Football Italia-ს ცნობით, “პარი სენ-ჟერმენის” ნახევარმცველი ტიაგო მოტა კარიერის გაგრძელების ალტერნატიულ ვარიანტებს განიხილავს.
წყაროს თანახმად, იტალიელი ფეხბურთელით მილანის “ინტერია” დაინტერესებული. შეგახსენებთ, რომ 2009-დან 2012 წლამდე მოტა სწორედ “ნერიაძურის” ღირსებას იცავდა.
მიუხედავად ამისა, ფეხბურთელის აგენტმა ალესანდრო კანოვიმ განაცხადა, რომ ტიაგო მოტა “პარი სენ-ჟერმენში” მინიმუმ მანამ ითამაშებს, სანამ მოქმედ შრომით ხელშეკრულებას ვადა არ გაუვა, ეს კი 2016 წლის ივნისში მოხდება.
“პარი სენ-ჟერმენის” თავდამსხმელმა ზლატან იბრაჰიმოვიჩმა ჩემპიონთა ლიგის მერვედფინალურ ეტაპზე ლონდონის “ჩელსის” წინააღმდეგ გამართულ საპასუხო მატჩში (2:2) გაძევების გამო უეფასგან ერთმატჩიანი დისკვალიფიკაცია მიიღო.
ამრიგად, შვედი ფეხბურთელი მეოთხედფინალურ ეტაპზე გასამართ პირველ შეხვედრას გამოტოვებს.
იბრაჰიმოვიჩის თანაკლუბელმა სერჟ ორიემ მთავარ არბიტრ ბიორნ კეიპერსის მიმართ გაკეთებული განცხადების გამო სამმატჩიანი დისკვალიფიკაცია მიიღო.
ლონდონის “ჩელსის” “ინსტაგრამის” ოფიციალურ გვერდზე გამოქვეყნდა ფოტო, რომელზეც მსაჯებთან მოკამათე ჯეიმი კარაგერი და გრემ სუნესი არიან გამოსახულნი.
“ეს მათ, ვისაც მოკლე მეხსიერება აქვთ…”, – ასეთი წარწერა აქვს გაკეთებული ფოტოს.
შეგახსენებთ, რომ კარაგერმა და სუნესმა, რომელიც “სქაი სპორტსში” ექსპერტებად მუშაობენ, უეფას ჩემპიონთა ლიგის მერვედფინალურ ეტაპზე “ჩელსისა” და “პარი სენ-ჟერმენს” შორის გამართულ მატჩში (2:2) ზლატან იბრაჰიმოვიჩის გაძევებისას ინგლისური გუნდის ფეხბურთელთა ქმედება გააკრიტიკეს. სწორედ ამ კრიტიკის პასუხია აღნიშნული ფოტოც.
ავტორიტეტული იტალიური გამოცემა “ლა გაძეტა დელო სპორტი” იუწყება, რომ “პარი სენ-ჟერმენის” ნახევარმცველ მარკო ვერატით “მანჩესტერ სიტი” დაინტერესდა. წყაროს თანახმად, ინგლისური კლუბის სკაუტები უეფას ჩემპიონთა ლიგის მერვედფინალურ ეტაპზე ლონდონის “ჩელსის” წინააღმდეგ გამართულ მატჩში (2:2) იტალიელი ფეხბურთელის თამაშით მოიხიბლნენ და მის მოწვევაზეც დაფიქრდნენ.
მარკო ვერატის სატრანსფერო ღირებულება 35 მილიონ ევროდ ფასდება.
თავად “პარი სენ-ჟერმენმა” ვერატი 20 წლის ასაკში 11 მილიონ ევროდ შეიძინა. მაშინ ფეხბურთელს იტალიის სერია A-ში ერთი მატჩიც კი არ ჰქონდა ჩატარებული.
შეგახსენებთ, რომ 22 წლის იტალიელ ნახევარმცველს პარიზულ კლუბთან მოქმედი შრომითი ხელშეკრულება 2019 წლის 30 ივნისს ეწურება.
საფრანგეთის ჩემპიონატის 27-ე ტურის დასკვნითი და ცენტრალური მატჩი დღეს შედგება: “მონაკო” “პარი სენ-ჟერმენს” მიიღებს. პარიზელთა მთავარმა მწვრთნელმა ლორან ბლანმა “მონაკოს” თავდამსხმელის, დიმიტარ ბერბატოვის შესახებ ისაუბრა და ბულგარელი ფეხბურთელი ზლატან იბრაჰიმოვიჩს შეადარა.
“ბერბატოვი “მონაკოსთვის” ძალზედ მნიშვნელოვანი ფეხბურთელია. ის მეტად ტექნიკურია, შეუძლია პოზიციის შერჩევა და გუნდის შემოქმედებით თამაშში ჩართულია. ის შესანიშნავი ფეხბურთელია, რომელიც თავისი მოქმედებებით თანაგუნდელებს ამშვიდებს. ბერბატოვი ბურთით გონივრულად თამაშობს და ძალზედ იშვიათად კარგავს მას. ის ისეთივე მნიშვნელოვანია “მონაკოსთვის”, როგორც იბრაჰიმოვიჩი ჩვენთვის”, – ბლანის სიტყვები Goal.com-მა გამოაქვეყნა.
მატჩი “მონაკოსა” და “პარი სენ-ჟერმენს” შორის თბილისის დროით 00:00 საათზე დაიწყება.
“პარი სენ-ჟერმენის” თავდამსხმელმა ესეკიელ ლავესიმ მიანიშნა, რომ მიმდინარე სეზონის ბოლოს “ნაპოლიში” დაბრუნების წინააღმდეგი არ არის.
“გონსალო იგუაინთან ერთად თამაშის წინააღმდეგი ნამდვილად არ ვიქნებოდი. იტალია მენატრება. თუ სერია A-ში დაბრუნებას გადავწყვეტ, “ნაპოლი” ჩემთვის პრიორიტეტი იქნება. “პარი სენ-ჟერმენთან” მოქმედი კონტრაქტი მაქვს, თუმცა სეზონის ბოლოს ყველაფერი შეიძლება შეიცვალოს”, – ციტირებს ლავესის სიტყვებს “სქაი იტალია”.
შეგახსენებთ, რომ ესეკიელ ლავესი “ნაპოლის” ღირსებას 2007-დან 2012 წლამდე იცავდა. ამ პერიოდის განმავლობაში მან 173 მატჩი ჩაატარა.
უეფას ჩემპიონთა ლიგის მერვედფინალურ ეტაპზე “პარი სენ-ჟერმენსა” და ლონდონის “ჩელსის” შორის პირველი მატჩი ფრედ, ანგარიშით 1:1 დასრულდა. შეხვედრის შემდეგ პარიზელთა მცველმა დავიდ ლუისმა “პენსიონერთა” მეკარე ტიბო კურტუა შეაქო.
“რომ არა კურტუა, “პარი სენ-ჟერმენი” გაიმარჯვებდა. ბელგიელმა კიპერმა დიდებულად ითამაშა. “ჩელსიმ” ერთადერთი შანსი გამოიყენა. ვფიქრობ, ჩვენ მეოთხედფინალში გასვლა შეგვიძლია”, – დავიდ ლუისის კომენტარი უეფას ოფიციალურ ვებგვერდზე გამოქვეყნდა.
შეგახსენებთ, რომ წყვილის განმეორებით მატჩს “სტემფორდ ბრიჯი” 11 მარტს უპასუხებს.
უეფას ჩემპიონთა ლიგის მერვედფინალურ ეტაპზე “პარი სენ-ჟერმენსა” და ლონდონის “ჩელსის” შორის პირველი მატჩი ფრედ, ანგარიშით 1:1 დასრულდა. “პენსიონერთა” მთავარმა მწვრთნელმა ჟოზე მოურინიომ განაცხადა, რომ ძლიერ მეტოქესთან ფრე კარგი შედეგია.
“ჩელსის” შესაძლოა წაეგო კიდეც. ამიტომ, ფრე კარგი შედეგია. ძალიან რთული მატჩი გამოვიდა. ვერ ვიტყვი, რომ ძალიან კმაყოფილი ვარ. ყველაფერს საპასუხო შეხვედრა გადაწყვეტს. ფრედ ვითამაშეთ ძალიან კარგ გუნდთან, რომელიც მეტად ტექნიკური ფეხბურთელებით არის დაკომპლექტებული”, – მოურინიოს სიტყვები უეფას ოფიციალურ ვებგვერდზე გამოქვეყნდა.
წყვილის განმეორებით მატჩს “სტემფორდ ბრიჯი” 11 მარტს უპასუხებს.
ჩემპიონთა ლიგის მერვედფინალურ ეტაპზე “პარი სენ-ჟერმენსა” და ლონდონის “ჩელსის” შორის გამართული მატჩის (1:1) დაწყებამდე ინგლისელთა ავტობუსს სტადიონზე ავარია მოუვიდა.
მძღოლი სტადიონის ავტოსადგომზე ავტობუსის დაყენებას ცდილობდა, თუმცა ვიწრო მოსახვევში ხეირიანად ვერ მოუხვია და კედელს შეეჯახა.
ავტობუსს ძირითადად ფანჯრის მინა დაუზიანდა.
დღეს სტარტს იღებს უეფას ჩემპიონთა ლიგის 2014/15 წლების გათამაშების მერვედფინალური ეტაპი. Fanebi.com-ის მომხმარებლებმა თავიანთი ვარაუდი გამოთქვეს, თუ რა შედეგით დასრულდება დღევანდელი დღის ორი მატჩი. პროცენტულად გთავაზობთ, თუ როგორ გადანაწილდა ხმები.
| “პარი სენ-ჟერმენი” (39 %) | ფრე (32 %) | “ჩელსი” (29 %) |
| “შახტარი” (1 %) | ფრე (3 %) | “ბაიერნი” (96 %) |
“პარი სენ-ჟერმენის” ახალგაზრდა ნახევარმცველმა მარკო ვერატიმ ჩემპიონთა ლიგის მერვედფინალურ ეტაპზე ლონდონის “ჩელსის” წინააღმდეგ დღეს გასამართ მატჩზე ერთი შეხედვით მოულოდნელი პროგნოზი გააკეთა.
“ჩვენ, იტალიელები ძალიან ცრუმორწმუნე ხალხი ვართ. ამიტომ, უმჯობესი იქნება, რომ მატჩამდე მეტოქის გამარჯვებაზე ვისაუბროთ. “ჩელსი” ანგარიშით 4:0 გაიმარჯვებს”, – ღიმილით განუცხადა ვერატიმ ჟურნალისტებს.
“პარი სენ-ჟერმენსა” და “ჩელსის” შორის მატჩი დღეს, თბილისის დროით 23:45 საათზე დაიწყება. შეხვედრას თურქი არბიტრი ჯიუნეთ ჩაქირი მოემსახურება. წყვილის განმეორებით მატჩს “სტემფორდ ბრიჯი” 11 მარტს უმასპინძლებს.
ლონდონის “ჩელსის” თავდამსხმელმა დიდიე დროგბამ ჩემპიონთა ლიგის მერვედფინალურ ეტაპზე “პარი სენ-ჟერმენის” წინააღმდეგ გასამართ მატჩამდე პარიზელთა ფორვარდის, ზლატან იბრაჰიმოვიჩის შესახებ ისაუბრა.
“იბრაჰიმოვიჩი ძალიან შეიცვალა. მან გააცნობიერა, რომ გუნდისთვის უნდა ითამაშოს. მე მომწონს მისი სათამაშო სტილი, მომწონს მისი აგრესიულობაც. ბევრ რამეში ერთმანეთს ვგავართ კიდეც.
არ ვეთანხმები მოსაზრებას, რომ “პარი სენ-ჟერმენი” შესუსტებულია. სულაც არა. ისინი დამდეგი მატჩისთვის ემზადებიან და ჩვენთან საბრძოლველად მზად იქნებიან”, – ციტირებს დროგბას სიტყვებს ინტერნეტგამოცემა Goal.com-ი.
შეგახსენებთ, რომ “პარი სენ-ჟერმენსა” და “ჩელსის” შორის პირველი მატჩი დღეს, პარიზში გაიმართება და თბილისის დროით 23:45 საათზე აიღებს სტარტს. წყვილის განმეორებით შეხვედრას “სტემფორდ ბრიჯი” 11 მარტს უმასპინძლებს.
