ჭდე: ლუის სუარესი

სუარესი: „უოლკოტისა და ფალკაოს შემთხვევებმა შემაშფოთა“

Posted on by ბექა დოგრაშვილი

„ლივერპულის“ თავდამსხმელი ლუის სუარესი გამოტყდა, რომ თეო უოლკოტისა და რადამელ ფალკაოს მძიმე ტრავმებმა შეაშფოთა. სავარაუდოდ, უოლკოტსა და ფალკაოს 2014 წლის მსოფლიოს ჩემპიონატის გამოტოვება მოუწევთ. აღნიშნულის მიუხედავად, მერსიაიდული გუნდის ურუგვაელი ფეხბურთელი ამბობს, რომ მუნდიალის გამო ენერგიის დაზოგვასა და ფრთხილად თამაშს არ აპირებს.

„უოლკოტისა და ფალკაოს ტრავმებმა შემაშფოთა. ამ ფაქტებმა დიდი რეზონანსი გამოიწვია, ბევრი დაფრთხა კიდეც, თუმცა მე კლუბისთვის ძალებს არ დავზოგავ. ცუდზე ფიქრი არ შეიძლება. თითოეული მსოფლიოს ჩემპიონატი უნიკალური შანსია. ყველას სურს ამ ტურნირზე თამაში, თუმცა მე ინგლისის ჩემპიონატზე ფიქრი მირჩევნია. მხოლოდ ამის შემდეგ გადავერთვები მუნდიალზე“, – სუარესის სიტყვებს A Bola ციტირებს.

ბექა დოგრაშვილი

სუარესი: „არსენალი“ აუცილებლად უნდა დავამარცხოთ“

Posted on by ბექა დოგრაშვილი

ინგლისის პრემიერლიგის 25-ე ტურის ცენტრალური მატჩი „ენფილდზე“ შედგება, სადაც „ლივერპული“ ლონდონის „არსენალს“ უმასპინძლებს. მერსისაიდული გუნდის თავდამსხმელი და გათამაშების საუკეთესო ბომბარდირი ლუის სუარესი აცხადებს, რომ „მეთოფეების“ შესაძლო დამარცხება „ლივერპულს“ სატურნირო ცხრილის საუკეთესო ოთხეულში ადგილის დაკავების შანსს მნიშვნელოვნად გაუზრდის.

შეგახსენებთ, რომ ამ დროისთვის „ენფილდროუდელებს“ 47 ქულით მეოთხე ადგილი აქვთ დაკავებული და ლიდერ „არსენალს“ რვა ქულით ჩამორჩებიან.

სუარესის თქმით, დამდეგი მატჩი მნიშვნელოვნად იმოქმედებს კლუბის სასეზონო მიზნებზე.

„არსენალი“ გათამაშების ლიდერია და მისი შესაძლო დამარცხება ჩვენს წინ მდგარ გუნდებთან ქულათა სხვაობის შემცირების საშუალებას მოგვცემს. ეს ძალას შეგვმატებს და მორალურადაც უფრო გავძლიერდებით.

„ემირეითსზე“ მათი დამარცხება ვერ შევძელით (0:2), ამიტომ დამდეგ მატჩში ჩვენი მთავარი მიზანი სამი ქულის მოპოვება გახლავთ. ეს შანსი აუცილებლად უნდა გამოვიყენოთ.

ჩვენ საუკეთესო ოთხეულში ადგილი უნდა გავინაღდოთ. ყველაფერი უნდა გავაკეთოთ იმისთვის, რომ უშუალო კონკურენტთან სასურველ შედეგს მივაღწიოთ“, – სუარესის სიტყვები ბრიტანულმა „მირორმა“ გამოაქვეყნა.

მატჩი „ლივერპულსა“ და „არსენალს“ შორის 8 თებერვალს, ჩვენი დროით 16:45 საათზე დაიწყება.

ბექა დოგრაშვილი

ლუის სუარესი — „ლივერპულის“ ლიდერი

Posted on by ბექა დოგრაშვილი

2011 წლის ზამთარში ლუის სუარესი ამსტერდამის „აიაქსიდან“ „ლივერპულში“ გადაბარგდა. მაშინ მერსისაიდულმა გუნდმა ურუგვაელი თავდამსხმელის სანაცვლოდ 22,8 მილიონი ფუნტ სტერლინგი გაიღო, რაც იმ დროისთვის კლუბის სარეკორდო სატრანსფერო თანხა იყო. „წითლების“ ხელმძღვანელები და გულშემატკივრები სუარესს დიდი იმედებით შეხვდნენ და მას 7-ნომრიანი მაისურიც უბოძეს, რომელიც თავის დროზე ლეგენდარულ კენი დალგლიშს ეკუთვნოდა. სხვათა შორის, მოგვიანებით სუარესმა აღიარა, რომ ამ ფაქტის შესახებ არ იცოდა, თორემ 7-ნომრიანი მაისურის არჩევას ვერ გაბედავდა.

სუარესის მოსვლამ „ლივერპულის“ შეტევითი ხაზი მნიშვნელოვნად გააძლიერა. 2012 წლის თებერვალში ურუგვაელმა ფეხბურთელმა მერსისაიდული გუნდის რიგებში პირველი ტიტულიც მოიგო — ინგლისის ლიგის თასი. პრემიერლიგის მიმდინარე გათამაშებაში სუარესმა უკვე 23 გოლი გაიტანა და ბომბარდირთა დავას სათავეში უდგას. სულ კი, ურუგვაელმა ფეხბურთელმა პრემიერლიგაში 96 მატჩი ჩაატარა, აქტივში 61 გატანილი გოლი და 31 საგოლე გადაცემა აქვს.

გთავაზობთ 2013/2014 წლების სეზონში სუარესის მიერ გატანილი ყველაზე ლამაზი გოლების ამსახველ ვიდეომასალას.

ბექა დოგრაშვილი

ყველაზე უშნო კბილების მქონე ფეხბურთელები

Posted on by -

საფეხბურთო პორტალმა FTBPRO-მ საფეხბურთო სამყაროში, ყველაზე უშნო კბილების მქონე მოთამაშეთა სია გამოაქვეყნა.

7. რონალდო

ლეგენდარულ ბრაზილიელ ფეხბურთელს სწორედ თავისი კბილების გამო შეარქვეს ასეთი ზედმეტსახელი: “კიჭა”.

fenomeno

6. რონალდინიო

კიდევ ერთი ბრაზილიელი ფეხბურთელი, რომელიც ამ სიაში მოხვდა – რონალდინიო. ყველასათვის საყვარელი მოთამაშე თავისი კბილების გამო, ხუმრობის ობიექტი ხშირად გამხდარა. გავრცელებული ინფორმაციის თანახმად, მასსა და ერთ-ერთ კლუბს შორის გაფორმებულ კონტრაქტში იდო ისეთი პუნქტი, რომლის თანახმადაც, რონის კბილების გასწორება აკრძალული ჰქონდა. ეს ყოველივე იმის გამო, რომ მისი კბილების გასწორება უზარზმარ თანხებთან იყო დაკავშირებული.

ronaldinho

5. კარლოს ტევესი

კარლოს ტევესმა 10 წლის ასაკში, ადუღებული წყლის გადასხმის გამო, სახეზე, კისერსა და მკერდზე მესამე ხარისხის დამწვრობა მიიღო. მას არც კბილები აქვს კარგ მდგომარეობაში, თუმცა არგენტინელი თავდამსხმელი ამბობს: “პლასტიკური ოპერაცია არ მჭირდება. ისეთი მიმიღეთ, როგორიც ვარ.”

tevez

4. რაველ მორისონი

“მანჩესტერ იუნაიტედის” აღრზდილი ფეხბურთელი, რომელიც ახლა “ვესტ ჰემის” ღირსებას იცავს, თავისი კბილების გამო ყურადღებას ნამდვილად იქცევს. 20 წლის ნახევარმცველს, რომელსაც ინგლისის 16, 17, 18 და 21 წლამდელთა ნაკრებებში უთამაშია 2012 წელს, “ბირმინგემში” გადაბარგებისას, აღმოუჩინეს, რომ შვიდი კბილი სულაც არ ჰქონდა.

ravel mor

3. ალი სისოხო

ალი სისოხოს კბილებზე საუბარი, შესაძლოა, დიდხანს გაგრძელდეს. ფრანგ ფეხბურთელს 2009 წელს, “მილანში” თამაში შეეძლო. მაშინ, თითქმის, ყველაფერი მოგვარებული იყო, თუმცა სისოხო სამედიცინო შემოწმებაზე, რამდენადაც უცნაურად არ უნდა მოგეჩვენოთ, კბილების გამო ჩაიჭრა. “მილანის” ექიმმა განაცხადა, რომ სისოხოს კბილები მომავალში ხერხემლის პრობლემებს წარმოქმნიდა.

siso

2. ლუის სუარესი

ურუგვაელი თავდამსხმელის ბასრ კბილებზე უკვე ლეგენდებიც კი დადის. ლუის სუარესმა რამდენჯერმე თავისი კბილები მეტოქე გუნდის ფეხბურთელების გასამწარებლადაც გამოიყენა, მათგან კი, რა თქმა უნდა, ყველაზე გახმაურებული ივანოვიჩის მკლავზე კბენა იყო.

suarez

1. ჯო ჯორდანი

ჯო ჯორდანი, რომელიც ახლა 62 წლისაა, ახალგაზრდობაში ფეხბურთს ისე თამაშობდა, რომ მას წინა რამდენიმე კბილი სულაც არ ჰქონდა. ამჟამად, შოტლანდიელი მწვრთნელი ყველაზე მეტად იმითაა ცნობილი, რომ რამდენიმე წლის წინ, მასსა და “მილანის” ფეხბურთელ ჯენარო გატუზოს შორის სერიოზული შეხლა-შემოხლა მოხდა.

Actor Richard Kiel, who plays Jaws in the James Bond film "The S

დიტო ჭიჭინაძე

პრემიერლიგის დეკემბრის თვის საუკეთესოები გამოვლინდნენ

Posted on by გიორგი დოგრაშვილი

გამოვლინდა ინგლისის პრემიერლიგის 2013 წლის დეკემბრის თვის საუკეთესო ფეხბურთელი და მწვრთნელი.

თვის საუკეთესო ფეხბურთელის სტატუსი “ლივერპულის” ურუგვაელმა ფორვარდმა ლუის სუარესმა მიიღო, ხოლო “მანჩესტერ სიტის” დამრიგებელი მანუელ პელეგრინი – საუკეთესო მწვრთნელად დასახელდა. მათ, ტრადიციულად, სპეციალური ჯილდოები გადაეცათ.

ლუის სუარესი პრემიერლიგის ისტორიაში პირველი ფეხბურთელია, რომელმაც ერთ კალენდარულ თვეში ათი გოლის გატანა მოახერხა. შეგახსენებთ, რომ ურუგვაელ ფეხბურთელს გასულ სეზონში მიღებული დისკვალიფიკაციის გამო მიმდინარე სეზონში მოგვიანებით ჩართვა მოუხდა. მიუხედავად ამისა, ის ჯერჯერობით 20 გატანილი გოლით პრემიერლიგის საუკეთესო ბომბარდირია. მის ანგარიშზე სულ 37 დარტყმაა, რომლიდანაც 26 ზუსტი გამოდგა. სტატისტიკურად, მისი ყოველი 2,6 ზუსტი დარტყმის შემდეგ გოლი გადის.

რაც შეეხება მანუელ პელეგრინის, მის მიერ გაწვრთნილმა “მანჩესტერ სიტიმ” გასულ თვეში შვიდი პრემიერლიგური შეხვედრიდან ექვსი გამარჯვებით დაასრულა, ერთი კი, “საუთჰემპტონთან” ფრედ ითამაშა.

აღსანიშნავია, რომ “ქალაქელებმა” დეკემბერში “ტოტენჰემი” 6-0, ხოლო გათამაშების ლიდერი “არსენალი” 6-3 გაანადგურეს. ამ დროისთვის მანჩესტერული გუნდი ჩემპიონატში მეორე ადგილს იკავებს და “არსენალს” ერთი ქულით ჩამორჩება.

 გიორგი დოგრაშვილი

სუარესის ულამაზესი გოლი

Posted on by ბექა დოგრაშვილი

ინგლისის პრემიერლიგის მე-20 ტურში „ლივერპულსა“ და „ჰალ სიტის“ შორის მიმდინარე მატჩში მერსისაიდული გუნდის ურუგვაელმა თავდამსხმელმა ლუის სუარესმა საჯარიმო დარტყმით ულამაზესი გოლი გაიტანა და „წითლების“ უპირატესობა ორ ბურთამდე გაზარდა.

აქვე გთავაზობთ აღნიშნული გოლის ამსახველ ვიდეომასალას.

 

მოურინიო: „სუარესი ისე დავარდა, თითქოს, მას ზურგში ესროლეს“

Posted on by Alix

ლონდონის „ჩელსის“ მთავარმა მწვრთნელმა ჟოზე მოურინიომ „ლივერპულის“ თავდამსხმელი ლუის სუარესი გააკრიტიკა, რომელიც მის გუნდთან მატჩის ბოლოს სიმულაციის წყალობით, პენალტის გამომუშავებას ცდილობდა.

„ასპილიკუეტას უკვე ჰქონდა ბურთი, როდესაც სუარესი მიწაზე ეშვებოდა. იგი ამას ისე აკეთებდა, თითქოს, საცურაო აუზში ხტებოდა. უები ამ ეპიზოდისგან ათ მეტრში იყო და მან შეცდომა დაუშვა, როდესაც სუარესს ყვითელი ბარათი არ უჩვენა. ასე მაშინ ვარდებიან, როდესაც ზურგში ტყვია ხვდებათ.

ბრენდან როჯერი სუარეთან კარგად მუშაობს და, რა თქმა უნდა, იგი შეიცვალა, თუმცა, მსგავსი სიტუაციებისას ლუისი თავის უკულტურობას ამჟღავნებს. ამ მოთამაშეს მისი შესაძლებლობებისა და ნიჭის გამო დიდ პატივს ვცემ, მაგრამ, კარგი იქნება, თუ იგი ასე აღარ მოიქცევა“, – განაცხადა ფეხბურთის პორტუგალიელმა სპეციალისტმა.

ალექსანდრე მატევოსოვი

ბერლუსკონი სუარესის „მილანში“ ნახვაზე ოცნებობს

Posted on by Alix

„მილანის“ მფლობელი სილვიო ბერლუსკონი საკუთარ გუნდში „ლივერპულის“ ურუგვაელი თავდამხმელის ლუის სუარესის ნახვაზე ოცნებობს, რის შესახებაც ცნობილი იტალიური გამოცემა „ტუტოსპორტი“ წერს.

სამხრეთ ამერიკელმა მერსესაიდელებთან კონტრაქტი ორი კვირი წინ გაახანგრძლივა და მისი სხვა კლუბში გადასვლა, ამ ეტაპზე, ნაკლებად სავარაუდოა

გაცილებით იაფი ალტერნატივა „როსონერითვის“ „მანჩესტერ სიტის“ ბოსნიელი ფორვარდი ედინ ჯეკო უნდა იყოს, რომელსაც, სხვათაშორის, „შავ-წითლებში“ გადასვლა რამდენიმე წლის წინაც შეეძლო.

ალექსანდრე მატევოსოვი

მოურინიო: „იმედია, სუარესმა მცირე ტრავმა მიიღო და ჩვენთან ვერ ითამაშებს“

Posted on by ბექა დოგრაშვილი

ინგლისის პრემიერლიგის XIX ტურის ცენტრალური მატჩი „სტემფორდ ბრიჯზე“ შედგება, სადაც ლონდონის „ჩელსი“ „ლივერპულს“ უმასპინძლებს. „პენსიონერების“ მთავარმა მწვრთნელმა ჟოზე მოურინიომ მოახლოებული შეხვედრის შესახებ ისაუბრა და ხუმრობით ისურვა, რომ ლუის სუარესი მცირეოდენი ტრავმის გამო თამაშს ვერ შეძლებს. ურუგვაელ ფეხბურთელს დაზიანება არ მიუღია, თუმცა პორტუგალიელ სპეციალისტს მისი უქმობის იმედი მაინც აქვს.

„იქნებ „მანჩესტერ სიტისთან“ გამართულ მატჩში სუარესმა მცირეოდენი ტრავმა მიიღო? სერიოზულ დაზიანებას არ ვუსურვებ. მხოლოდ მცირე, ოთხდღიანი ტრავმაც საკმარისია, რომ ჩვენს წინააღმდეგ თამაში ვერ შეძლოს“, – მოურინიოს სიტყვები ბრიტანულმა „დეილი მეილმა“ გამოაქვეყნა.

მატჩი „ჩელსისა“ და „ლივერპულს“ შორის კვირას, თბილისის დროით 20:00 საათზე დაიწყება.

ბექა დოგრაშვილი

სუარესმა „ლივერპულთან“ ახალი კონტრაქტი გააფორმა

Posted on by ბექა დოგრაშვილი

„ლივერპულის“ თავდამსხმელმა ლუის სუარესმა კლუბთან კონტრაქტი გაახანგრძლივა.

გრძელვადიანი ხელშეკრულების გაფორმების შემდეგ, ურუგვაელმა ფეხბურთელმა განაცხადა, რომ მერსისაიდულ გუნდში თამაშით ამაყი და ბედნიერია.

„ბედნიერი ვარ, რომ „ლივერპულთან“ ახალი კონტრაქტი გავაფორმე და ჩემი გრძელვადიანი მომავალი „ენფილდს“ დავუკავშირე.

ჩვენს გუნდში ბევრი მაღალი დონის მოთამაშეა, ვიზრდებით და თამაშს ვაუმჯობესებთ. მჯერა, რომ შემიძლია, „ლივერპულს“ დასახული მიზნების მიღწევაში დავეხმარო, ტიტულები მოვიგო და გუნდთან ერთად უმაღლეს დონეზე ვითამაშო.

ეჭვგარეშეა, რომ ამ გადაწყვეტილების მიღებაში უდიდესი როლი შეასრულა ქომაგთა მხარდაჭერამ. ვამაყობ, რომ მე მათ წარმოვადგენ. ჩვენ ერთმანეთთან განსაკუთრებული ურთიერთობა გვაქვს. მე მათ ვუყვარვარ და მე ისინი მიყვარს. მათთვის ყველაფერს გავიღებ და იმედი მაქვს, ერთად მივაღწევთ წარმატებებს“, – სუარესის სიტყვები „ლივერპულის“ ოფიციალურ ვებ-გვერდზე გამოქვეყნდა.

რა ხნით გახანგრძლივდა კონტრაქტი, ჯერჯერობით არ კონკრეტდება.

ბექა დოგრაშვილი

სუარესი: „ჯერარდი – „ლივერპულის“ ერთადერთი კაპიტანია“

Posted on by Alix

„ტოტენჰემთან“ ანგარიშით 0:5 მოგებული შეხვედრის შემდეგ „ლივერპულის“ თავდამსხმელმა ლუის სუარესმა განაცხადა, რომ გუნდის შედეგები მისთვის პირად შედეგებზე უფრო მნიშვნელოვანია.

„ის, რომ დღეს გუნდის კაპიტანი ვიყავი, არაფერს ნიშნავს, რადგან, ჩემთვის „ლივერპულის“ ერთადერთი კაპიტანი – სტივენია. დღეს კაპიტნის სამკლაური მეკეთა, თუმცა, ვფიქრობ, ჩვენი ლამაზი თამაში აღნიშნულ საკითხზე უფრო მნიშვნელოვანია. მოედანზე ყველაფრის ჩვენებას ვცდილობ, რისი გაკეთებაც შემიძლია. იქედან გამომდინარე, რომ ფორვარდი ვარ, ჩემი უმთავრესი მიზანი – გოლის გატანაა. გუნდის თამაში ჩემთვის ყველაფერზე მაღლა დგას“, – განაცხადა ურუგვაელმა.

შეგახსენებთ, რომ „ტოტენჰემთან“ შეხვედრაში სამხრეთ ამერიკელმა დუბლი შეასრულა. ინგლისის პრემიერლიგის მიმდინარე სეზონის გათამაშებაში სუარესის ანგარიშზე 15 გოლია და ბომბარდირთა დავას ამჟამად სწორედ იგი ლიდერობს.

ალექსანდრე მატევოსოვი

სუარესი ბავშვმა გაამასხარავა

Posted on by ბექა დოგრაშვილი

ინგლისის პრემიერლიგის XVI ტურში „ტოტენჰემ ჰოთსპურსა“ და „ლივერპულს“ შორის მიმდინარე მატჩის დაწყებამდე, ფეხბურთელების მისალმების დროს, მერსისაიდული გუნდის თავდამსხმელი ლუის სუარესი ბავშვმა გაამასხარავა. ურუგვაელმა ფეხბურთელმა ბავშვის ეს ჟესტი ხუმრობად მიიღო.

გთავაზობთ ფაქტის ამსახველ ვიდეომასალას.