რაული: “ის საუკეთესო ფეხბურთელია, ვის წინააღმდეგაც ოდესმე მითამაშია”

მადრიდის “რეალის” ყოფილმა თავდამსხმელმა რაულმა ის საუკეთესო ფეხბურთელი დაასახელა, ვის წინააღმდეგაც კარიერის განმავლობაში უთამაშია. ლეგენდარულმა ესპანელმა ასეთ მოთამაშედ “ბარსელონას” ლიდერი ლიონელ მესი მიიჩნია.

“მესი საუკეთესო ფეხბურთელია, ვის წინააღმდეგაც ოდესმე მითამაშია. გამიმართლა, რომ მოედანზე ზინედინ ზიდანს, რონალდოს, ლუიშ ფიგუსა და კრიშტიანუ რონალდუს შევხვდი, მაგრამ მესი ყველასგან განსხვავებულია…

მას ყველაფერი იოლად გამოსდის, შეუძლებელსაც კი უმარტივესად აკეთებს. როდესაც მის თამაშს უყურებ, გგონია, რომ ის მეგობრებთან ერთად ქუჩაში ფეხბურთს თამაშობს.

თუ ჩემი კარიერის ადრეულ წლებზე ვისაუბრებთ, მაშინ საუკეთესოებად რობერტო ბაჯოსა და რაიან გიგზს დავასახელებ.

საუკეთესო მცველი, ვის წინააღმდეგაც მითამაშია, პაოლო მალდინია. ის ძლიერი და ელეგანტური მოთამაშე იყო. მახსოვს, როგორ მიჭირდა მის წინააღმდეგ თამაში. ის ფეხბურთის ისტორიაში ერთ-ერთი საუკეთესო ცენტრალური მცველია. მოედნის მიღმაც საოცარი პიროვნებაა. ის საფეხბურთო კერპია.

საუკეთესო მეკარედ კი ოლივერ კანს დავასახელებ. ჩემპიონთა ლიგაზე მიუნხენის “ბაიერნთან” ყოველთვის რთული მატჩები გვქონდა”, – რაულის კომენტარი Goal.com-მა გამოაქვეყნა.

 

ჩაბი ალონსო: “რაულმა ბუნდესლიგის კარი ბევრს გაუხსნა”

მიუნხენის “ბაიერნის” ნახევარმცველმა ჩაბი ალონსომ ბოლო პერიოდში ბუნდესლიგაში ესპანელი ფეხბურთელების მომრავლებაზე ისაუბრა.

“ბოლო ოთხ-ხუთ წელიწადში ბუნდესლიგა გაცილებით მიმზიდველი გახდა.

მანამდე ესპანელი ფეხბურთელები, როგორც წესი, მხოლოდ პრიმერადივიზიონსა და ინგლისის პრემიერლიგაში თამაშობდნენ.

ახლა ბუნდესლიგაში ტრანსფერების პოპულარობა იზრდება. რაულმა, რომელიც “შალკეში” 2010 წელს გადავიდა, კარი ბევრს გაუხსნა”, – ჩაბი ალონსოს სიტყვები “მარკამ” გამოაქვეყნა.

 

რონალდუ, მესი, რაული: გოლები და ტიტულები ევროთასებზე

უეფას ჩემპიონთა ლიგის მერვედფინალურ ეტაპზე მადრიდის “რეალის” ლიდერმა კრიშტიანუ რონალდუმ გელზენკირხენის “შალკეს” წინააღმდეგ გამართულ მატჩში გაიტანა. პორტუგალიელი ფეხბურთელისთვის ეს ევროთასებზე გატანილი 76-ე გოლია, რითაც ის “ბარსელონას” ლიდერ ლიონელ მესის და “რეალის” ყოფილ თავდამსხმელ რაულს დაეწია.

scorers

რაულის აზრი “შალკე” — “რეალის” დამდეგ დაპირისპირებაზე

მადრიდის “რეალისა” და გელზენკირხენის “შალკეს” ყოფილმა თავდამსხმელმა რაულმა ამ კლუბთა შორის უეფას ჩემპიონთა ლიგის მერვედფინალურ ეტაპზე გასამართი დაპირისპირების შესახებ ისაუბრა.

“ქაღალდზე “რეალი” აშკარა ფავორიტია და თითქოს, ეს ეტაპი იოლად უნდა გაიაროს, თუმცა “შალკე” ასე ადვილად არ დანებდება. ამჯერად გერმანელები იმ ანგარიშით აღარ დამარცხდებიან, როგორც შარშან წააგეს (ორი მატჩის ჯამში 2:9). “შალკე” ყველაფერს გააკეთებს იმისთვის, რომ “რეალს” ცხოვრება გაურთულოს”, – რაულის სიტყვები გერმანულმა გამოცემა “კიკერმა” გამოაქვეყნა.

შეგახსენებთ, რომ ჩემპიონთა ლიგის მერვედფინალურ ეტაპზე გელზენკირხენის “შალკესა” და მადრიდის “რეალს” შორის გასამართი პირველი მატჩი გერმანიაში, 18 თებერვალს ჩატარდება, განმეორებითი კი – 10 მარტს, ესპანეთში.

 

რაული ფიფას საპრეზიდენტო არჩევნებზე ფიგუს კანდიდატურის დაყენებას გამოეხმაურა

მადრიდის “რეალის” ყოფილი თავდამსხმელი რაული ფიფას საპრეზიდენტო არჩევნებზე ლუიშ ფიგუს მიერ საკუთარი კანდიდატურის დაყენების ფაქტს გამოეხმაურა. ესპანელი ფეხბურთელის აზრით, ფიგუს მსოფლიო ფეხბურთის მმართველი ორგანოსთვის ბევრი სასიკეთო საქმის გაკეთება შეუძლია.

“ფიგუ მდიდარი ისტორიის მქონე ფეხბურთელია. მას ფეხბურთისთვის ბევრი კარგი საქმის გაკეთება შეუძლია. კარგია, რომ მან საკუთარი კანდიდატურა წამოაყენა. დარწმუნებული ვარ, ფიგუ დებატებში მონაწილეობას მიიღებს და ფეხბურთის განვითარებისთვის ახალ იდეებსაც შემოგვთავაზებს. მე მისკენ ვარ”, – რაულის სიტყვები “მარკამ” გამოაქვეყნა.

შეგახსენებთ, რომ ფიფას საპრეზიდენტო არჩევნებში ერთმანეთს კონკურენციას გაუწევენ: მოქმედი პრეზიდენტი ზეპ ბლატერი, იორდანიის პრინცი ალი ბინ ალ ჰუსეინი, ჟერომ შამპანი, ყოფილი ფეხბურთელები დავიდ ჟინოლა და ლუიშ ფიგუ, აგენტი მინო რაიოლა და ჰოლანდიის ფეხბურთის ასოციაციის ხელმძღვანელი მიქაელ ვან პრააგი.

ფიფას საპრეზიდენტო არჩევნები მიმდინარე წელს გაიმართება.

 

“ნიუ იორკ კოსმოსის” რიგებში რაულს დებიუტი 4 აპრილს ექნება

“ნიუ იორკ კოსმოსის” რიგებში რაულის დებიუტი 2015 წლის 4 აპრილს შედგება, როდესაც ჩრდილოეთ ამერიკის საფეხბურთო ლიგის ახალი სეზონის პირველი ტური გაიმართება. 37 წლის ესპანელი თავდამსხმელი პირველ შეხვედრას “ფორტ ლოდერდეილის” წინააღმდეგ ჩაატარებს.

უკვე 18 აპრილს რაული “ნიუ იორკ კოსმოსის” საშინაო არენაზე ითამაშებს პირველად. იმ შეხვედრაში მისი გუნდი “ტამპა ბეი რაუდისს” უმასპინძლებს.

შეგახსენებთ, რომ რაულმა ამერიკულ კლუბთან ოქტომბრის ბოლოს ორწლიანი კონტრაქტი გააფორმა. ესპანელი ფეხბურთელი “ნიუ იორკ კოსმოსში” 7-ნომრიანი მაისურით ითამაშებს. მომავალი წლიდან რაული კლუბის აკადემიაშიც დასაქმდება.

 

რაულმა ახალი კლუბისთვის სარგებლიანობის მოტანა უკვე დაიწყო

როგორც მოგეხსენებათ, ვეტერანი ესპანელი თავდამსხმელი რაული ამერიკულ “ნიუ იორკ კოსმოსში” გადავიდა. კლუბის კომერციული დირექტორი ერიკ სტოუვერი აცხადებს, რომ ლეგენდარული ესპანელი ფეხბურთელის მისვლამ უკვე მოახდინა გუნდზე დადებითი ეფექტი.

“ჩვენი გუნდის ფანები რაულის შეძენით აღფრთოვანებულები არიან.
მნიშვნელოვნად გაიზარდა ბილეთებისა და საკლუბო ატრიბუტიკის გაყიდვების რაოდენობა. რაულის დამატება ჩვენი კლუბის ისტორიის იმ მონაკვეთებს ჰგავს, როდესაც ჩვენთან პელე და ფრანც ბეკენბაუერი მოვიდნენ”, – ციტირებს “კოსმოსის” კომერციული დირექტორის სიტყვებს “ასი”.

 

რაულს “ნიუ-იორკ კოსმოსში” ორმაგი ფუნქცია ექნება

მადრდის “რეალის” ლეგენდარული ფეხბურთელი რაული მალე “ნიუ-იორკ კოსმოსის” მოთამაშე გახდება.

ამის შესახებ ინფორმაციას ESPN ავრცელებს.

“გარიგება შედგა. რაული “ნიუ-იორკ კოსმოსთან” რამდენიმეწლიან კონტრაქტს გააფორმებს. კლუბი ტრანსფერს ოფიციალურად 1-2 დღეში დაადასტურებს”, – აღნიშნავს წყარო.

რაული ახალ კლუბს 2015 წლის გაზაფხულზე შეუერთდება. კონტრაქტის პრობების თანახმად, ესპანელი ფეხბურთელი “ნიუ-იორკ კოსმოსის” აკადემიაში კონსულტანტადაც იმუშავებს.

 

რაულის ტრანსფერი უახლოეს დღეებში დადასტურდება

ამერიკული კლუბი „ნიუ-იორკ კოსმოსი“ მადრიდის „რეალის“ ყოფილ თავდამსხმელთან რაულთან კონტრაქტის ბოლო დეტალებს ათანხმებს.

სავარაუდოდ, ესპანელი ვეტერანის ტრანსფერს კლუბი ოფიციალურად მიმდინარე კვირის ბოლომდე დაადასტურებს.

როგორ ცნობილია, მხარეები ხელს ნახევარწლიან შეთანხმებას მოაწერენ.

რაული: „შესაძლოა, დელ ბოსკე 4-6-0 სქემას მიუბრუნდეს“

ესპანური ფეხბურთის ლეგენდარული ფიგურა რაული თვლის, რომ თავდამსხმელებთან დაკავშირებული პრობლემების გამო, ვისენტე დელ ბოსკეს გუნდმა შესაძლოა, მსოფლიოს ჩემპიონატზე ნომინალური ფორვარდის გარეშე ითამაშოს.

„დავიდ ვილიამ და ფერნანდო ტორესმა თავიანთ კლუბებში მთლად კარგად თავი ვერ წარმოაჩინეს. შესაძლოა, დელ ბოსკემ კვლავ მიმართოს 4-6-0 სქემას. თუ ეს გოლების გატანაში დაგვეხმარება, ყველაფერი კარგად იქნება, თუ არა – მწვრთნელი საყოველთაო კრიტიკის ქარცეცხლში მოექცევა. ასეთია საფეხბურთო მწვრთნელისა და მოთამაშეების ბედი.

ტიტულის დაცვა გაცილებით რთულია, ვიდრე მისი მოპოვება. ყველა ესპანელი გულშემატკივარი სვამს კითხვას, შეძლებს ესპანეთის ნაკრები ამ ამოცანის დაძლევას? დელ ბოსკე იცნობს თავის გუნდს და იცის, რომელი სათამაშო სქემა გამოადგება. პუიოლის არყოფნაში დაცვა უფრო სუსტი იქნება. დიეგო კოსტას მდგომარეობაც დიდ შეშფოთებას იწვევს. იგი ტრავმის მიღებამდე საუცხოო ფორმაში იყო.

ესპანეთის ნაკრები ტურნირის ერთ-ერთი ფავორიტია. არის ჩემპიონობის სხვა კანდიდატებიც, თუმცა ესპანეთი პირველ რიგში სახელდება. ბრაზილიის ნაკრები საკუთარ კედლებში ითამაშებს, რაც მათ თავდაჯერებას შემატებს. ბრაზილიელებს ამჯერად უფრო ძლიერი მცველები ჰყავს, ვიდრე შემტევები“, – განაცხადა რაულმა.

 

ვალდანო: „რაული „რეალის“ გვარდიოლა გახდება“

მადრიდის „რეალის“ ექს-გენერალური დირექტორი ხორხე ვალდანო დარწმუნებულია, რომ „სამეფო კლუბის“ ყოფილი თავდამსხმელი რაული „გალაქტიკოსის“ წარმატებული თავკაცი გახდება.

„რაულს „რეალის“ გვარდიოლას მოვიაზრებ, თუმცა საკუთარი თვისებებით სულაც არ ჩამოუვარდება პეპს, რომელმაც „ბარსელონასთან“ ერთად მოიგო ყველაფერი, რისი მოგებაც შეიძლებოდა.

მოუთმენლად ველი იმ დროს, როცა რაულს „რეალის“ საპასუხისმგებლო პოსტზე ვიხილავ“, – ვალდანოს სიტყვები foxsportsla-მ გამოაქვეყნა.

ბექა დოგრაშვილი