ინგლისის პრემიერლიგის XII ტური მერსისაიდული დერბით გაიხსნა – „ევერტონმა“ „გუდისონ პარკზე“ თანაქალაქელი „ლივერპული“ მიიღო. მატჩი საკმაოდ მაღალ ტემპში, დრამატულად წარიმართა. დაძაბულ თამაშს სტადიონის ატმოსფერო კიდევ უფრო ალამაზებდა.
მაყურებელმა სწრაფი გოლი იხილა: შეხვედრის მეხუთე წუთზე სტუმრები დაწინაურდნენ. „ლივერპულის“ შეტევის მარცხენა ფლანგიდან ჩამოწოდებული კუთხურის შემდეგ „ლურჯებმა“ საკუთარი საჯარიმოდან ბურთის გამოტანა ვერ შეძლეს, რითაც ისარგებლა ფილიპე კოუტინიომ და „წითლები“ დააწინაურა, თუმცა ბრენდან როჯერსის გუნდის ქომაგებს სიხარული არ დასცალდათ. ზუსტად სამ წუთში „ევერტონმა“ ანგარიში გაათანაბრა: გოლი ამჯერადაც სტანდარტულ მდგომარეობას მოჰყვა – მოედნის ცენტრალური ზონიდან ლეიტონ ბეინსის ჩაწოდების შემდეგ ბრძოლა როს ბარკლიმ მოიგო, ბურთი კართან კიდევ უფრო ახლოს მყოფ კევინ მირალასს მიუვიდა, რომელსაც ანგარიშის გათანაბრება არ გასჭირვებია. მე-19 წუთზე „ლივერპული“ ისევ დაწინაურდა. საჯარიმო დარტყმა უნაკლოდ შეასრულა ლუის სუარესმა, რომელმაც ბურთი ცოცხალ კედელს შორის გაატარა და მოჭრილი დარტყმით „წითლები“ წინ გაიყვანა. პირველი ტაიმიდან გამოსარჩევი კიდევ ის გახლავთ, რომ მირალასი მოედნიდან გაძევებას გადაურჩა. ბელგიელმა თავდამსხმელმა გაშლილი ფეხით მძიმე დარტყმა მიაყენა სუარესს, ურუგვაელ ფეხბურთელს სისხლიც წამოუვიდა. „ლივერპულის“ ფორვარდი, საბედნიეროდ, ტრავმას გადაურჩა. ორწუთიანი ფიქრის შემდეგ მთავარმა არბიტრმა ფილ დაუდმა მირალასს მხოლოდ ყვითელი ბარათი უჩვენა.
პირველი ტაიმი „ლივერპულმა“ ანგარიშით 2:1 მოიგო.
შეხვედრის მეორე ნახევარიც ანალოგიურ ტემპში წარიმართა. „ევერტონი“ ანგარიშის გათანაბრებას ცდილობდა, „ლივერპული“ თავის შანსს კონტრშეტევებზე ელოდა და სტუმრებს მე-60 წუთზე გოლის გატანის შესანიშნავი შესაძლებლობა მიეცათ, თუმცა მეტოქის კარის წინ რამდენიმე მეტრში მდგარმა ჯო ალენმა ბურთი ააცილა, თანაც უელსელ ნახევარმცველს ხელს არავინ უშლიდა. ეს ეპიზოდი ნამდვილად შევა კურიოზულ აცილებათა ვიდეოში. რამდენიმე წუთში კარგი შანსი ჰქონდა რომელუ ლუკაკუსაც, თუმცა ახალგაზრდა ბელგიელს მეკარემ აჯობა და ბურთი ჰაერიდან ცალი ხელით მოუხსნა.
72-ე წუთზე ლუკაკუმ მაინც გაიტანა. მის მიერ შესრულებული საჯარიმო დარტყმა მინიოლემ უხეიროდ მოიგერია, ბურთს „ლივერპულის“ საჯარიმო მოედანზე „ევერტონის“ ფეხბურთელები დაეუფლნენ, შეტევა გაგრძელდა, მაკკარტიმ კარის წინ მყოფი ლუკაკუ მოძებნდა, ბელგიელმა ფორვარდმა ისარგებლა არეულობით და ანგარიში გაათანაბრა – 2:2.
82-ე წუთზე „ევერტონი“ სულაც წინ გაიჭრა. გოლი ამჯერადაც სტანდარტულ მდგომარეობას მოჰყვა – მათი შეტევის მარცხენა ფლანგიდან ჩამოწოდებული კუთხურის შემდეგ მეორე სართულზე ყველას ლუკაკუმ აჯობა და მინიოლეს კარის ბადე მეორედ შეარხია.
ამით ყველაფერი არ დასრულებულა. 89-ე წუთზე ანგარიში კვლავ გათანაბრდა – ჯარიმიდან სტივ ჯერარდის ჩაწოდების შემდეგ თავით შეცვლაზე შემოსულმა დანიელ სტარიჯმა დაარტყა და გაიტანა – 3:3.
საბოლოო ჯამში, მატჩი ანგარიშით 3:3 დასრულდა. მაყურებელმა დაძაბული, დრამატული მატჩი იხილა, რომელსაც არც გოლები აკლდა, არც ვნებათაღელვა და არც აღმაფრენა.
მეორეადგილოსანმა „ლივერპულმა“ 12 ტურის შემდეგ აქტივში 24 ქულა მოაგროვა. რაც შეეხება „ევერტონს“, „კანფეტებმა“ 21 ქულას მოუყარეს თავი და მეხუთე პოზიციაზე გადაინაცვლეს.
ინგლისის პრემიერლიგა
XII ტური
„ევერტონი“-„ლივერპული“ 3:3 (1:2)
„ევერტონი“: ჰოვარდი, ჯაგელკა, ბეინსი (დეულოფე 50′), დისტინი, პიენაარი (სტოუნსი 84′), ბერი, კოულმენი, მაკკარტი, ბარკლი, მირალასი (ოსმანი 88′), ლუკაკუ.
მთავარი მწვრთნელი: რობერტო მარტინესი.
„ლივერპული“: მინიოლე, ჯონსონი, შკრტელი, აგერი, ფლანაგანი, ლუკასი (სტარიჯი 79′), ალენი (მოზესი 68′), ჰენდერსონი, ჯერარდი, კოუტინიო, სუარესი.
მთავარი მწვრთნელი: ბრენდან როჯერსი.
გოლები: მირალასი 8′, ლუკაკუ 72′, 82′ – კოუტინიო 5′, სუარესი 19′, სტარიჯი 89′.
გაფრთხილებები: ბრაკლი 31′, მირალასი 36′, დისტინი 89′ – ალენი 62′, ლუკასი 67′, სუარესი 79′.
მთავარი მსაჯი: ფილ დაუდი.
ბექა დოგრაშვილი
