Louis van Gaal – გვერდი 4 – Fanebi.Com – ფეხბურთი, კალათბურთი, რაგბი, სხვა

ვან გაალი: “ამ სეზონში ერთი ტიტულის მოგებაც კარგი შედეგი იქნება”

Posted on აგვისტო 5, 2014 by ბექა დოგრაშვილი

“ლივერპულის” მთავარმა მწვრთნელმა ბრენდან როჯერსმა “მანჩესტერ იუნაიტედის” ახალი თავკაცის, ლუი ვან გაალის შესახებ თქვა, რომ ის რთული ამოცანის წინაშეა. ფეხბურთის ჰოლანდიელი სპეციალისტი როჯერსის ამ სიტყვებს გამოეხმაურა.

“კი ბატონო, პრემიერლიგაში არასდროს მიმუშავია, თუმცა ვმუშაობდი ესპანეთში, სადაც პირველივე სეზონში ერთბაშად სამი ჩემპიონატი მოვიგე, ვმუშაობდი გერმანიაში, სადაც ორი თასი დავისაკუთრე. თუ ინგლისში პირველივე სეზონში თუნდაც ერთ ტიტულს მოვიგებ, ეს კარგი შედეგი იქნება”, – ციტირებს ვან გაალის სიტყვებს “ტოდო მერკატო”.

შეგახსენებთ, რომ წუხელ “მანჩესტერ იუნაიტედსა” და “ლივერპულს” შორის Guinness International Champions Cup-ის ფინალური მატჩი გაიმართა, რომელიც “წითელი ეშმაკების” გამარჯვებით, ანგარიშით 3:1 დასრულდა.

ვან გაალი: “სიცხემ “მანჩესტერ იუნაიტედს” ხელი შეუშალა”

Posted on ივლისი 27, 2014 by ბექა დოგრაშვილი

Guinness International Champions Cup-ის ეგიდით “მანჩესტერ იუნაიტედსა” და “რომას” შორის გამართული ამხანაგური მატჩი ინგლისელთა გამარჯვებით, ანგარიშით 3:2 დასრულდა. “წითელი ეშმაკების” მთავარი მწვრთნელი ლუი ვან გაალი შედეგით კმაყოფილი დარჩა, თუმცა თამაშის ხარისხი არ მოიწონა. ფეხბურთის ჰოლანდიელი სპეციალისტის თქმით, სიცხემ მის გუნდს შესაძლებლობების სრულად გამოვლენაში ხელი შეუშალა.

„მოხარული ვარ, რომ ჩემმა გუნდმა გაიმარჯვა, თუმცა არცთუ ისე კარგად ვითამაშეთ. გვქონდა შესაძლებლობა, რომ სხვაგვარად გვემოქმედა. ჩემი აზრით, სიცხემ ფეხბურთელებზე იმოქმედა. მოთამაშეები ახალი სეზონისთვის ემზადებიან და ჯერ არ არიან ასეთ პირობებში თამაშს მიჩვეულნი. თამაში 3:0 მიგვყავდა და საჭიროა იყო, რომ უბრალოდ ბურთი შეგვენარჩუნებინა, თუმცა სიცხის გამო ძალიან დაიღალნენ ჩემი ფეხბურთელები”, – ციტირებს ვან გაალის სიტყვებს „მანჩესტერ იუნაიტედის“ ოფიციალური ვებგვერდი.

ამავე ჯგუფში მილანის “ინტერსა” და მადრიდის “რეალს” შორის გამართული მატჩის ძირითადი დრო ფრედ, ანგარიშით 1:1 დასრულდა, პენალტების სერიაში კი იტალიურმა გუნდმა 3:2 გაიმარჯვა.

მოურინიო: „მე და ვან გაალი დიდებული მწვრთნელები ვართ“

Posted on ივლისი 20, 2014ივლისი 20, 2014 by ბექა დოგრაშვილი

ინგლისის პრემიერლიგის ახალი სეზონის ერთ-ერთი მთავარი დაპირისპირება ლონდონის „ჩელსისა“ და „მანჩესტერ იუნაიტედს“ შორის გაიმართება. „პენსიონერებს“ ჟოზე მოურინიო თავკაცობს, „წითელ ეშმაკებს“ კი ლუი ვან გაალის სახით ახალი მთავარი მწვრთნელი ჰყავთ. ისინი ერთმანეთს კარგად იცნობენ, ვინაიდან სამი წლის განმავლობაში „ბარსელონაში“ ერთად მუშაობდნენ.

მოურინიო მოუთმენლად ელის „მანჩესტერ იუნაიტედთან“ გასამართ დაპირისპირებას და ვან გაალთან შეხვედრას.

პორტუგალიელმა მწვრთნელმა ჰოლანდიელი სპეციალისტის შესახებ საკმაოდ გულთბილად ისაუბრა.

„არ ვღელავ იმის გამო, რომ ვან გაალი ინგლისში იმუშავებს. მოუთმენლად ველოდები „მანჩესტერ იუნაიტედის“ წინააღმდეგ გასამართ მატჩს. არ ვნერვიულობთ.

ცოტა ხნის წინათ ვან გაალის პრესკონფერენციას ვუცქირე. აი, ეს იყო ნამდვილი ვან გაალი – სამართლიანი და გახსნილი. ის ყოველთვის ასეთი გახლდათ. ლუი შესანიშნავი მწვრთნელია, „მანჩესტერ იუნაიტედისთვის“ ზედგამოჭრილი თავკაცია~, – ციტირებს მოურინიოს სიტყვებს „დეილი მეილი“.

კითხვაზე, მოურინიო უკეთესია თუ ვან გაალი, პორტუგალიელი ასე პასუხობს:

„მეც და ისიც დიდებული მწვრთნელები ვართ. ჩვენ ამ პროფესიისთვის ვართ დაბადებულნი. ლუი ბრაზილიაში გამართული მსოფლიოს ჩემპიონატის საუკეთესო მწვრთნელია. მას ახლა კარიერის საუკეთესო პერიოდი აქვს. ვან გაალი მიღებულ გამოცდილებას აანალიზებს და სულ უფრო ვითარდება.

გარდა ამისა, ის ჩემი მეგობარიც გახლავთ, მუდმივი მეგობარი. მე მას დიდ პატივს ვცემ“, – აღნიშნა მოურინიომ.

„ჩელსისა“ და „მანჩესტერ იუნაიტედს“ შორის დამდეგი მატჩი 26 ოქტომბერს გაიმართება.

ვინ იქნება „მანჩესტერ იუნაიტედის“ ახალი კაპიტანი

Posted on ივლისი 20, 2014ივლისი 20, 2014 by ბექა დოგრაშვილი

„მანჩესტერ იუნაიტედის“ ყოფილი კაპიტანი ნემანია ვიდიჩი მილანის „ინტერში“ გადავიდა. შესაბამისად, „წითელ ეშმაკებს“ ახალი კაპიტანი ჰყავთ ასარჩევი.

გავრცელებული ინფორმაციის თანახმად, ამ საპასუხისმგებლო მისიის დაკისრებას მაიკლ კერიკს უპირებენ. ლუი ვან გაალს კაპიტნის სამკლავურის ახალი მფლობელის ვინაობა უახლოეს პერიოდში უნდა გამოეცხადებინა, თუმცა ინგლისელ ნახევარმცველს ტრავმა აქვს და შესაძლოა, ჰოლანდიელმა თავკაცმა ახალი კაპიტნის ვინაობის გამოცხადება გადადოს.

შეგახსენებთ, რომ კერიკი რამდენიმე დღის წინათ საწვრთნელ პროცესზე დაშავდა, რის გამოც 12 კვირით იუქმებს.

სკოლარი: „ეს არ ნიშნავს სამყაროს აღსასრულს“

Posted on ივლისი 12, 2014ივლისი 12, 2014 by ბექა დოგრაშვილი

ბრაზილიის ნაკრების მთავარმა მწვრთნელმა ლუიშ ფელიპე სკოლარიმ წინასამატჩო პრესკონფერენციაზე „სელესოას“ შანსები შეაფასა.

„როდესაც დახურულ ვარჯიშს ვატარებ, მაკრიტიკებთ. როდესაც ღია ვარჯიშს ვატარებ, მაინც მაკრიტიკებთ. ჩვენც არ მოგვწონს ნაჩვენები შედეგი, თუმცა მსოფლიოს საუკეთესო გუნდების ოთხეულში შევდივართ და ეს არ ნიშნავს სამყაროს აღსასრულს.

ვთვლი თუ არა, რომ ანგარიშით 1:7 მარცხის შემდეგ იმიჯი გავიფუჭე? შედეგი კატასტროფული იყო, თუმცა ანგარიშის გარდა არაფრის მრცხვენია. საკმაოდ პროდუქტიული სამუშაო გავწიეთ“, – განაცხადა სკოლარიმ.

შეგახსენებთ, რომ ბრაზილიის ნაკრები ბრინჯაოს მედლებისთვის ჰოლანდიის ეროვნულ გუნდს დაუპირისპირდება.

ვან გაალი: „პენალტების სერიაში წაგებას ისევ 1:7 მარცხი სჯობდა“

Posted on ივლისი 12, 2014 by ბექა დოგრაშვილი

ჰოლანდიელთა მთავარი მწვრთნელი ლუი ვან გაალი ბრაზილიის ნაკრებთან გასამართ მატჩამდე აცხადებს, რომ მისი გუნდი საშინელ მორალურ მდგომარეობაშია.

„იმედგაცრუებულნი ვართ. ჩვენი ოცნება დაიმსხვრა და ამას ვეღარაფერი შეცვლის. მიზანი იყო მსოფლიოს ჩემპიონატის მოგება. აი, ამიტომ ვართ ასე ცუდად. მართლაც საშინელებაა ასე დამარცხება. ამას ისევ 1:7 წაგება სჯობდა, რადგან ყველასთვის გასაგები იქნებოდა, რომ მარცხს იმსახურებდი. თუმცა, ჩვენ არ დავმარცხებულვართ, პენალტების სერიაში წავაგეთ, რაც ორმაგად სამწუხაროა. ვწუხვართ, რომ ფინალში ვერ გავაღწიეთ“, – ვან გაალის სიტყვები „მარკას“ ვებგვერდზე გამოქვეყნდა.

შეგახსენებთ, რომ ჰოლანდიის ნაკრები ბრინჯაოს მედლებისთვის ბრაზილიის ეროვნულ გუნდს დაუპირისპირდება.

ვან გაალი: „რომეროს პენალტების მოგერიება მე ვასწავლე“

Posted on ივლისი 10, 2014 by ბექა დოგრაშვილი

მსოფლიოს ჩემპიონატის ნახევარფინალურ ეტაპზე ჰოლანდიისა და არგენტინის ნაკრებებს შორის გამართული მატჩი უგოლოდ დასრულდა, თერთმეტმერიანი დარტყმების სერიაში კი სამხრეთამერიკელებმა 4:2 იმარჯვეს და ფინალში თამაშის უფლება მოიპოვეს.

„ნარინჯისფერთა“ მთავარმა მწვრთნელმა ლუი ვან გაალმა მატჩი შეაჯამა.

„ცვლილების უფლება რომ მქონოდა, ტიმ კრულს კვლავ გამოვიყვანდი იასპერ სილესენის ნაცვლად, თუმცა იმ დროს უკვე სამივე შეცვლა მქონდა განხორციელებული. რომეროს პენალტების მოგერიება მე ვასწავლე. სწორედ ჩემმა „ალკმაარმა“ მისცა მას ევროპული ფეხბურთის საგზური. იმედია, სწორად გამიგებთ. ვხუმრობ, რა თქმა უნდა.

კოსტა რიკის ნაკრების წინააღმდეგ თერთმეტმეტრიანი დარტყმები იდეალურად შევასრულეთ. ძალიან მნიშვნელოვანი იყო, რომ მაშინ პირველივე პენალტი გავიტანეთ. დღეს ორ ფეხბურთელს ვთხოვე თერთმეტმეტრიანის შესრულება. შემდეგ გადავწყვიტეთ, რომ ვლაარი დაარტყამდა, რადგან, ჩემი აზრით, ის მატჩის საუკეთესო ფეხბურთელი იყო. სამწუხაროდ, მას დარტყმა არ გამოუვიდა.

არ მაინტერესებს, რას ამბობს ხალხი ჩემზე და ჩემს გუნდზე. კი ბატონო, ბევრი საგოლე მომენტი ვერ შევქმენით, არგენტინის ნაკრების დაცვის კარგი თამაში აღსანიშნავია. უნდა ვთქვა, რომ ვერც მეტოქემ ვერ შექმნა ბევრი ხიფათი ჩვენს კართან. დაბალანსებული მატჩი გამოვიდა, ბევრი იყო ტაქტიკური ნიუანსები. მიუხედავად იმისა, რომ დღეს რობენი, ვან პერსი, სნეიდერი, მესი, აგუერო, ლავესი თამაშობდნენ, მაინც ცოტა საგოლე მომენტი შეიქმნა.

ახლავე შემიძლია იმის თქმა, რომ ტურნირზე ფანტასტურად გამოვედით. არავინ ელოდა ჩვენს ნახვას არამცთუ ნახევარფინალში, პლეი-ოფშიც კი. მექსიკა და კოსტა რიკა ორგანიზებული და ძლიერი მეტოქეები არიან, თუმცა ჰოლანდიის ნაკრებმა ეს ბარიერები დაძლია. დავმარცხდით მდიდარი საფეხბურთო ისტორიის მქონე არგენტინის ნაკრებთან და ისიც პენალტების სერიაში. სამწუხაროა. არადა, თანაბარი თამაში იყო“, – განაცხადა ვან გაალმა.

ახლა ჰოლანდიის ნაკრები საპატიო მესამე ადგილისთვის იბრძოლებს. ბრინჯაოს მედლებისთვის ბრძოლა ბრაზილიისა და ჰოლანდიის ნაკრებებს შორის შედგება და ის 13 ივლისს, თბილისის დროით 00:00 საათზე დაიწყება.

რა გააკეთა გაბრაზებულმა სილესენმა წუხანდელი შეცვლის შემდეგ

Posted on ივლისი 6, 2014ივლისი 10, 2014 by ბექა დოგრაშვილი

როგორც მოგეხსენებათ, მსოფლიოს ჩემპიონატის მეოთხედფინალურ ეტაპზე ჰოლანდიისა და კოსტა რიკის ნაკრებებს შორის გამართული შეხვედრა ფრედ, ანგარიშით 0:0 დასრულდა, პენალტების სერიაში კი ევროპელებმა 4:3 იმარჯვეს და ნახევარფინალური რაუნდის საგზური მოიპოვეს.

მატჩის 119-ე წუთზე ჰოლანდიელთა თავკაცმა ლუი ვან გაალმა მეკარე იასპერ სილესენი ტიმ კრულით ჩაანაცვლა, რამაც ძირითადი კიპერის გაღიზიანება გამოიწვია. სათადარიგო ფეხბურთელთა შორის გადანაცვლებულმა სილესენმა ბრაზისგან წყლის ბოთლებს ფეხიც მიარტყა. ტიმ კრულს რაც შეეხება, მან დაკისრებულ დავალებას თავი შესანიშნავად გაართვა, ორი დატყმული მოიგერია და ჰოლანდიის ნაკრებს ნახევარფინალურ ეტაპზე თამაშის უფლება მოუპოვა.

მატჩის შემდეგ სილესენმა ბოდიში მოიხადა:

„მატჩის დასრულებისთანავე ფრანკ ჰუკს (მეკარეების მწვრთნელი) მოვუბოდიშე. ბოდიშს მთელ გუნდს მოვუხდი. ჩვენ ყველანი ერთ საქმეს ვაკეთებთ. ეს მართებული ცვლილება იყო, ტიმმა ფანტასტიურად ითამაშა“.

ფაქტზე კომენტარი გააკეთა ვან გაალმაც:

„ეს ჯერ კიდევ მატჩამდე გვქონდა დაგეგმილი. ნაკრების თითოეულ წევრს კონკრეტული დავალება აქვს. ჩვენს გუნდში პენალტების მოგერიების მხრივ კრული საუკეთესოა. მატჩამდე სილესენს არაფერი არ ვუთხარით, რათა ამას მასზე ცუდი გავლენა არ მოეხდინა“.

აი, ფაბიო კანავაროს კი ვან გაალის საქციელი არ მოეწონა:

„ვიცი, რომ ამ ცვლილების შემდეგ ვან გაალზე ყველა ისე ისაუბრებს, როგორც ლეგენდაზე, მაგრამ პირადად მე ასეთი რაღაცები არ მომწონს. ეს სილესენის მიმართ უპატივცემულობაა. რომელ მეკარეს დააყენებს მომდევნო შეხვედრაში სასტარტო შემადგენლობაში? სილესენს უკვე ეცოდინება, რომ მწვრთნელი მას 100 პროცენტით არ ენდობა“.

მეკარის შეცვლაზე კომენტარი გააკეთა ინგლისის ნაკრების ყოფილმა ფეხბურთელმა გარი ლინეკერმაც, რომელმაც კრულის სტატისტიკა მოიხმო:

„ვან გაალმა მეკარე მხოლოდ პენალტების სერიის გამო შეცვალა. სილესენის შეცვლა მისი გეგმის ნაწილი იყო, მაგრამ ის თუ მაინც იცის, რომ „ნიუკასლის“ შემადგენლობაში კრულმა ოციდან მხოლოდ ორი პენალტი მოიგერია?!“

ასეა თუ ისე, ვან გაალის შეცვლამ გაამართლა, ჰოლანდიის ეროვნულმა გუნდმა მუნდიალის ნახევარფინალური ეტაპის საგზური მოიპოვა, სადაც არგენტინის ნაკრებს დაუპირისპირდება. შეხვედრა10 ივლისს, თბილისის დროით 00:00 საათზე აიღებს სტარტს.

ვან პერსი: „ვან გალმა გოლი მიწინასწარმეტყველა“

Posted on ივნისი 14, 2014 by ბექა დოგრაშვილი

2014 წლის მსოფლიოს ჩემპიონატის ჯგუფურ ეტაპზე ესპანეთისა და ჰოლანდიის ნაკრებებს შორის გამართული შეხვედრა „ნარინჯისფერთა“ დამაჯერებელი გამარჯვებით, ანგარიშით 5:1 დასრულდა. მატჩის გმირად ჰოლანდიელთა თავდამსხმელი რობინ ვან პერსი დაასახელეს, რომელმაც დუბლი გაიფორმა.

„მანჩესტერ იუნაიტედის“ ფორვარდმა ესპანელთა წინააღმდეგ გამართული შეხვედრა შეაჯამა.

„მატჩის წინ ვან გაალმა მითხრა, რომ გოლის გატანა შემეძლო. ასეც მოხდა – ამიტომაც აღვნიშნე ესპანელთა კარში გატანილი პირველი გოლი მწვრთნელთან ერთად. უკანასკნელი რამდენიმე დღის განმავლობაში ესპანეთის ნაკრების ტაქტიკა სწორად გავანაალიზეთ და მათ წინააღმდეგ მატჩს სრულად შეიარაღებულნი შევხვდით“, – განაცხადა ვან პერსიმ.

ვან გაალი: „თავი არ უნდა მოვიტყუოთ“

Posted on ივნისი 14, 2014 by ბექა დოგრაშვილი

მატჩი ჰოლანდიელთა მთავარმა მწვრთნელმა ლუი ვან გაალმა შეაფასა.

„არ ველოდი, რომ ეს ტაქტიკა ასე გაამართლებდა. აღფრთოვანებული ვარ. მსოფლიოს მოქმედი ჩემპიონის ანგარიშით 5:1 დამარცხება მართლაც შესანიშნავი რამ გახლავთ. ისე, მეექვსეს გატანაც შეგვეძლო. თუმცა, თავი არ უნდა მოვიტყუოთ… ჯგუფიდან ჯერ არ გავსულვართ“, – აღნიშნა ვან გაალმა.

როჯერსი: „მოუთმენლად ველი ვან გალთან შეხვედრას“

Posted on მაისი 21, 2014 by ბექა დოგრაშვილი

„ლივერპულის“ მთავარი მწვრთნელი ბრენდან როჯერსი თვლის, რომ „მანჩესტერ იუნაიტედის“ ხელმძღვანელობამ კლუბის თავკაცის პოსტზე ლუი ვან გალის დანიშვნით სწორი გადაწყვეტილება მიიღო. გარდა ამისა, მერსისაიდული გუნდის დამრიგებელმა დევიდ მოიესის გათავისუფლების გამო სინანული გამოთქვა.

„პირველ რიგში, სამწუხაროა, რომ მოიესს შანსი არ მიეცა. მისი წასვლის შემდეგ „მანჩესტერ იუნაიტედს“ გამოცდილი სპეციალისტი სჭირდებოდა. ვან გალი ამ პოსტისთვის იდეალური ვარიანტია. მრავალი წლის განმავლობაში ვაკვირდებოდი მის მუშაობას. ის ყოველთვის აღწევდა წარმატებას. აქვს საკუთარი ხედვა და გაგება, თუ როგორ უნდა ითამაშოს მისმა გუნდმა. ვან გალს ახალგაზრდებთან მუშაობაც ეხერხება. ჰოლანდიელის სტატუსი კლუბის ისტორიას შეესაბამება. მოუთმენლად ველი ვან გალთან შეხვედრას“, – განაცხადა ბრენდან როჯერსმა რადიოსადგურ „თოქსპორტის“ ეთერში.

შეგახსენებთ, რომ ლუი ვან გალი „მანჩესტერ იუნაიტედს“ მსოფლიოს ჩემპიონატის შემდეგ ჩაიბარებს.

ბექა დოგრაშვილი

ოფიციალურად: „მანჩესტერ იუნაიტედსა“ და ვან გალს შორის კონტრაქტი გაფორმდა

Posted on მაისი 19, 2014 by ბექა დოგრაშვილი

„მანჩესტერ იუნაიტედმა“ ოფიციალურად გამოაცხადა ლუი ვან გალთან კონტრაქტის გაფორმების შესახებ.

62 წლის ჰოლანდიელმა სპეციალისტმა ინგლისურ კლუბთან სამწლიან ხელშეკრულებას მოაწერა ხელი.

ვან გალი, რომლის თავკაცობითაც ჰოლანდიის ნაკრები ბრაზილიაში გასამართ მსოფლიოს ჩემპიონატზე იასპარეზებს, „მანჩესტერ იუნაიტედში“ მუშაობას მუნდიალის დასრულების შემდეგ შეუდგება.

ვან გალის თანაშემწეებად რაიან გიგზი, ფრანს ჰუკი და მარსელ ბუტი იმუშავებენ.

„ლუი ვან გალის სახით თანამედროვე ფეხბურთის ერთ-ერთი გამოჩენილი მწვრთნელი მოვიყვანეთ. მან კარიერის განმავლობაში ბევრს მიაღწია. „ოლდ ტრაფორდზე“ მას მიეცემა შესაძლებლობა, რომ „მანჩესტერ იუნაიტედის“ ისტორიაში ახალი თავი დაწეროს“, – განაცხადა კლუბის აღმასრულებელმა დირექტორმა ედ ვუდვორდმა.

ბექა დოგრაშვილი