იტალიის სერია A-ს XVII ტურში ტურინის “იუვენტუსსა” და მილანის “ინტერს” შორის გამართული მატჩის პირველ ტაიმში მასპინძელთა ახალგაზრდა ფრანგმა ნახევარმცველმა პოლ პოგბამ ეფექტური ფინტით ორი მეტოქე ჩამოიტოვა და მეკარესთან ერთი ერთზე გავიდა, თუმცა გოლის გატანა ვეღარ მოახერხა.
ბრიტანული პრესის ცნობით, ლონდონის “არსენალი” ტურინის “იუვენტუსის” ნახევარმცველ პოლ პოგბასთვის ბრძოლაში ერთვება.
როგორც ცნობილია, “მეთოფეთა” მთავარი მწვრთნელი არსენ ვენგერი ახალგაზრდა ფრანგი ფეხბურთელის დიდი ქომაგია და პრემიერლიგაში მისი დაბრუნების სურვილიც აქვს.
პოლ პოგბას მიმართ ინტერესს სხვა ინგლისური კლუბებიც იჩენენ. მანამდე გავრცელებული ინფორმაციის თანახმად, “მანჩესტერ სიტი” მზად არის, ფრანგი ნახევარმცველის სანაცვლოდ 62 მილიონი ევრო გაიღოს. პოგბას ტრანსფერის გაჩარხვას “მანჩესტერ იუნაიტედი” და ლონდონის “ჩელსიც” შეეცდებიან.
ტურინის “იუვენტუსისა” და საფრანგეთის ნაკრების ახალგაზრდა ნახევარმცველმა პოლ პოგბამ საკუთარი ვარაუდი გამოთქვა, თუ ვის გადასცემენ “ოქროს ბურთს”. ფრანგი ფეხბურთელის თქმით, წელს საუკეთესო მოთამაშის წოდებას მადრიდის “რეალისა” და პორტუგალიის ეროვნული გუნდის ლიდერი კრიშტიანუ რონალდუ იმსახურებს.
“მგონია, რომ “ოქროს ბურთს” რონალდუს მისცემენ. ჩემი აზრით, ეს ყველაზე ლოგიკური არჩევანი იქნება. ასე ვთვლი მე და ასე თვლის ბევრი სხვა”, – ციტირებს პოგბას სიტყვებს L’ Equipe-ი.
შეგახსენებთ, რომ “ოქროს ბურთზე” წარდგენილ 23 ფეხბურთელს შორის პოლ პოგბაც მოხვდა.
“ოქროს ბურთის” დაჯილდოების საზეიმო ცერემონიალი 2015 წლის 12 იანვარს, შვეიცარიის ქალაქ ციურიხში ჩატარდება.
ტურინის “იუვენტუსის” ნახევარმცველმა პოლ პოგბამ განაცხადა, რომ ეცდება, კარიერის განმავლობაში მაქსიმალურად ბევრი ტიტული მოიგოს. ფრანგი ამბობს, რომ მსოფლოს საუკეთესო ფეხბურთელად გახდომის სურვილი აქვს.
“ვერ გეტყვით, რა მოხდება მომავალში, თუმცა ჩემზე რაც იქნება დამოკიდებული, ყველაფერს გავაკეთებ იმისთვის, რომ მაქსიმალურად ბევრი ტიტული მოვიგო. თავდაუზოგავად მუშაობას გავაგრძელებ. ჩემი მიზანია, რომ მსოფლოს საუკეთესო ფეხბურთელი გავხდე”, – ციტირებს პოგბას სიტყვებს Goal.com-ი.
შეგახსენებთ, რომ პოლ პოგბა ბრაზლიაში წელს გამართული მსოფლოს ჩემპიონატის საუკეთესო ახალგაზრდა მოთამაშედ დაასახელეს.
გამოცდილმა იტალიელმა სპეციალისტმა ფაბიო კაპელომ ჩემპიონთა ლიგის ფავორიტი გუნდები დაასახელა.
“ჩემპიონთა ლიგის ფავორიტებად მიუნხენის “ბაიერნსა” და ლონდონის “ჩელსის” ვთვლი. ეს გუნდები სხვებს აღემატებიან. გარდა ამისა, ესპანური კლუბებიც ძალზედ საშიშ კონკურენტებად რჩებიან.
იტალიული გუნდები ზემოთ დასახელებული ქვეყნის კლუბებს ჩამორჩებიან. თუმცა, “ატლეტიკოს” მაგალითზე შეგვიძლია ვთქვათ, თუ რა როლს თამაშობს მოტივაცია გამარჯვებისთვის ბრძოლაში”, – განუცხადა კაპელომ Sky Sport Italia-ს.
რუსეთის ნაკრების იტალიელმა თავკაცმა იქვე ისიც აღნიშნა, რომ “ბარსელონა” ამ ზაფხულს მნიშვნელოვნად გაძლიერდა.
“ამ სატრანსფერო პერიოდში “ბარსელონა” მართლაც გაძლიერდა. ლუის სუარესის დამატებით კატალონიური გუნდი მეტოქეებისთვის კიდევ უფრო სახიფათო გახდა. მესი-ნეიმარი-სუარესი ფანტასტიური ტრიო გამოვა.
მთლად სრულყოფილი იქნება გუნდი, თუ ეს ფეხბურთელები თავდაცვით სამუშაოსაც გასწევენ. სუარესი დაცვით ფუნქცებსაც ასრულებს, დანარჩენი შემტევები – ნაკლებად.
ესპანეთის პრიმერადივიზიონში ასეთივე საშიში იქნება მადრიდის “რეალი”. დანარჩენი გუნდები შედარებით დაბალ დონეზე არიან”, – აღნიშნა იტალიელმა სპეციალისტმა.
კაპელომ პოლ პოგბა ზლატან იბრაჰიმოვიჩს შეადარა:
“პოგბა დიდებული ფეხბურთელია, გარკვეულწილად უნიკალურიც კია. მე მას “იუვენტუსში” ახალმისულ იბრაჰიმოვიჩს შევადარებდი. ორივეს სრულყოფა სჭირდებოდა”.
ფაბიო კაპელომ “მილანზეც” ჩამოაგდო სიტყვა:
“იმედი მაქვს, “მილანი” ევროპაში დაბრუნდება. ფილიპო ინძაგი ყველაფერს კარგად ასრულებს, მან გუნდს სულისკევეთება დაუბრუნა, თუმცა მწვრთნელი მეტს ვერაფერს გააკეთებს დიდი ფეხბურთელების გარეშე”.
2014 წლის მსოფლიოს ჩემპიონატის საუკეთესო ფეხბურთელად არგენტინის ნაკრების კაპიტანი ლიონელ მესი დაასახელეს. ფინალური მატჩის შემდეგ არგენტინელ ფეხბურთელს საუკეთესო მოთამაშის ჯილდო გადაეცა — „ოქროს ბურთი“.
„ვერცხლის ბურთი“ წილად ხვდა გერმანიის ნაკრების თავდამსხმელ ტომას მიულერს, ხოლო „ბრინჯაოს ბურთი“ ბრაზილიელთა ლიდერ ნეიმარს გადაეცა.
ტურნირის საუკეთესო მეკარედ გერმანიის ნაკრების კარის დარაჯი მანუელ ნოიერი დაასახელეს, რომელსაც „ოქროს ხელთათმანი“ გადაეცა.
6 გატანილი გოლით ტურნირის საუკეთესო ბომბარდირად კოლუმბიის ნაკრების შემტევი ხამეს როდრიგესი დაასახელეს, რომელსაც „ოქროს ბუცს“ გადასცემენ.
მსოფლიოს ჩემპიონატის საუკეთესო ახალგაზრდა მოთამაშე საფრანგეთის ნაკრების 21 წლის ნახევარმცველი პოლ პოგბა გახდა.
2014 წლის მსოფლიოს ჩემპიონატის მერვედფინალურ ეტაპზე საფრანგეთისა და ნიგერიის ნაკრებებს შორის გამართული შეხვედრა „მამლების“ გამარჯვებით, ანგარიშით 2:0 დასრულდა.
მატჩის საუკეთესო ფეხბურთელად ფრანგთა ახალგაზრდა ნახევარმცველი პოლ პოგბა დაასახელეს, რომელმაც ანგარიში გახსნა.
„იუვენტუსში“ მოთამაშე ფეხბურთელმა მატჩი სრულად ჩაამთავრა, გააკეთა 60 გადაცემა და კარში დაარტყა 3-ჯერ.
ტურინის „იუვენტუსის“ ნახევარმცველმა პოლ პოგბამ განაცხადა, რომ „დეილი მეილისთვის“ ის ინტერვიუ არ მიუცია, რომელსაც დიდი რეზონანსი მოჰყვა. გამოცემის ვებ-გვერდზე დაიწერა, რომ პოგბამ „მანჩესტერ იუნაიტედში“ გატარებულ დროს კარიერის ყველაზე ცუდი მოგონება უწოდა, რადგან მას პატივს არ სცემდნენ არც როგორც ფეხბურთელს და არც როგორც პიროვნებას.
„დეილი მეილის“ ვებ-გვერდმა გამოაქვეყნა პოგბას ყალბი სიტყვები, რომელმაც მედიაში დიდი რეზონანსი გამოიწვია. პოლი ამბობს, რომ არც „დეილი მეილისთვის“, არც „სპორტსმეილისთვის“ და არც ბატონ დევიდ კენტისთვის ინტერვიუ არასდროს მიუცია. ამ ჟურნალისტს არც არასდროს შეხვედრია. პოლი უფლებას იტოვებს, საქმეს შესაბამისი იურიდიული მიმართულება მისცეს“, – ნათქვამია პოგბას ოჯახის მიერ გამოქვეყნებულ ოფიციალურ განცხადებაში.
ბექა დოგრაშვილი
ფრანგული პრესის ცნობით, მადრიდის „რეალის“ მწვრთნელ ზინედინ ზიდანსა და ტურინის „იუვენტუსის“ ნახევარმცველ პოლ პოგბას შორის სატელეფონო საუბარი შედგა. ზიდანმა ახალგაზრდა ფეხბურთელს „სამეფო კლუბში“ გადასვლა შესთავაზა.
„რეალი“ პოგბას მიმართ დაინტერესებას რომ იჩენს, ეს არაახალი ამბავია. გავრცელებული ინფორმაციის თანახმად, მადრიდელები მზად არიან, ფრანგი ფეხბურთელის სანაცვლოდ „ბებერ ქალბატონს“ 70 მილიონი ევრო შეაძლიონ.
შეგახსენებთ, რომ პოგბას მიმართ ინტერესს „მონაკოც“ იჩენს.
ცნობისთვის, ფრანგმა ნახევარმცველმა „იუვენტუსის“ ფორმით მიმდინარე სეზონში 45 მატჩი ჩაატარა, 8 გოლი გაიტანა და 7 საგოლე გადაცემა გააკეთა.
ბექა დოგრაშვილი
ტურინის „იუვენტუსის“ ნახევარმცველ პოლ პოგბას აგენტმა მინო რაიოლამ განაცხადა, რომ მსოფლიოს ჩემპიონატამდე გადაჭრით ვერავინ იტყვის, თუ როგორ წარიმართება ფრანგი ფეხბურთელის კარიერა.
„ჩემი პრიორიტეტი უცვლელია, ფეხბურთელების ინტერესებს ბოლომდე ვიცავ. მსოფლიოს ჩემპიონატამდე პოგბას შესახებ არანაირ სიახლეს არ ელოდოთ. ყველაფერს, რის შესახებაც თქვენ საუბრობთ – კონტრაქტის გაგრძელება ან შესაძლო ტრანსფერი – ყურადღებით განვიხილავთ, მაგრამ მუნდიალის დასრულების შემდეგ.
პოგბა „იუვენტუსში“ ყველაფრით კმაყოფილია, კლუბიც კმაყოფილი უნდა იყოს მისი თამაშით. კონტრაქტს ვადა 2016 წელს ეწურება, ასე რომ საჩქარო არაფერია. ჯერჯერობით ის არსად არ მიდის. ვიმეორებ „ჯერჯერობით“. თუ ერთ დღეს საოცარ შემოთავაზებას მივიღებთ, წინადადებას ერთად განვიხილავთ.
ახლა პოლი „იუვენტუსის“ რიგებში იტალიის ჩემპიონატსა და ევროპის ლიგაზე წარმატებით თამაშზე არის კონცენტრირებული, შემდეგ კი საფრანგეთის ნაკრებთან ერთად მუნდიალი ელის“, – მინო რაიოლას სიტყვებს Goal.com-ი ციტირებს.
გავრცელებული ინფორმაციის თანახმად, პოგბას მიმართ ინტერესს მადრიდის „რეალი“ და ფრანგული „პარი სენ-ჟერმენი“ იჩენენ.
ბექა დოგრაშვილი
მადრიდის „რეალის“ ხელმძღვაბელობამ ტურინის „იუვენტუსს“ შეხვედრის ჩატარების თხოვნით მიმართა, რომელზედაც „სამეფო კლუბი“ „ბიანკონერის“ ნახევარმცველ პოლ პოგბას შესაძლო ტრანსფერის ალბათობას განიხილავს. ინფორმაციას ამის შესახებ სპორტული სააგენტო Football Italia ავრცელებს. საფრანგეთის ნაკრების ახალგაზრდა ფეხბურთელის შეძენით „რეალის“ მთავარი მწვრთნელის თანაშემწე ზინედინ ზიდანი პირადად გახლავთ დაინტერესებული.
მანამდე გავრცელებული ინფორმაციის თანახმად, მადრიდელები მზად არიან, პოგბას სანაცვლოდ 60 მილიონი ევრო გაიღონ.
20 წლის ფრანგი ფეხბურთელის მიმართ ინტერესს „პარი სენ-ჟერმენიც“ იჩენს, თუმცა პარიზელთა მხრიდან რაიმე კონკრეტიკაზე საუბარი ნაადრევია.
ბექა დოგრაშვილი
ტურინის „იუვენტუსის“ ნახევარმცველ პოლ პოგბას შესაძლო ტრანსფერთან დაკავშირებით სპეკულაციები არ წყდება. „ელ მუნდო დეპორტივოს“ ცნობით, მადრიდის „რეალის“ პრეზიდენტი ფლორენტინო პერესი ახალგაზრდა ფრანგი ფეხბურთელის ტრანსფერის გასაჩარხად 60 მილიონ ევროს ამზადებს. გავრცელებული ინფორმაციის თანახმად, „სამეფო კლუბის“ ხელმძღვანელობა პოგბას შესაძლო ტრანსფერს პირად კონტროლზე აიყვანს. მანამდე ფრანგმა ნახევარმცველმა „იუვენტუსის“ ხელმძღვანელობას შეუთვალა, რომ მსოფლიოს ჩემპიონატის დასრულებამდე კლუბთან კონტრაქტს არ გაახანგრძლივებს.
20 წლის პოგბას მიმართ ინტერესს სხვა წამყვანი ევროპული კლუბებიც იჩენენ: „პარი სენ-ჟერმენი“, „ჩელსი“, „არსენალი“ და „მანჩესტერ იუნაიტედი“.
პოგბამ იტალიის ჩემპიონატის მიმდინარე გათამაშებაში 23 მატჩი ჩაატარა, ექვსი გოლი მიითვალა და შვიდი საგოლე გადაცემა გააკეთა.
ბექა დოგრაშვილი
