაოლომ მიიღო მონაწილეობა, რომლის არჩევანიც ასეთია: 1. ლიონელ მესი; 2. რობერტ ლევანდოვსკი; 3. ნეიმარი.
ლეგენდარულმა ბრაზილიელმა ფეხბურთელმა რონალდომ იმის შესახებ ისაუბრა, თუ ვის ქომაგობს იტალიის სერია A-ს გათამაშებაში.
“ნაპოლისთან” დამარცხების მიუხედავად, მე მაინც “ინტერს” ვქომაგობ. ჩემი გული “ნერიაძურისთვის” ძგერს. ამ ქალაქთან ჯერ კიდევ მჭიდრო კავშირი მაქვს. იმ ხუთ წელს, რომელიც “ინტერში” გავატარე, არასდროს დავივიწყებ.
“მილანთანაც” განსაკუთრებული სიყვარული მაკავშირებს, მაგრამ კიდევ ერთხელ ვიმეორებ, რომ “ინტერი” ჩემთვის ძალიან მნიშვნელოვანი კლუბი იყო.
“ნაპოლი” ძლიერი კონკურენტია, “იუვენტუსსაც” გამოვყოფდი. მიუხედავად იმისა, რომ “ბებერი სინიორა” ძველებურად ვეღარ ბრწყინავს და სატურნირო ცხრილში ქვედა პოზიცია უკავია, გუნდი დღესაც საკმაოდ ძლიერია.
რაც შეეხება “რომას”, გუნდი შედარებით ქვედა დონეზე იმყოფება და არა მგონია, კონკურენციაში ჩაერთოს”, – რონალდოს კომენტარი Football Italia-მ გამოაქვეყნა.
დღეს ლეგენდარულ იტალიელ კიპერ ფრანჩესკო ტოლდოს 44 წელი შეუსრულდა. Fanebi.Com-ი თქვენთან ერთად გაიხსენებს ტოლდოს კარიერის ყველაზე გამორჩეულ ეპიზოდებს.
ჰოლანდიის დამმარცხებელი
ნიჭიერ მეკარეს დიდი ხნის განმავლობაში არ უმართლებდა: ის უმეტესად უფრო სახელოვანი თანაგუნდელების ჩრდილში ექცეოდა. ასე იყო ნაკრებში და ასე იყო „ინტერშიც“. ტოლდომ ეროვნულ ნაკრებში 2000 წლის ევროპის ჩემპიონატზე გაიბრწყინა. ტურნირამდე გამართულ ამხანაგურ მატჩში ჯანლუიჯი ბუფონმა ხელი მოტეხა და ასე გაეხსნა გზა ფრანჩესკოს.
ტურნირის ნახევარფინალურ ეტაპზე, „ამსტერდამ არენაზე“, ჰოლანდიის ნაკრების წინააღმდეგ გამართულ მატჩში ტოლდომ ექვსი პენალტიდან მხოლოდ ერთი გაუშვა. აქედან ორი თერთმეტმეტრიანი შეხვედრის ძირითად დროში დაინიშნა. თანაც, იტალიელები ჯანლუკა ძამბროტას გაძევების შემდეგ მოედანზე რიცხობრივ უმცირესობაში იყვნენ. ტოლდომ ჯერ ფრანკ დე ბურის დარტყმული მოიგერია, შემდეგ კი პატრიკ კლუივერტმა ბურთი ძელს გაარტყა. პენალტების სერიაში ჰოლანდიელები აშკარად ცუდად გამოიყურებოდნენ. ტოლდომ თითქოს მოაჯადოვა იმ საღამოს თავისი კარი.
მხსნელი გოლეადორი
ტოლდოს „ინტერი“ ბევრჯერ გადაურჩენია, თუმცა ყველაზე დასამახსოვრებელი ეპიზოდი არა საკუთარ, არამედ მეტოქე გუნდის კართან მოხდა. 2002 წელი, პრინციპული ბრძოლა ტურნირის „იუვენტუსთან“. ყველაზე დრამატული მატჩის ბოლო ნაწილი გამოდგა: 89-ე წუთზე პიერლუიჯი კოლინამ „ინტერის“ კარის მიმართულებით საეჭვო პენალტი დანიშნა, რომელიც ალესანდრო დელ პიერომ გოლად აქცია. 95-ე წუთზე კი ნამდვილი სასწაული მოხდა: „იუვენტუსის“ კართან კუთხური დაინიშნა, ტოლდო მეტოქის საჯარიმოსკენ გაეშურა, ბურთის მოწოდების შემდეგ არეულობა შეიქმნა, რითაც ფრანჩესკომ ისარგებლა და ბურთი ბუფონის კარში გადაგზავნა. ტურინელებს ისღა დარჩენოდათ, კოლინასთან დაეჩივლათ, ჩვენს მეკარეზე თავდასხმა მოხდაო, თუმცა გოლი გავიდა და ამას ვინღა გააუქმებდა?!
„იების“ საგუშაგოზე
90-იანი წლების ბოლოს „ფიორენტინა“ მრისხანე ძალა იყო. „იების“ რიგებში მანუელ რუი კოშტა და „მკვლელად“ წოდებული ფორვარდი გაბრიელ ომარ ბატისტუტა ბრწყინავდნენ, თუმცა ერთ დღეს, როდესაც კლუბის მთავარ მწვრთნელ ჯოვანი ტრაპატონის ჰკითხეს, თუ ვინ იყო მისი გუნდის ყველაზე მნიშვნელოვანი ფიგურა, მან ასეთად ტოლდო დაასახელა. 1998/99 წლების სეზონში „ფიორენტინა“ დიდი ხნის განმავლობაში ლიდერობდა სერია A-ს, თუმცა ფინიშის ხაზთან მას „მილანმა“ და „ლაციომ“ გადაასწრეს. ამის მიუხედავად, ქომაგებს სიხარული არ განელებიათ, რადგან „ფიორენტინამ“ ჩემპიონთა ლიგის საგზური მოიპოვა და რაც ყველაზე მთავარია, ფლორენციელები იშვიათი სილამაზის ფეხბურთს თამაშობდნენ.
„ფიორენტინა“ ჩემპიონთა ლიგაზეც ღირსეულად გამოვიდა. ჯგუფური ეტაპის გადამწყვეტ მატჩად ლონდონის „არსენალთან“ სტუმრად გამართული მატჩი გამოდგა. იმ შეხვედრაში ფლორენციელები ბატისტუტას გოლით დაწინაურდნენ, რის შემდეგაც ლონდონელებმა შეტევები კიდევ უფრო გაამწვავეს და რომ არა ტოლდო, ინგლისელები, ალბათ, სასურველ შედეგსაც მიაღწევდნენ. იტალიელმა კიპერმა „ჰაიბერიზე“ ნამდვილი სასწაული ჩაიდინა, როდესაც ორი მეტრის მანძილიდან კანუს დარტყმულზე რეაგირება მოასწრო და ბურთი მოიგერია. ნიგერიელ თავდამსხმელს ასეთი გაოცებული სახე, ალბათ, არც მანამდე და არც მას შემდეგ არ ჰქონია.
ტოლდო იტალიის ხუთგზის ჩემპიონი და „ინტერის“ შემადგენლობაში ჩემპიონთა ლიგის გამარჯვებულია, თუმცა მან ეს ტიტული მაშინ მოიგო, როდესაც მილანური გუნდის პირველ მეკარედ ჟულიო სეზარი ითვლებოდა. გარდა ამისა, ის შეყვანილი იყო 1998 და 2002 წლის მსოფლიოს და 2004 წლის ევროპის ჩემპიონატების სანაკრებო განაცხადებში, თუმცა არცერთი მატჩი არ ჩაუტარებია. იტალიის ნაკრებში ჩატარებულ 28 შეხვედრაში მხოლოდ 15 გოლი გაუშვა. გარდა ამისა, ტოლდო იტალიის რესპუბლიკისადმი გაწეული დამსახურებისთვის დაჯილდოებულია კავალერის ორდენით.
2010 წლის 7 ივლისს ფრანჩესკო ტოლდომ კარიერის დასრულების შესახებ განაცხადა: „კარიერის დასრულების შესახებ გადაწყვეტილება მივიღე. ამას ოფიციალურად პირველად ვამბობ, ამიტომ ძალიან მიჭირს, თუმცა კლუბიდან არ მივდივარ — ახალგაზრდებთან მუშაობას გავაგრძელებ. რაც შეეხება გამოსათხოვარ მატჩს, ის არ იქნება“.
დღესდღეობით ფრანჩესკო ტოლდო არაკომერციულ სოციალურ ორგანიზაცია “ინტერ კამპუსში” მუშაობს, რომელიც მასიმო მორატის დაფუძნებული ფონდია. ორგანიზაცია მსოფლიოს სხვადასხვა ქვეყნებში ბავშვებისთვის საფეხბურთო პროგრამებს ატარებს.
იტალიის ნაკრების მთავარმა მწვრთნელმა ანტონიო კონტემ 2016 წლის ევროპის ჩემპიონატზე “სკუადრა აძურას” შანსები შეაფასა. შეგახსენებთ, რომ იტალიელებმა კონტინენტის პირველობაზე თამაშის უფლება უკვე გაინაღდეს.
“ჩვენ არ ვართ ფავორიტები, მაგრამ საფრანგეთში ნებისმიერ გუნდს შევუქმნით პრობლემას.
მინდა ისეთი გუნდი ვიხილო, რომლითაც იტალიელები იამაყებენ. ეს იმას არ ნიშნავს, რომ აუცილებლად ჩემპიონები უნდა გავხდეთ. საუბარი მაქვს ლამაზი და სწრაფი ფეხბურთის ჩვენებაზე.
იმედი მაქვს, სერია A-ს დასრულების შემდეგ მომზადებისთვის შანსი მომეცემა. პატარა საომარი მანქანა უნდა მოვამზადო”, – ციტირებს კონტეს სიტყვებს Football Italia.
იტალიის ნაკრების ყოფილმა მთავარმა მწვრთნელმა ჯოვანი ტრაპატონიმ გუნდის ამჟამინდელი მთავარი მწვრთნელის, ანტონიო კონტეს მუშაობა შეაფასა. ტრაპატონის აზრით, კონტე “სკუადრა აძურასთან” ერთად შესაძლებლობის ფარგლებში მაქსიმუმს აღწევს.
“იტალიის ნაკრებს ლიონელ მესისა და კიშტიანუ რონალდუს დონის ფეხბურთელი არ ჰყავს და ამას უნდა შევეგუოთ. აქედან გამომდინარე, კმაყოფილნი უნდა ვიყოთ იმით, რასაც ამ ეტაპზე მივაღწიეთ.
ბულგარეთისა (1:0) და მალტის (1:0) ნაკრებებთან გამართულ მატჩებში ექვსი ქულა მოვიპოვეთ და საკმაოდ რთულ ჯგუფს ვლიდერობთ. კონტე კარგად მუშაობს. იგი გუნდისგან მაქსიმუმის მიღებას ახერხებს. ფეხბურთელები მას ენდობიან. მთელი საფეხბურთო საზოგადოებაც მათ უნდა შეუერთდეს. დარწმუნებული ვარ, რომ იტალიის ნაკრები 2016 წლის ევროპის ჩემპიონატის ერთ-ერთი ფავორიტი იქნება. კრიტიკა ჩვენი გუნდის მისამართით გაზვიადებულია, თუმცა ამას მიჩვეულნი ვართ”, – ტრაპატონის კომენტარი იტალიურმა გამოცემა “ტუტოსპორტმა” გამოაქვეყნა.
იტალიის ნაკრებმა ანტონიო კონტეს თავკაცობით პირველად წააგო.
“სკუადრა აძურა” შვეიცარიის ქალაქ ჟენევაში პორტუგალიის ნაკრებს ამხანაგურად დაუპირისპირდა და ანგარიშით 0:1 დამარცხდა. ეს ერთადერთი გოლი შეხვედრის 52-ე წუთზე პორტუგალიელთა თავდამსხმელმა ედერმა გაიტანა
შეგახსენებთ, რომ კონტე იტალიის ნაკრებს 2014 წლის 14 აგვისტოდან თავკაცობს. ამ დროის განმავლობაში გუნდმა ათი მატჩი ჩაატარა. წაგებასთან ერთად, კონტეს ხელმძღვანელობით ეს პირველი შემთხვევაა, როცა იტალიელბმა გოლის გატანა ვერ შეძლეს.
ამხანაგური მატჩი:
იტალია — პორტუგალია 0:1 (0:0)
გოლი: ედერი 52′.
გაფრთხილებები: სორიანო 55′, ბერტოლაჩი 70′ — ადრიენ სილვა 73′, ელიზეუ 82′.
როგორც გაცნობეთ, 2016 წლის ევროპის ჩემპიონატის საკვალიფიკაციო ეტაპზე ხორვატიისა და იტალიის ნაკრებებს შორის გამართული მატჩის (1:1) მიმდინარეობისას “პოლიუდის” მოედანზე ნაცისტური სიმბოლო სვასტიკა გამოჩნდა.
მომხდარის გამო ხორვატები ბოდიშს იხდიან.
ხორვატიის ფეხბურთის ფედერაციის პრესსამსახურის წარმომადგენელმა ტომისლავ პასაკმა განაცხადა, რომ ეს მთელი ხორვატიის სირცხვილია.
“ეს საბოტაჟი და დანაშაულია. ჩვენ სამართალდამცველებისგან ფაქტის გამოძიებას ვითხოვთ. ეს არამხოლოდ ხორვატიის ფეხბურთის ფედერაციის, არამედ მთელი ხორვატიის სირცხვილია.
როგორც გავიგეთ, ეს სიმბოლო მატჩამდე 24-48 საათით ადრე დახაზეს და მატჩის მიმდინარეობისას უნდა გამოჩენილიყო. ბოდიშს ვუხდით ფანებს, რომლებიც შეხვედრას ტელევიზიის საშუალებით ადევნებდნენ თვალყურს, ბოდიშს ვუხდით ორივე გუნდსა და ჩვენს იტალიელ სტუმრებს”, – განაცხადა ტომისლავ პასაკმა.
სვასტიკა შესვენების დროს შეამჩნიეს.
ფაქტს ხორვატიის ფეხბურთის ფედერაციის პრეზიდენტი დავორ შუკერიც გამოეხმაურა.
“ეს ჩვენი ერთ-ერთი პრობლემაა და ამის აღმოფხვრაზე ვმუშაობთ. ამ საკითხზე შაბათს ვიმსჯელებთ, ძალიან გაბრაზებული ვარ”, – ციტირებს შუკერის სიტყვებს BBC.
შეგახსენებთ, რომ ხორვატიისა და იტალიის ეროვნულ გუნდთა შორის გამართული მატჩი მაყურებლების გარეშე ჩატარდა, რადგან ხორვატებს ნორვეგიის ნაკრების წინააღმდეგ გამართულ შეხვედრაში ქომაგების მხრიდან გამოვლენილი რასისტული ქცევის გამო დისკვალიფიკაცია ჰქონდათ.
იტალიის ფეხბურთის ფედერაციის წარმომადგენელმა უეფას დელეგატთან “პოლიუდის” მოედანზე გამოსახული სვასტიკის გამო დაიჩივლა.
ინციდენტი 2016 წლის ევროპის ჩემპიონატის საკვალიფიკაციო ეტაპზე ხორვატიისა და იტალიის ნაკრებებს შორის გამართული მატჩისას (1:1) მოხდა.
ხორვატიის ფეხბურთის ფედერაციის წარმომადგენლებმა სვასტიკას ყურადღება შეხვედრის შესვენებისას მიაქციეს, როდესაც სტადიონის თანამშრომლები მინდვრიდან მის წაშლას ცდილობდნენ.
შეგახსენებთ, რომ აღნიშნული მატჩი მაყურებლების გარეშე ჩატარდა. ხორვატიას ნორვეგიის ნაკრების წინააღმდეგ გამართულ შეხვედრაში ქომაგების მხრიდან რასისტული ქცევის გამო დისკვალიფიკაცია მისცეს.
იტალიის ეროვნული ნაკრების მთავარმა მწვრთნელმა ანტონიო კონტემ ევროპის 2016 წლის ჩემპიონატის შესარჩევ ეტაპზე ბულგარეთის და ამხანაგურად ინგლისის ეროვნული გუნდების წინააღმდეგ გასამართი მატჩებისთვის “სკუადრა აძურას” რიგებში შემდეგ ფეხბურთელებს უხმო:
მეკარეები: ბუფონი (“იუვენტუსი”), პერინი (“ჯენოა”), სირიგუ (“პარი სენ-ჟერმენი”);
მეცველები: ბარძალი (“იუვენტუსი”), ბონუჩი (“იუვენტუსი”), კიელინი (“იუვენტუსი”), მორეტი (“ტორინო”), რანოკია (“ინტერი”);
ნახევარმცველები: ანტონელი (“მილანი”), ბერტოლაჩი (“ჯენოა”), კანდრევა (“ლაციო”), ჩერჩი (“მილანი”), დარმიანი (“ტორინო”), ფლორენცი (“რომა”), მარკიზიო (“იუვენტუსი”), პაროლო (“ლაციო”), პასკუალი (“ფიორენტინა”), სორიანო (“სამპდორია”), ვალდიფიორი (“ემპოლი”), ვერატი (“პარი სენ-ჟერმენი”);
თავდამსხმელები: ედერი (“სამპდორია”), გაბიადინი (“ნაპოლი”), იმობილე (“დორტმუნდი”), პელე (“საუთჰემპტონი”), ვასკესი (“პალერმო”), ძაძა (“სასუოლო”).
იტალიელები ბულგარელებთან მატჩს 28 მარტს გამართავენ, ინგლისელებს კი 31 მარტს გაეჯიბრებიან.
საქართველოს 19-წლამდე ნაკრები იტალიაში, ქალაქ ჯენზანოში იმყოფება და იტალიის 19-წლამდე ნაკრებთან ამხანაგური შეხვედრისთვის ემზადება. ჯენზანო რომის სიახლოვეს, სულ რაღაც 30 კილომეტრში მდებარე პატარა ქალაქია.
19-წლამდელები იტალიაში გუშინ საღამოს ჩავიდნენ. ადგილობრივი დროით 20:00 საათზე, გუნდის მთავარმა მწვრთნელმა – გიორგი დევდარიანმა ფეხბურთელები ადგილობრივ სტადიონზე მსუბუქად ავარჯიშა. ნაკრებს ადგილზე დახვდა ორი ლეგიონერი – ბელგიური „გენკის“ ქართველი შემტევი – ლუკა ზარანდია და იტალიური „ემპოლის“ ფორვარდი – რომან ჭანტურია. „ემპოლის“ ფორვარდი ტრავმას იშუშებს და მისი მატჩში მონაწილეობა თითქმის გამორიცხულია. თუმცა, ის ნაკრებთან ერთადაა და სავარჯიშო პროცესშიც მცირე დატვირთვებს იღებს.
იტალია – საქართველოს ამხანაგური მატჩი ხვალ, 25 თებერვალს, თბილისის დროით 17:30 წუთზე, ჯენზანოს სტადიონზე დაიწყება.
გამომგზავრებამდე, ნაკრების შემადგენლობაში ორი ცვლილება მოხდა. ზურაბ მალანიასა და გიორგი თევზაძის ნაცვლად, გუნდს ბექა ჭკუასელი და დემურ ჩიხლაძე შემოუერთდნენ. მალანიამ, რომელიც საქართველოს ჩემპიონატის ბოლო ტურის მატჩში „შუქურას“ შემადგენლობაში ერთ-ერთი საუკეთესო იყო, ბოლო წუთებზე მიიღო ტრავმა. გიორგი თევზაძე კი, შეუძლოდ გახდა.
საბოლოოდ, საქართველოს 19-წლამდე ნაკრები იტალიაში ასეთი შემადგენლობით იმყოფება:
მეკარეები: ოთო გოშაძე („ქასიმფაშა“, თურქეთი), ბექა ქურდაძე („საბურთალო“);
მცველები: ჯიმი ტაბიძე, გაგი მარგველაშვილი, გრიგოლ ჩაბრაძე (ყველა „საბურთალო“), გიორგი დუმბაძე („ლოკომოტივი“, თბილისი);
ნახევარმცველები: ოთარ კიტეიშვილი („დინამო“ თბილისი), გიორგი კილასონია („მეტალურგი“, რუსთავი), გიორგი ხარაიშვილი („საბურთალო“), ცოტნე მესხი („შუქურა“, ქობულეთი), გიორგი ბერიძე („ზესტაფონი“), აკაკი შულაია („მერანი“, მარტვილი), დემურ ჩიხლაძე („ლოკომოტივი“ თბილისი), ბექა ჭკუასელი („დინამო“, ბათუმი);
თავდამსხმელები: რომან ჭანტურია („ემპოლი“, იტალია), ილია კერძევაძე („სამტრედია“), ლუკა ზარანდია („გენკი“, ბელგია).
დღეს საღამოს, მატჩისწინა ვარჯიში საქართველოს ნაკრებმა კვლავ ჯენზანოს სტადიონზე ჩაატარა. უნდა აღვნიშნოთ, რომ მასპინძელთა ნაკრები დღესდღეობით ევროპაში ერთ-ერთი საუკეთესო გუნდია. როგორც ცნობილია, 96 წელს დაბადებულთა თაობა იტალიაში გამორჩეულია.
სფფ-ის პრესსამსახური
ჯენზანო, იტალია
ტურინის “იუვენტუსისა” და იტალიის ნაკრების 35 წლის ნახევარმცველმა ანდრეა პირლომ განაცხადა, რომ ბუცების ლურსმანზე დაკიდვას ჯერჯერობით არ აპირებს.
“მინდა, რომ ფეხბურთი კიდევ რამდენიმე წლის განმავლობაში ვითამაშო. მე სპორტის ეს სახეობა ისევ ისე მიყვარს, როგორც 15 წლის ასაკში მიყვარდა. თუ ერთხელაც გავიღვიძებ და ვიგრძნობ, რომ ფეხბურთისადმი ჩემი დამოკიდებულება შეიცვალა, მაშინ კარიერის დასრულების გადაწყვეტილებას მივიღებ. თუმცა, დღეს ვფიქრობ, რომ ამ მომენტამდე ჯერ კიდევ დიდი დროა”, – პირლოს სიტყვებს A bola აქვეყნებს.
ცნობისთვის, ანდრეა პირლოს “იუვენტუსთან” მოქმედი კონტრაქტის ვადა 2016 წლის 30 ივნისს ეწურება.
პირლომ იმის შესახებაც ისაუბრა, თუ რატომ გადაწყვიტა იტალიის ნაკრებში დაბრუნება.
“ანტონიო კონტემ დამირეკა და მკითხა, ვიყავი თუ არა მზად, რომ ევრო-2016-ზე გუნდს დავხმარებოდი. მან ჩემი დარწმუნება შეძლო”, – აღნიშნა პირლომ.
