მადრიდის „რეალის“ მთავარმა მწვრთნელმა კარლო ანჩელოტიმ განაცხადა, რომ მის გუნდს უეფას ჩემპიონთა ლიგის მეოთხედფინალურ ეტაპზე დორტმუნდის „ბორუსიასთან“ გამართულ განმეორებით მატჩში გაუმართლა.
„მოხარულნი ვართ, რომ ნახევარფინალში გავედით, თუმცა ჩემი გუნდის თამაშით კმაყოფილი არ ვარ, მით უფრო – პირველ ტაიმში. მეტოქეს ორი მატჩის ჯამში ანგარიშის გათანაბრების ბევრი შანსი ჰქონდა.
მეორე ნახევარში გაცილებით უკეთ ვითამაშეთ. მეტოქე გუნდს ბევრი საჩუქარი მივეცით, ბევრი შეცდომა დავუშვით, არ ვიყავით თავდაჯერებულები.
იკერ კასილასმა მატჩის გადამწყვეტ მომენტში ფანტასტური სეივები გვიჩვენა. მან ძალიან, ძალიან კარგად ითამაშა.
ამ სტადიაზე ყველა მატჩი რთულია. გაგვიმართლა, რომ ნახევარფინალში გავედით“, – ანჩელოტის სიტყვებს Football Espana ციტირებს.
შეგახსენებთ, რომ შეხვედრა „ბორუსიამ“ ანგარიშით 2:0 მოიგო, თუმცა ორი მატჩის ჯამში „რეალმა“ მეტოქეს 3:2 სძლია.
ბექა დოგრაშვილი
