არსენ ვენგერისთვის ლონდონის „ჩელსის“ ახლანდელი მთავარი მწვრთვნელი ჟოზე მოურინიო – ყველაზე უხერხული მეტოქეა. ფეხბურთის პორტუგალიელი სპეციალისტის მიერ მომზადებული „არისტოკრატები“ „მეთოფეებს“ არასდროს დაუმარცხებიათ, რისი გამოსწორების შანსიც მათ ინგლისის ლიგის თასის მატჩში მიეცათ. ეს ძალიან კარგად არსენ ვენგერსაც ესმოდა, რომელმაც აღნიშნული ტურნირისათვის საკმაოდ საბრძოლო შემადგენლობა გაიყვანა – ძირითადი შემადგენლობის ფეხბურთელთა შორის მხოლოდ მესუთ იოზილს და ოლივიე ჟირუს არ უთამაშიათ.
მოურინიო, რომელიც თავისი გუნდის რთული კალენდრით უკმაყოფილო იყო, თავიდან ახალგაზრდა მოთამაშეების დაყენებასაც კი აპირებდა, თუმცა, საბოლოო ჯამში, თავის ოპონენტს ასეთი საჩქარი არ გაუკეთა. ჟოზემ ათი ცვლილება გააკეთა, რის მიუხედავად, მისი გუნდი მაინც შესანიშნავად თამაშობდა.
სათქმელია, რომ განსაკუთრებული მომენტებით ვერც ერთი და ვერც მეორე გუნდი გამოირჩეოდა, თუმცა აღსანიშნავია ისიც, რომ ბურთის უკეთესი ფლობა „ლურჯთა“ სასარგებლოდ დაფიქსირდა. თავიდან კასორლამ კუთხურის კარგად შესრულება ვერ შეძლო, რის შემდეგაც „არსენალს“ ტრადიციული პრობლემები შექმნა. პირველი გოლი კარლ ჯენკინსონის შეცდომას მოჰყვა, რომელმაც მეკარე ფაბიანსკის არც თუ ისე კარგი გადაცემა გაუკეთა, რითაც ასპილიკუეტამ ისარგებლა, რომელიც მეტოქის საჯარიმოში შეიჭრა და პოლონელი გოლკიპერის მოტყუება არ გაუჭირდა.
მეორე ტაიმში „არსენალი“ ანგარიშის გათანაბრებას ცდილობდა, მაგრამ „ჩელსი“ მეტოქეს ბევრი რამის გაკეთების საშუალებას უბრალოდ არ აძლევდა. სიტუაცია არც ჟირუსა და იოზილის გამოჩენით შეცვლილა. მეტიც, ამ ორი ფეხბურთელის მოედანზე შესვლის შემდეგ რამდენიმე წუთში მოურინიოს შეგირდებმა მეორე გოლიც აღნიშნეს, რომელიც ხუან მატამ გაიტანა.
საბოლოოდ, 0:2 და ვენგერი მოურინიოს დამარცხებას კვლავ ვერ ახერხებს.
„არსენალი“ – „ჩელსი“ 0:2
გოლები: ასპილიკუეტა 25′, მატა 66′„არსენალი“: ფაბიანსკი, ჯენკინსონი, ვერმალენი, კოშელნი, მონრეალი, უილშირი, რემსი (პარკი 80′), კასორლა, როსიცკი, მიაჩი (იოზილი 62′), ბენდტნერი (ჟირუ 66′)
„ჩელსი“: შვარცერი, ასპილიკუეტა, კეიჰილი, ლუისი, ბერტრანდი, ესიენი, მიკელი, დე ბრიუინე (რამირესი 68′), მატა (კალასი 90+3′), ვილიანი, ეტოო (ბა 80′)
ალექსანდრე მატევოსოვი
