ჭდე: ფიფა

ფიფამ რიბერის ფოტოსესია გააუქმა ანუ „ოქროს ბურთს“ რონალდუ მოიგებს?

Posted on by ბექა დოგრაშვილი

ესპანურ პრესაში გავრცელებული ინფორმაციის თანახმად, ფიფამ ფრანკ რიბერისთან დაგეგმილი ფოტოსესია გააუქმა.

უცხოელი სპორტული ჟურნალისტები ამ ფაქტს იმით ხსნიან, რომ „ოქროს ბურთისთვის“ ბრძოლაში მადრიდის „რეალის“ თავდამსხმელი კრიშტიანო რონალდუ დაწინაურდა.

არც ის არის გამორიცხული, რომ რიბერის ფოტოსესიის გაუქმება გამოკითხვის ვადის გახანგრძლივებას გამოეწვია.

შეგახსენებთ, რომ ფიფამ „ოქროს ბურთის“ გამოკითხვა დაბალი აქტივობის გამო 29 ნოემბრამდე გაახანგრძლივა. წლის საუკეთესო ფეხბურთელს ეროვნული ნაკრებების თავკაცები, კაპიტნები და სპორტული ჟურნალისტები ირჩევენ.

9 დეკემბერს გახდება ცნობილი, თუ რომელი სამი ფეხბურთელი იბრძოლებს „ოქროს ბურთისთვის“. დაჯილდოების საზეიმო ცერემონიალი 2014 წლის 13 იანვარს, ციურიხში შედგება.

ბექა დოგრაშვილი

ვან დერ ვარტი: „რონალდუ „ოქროს ბურთს“ იმსახურებს“

Posted on by ბექა დოგრაშვილი

„ჰამბურგისა“ და ჰოლანდიის ნაკრების ნახევარმცველი რაფაელ ვან დერ ვარტი თვლის, რომ წელს „ოქროს ბურთს“ მადრიდის „რეალის“ თავდამსხმელი კრიშტიანო რონალდუ იმსახურებს. ჰოლანდიელმა ფეხბურთელმა აღნიშნა, რომ ბევრი ახალგაზრდა მოთამაშე ბაძავს რონალდუს.

„ალბათ, ყველა ახალგაზრდა ფეხბურთელს, მათ შორის „ჰამბურგის“ მოთამაშეებსაც, სურს, რომ რონალდუს მსგავსი იყოს. ზოგიერთები თვლიან, რომ ის მოედანზე ქედმაღლურად იქცევა, მაგრამ გასახდელში რონალდუ საკმაოდ მოკრძალებული და მშვიდი ადამიანია. ის გასაოცარი ფეხბურთელია და „ოქროს ბურთს“ იმსახურებს“, – ვან დერ ვარტის სიტყვებს Goal.com-ი ციტირებს.

30 წლის ჰოლანდიელმა ფეხბურთელმა კოლუმბიის ნაკრების წინააღმდეგ გამართულ ამხანაგურ მატჩში კოჭის მყესები გაიწყვიტა. ვან დერ ვარტი იმედოვნებს, რომ მოედანს მალე დაუბრუნდება.

„თავს გაცილებით უკეთ ვგრძნობ, ვიდრე რამდენიმე დღის წინ. დღეს ბევრად კარგად ვარ და ვიმედოვნებ, რომ მოედანს მალე დავუბრუნდები“, – აღნიშნა ვან დერ ვარტმა.

ბექა დოგრაშვილი

ბუფონმა თქვა, ვის მისცა ხმა „ოქროს ბურთის“ გამოკითხვაში

Posted on by ბექა დოგრაშვილი

ტურინის „იუვენტუსის“ მეკარე თვლის, რომ „ოქროს ბურთი“ მის თანაგუნდელ ანდრეა პირლოს უნდა გადაეცეს. იტალიელმა კიპერმა პირველი ადგილი სწორედ „ბებერი ქალბატონის“ ნახევარმცველს მიაკუთვნა, მეორე ადგილი – მადრიდის „რეალის“ თავდამსხმელ კრიშტიანო რონალდუს, მესამე კი – „ბარსელონას“ ფორვარ ლეო მესის.

„ხმა პირლოსს, რონალდუსა და მესის მივეცი, სწორედ ამ თანმიმდევრობით“, – ციტირებს ბუფონის სიტყვებს Football Italia.

შეგახსენებთ, რომ ფიფამ „ოქროს ბურთის“ გამოკითხვა დაბალი აქტივობის გამო 29 ნოემბრამდე გაახანგრძლივა. წლის საუკეთესო ფეხბურთელს ეროვნული ნაკრებების თავკაცები, კაპიტნები და სპორტული ჟურნალისტები ირჩევენ.

პრეტენდენტები არიან:

გარეტ ბეილი (უელსი), ედისონ კავანი (ურუგვაი), რადამელ ფალკა (კოლუმბია), ედენ აზარი (ბელგია), ზლატან იბრაჰიმოვიჩი (შვედეთი), ანდრეს ინიესტა (ესპანეთი), ფილიპ ლამი (გერმანია), რობერტ ლევანდოვსკი (პოლონეთი), ლიონელ მესი (არგენტინა), ტომას მიულერი (გერმანია), მანუელ ნოიერი (გერმანია), ანდრეა პირლო (იტალია), ნეიმარი (ბრაზილია), მესუთ იოზილი (გერმანია), ფრანკ რიბერი (საფრანგეთი), არიენ რობენი (ჰოლანდია), კრიშტიანო რონალდუ (პორტუგალია), ბასტიან შვაინშტაიგერი (გერმანია), ლუის სუარესი (ურუგვაი), ტიაგო სილვა (ბრაზილია), იაია ტურე (კოტ დივუარი), რობინ ვან პერსი (ჰოლანდია), ჩავი (ესპანეთი).

პრეტენდენტთა ეს გაფართოებული შემადგენლობა 9 დეკემბერს სამ ფეხბურთელამდე შემცირდება. დაჯილდოების საზეიმო ცერემონიალი 2014 წლის 13 იანვარს, ციურიხში შედგება.

ბექა დოგრაშვილი

ბლატერი: „მსოფლიოს ჩემპიონატის ყატარში ჩატარებას საფრანგეთი და გერმანია ლობირებდნენ“

Posted on by ბექა დოგრაშვილი

ფიფას პრეზიდენტმა იოზეფ ბლატერმა განაცხადა, რომ 2022 წლის მსოფლიოს ჩემპიონატის ყატარში ჩატარებას საფრანგეთი და გერმანია ლობირებდნენ.

რომში გამართულ პრესკონფერენციაზე მსოფლიო ფეხბურთის მმართველი ორგანოს ხელმძღვანელმა აღნიშნა, რომ მსოფლიო ჩემპიონატის ყატარში ჩატარება ზოგიერთი ევროპული ქვეყნის ეკონომიკურ ინტერესებში შედის.

„ფიფაზე ზეწოლას ორი ქვეყანა ახორციელებდა: საფრანგეთი და გერმანია. ჩემი აზრით, პირველ რიგში, ამ სახელმწიფოების მეთაურებმა უნდა ახსნან, რას ფიქრობენ ამ სიტუაციაზე. ფიფაზე ყველაფრის გადაბრალება ადვილია. ჩვენ ნაწილობრივ ვართ პასუხისმგებელნი ამ გადაწყვეტილებაზე“, – განაცხადა ზეპ ბლატერმა.

შეგახსენებთ, რომ რამდენიმე დღის წინათ, ევროპარლამენტის დეპუტატებმა მსოფლიოს ფეხბურთის მმართველი ორგანოს ხელმძღვანელებს თხოვნით მიმართეს, რათა ფიფამ მკაფიო და ძლიერი სიგნალი გაუგზავნოს ყატარის მთავრობას 2022 წლის მსოფლიოს ჩემპიონატის სტადიონების მშენებლობასთან დაკავშირებული დარღვევების გამო. ევროპარლამენტარების თქმით, ფიფას პასუხისმგებლობა მხოლოდ ტურნირის ჩატარებით არ შემოიფარგლება.

ბექა დოგრაშვილი

ბლატერი: „რონალდუს შესახებ აზრი არ შემიცვლია“

Posted on by ბექა დოგრაშვილი

ფიფას პრეზიდენტმა იოზეფ ბლატერმა კიდევ ერთხელ გამოხატა აღტაცება მადრიდის „რეალის“ ფორვარდ კრიშტიანო რონალდუს მიმართ და კიდევ ერთხელ სცადა დაძაბულობის განმუხტვას.

სამი კვირის წინ, ოქსფორდის უნივერსიტეტში გამოსვლისას, მსოფლიო ფეხბურთის მმართველი ორგანოს ხელმძღვანელმა განაცხადა, რომ მას რონალდუს ლეო მესი ურჩევნია.

ფიფას პრეზიდენტის ამ განცხადებას „რეალის“ მხრიდან ლოგიკური აღშფოთება მოჰყვა. მოგვიანებით ბლატერმა მოიბოდიშა და აღნიშნა, რომ პორტუგალიელის შეურაცხყოფაზე არც უფიქრია.

როგორც მოგეხსენებათ, რონალდუ „ოქროს ბურთის“ დაჯილდოების ცერემონიალზე დასწრებას არ აპირებს, ამის მიზეზი კი რა შეიძლება იყოს, თუ არა ოქსოფრდში ბლატერის მიერ გაკეთებული განცხადება. აშკარაა, რომ ფიფას პრეზიდენტი პორტუგალიელი ფეხბურთელის მოთაფვლას ცდილობს. შვედეთისა და პორტუგალიის ნაკრებთა შორის გამართული მატჩის შემდეგ, ბლატერმა სოციალური ქსელის მეშვეობით რონალდუ გატანილი ჰეთ-თრიკისთვის შეაქო, თუმცა „რეალის“ ფეხბურთელს „ოქროს ბურთის“ ცერემონიალის ბოიკოტირებასთან დაკავშირებით პოზიცია არ შეუცვლია.

ბლატერი კიდევ ერთხელ შეეცადა, როგორმე განემუხტა დაძაბული სიტუაცია და რონალდუს მიმართ ამჯერადაც აღმატებით ხარისხში ისაუბრა.

„არაფერს არ ვნანობ. ყოველთვის ვამბობდი, რომ კრიშტიანო რონალდუ გამორჩეული მოთამაშეა და ჩემი აზრი მის შესახებ არ შეცვლილა. მოედანზე ის მეთაურია. სამწუხაროა, რომ ჩემი სიტყვები სხვაგვარად გაიგეს. გულში ყველას თავისი ფავორიტი ჰყავს“, – განაცხადა ბლატერმა იტალიაში გამართულ პრესკონფერენციაზე.

ბექა დოგრაშვილი

ევროპარლამენტარები ფიფას: „თქვენი პასუხისმგებლობა მხოლოდ ტურნირის ჩატარება არ არის“

Posted on by ბექა დოგრაშვილი

ევროპარლამენტის დეპუტატებმა მსოფლიოს ფეხბურთის მმართველი ორგანოს ხელმძღვანელებს თხოვნით მიმართეს, რათა ფიფამ მკაფიო და ძლიერი სიგნალი გაუგზავნოს ყატარის მთავრობას 2022 წლის მსოფლიოს ჩემპიონატის სტადიონების მშენებლობასთან დაკავშირებული დარღვევების გამო. პარლამენტართა თქმით, მუშათა მაღალმა სიკვდილიანობამ შეიძლება ამ მნიშვნელოვანი სპორტული მოვლენის მოსამზადებელი პერიოდი მთლიანად ჩაშალოს.

დეპუტატებმა მიიღეს რეზოლუცია, რომელშიც შეშფოთებას გამოთქვამენ სამუშაო საათების ხანგრძლივობისა და მშენებლობაზე უსაფრთხოების წესების დარღვევის გამო. პარლამენტარები აცხადებენ, რომ ყატარელმა დამსაქმებლებმა მიგრანტ მუშებს პასპორტები ჩამოართვეს, დასაქმებულები რამდენიმე თვეა უხელფასოდ მუშაობენ და მათ გადავსებულ საერთო საცხოვრებელში ცხოვრებას აიძულებენ.

„აუცილებელია, ფიფას შევახსენოთ, რომ მსოფლიოს ფეხბურთის მმართველი ორგანოს პასუხისმგებლობა მხოლოდ ტურნირის ჩატარებით არ შემოიფარგლება. ფიფას მოვუწოდებთ, რომ ჩვენი მხარდაჭერით ყატარს მკაფიო და ძლიერი სიგნალი გაუგზავნოს, რათა 2022 წლის მსოფლიოს ჩემპიონატის მოსამზადებელ პერიოდში მონური შრომა არ დავუშვათ“, – აღნიშნულია დეპუტატთა განცხადებაში.

ევროპარლამენტარები ტენდერებში გამარჯვებულ ევროპულ კომპანიებსაც მოუწოდებენ, რომ ყატარში სპორტული ნაგებობების მშენებლობის პროცესი შრომითი სტანდარტების შესაბამისად მოხდეს.

ევროპარლამენტართა მიმართვას ფიფა უკვე გამოეხმაურა საგანგებო განცხადებით, რომელშიც ნათქვამია, რომ მსოფლიო ფეხბურთის მმართველი ორგანო მიესალმება რეზოლუციას და პოლიტიკური ლიდერებისგან ამ საკითხის გადასაჭრელად მხარდაჭერას ითხოვს.

ბექა დოგრაშვილი

დანი ალვეში: „რონალდუ სხვებზე ძლიერია, მაგრამ „ოქროს ბურთს“ არ იმსახურებს“

Posted on by ბექა დოგრაშვილი

„ბარსელონას“ მცველმა დანი ალვეშმა საკუთარი მოსაზრება გამოთქვა იმის შესახებ, თუ ვის უნდა გადაეცეს „ოქროს ბურთი“.

ბრაზილიელი ფეხბურთელის თქმით, კრიშტიანო რონალდუს სხვებთან შედარებით უპირატესობა აქვს, თუმცა არსებობს ერთი „მაგრამ“.

„კრიშტიანო რონალდუ, რა თქმა უნდა, ამ დროისთვის სხვებს აღემატება, თუმცა თუ მესის არ მისცემენ „ოქროს ბურთს“, ჯილდო ფრანკ რიბერის უნდა გადაეცეს. მე ასე მოვიქცეოდი, რადგან „ოქროს ბურთის“ მისაღებად გუნდთან ერთად რაიმე ტიტული უნდა გქონდეს მოგებული“, – ციტირებს დანიელ ალვეშის სიტყვებს Football Espana.

თავად რონალდუ ზეპ ბლატერთან მომხდარი ინციდენტის გამო დაჯილდოების ცერემონიალზე მისვლას არ აპირებს.

შეგახსენებთ იმასაც, რომ ფიფამ და ჟურნალმა „ფრანს ფუტბოლმა“ დაბალი აქტივობის გამო „ოქროს ბურთის“ გამოკითხვის პერიოდი გაახანგრძლივა.

კიდევ ერთხელ გეტყვით, რომ დაჯილდოების საზეიმო ცერემონიალი 2014 წლის 13 იანვარს, ციურიხში შედგება.

ბექა დოგრაშვილი

კასილასმა თქვა, ვის მისცა ხმა „ოქროს ბურთის“ გამოკითხვაში

Posted on by ბექა დოგრაშვილი

ესპანეთის ეროვნული ნაკრების კაპიტანმა იკერ კასილასმა განაცხადა, რომ „ოქროს ბურთის“ გამოკითხვაში ხმა თავის თანაკლუბელ კრიშტიანო რონალდუს მისცა.

„ხმა მანამდე მივეცი, სანამ გამოკითხვის პერიოდს გაახანგრძლივებდნენ. პირველი პოზიცია რონალდუს მივაკუთვნე. მან შესანიშნავი წელიწადი ჩაატარა და ჯილდო დაიმსახურა. გამიკვირდება, თუ მას „ოქროს ბურთს“ არ მისცემენ“, – განაცხადა კასილასმა.

ჯილდოს მოპოვების მთავარ კონკურენტებად რონალდუს გარდა ლიონელ მესი და ფრანკ რიბერი ითვლებიან. 9 დეკემბერს გახდება ცნობილი, თუ რომელი სამი ფეხბურთელი იბრძოლებს „ოქროს ბურთისთვის“. დაჯილდოების საზეიმო ცერემონიალი 2014 წლის 13 იანვარს, ციურიხში შედგება.

ბექა დოგრაშვილი

რონალდუ „ოქროს ბურთის“ დაჯილდოების ცერემონიალზე დასწრებას არ აპირებს

Posted on by ბექა დოგრაშვილი

მადრიდის „რეალისა“ და პორტუგალიის ნაკრების თავდამსხმელი კრიშტიანო რონალდუ „ოქროს ბურთის“ დაჯილდოების ცერემონიალზე დასწრებას არ აპირებს.

პორტუგალიელი ფეხბურთელის ამ გადაწყვეტილების მიზეზი ფიფას პრეზიდენტის, ზეპ ბლატერის განცხადება გახდა. შეგახსენებთ, ცოტა ხნის წინათ მსოფლიო ფეხბურთის მმართველი ორგანოს ხელმძღვანელმა რონალდუს მისამართით არცთუ სასიამოვნო სიტყვები თქვა. შვეიცარიელმა ამის გამო სოციალური ქსელის მეშვეობით კი მოიბოდიშა, თუმცა პორტუგალიელმა თავდამსხმელმა ფიფას პრეზიდენტის ბოდიში არ მიიღო.

რონალდუს ბლატერთან შეხვედრა არ სურს, ამიტომაც არ აპირებს „ოქროს ბურთის“ დაჯილდოების ცერემონიალზე დასწრებას. თუმცა, პორტუგალიელმა ისიც თქვა, რომ ფიფას პრეზიდენტთან დაკავშირებულ ამ უსიამოვნო ისტორიას წერტილი დაესვა.

გარდა ამისა, „რეალის“ მთავარმა მწვრთნელმა კარლო ანჩელოტიმ ხუმრობით ან სერიოზულად განაცხადა, თუ „ოქროს ბურთს“ რონალდუს არ გადასცემენ, საპროტესტო მუხტს ავაგორებო.

კიდევ ერთხელ შეგახსენებთ, რომ „ოქროს ბურთის“ დაჯილდოების ცერემონიალი 2014 წლის 13 იანვარს შედგება.

ბექა დოგრაშვილი

2014 წლის მუნდიალი – კალათების სავარაუდო შემადგენლობა

Posted on by ბექა დოგრაშვილი

2014 წლის მსოფლიოს ჩემპიონატზე მონაწილე 32 ნაკრებიდან 31-ის ვინაობა ცნობილია. Fanebi.Com-ი წარმოგიდგენთ კალათების შემადგენლობას, რითაც მოხდება წილისყრის განსაზღვრა. მართალია, ეს ჯერ არაოფიციალურია, თუმცა დიდი ალბათობით სწორედ ასე გადანაწილდებიან გუნდები კალათებში.

ბრაზილიის მუნდიალის მონაწილე ნაკრებთა ვინაობა სრულად თბილისის დროით ხვალინდელი დღის დილის 05:00 საათზე გახდება ცნობილი, როდესაც ურუგვაისა და იორდანიის ნაკრებთა შორის მატჩი დასრულდება. პირველი შეხვედრა სამხრეთ ამერიკელებმა დიდი უპირატესობით, ანგარიშით 5:0 მოიგეს და მსოფლიოს ჩემპიონატის საგზური ფაქტობრივად გაინაღდეს.

ტრადიციულად, 32 გუნდი ოთხ კალათაში გადანაწილდება. პირველ კალათაში მოხვდება ტურნირის მასპინძელი ბრაზილიის ნაკრები და ფიფას ოქტომბრის თვის რეიტინგით 7 საუკეთესო გუნდი. ესენია: 1) ესპანეთი, 2) გერმანია, 3) არგენტინა, 4) კოლუმბია, 5) ბელგია, 6) ურუგვაი*, 7) შვეიცარია.

რა პრინციპით შეივსება მეორე კალათა, ეს ფიფას ჯერჯერობით არ განუცხადებია, თუმცა შეგვიძლია ვივარაუდოთ, რომ გუნდები როგორც წინა მსოფლიოს ჩემპიონატებზე, ახლაც გეოგრაფიული პრინციპით დალაგდებიან.

მე-2 კალათაში უნდა მოხვდნენ აზიისა და ჩრდილოეთ ამერიკის ნაკრებები, მე-3 კალათაში – აფრიკისა და სამხრეთ ამერიკის ნაკრებები, მე-4 კალათაში კი – ევროპის ნაკრები გუნდები.

თუმცა, მსოფლიოს ჩემპიონატზე მონაწილე იმ ევროპულ ნაკრებთა რაოდენობა, რომლებიც ფიფას რეიტინგის ტოპ-შვიდეულში არ შედიან, 9 არის და არა – 8. ამიტომ, ყველაზე ცუდი რეიტინგის მქონე ევროპული ნაკრები მე-3 კალათაში გადაინაცვლებს, ასეთი გუნდი კი საფრანგეთი გახლავთ. „მამლები“ ვერ მოხვდებიან ჯგუფში სხვა ევროპულ ნაკრებთან ერთად. აქედან გამომდინარე, პირველი კალათიდან შესაძლებელია საფრანგეთის მეტოქედ მოგვევლინოს არგენტინის, კოლუმბიის, ურუგვაის ან ბრაზილიის ნაკრებებიდან ერთ-ერთი.

გთავაზობთ კალათების არაოფიციალურ შემადგენლობას:

 კალათა I (ფიფას რეიტინგის ტოპ-შვიდეული)
 ნაკრები  ადგილი ფიფას რეიტინგში
 ბრაზილია (მასპინძელი) 11
 ესპანეთი 1
 გერმანია 2
 არგენტინა 3
 კოლუმბია 4
 ბელგია 5
 ურუგვაი* 6
 შვეიცარია 7
 კალათა II (აზია+ჩრდ. ამერიკა)
 ნაკრები  ადგილი ფიფას რეიტინგში
 აშშ 13
 მექსიკა 24
 კოსტა-რიკა 31
 ჰონდურასი 34
 იაპონია 44
 ირანი 49
 სამხრეთ კორეა 56
 ავსტრალია 57
 კალათა III (სამხ. ამერიკა+1 ევროპული ნაკრები)
 ნაკრები  ადგილი ფიფას რეიტინგში
 ჩილე 12
 კოტ-დივუარი 17
 ეკვადორი 22
 განა 23
 ალჟირი 32
 ნიგერია 33
 კამერუნი 59
 საფრანგეთი 21
 კალათა IV (ევროპა)
 ნაკრები  ადგილი ფიფას რეიტინგში
 ჰოლანდია 8
 იტალია 9
 ინგლისი 10
 პორტუგალია 14
 საბერძნეთი 15
 ბოსნია/ჰერცეგოვინა 16
 ხორვატია 18
 რუსეთი 19

* ურუგვაის ნაკრებს ჯერ არ გაუნაღდებია მსოფლიოს ჩემპიონატზე თამაშის უფლება.

2014 წლის მსოფლიოს ჩემპიონატის წილისყრა 6 დეკემბერს შედგება.

ბექა  დოგრაშვილი

სტადიონი, ნავი თუ ქალის სასქესო ორგანო? (ვიდეო)

Posted on by ბექა დოგრაშვილი

ყატარის მსოფლიოს ჩემპიონატამდე ჯერ კიდევ ადრეა, თუმცა სტადიონ „ალ ვაკრას“ პროექტი უკვე მზად არის.

სტადიონის პროექტის ავტორების ჩანაფიქრით, არენას ძველი ნავის ფორმა ექნება, რომელზეც მყვინთავებმა მარგალიტი აღმოაჩინეს. აღნიშნულ პროექტს კრიტიკოსები უკვე გამოუჩნდნენ, რომლებიც ამბობენ, რომ სტადიონს არა ნავის, არამედ ქალის სხეულის ნაწილის ფორმა აქვს.

გთავაზობთ არენის პროექტის ვიდეოგამოსახულებას.

 

 

ფიფა „რეალს“ ორ მილიონ ევროს გადაუხდის?

Posted on by ბექა დოგრაშვილი

სამი ხედირას ტრავმით გამოწვეულ ზიანს მადრიდის „რეალი“, სავარუდოდ, დაახლოებით ორი მილიონი ევროთი შეაფასებს. მოგეხსენებათ, წესების მიხედვით, საერთაშორისო მატჩში მიღებული დაზიანების გამო, მსოფლიო ფეხბურთის მმართველ ორგანოს კლუბებისთვის ფულადი კომპენსაციის გადახდა უწევს. ხედირამ იტალიისა და გერმანიის ეროვნულ ნაკრებთა შორის გამართულ ამხანაგურ შეხვედრაში (1:1) მუხლის ჯვარედინი მყესები გაიწყვიტა. ფეხბურთელის გამოჯანმრთელებას მინიმუმ ნახევარი წელიწადი დასჭირდება.

სადაზღვევო წესების თანახმად, ტრავმის მიღებიდან 28 დღის შემდეგ, ფიფამ მადრიდულ კლუბს ფეხბურთელის უქმობის ყოველ დღეს 20 548 ევრო უნდა გადაუხადოს. გასულ სეზონში, მას შემდეგ, რაც „რეალის“ ყოფილმა ნახევარმცველმა მესუთ იოზილმა სანაკრებო მატჩში ტრავმა მიიღო და სამი თვით იუქმა, ფიფამ „სამეფო კლუბს“ ერთ მილიონ ევროზე მეტი გადაუხადა.