ინტერნეტ-პორტალ sulia.com-ზე გამოქვეყნდა, თუ ვინ არიან (ან იყვნენ) ყველაზე ცნობილი მომღერლების ფავორიტი ფეხბურთელები.
გთავაზობთ აღნიშნულ სიას.
| მაიკლ ჯექსონი | დევიდ ბექჰემი |
| ემინემი | სტივენ ჯერარდი |
| ჯასტინ ბიბერი | ლეო მესი |
| ტეილორ სვიფტი | მესუთ იოზილი |
| სნუპ დოგი | ფერნანდო ტორესი |
| ლიამ გალაჰერი | დევიდ ბექჰემი |
| ლუის ტომლინსონი | კრიშტიანო რონალდუ |
| 50 ცენტი | სტივენ ჯერარდი |
| ენრიკე იგლესიასი | კრიშტიანო რონალდუ |
| რიანა | დევიდ ბექჰემი |
„მის მსოფლიო 2003“ როსანა დევისონი თურმე „ლივერპულის“ ფანი ყოფილა და ამიერიდან კლუბის სატელევიზიო რგოლებში მიიღებს მონაწილეობას.
29 წლის მოდელი ჟურნალ „ფლეიბოის“ ფოტოსესიაში მონაწილეობდა, როსანა დევისონი ორ 30-წუთიან ფილმშიც არის გადაღებული, რომელიც „ლივერპულის“ ყოფილ ირლანდიელ ვარსკვლავებს მიეძღვნა.
„რა თქმა უნდა, მიკვირს, როცა ვამბობ, რომ „ლივერპულის“ დიდი ფანი ვარ, თუმცა მიყვარს მათ მატჩებზე დასწრება და ტელევიზორით ყურება. მათი ცქერა ოჯახთან ერთად ან „ენფილდზე“ წასვლა – ეს არის ის, რაც მსიამოვნებს“, – აცხადებს დევისონი.
მან დაამატა: „მამაჩემი დიდი ხნის მანძილზე იყო “წითლების” ფანი ისევე, როგორც ჩემი ძმა და ვფიქრობ, რომ მამამ ყველას შეგვაყვარა „ლივერპული“. ჩვენს ძაღლსაც კი წითელი საყელო აქვს და ისიც მხარს უჭერს მერსისაიდელებს. როდესაც საშუალება მაქვს, „ენფილდს“ ვსტუმრობ. არაფერი შეედრება იმ ატმოსფეროს, რაც იქ ტრიალებს, განსაკუთრებით, „კოპის“ ტრიბუნაზე“.
გეტყვით იმასაც, რომ მამამისი ცნობილი მუსიკოსი კრის დე ბურგია, რომელიც სამიოდე წლის წინათ ბათუმს ეწვია და გრანდიოზული კონცერტიც გამართა.
„სტოკ სიტიმ“ წუხელ პენალტების სერიაში „ბირმინგემი“ დაამარცხა და ინგლისის ლიგის თასის მეოთხედფინალის საგზური მოიპოვა, რაც უკანასკნელი 35 წლის განმავლობაში პირველად მოხდა.
პიტერ კრაუჩმა ხუთ მატჩში უკვე მესამე გოლი გაიტანა. ბოლოს როდის მოხდა ასეთი რამ, ალბათ, თვითონაც არ ახსოვს. საინტერესოა, რა (თუ ვინ) არის კრაუჩის მთავარი მოტივატორი.
რამდნეიმე დღის წინათ, Fanebi.Com-ის ფეისბუქის გვერდზე კრაუჩის მეუღლის ფოტო გამოვაქვეყნეთ, რამაც საყოველთაო ყურადღება გამოიწვია. შლანგი უძახეთ და კრაუჩს მშვენიერი ქალის გული კი აქვს მოგებული. გადავწყვიტეთ ები კლენსისთვის ცალკე პუბლიკაცია მიგვეძღვნა. ები კლენსი ბრიტანელი მოდელი და ტელეწამყვანია. პიტერი და ები ერთად 2006 წლის შემდეგ არიან.
ები კლენსი ბრიტანულ „ცეკვავენ ვარსკვლავებში“
ებისა და პიტერს ქორწილი 2011 წლის ზაფხულში ჰქონდათ. მ წლის გაზაფხულზე წყვილს ქალიშვილი შეეძინა, რომელსაც სოფია რუბი დაარქვეს.
ფეხბურთი გისოსებს მიღმა. ნორმანდიის კუნძულის ციხის ზედამხედველები პატიმრებს ცხოვრების სწორ გზას ფეხბურთის დახმარებით უჩვენებენ. Fanebi.Com-ი მოგიყვებათ, რატომ არის ადგილობრივი პატიმრების საყვარელი ფრაზა: „გაუმარჯოს ჩვენს ციხეს! ყველაზე ჰუმანურ ციხეს მსოფლიოში!“
ოდესმე ყოფილხართ გერნზიში? არის ასეთი პატარა კუნძული ლა-მანშის სრუტეში. მთლად ტაიტი არ არის, თუმცა ეს ადგილიც საკმაოდ ლამაზია. მოსახლეობა 63 ათასია, ფართობი – 65 კვადრატული კილომეტრი. კუნძული ექვემდებარება ბრიტანეთის იურისდიქციას, თუმცა საფრანგეთთან უფრო ახლოს არის. რატომ მოხდა ასე, ამას დიდი ისტორია აქვს. თუ ვიქტორ ჰიუგო გიყვართ, მაშინ ამ ადგილის შესახებ რომანი „ზღვის მუშები“ უნდა წაიკითხოთ.
გერნზი ინგლისის ნაკრების ყოფილი ნახევარმცველის, მეთიუ ლე ტისიეს (8 მატჩი) სამშობლოა. აქ თავიანთ გმირებს არ ივიწყებენ და რამდენიმე წლის წინათ, ის საფეხბურთო კლუბ „გერნზის“ საპატიო პრეზიდენტად აირჩიეს. კლუბი, რომელსაც მეტსახელად „მწვანე ლომები“ ჰქვია, მნიშვნელობით ინგლისის მე-9 დივიზიონში ასპარეზობს.
თავისუფლების 90 წუთი
„გერნზის“ სტადიონიდან რამდენიმე კილომეტრის მოშორებით კიდევ ერთი „ცხოველური“ გუნდია და, საბედნიეროდ, ლე ტისიეს მასთან არავითარი ურთიერთობა არ აქვს. გუნდი, რომელიც გერნზის ციხის პატიმრებისგან არის დაკომპლექტებული, „ციხის ლომების“ სახელს ატარებს და კუნძულის საკვირაო ლიგაში გამოდის. გუნდის მწვრთნელმა დევიდ უაიტმა თითქოს შეუძლებელი შეძლო: „ლომებს“ ადგილობრივ სამოყვარულო ლიგაში თამაშის უფლება მისცეს.
„პატიმარიც ადამიანია, ფეხბურთს კი შეუძლია, ადამიანი უკეთესი გახადოს, – საუბრობს დევიდ უაიტი. – ამ იდეის განხორციელებას დიდი ხნის განმავლობაში ვცდილობდი ციხის უფროსობასა და სამოყვარულო ლიგის პრეიზდენტთან. მიზანს მივაღწიე. 101 პატიმარი გვყავს, ყველა კაცია. ღრმად ვარ დარწმუნებული, რომ ფეხბურთს ამ ხალხის გამოსწორება შეუძლია. რა არის ფეხბურთი? ეს არის გუნდში მუშაობის უნარი, ურთიერთგაგება და შრომისმოყვარეობა, მარცხის ღირსეულად მიღების უნარი. ფეხბურთი – ეს იდეების მუშაობაა. ვუყურებ ჩემს მოთამაშეებს და ვხვდები: თამაში მათთვის თავისუფლების 90 წუთია. პატიმართა დიდი ნაწილი არასდროს ყოფილა რაიმე დადებითი და კონსტრუქციული პროექტის ნაწილი. ფეხბურთში წარმატებისთვის ისინი ისეთ თვისებებს შეიძენენ, რაც საზოგადოებაში დაბრუნების შემდეგ გამოადგებათ“.
როგორც ნებისმიერ სამოყვარულო ლიგაში, აქაც მხოლოდ კვირა დღეს თამაშობენ. აქედან მოდის სახელწოდება – საკვირაო ლიგა „მფხანავი ფეხები“ (Itchy Feet Guernsey Sunday League: ანუ იმდენად გინდა ფეხბურთის თამაში, რომ ფეხები გეფხანება). „ლომებს“ მატჩების მუდამ საშინაო არენაზე ჩატარების უპირატესობა აქვთ. ბუნებრივია, პატიმართა გუნდი თავის მეტოქეებს ციხეში მასპინძლობს. სეზონში 15 მატჩი სამ წრედ ტარდება, ჩემპიონატში ექვსი გუნდი იღებს მონაწილეობას.
„ყველამ იცის, რომ ჩვენ გასვლაზე არ ვთამაშობთ და ამაზე არც არავინ წუხს. საფეხბურთო მოედანი ციხის ტერიტორიაზეა და არც ეს წარმოადგენს რაიმე პრობლემას. ზომა სტანდარტულია, საფარი ბუნებრივია. ვთამაშობთ 11-11-ზე, ყველა სრულწლოვანია“, – ამბობს უაიტი.
„მფხანავი ფეხები“ სუსტი ნერვების მქონე ადამიანებისთვის არ არის განკუთვნილი. დავიწყოთ იმით, რომ „ციხის ლომების“ სტუმრებს დიდი ყურადღებით ჩხრეკენ (ისევე, როგორც ციხის ყველა პატიმარს). აქ ესმით, რომ გადამეტებული უხეშობა არავის არგებს.
„ჩვენს გუნდში ციხის რამდენიმე თანამშრომელიც თამაშობს. ბიჭებმა იციან, რომ მოედანზე გამოვლენილ არასათანადო ქცევას ძალზედ უსიამოვნო შედეგები მოჰყვება – ისინი გუნდში ადგილს დაკარგავენ. ამიტომ, ყველა ცდილობს, სუფთად ითამაშოს, წითელი ბარათის მიღების გარეშე. ბიჭები, რომლებიც ჩვენს წინააღმდეგ პირველად თამაშობენ, როგორც წესი, ძალიან დაძაბულები არიან ხოლმე, მაგრამ პირველი ათი წუთის შემდეგ ყველა მშვიდდება“, – ამბობს დევიდ უაიტი.
„ციხის ლომებმა“ სეზონი ძალიან კარგად დაიწყო – ორჯერ მოუგო გერნზის რესტორნის ფეხბურთელთა გუნდს (1:0 და 6:2), დაამარცხა აუდიტორთა გუნდი „დელოიტი“ (2:1). მეოთხე მატჩში „ლომების“ გამარჯვების სერია შეწყდა. საიუველირო მაღაზიის წარმომადგენელთა გუნდმა ციხიდან სამი ქულის წაღება შეძლო.
ბომბარდირი ნარკომოვაჭრე
„ციხის ლომების“ საუკეთესო ბომბარდირი 25 წლის ტომ უოლში გახლავთ.
ხუთი გოლი სამ მატჩში. ტომი შემტევი ნახევარმცველის პოზიციაზე თამაშობს. ის შეუმდგარი ნარკომოვაჭრეა. გასული წლის მარტში პოლიციამ მის მანქანაში პლასტიკური პაკეტით ექსტაზის ორი ათასი აბი იპოვა. ტომი 38 ათასი ფუნტით გამდიდრებას ელოდა, თუმცა 6 წლით თავისუფლების აღკვეთა მიიღო.
დაცვას 27 წლის ლატვიელი მარტინს აპსკალნსი ამაგრებს. დააკავეს ფულის გათეთრებისთვის, მიუსაჯეს ოთხი წელი. მეწყვილედ 37 წლის რუმინელი კონსტანტინ არმეგი ჰყავს. აღსანიშნავია, რომ არმეგი პროფესიონალი მოკრივეა, თუმცა მოედანზე გაფრთხილება ამ დრომდე არ მიუღია.
გუნდის ერთ-ერთი მეკარე „მანჩესტერ იუნაიტედის“ ქომაგი გარეტ მასტერტონი გახლავთ, რომელიც ციხეში იმიტომ მოხვდა, რომ მანჩესტერული დერბის დროს, ბარში „სიტის“ ფანს თავში ლუდის კათხა ჩაარტყა. სხეულის განზრახ დაზინების გამო, მიუსაჯეს 4,5 წლით თავისუფლების აღკვეთა.
თადარიგში შეიძლება თვალი მოკრათ ადგილობრივი სარაგბო გუნდის ყოფილ მოთამაშესა და პოლიციელის შვილს, მეფედრონით მოვაჭრესა და უბრალო თაღლითს. რაც არ უნდა იყოს, ეს არის ციხის დრიმთიმი.
„გთხოვთ, ნუ მკითხავთ, რა დააშავეს ამ ადამიანებმა. არ მინდა ამაზე საუბარი. როდესაც მათ მოედანზე ვუყურებ, ისინი ჩემთვის თანასწორნი არიან“, – აღნიშნა დევიდ უაიტმა.
გუნდის მეორე ბომბარიდირი 19 წლის კალუმ სმიტია, რომელიც გისოსებს მიღმა სასახლის გაძარცვის გამო მოხვდა. როდესაც პოლიციელები დანაშაულის ადგილზე მივიდნენ, სმიტი მათ სასახლეში დახვდა და თან… ჩაის მიირთმევდა. მომავალი წლის დასაწყისში კალუმი თავისუფალი აგენტის სტატუსს იღებს. ასე რომ, სამწვრთნელო შტაბს ახალი თავდამსხმელის ძიება მოუწევს.
საკვირაო ლიგის პრეზიდენტი როდ ჰემონი გამოტყდა, რომ „ციხის ლომების“ გამო ტურნირის რეგლამენტის შეცვლა მოუწია.
„ჩვენს ჩემპიონატში სატრანსფერო პერიოდი 31 დეკემბერს სრულდება. რა უნდა მოვუხერხოთ სმიტს, რომელიც თავისუფალი აგენტის სტატუსს შობის შემდეგ მიიღებს? მას გუნდში დარჩენა შეუძლია“, – ამბობს პრეზიდენტი ჰემონი, რომელიც საკვირაო ლიგაში მსაჯადაც მუშაობს.
როი ჰოჯსონს ციხეში ელიან
„ფეხბურთი მათთვის ჯილდოა, რომელსაც კარგი ქცევისთვის იღებენ, – საუბრობს ციხის უფროსი დეივ მეთიუზი. – პატარა გადაცდომა და პატიმრის საფეხბურთო კარიერას ჯვარი დაესმება. შეიძლება სასაცილოდ ჟღერდეს, მაგრამ ფეხბურთი მათთვის ერთგვარი საჰაერო ხვრელია. ციხეში ასეთი გასართობი ბევრი არ არის. არავის სურს, ტურნირში თამაშისა და პრიზების მოგების შესაძლებლობა დაკარგოს. პირველი ადგილისთვის ოქროს მედლები და თასია განკუთვნილი“.
„გვინდა, რომ სტერეოტიპები დავამსხვრიოთ, – აგრძელებს დევიდ უაიტი. – კარგია, რომ ყურადღებას გვაქცევენ. მსმენია, რომ ლათინური ამერიკის ციხის მატჩებს ეროვნული ნაკრებების მთავარი მწვრთნელებიც ესწრებიან. იქნებ, ოდესმე როი ჰოჯსონმა პატივი დაგვდოს?! როი, ჩვენ შენ გელით!“
ბექა დოგრაშვილი
საქართველოს ჩემპიონატის უმაღლესი ლიგის მეათე ტურის ცენტრალური მატჩი „დინამო არენაზე“ შედგა, სადაც გათამაშების ერთპიროვნულმა ლიდერმა „დინამო თბილისმა“ ცხრილის მეორეადგილოსან ქუთაისის „ტორპედოს“ უმასპინძლა. შეხვედრა დრამატულ ბრძოლაში წარიმართა და მასპინძელტა გამარჯვებით, ანგარიშით 2:1 დასრულდა. მატჩის შემდეგ, სტადიონის მედია დარბაზში ტრადიციული მატჩისშემდგომი პრესკონფერენცია გაიმართა.
დუშან უჰრინი: „ჩვენთვის ძალიან რთული მატჩი გამოდგა. მსაჯმა დაპირისპირების დებიუტში კაცი გაგვიგდო და ათი კაცით გავაგრძელეთ თამაში. პირველივე წუთებიდან გუნდს ტაქტიკურად გადაწყობა სჭირდებოდა ისეთ სქემაზე, რომ გუნდს ნაყოფიერად შეეტია და დაცვაშიც რიგიანად ეთამაშა. მეორე ნახევარი არც თუ ისე ცუდად დავიწყეთ, თუმცა ბოლო ოცი წუთი ბევრად უკეთესი თამაში ვაჩვენეთ. შეიძლება ითქვას, რომ ჩვენი თამაში ვაჩვენეთ და საჭირო შეხვედრა მოვიგეთ. შეხვედრის მიწურულს მოედანზე „დინამო“ ათი კაცით დომინირებდა, კმაყოფილი ვარ ამ მოგებით. დღევანდელი საღამო ჩვენთვის სასიამოვნო რეზულტატით დასრულდა“.
ჟერარდ სარაგოსა: „პირველ რიგში ტორპედოს გულშემატკივარს მინდა მოვუბოდიში, ვინაიდან ისეთი თამაში ვერ ვაჩვენეთ, როგორიც გვინდოდა. დღევნდელ დაპირისპირებაში არა თუ სამი ქულა, არამედ ქულის აღებაც ვერ მოვახერხეთ. სამი–ოთხი თვეა რაც ტორპედოს ვხელმძრვანელობ და მგონი, უკვე ჩამოყალიბდა ძირითადი ბირთვი. გუნდის საშუალო ასაკი 21 წელი არის და დინამოსთან ტოლ–სწორად თამაში იმის დასტურია, რომ ჩვენი დაწყებული საქმე ნაყოფიერია. პირველი სამოცი წუთი კარგად ვითამაშეთ, ბოლოს კი დინამომ გამოცდილების ხარჯზე წარმატებას მიაღწია. ახლა ყველანი სპარტაკთან შეხვედრისთვის ვიფიქრებთ“.
მატჩის რევიუსა და ვიდეომიმოხილვის სანახავად გადადით ბმულზე: ქართული „კლასიკო“ „დინამომ“ დრამატულ ბრძოლაში მოიგო
საქართველოს ჩემპიონატის უმაღლესი ლიგის მეათე ტურის ცენტრალური მატჩი „დინამო არენაზე“ შედგა, სადაც გათამაშების ერთპიროვნულმა ლიდერმა „დინამო თბილისმა“ ცხრილის მეორეადგილოსან ქუთაისის „ტორპედოს“ უმასპინძლა.
მატჩი ძალიან საინტერესოდ დაიწყო. შეხვედრის მე-3 წუთზე ქუთათურთა თავდამსხმელ გიორგი ფანცულაიას მეკარესთან ერთი ერთზე გასვლის შესაძლებლობა მიეცა, თუმცა მასპინძელთა ცენტრალურმა მცველმა უსტარიცმა ოპონენტი საჯარიმოს გარე პერიმეტრზე ხელით დაიჭირა და წინსვლის საშუალება არ მისცა. მთავარმა არბიტრმა გიორგი ვადაჭკორიამ ეპიზოდი ბოლო იმედის ჯარიმად შეაფასა და „დინამოს“ ბასკ მცველს პირდაპირ წითელი ბარათი უჩვენა. თბილისური გუნდი მოედანზე ათი კაცის შემადგენლობით დარჩა, რამაც ბუნებრივია, „დინამოს“ გეგმები გარკვეულწილად შეცვალა.
კარგი მომენტი მიეცა „დინამოს“ მე-18 წუთზე: შეტევის მარჯვენა ფლანგიდან ჯაბა დვალმა წამოიწყო შეტევა, რომელმაც საჯარიმოს მისადგომებთან ჩისკო მოძებნა, ამ უკანასკნელმა თავით ბურთი ხელსაყრელ პოზიციაზე მყოფ დორინ გოგას დაუგდო, რუმინელის დარტყმულს მეკარე ადგილზე დახვდა.
შეხვედრის 22-ე ანგარიში გაიხსნა, სტუმრები დაწინაურდნენ: მერაბ გიგაურმა მეტოქის საჯარიმოში ჩააწოდა, მართალია სტუმრებმა მეორე სართულზე ბრძოლა წააგეს, თუმცა ბურთი დავით უბილავას მიუვიდა, რომელმაც საჯარიმოში ჩააბრუნა, იქ კი თორნიკე კაპანაძემ ერთი შეხებით, ძლიერი დარტყმით გაგზავნა ბურთი გიორგი ლორიას კარში და გაიტანა კიდეც. ეს მიმდინარე ჩემპიონატში კაპანაძის რიგით მეხუთე გოლი გახლავთ.
უნდა ითქვას, რომ მატჩის პირველ ტაიმში ტერიტორიულ უპირატესობას ქუთაისელი ფეხბურთელები ფლობდნენ, მეტოქეს უბურთოდ ტოვებდნენ და დროსაც მშვიდ რითმში აკონტროლებდნენ, თუმცა გასახდელში გასვლის წინ „ტორპედომ“ ცივი შხაპი მიიღო. მთავარმა არბიტრმა საჯარიმოში ხელით თამაშის გამო სტუმართა კარის მიმართულებით თერთმეტმეტრიანი დარტყმა დანიშნა. პენალტის შესრულება დვალმა ითავა, თუმცა მისი დარტყმის შემდეგ ბურთი კარს ზემოდან გადასცდა.
მატჩის პირველი ნახევარი „ტორპედომ“ ანგარიშით 1:0 მოიგო.
მეორე ტაიმი პირველი ნახევარი შედარებით მონოტონურ რითმში წარიმართა, მოედანზე ბევრი არც არაფერი ხდებოდა საინტერესო.
მეორე ტაიმის შუაწელს ორივე გუნდის ქომაგებმა პირო-ტექნიკითა და ფოიერვერკებით ლამაზი წარმოდგენა გვიჩვენეს, თუმცა კიდევ ერთხელ სათქმელია, რომ ეს ჩვენს ჩემპიონატში აკრძალულია.
77-ე წუთზე მთავარმა არბიტრმა „ტორპედოს“ კარის მიმართულებით კიდევ ერთი პენალტი დანიშნა. ამ ეპიზოდში ქუთაისელთა კიპერმა მაქსიმე ქვილითაიამ საკუთარ საჯარიმოში თბილისელთა ნახევარმცველი ელგუჯა გრიგალაშვილი წააქცია. თერთმეტმეტრიანის ნიშნულთან ამჯერად ლევან ხმალაძე მივიდა, რომელმაც ანგარიში გაათანაბრა კიდეც.
მატჩის ბოლოს „ტორპედოს“ კიდევ ერთი კარგი შანსი მიეცა, როცა ლორიას კარის მიმართულებით ნიკა ახვლედიანმა „გაისროლა“, თუმცა მეკარემ ლამაზ ნატომში ბურთის მოგერიება მოახერხა.
მომენტი „დინამოსაც“ ჰქონდა: ხელსაყრელი პოზიციიდან შეცვლაზე სემოსული პატრიკ ვუო ურტყამდა, თუმცა ბურთს ადგილზე დახვდა დახვდა ქვილითაია.
მატჩის კულმინაცია კი 91-ე წუთზე მოხდა, როდესაც შეცვლაზე შემოსულმა გიორგი გველესიანმა მარჯვენა ფლანგიდან მოწოდებული კუთხურის შემდეგ თავით დაარტყა და „დინამო“ დააწინაურა – 2:1.
ასე დრამატულ ბრძოლაში გაიმარჯვა „დინამომ“, რომელმაც ლიდერის პოზიციები კიდევ უფრო გაიმყარა: თბილისურ გუნდს აქტივში 25 ქულა მოუგროვდა, მეორეადგილოსან „ტორპედოს“ კი 19 ქულა დარჩა. სატურნირო ცხრილის სრული ვერსიისა და მე-10 ტურის დანარჩენი მატჩების შედეგების ხილვა Fanebi.Com-ის საქართველოს განყოფილების გვერდზე შეგიძლიათ.
„დინამო“-„ტორპედო“ 2:1 (0:1)
„დინამო“: ლორია, უსტარიცი, კვარაცხელია, სეთურიძე, კვირკველია, ხმალაძე, ძარია (ვუო 77′), გოგა, მერებაშვილი, ჩისკო (გველესიანი 42′), დვალი (გრიგალაშვილი 58′).
მთავარი მწვრთნელი: დუშან უჰრინი.
„ტორპედო“: ქვილითაია, მთივლიშვილი (გაბაძე 90′), ხიდეშელი, ჭელიძე, უბილავა, ცინცაძე, გიგაური, კუხიანიძე (ახვლედიანი 77′), საბანაძე, ფანცულაია, კაპანაძე (გოროზია 69′).
მთავარი მწვრთნელი: ჟერარდ სარაგოსა.
გოლები: ხმალაძე 78′ (პენ), გველესიანი 90+1′ კაპანაძე 22′.
გაფრთხილებები: სეთურიძე 51′ – მთივლიშვილი 45′, გიგაური 50′, ქვილითაია 78′, გოროზია 90+1.
გაძევება: უსტარიცი 3′.
გამოუყენებელი პენალტი: დვალი 45+1′.
მთავარი მსაჯი: გიორგი ვადაჭკორია (თბილისი).
აქვე გთავაზობთ დღევანდელი მატჩის ვიდეომიმოხილვას.
ბექა დოგრაშვილი
ფეხბურთს წარსულშიც უამრავი მოყვარული ჰყავდა, მაგრამ იმის გამო, რომ არ არსებობდა თამაშის საყოველთაოდ მიღებული წესები, იგი უფრო თავშესაქცევს წააგავდა, ვიდრე სპორტის სახეობას. სწორედ ამან განაპირობა ამჟამად სპორტის საკმაოდ პოპულარული სახეობის – რაგბის წარმოშობა.
1823 წლის 7 აპრილს, ინგლისში ქალაქ რაგბის ერთ-ერთი კოლეჯის ეზოში ბიჭები ფეხბურთს თამაშობდნენ.
მატჩის მსვლელობის დროს 16 წლის უილიამ ვებ ელისმა ბურთი მკერდზე მიიკრა და მოწინააღმდეგეთა კარისკენ გაქანდა. თამაშის წესებიდან ასეთი მოულოდნელი გადახვევა მოეწონათ როგორც ფეხბურთელებს, ასევე გულშემატკივრებსც.
მალე ამ კოლეჯის შენობაზე მემორიალური დაფა გაჩნდა: “ეს წარწერა გვახსენებს უილიამ ვებ ელისის დიდებულ ქმედებას, რომელმაც 1823 წელს პირველმა დაარღვია ფეხბურთის თამაშის წესები და საფუძველი დაუდო რაგბის”.
მალე რაგბი პოპულარული გახდა ყველა კონტინენტზე და 1900, 1908, 1920, 1924 წლებში ოლიმპიურ თამაშთა პროგრამაშიც “დაიბადა”.
ბექა დოგრაშვილი
მსოფლიოს ცნობილი დიქტატორები თურმე მხოლოდ თავიანთი პოლიტიკური კარიერით არ ინტერესებოდნენ და ფეხბურთის დიდი ფანებიც ყოფილან. ამის შესახებ უცხოურ პრესაში არაერთი სტატიაა დაწერილი, სადაც ფაქტებით ასაბუთებენ ამა თუ იმ დიქტატორის ფეხბურთისადმი სიყვარულს.
ლიბიის ყოფილი დიქტატორის მუამარ კადაფის ცხოვრება გაცილებით უცნაური და საიდუმლოებებით მოცულია, ვიდრე ეს ერთი შეხევდვით ჩანს.
ბრიტანულ პრესაში ლიბიელი ექს-დიქტატორის სიცოცხლის ბოლო წუთების ფოტოები გამოქვეყნდა, სადაც ნათლად ჩანს, რომ კადაფის “ლივერპულის” ლოგოს გამოსახულებიანი ფინჯანი ჰქონდა. სურათი იმ ადგილზეა გადაღებული, სადაც კადაფი 2-კვირის განმავლობაში იმალებოდა.
ეს კადაფის ოჯახის მერსისაიდულ კლუბთან დაკავშირების პირველი შემთხვევა არაა. 2002 წელს მაშინ, როდესაც კადაფის შვილი – საადი იტალიის სერია A-ში და ლიბიის ეროვნულ ნაკრებში გამოდიოდა, ხშირად საუბრობდნენ იმის შესახებ, რომ “ლივერპულში” ლიბიური ინვესტიციები ჩაიდებოდა.
ამ ყველაფრის მიუხედავად, კადაფის “ლივერპულისადმი” სიყვარული ჯერაც საიდუმლოებებით მოცულია.
Daily Mirror-ის რეპორტიორის განცხადებით, კადაფს “ევერტონის” მიმართაც ჰქონია გარკვეული სიმპათიები მით უფრო მას შემდეგ, რაც “ლურჯებმა” 1979 წელს ლიბიური ტურნე მოაწყვეს.
მუამარ კადაფი პირველი პოლიტიკური ფიგურა არ არის, ვისაც საფეხბურთო კლუბის ფანობას “აბრალებენ”. მწერალ ადამ რობინსონი “ალ ქაიდას” ლიდერ ოსამა ბინ ლადენზე წერს, რომ ის თავის დროზე ლონდონის “არსენალს” ქომაგობდა. მიუხედავად იმისა, რომ “მეთოფეთა” ფანებმა ბინ ლადენის მისამართით სკანდირებდნენ (“ოსამა, ვოაჰ-ვოაჰ, ოსამა, ვოაჰ-ვოაჰ, ის იმალება ქაბულში და მას უყვარს “არსენალი”), “ალ ქაიდას” ლიდერს “არსენალის” მიმართ განსაკუთრებული ერთგულება არ გამოუხატავს.
1936 წლის 7 აგვისტოს ბერლინის ოლიმპიურ თამაშებზე გერმანიის ნაკრები ნორვეგიის ნაკრებს ხვდებოდა. სტადიონზე ერთი გამორჩეული სტუმარი იყო – ადოლფ ჰიტლერი. ეს იყო ფაშისტური გერმანიის ლიდერისთვის საფეხბურთო მატჩზე პირველი სტუმრობა. იმ მატჩში გერმანელები 0:2 დამარცხდნენ. როგორც ცნობილია, ჰიტლერი “შალკეს” ფანი იყო, თუმცა ამის დამასაბუთებელი მასალა არ არსებობს. ჰიტლერის მმართველობის პერიოდი “ხუმარების” ოქროს ხანა იყო, 1934-1942 წლებში “შალკემ” 6-ჯერ მოახერხა გერმანიის ჩემპიონობა.
ფაშისტური იტალიის ლიდერი ბენიტო მუსოლინი კი “ბოლონიას” ქომაგობდა. იტალიელი დიქტატორი ფორლიში დაიბადა, რაც სულ რამდენიმე კილომეტრითაა დაშორებული ქალაქ ბოლონიას.
ბოსნიის სერბეთის რესპუბლიკის პირველი პრეზიდენტი რადოვან კარაჯიჩი მილანის “ინტერის” ფანია. სერბი პოლიტიკოსი ამჟამად დაპატიმრებულია სამხედრო დანაშაულებების ბრალდებით.
ბექა დოგრაშვილი
ამბავი, რომელსაც ახლა მოგითხრობთ, საკუთარი ქვეყნის ნაკრებზე უზომოდ შეყვარებული ირლანდიელი ქომაგის შესახებაა. დუბლინის მკვიდრი დევიდ ფინი სამშობლოდან შორეულ ავსტრალიაში 16 წლის წინათ გადაიხვეწა. საბედნიეროდ, ევროპიდან ავსტრალიაში საფეხბურთო მატჩების ტელეტრანსლაციის განხორციელების პრობლემა არ დგას. ფინიც ცდილობდა, ხელიდან არ გაეშვა ეროვნული ნაკრების მატჩების ტელევიზიით ხილვის შესაძლებლობა, თუმცა…
გასულ კვირას მისთვის დაუჯერებელი რამ მოხდა: ფინიმ ტელეპროგრამაში ირლანდიისა და შვედეთის ნაკრებების საკვალიფიკაციო ეტაპის მატჩი ვერ იპოვა. ადგილობრივ ტელევიზიებში მას განუმარტეს, რომ აღნიშნული შეხვედრის ტრანსლირებას არ გეგმავდნენ. 38 წლის ფინიმ ინიციატივა საკუთარ თავზე აიღო…
საზრიანი ქომაგი იმ კომპანიას დაუკავშირდა, რომელიც აღნიშნული მატჩის ჩვენებაზე უფლებებს ფლობდა: „ირლანდიისა და შვედეთის ნაკრებებს შორის გასამართი მატჩის ჩვენებაზე ამ თქვენი უფლებების შეძენა მინდა“.
კომპანიის თანამშრომლები ასეთმა მოულოდნელმა შემოთავაზებამ განაცვიფრა და დევიდი ზრდილობიანად უარით გაისტუმრეს. ჯიუტმა ირლანდიელმა ხელი არ ჩაიქნია და მეორე დღეს კომპანიას გაუმჯობესებული წინადადებით მიმართა. რაც არ უნდა უცნაური იყოს, მას მწვანე შუქი აუნთეს.
ტრანსლაციის განხორციელებაზე ფინი იმ ტელეარხს მოელაპარაკა, რომელიც ბარებში, კაზინოებსა და ავსტრალიის მთელ აღმოსავლეთ სანაპიროზე პოპულარულია. ნაკრებისადმი სიყვარული დევიდ ფინის რამდენიმე ათასი დოლარი დაუჯდა.
– დევიდ, საიდან გაქვთ ამდენი პირადი თანხა? – დაინტერესდა ჟურნალისტი.
– არც მქონია და არც მაქვს. ყველაზე რთული ჩემი მეუღლის დარწმუნება იყო. მეწინააღმდეგებოდა, თუმცა სიტყვა მივეცი, რომ რასაც ამ ტელეტრანსლაციისთვის დახარჯავდა, უკლებლივ უკან დაუბრუნდებოდა.
ირლანდიელმა ფეხბურთელებმა ავსტრალიაში მცხოვრები მათი თანამემამულე ვერ გაახარეს და მატჩი ანგარიშით 1:2 დათმეს.
ბექა დოგრაშვილი
საქართველოსა და საფრანგეთის ეროვნულ ნაკრებთა შორის „დინამო არენაზე“ გამართული მატჩის (0:0) მიმდინარეობისას მოედანზე ახალგაზრდა გულშემატკივარი შეიჭრა, რომელიც გიორგი ლორიას ჩაეხუტა და მოედანი თავისივე ნებით დატოვა.
გთავაზობთ აღნიშნული ფაქტის ამსახველ ვიდეომასალას.
მსოფლიო ფეხბურთის განვითარებაში ქართველებსაც გვაქვს მნიშვნელოვანი წვლილი შეტანილი და ეს არ გახლავთ ლიტონი სიტყვები. მიხეილ მესხის სახელობის სტადიონზე ბატონ სულხან იაშვილს შევხვდით, რომელიც თანამედროვე ფეხბურთის ერთ-ერთი წესის თანაავტორი გახლავთ. მოგეხსენებათ, მეკარეს ბურთის ხელში აღება არ შეუძლია, როცა მას გადაცემას მისივე გუნდის მოთამაშე ფეხით აწვდის. თავის დროზე აღნიშნული წესი მსოფლიო ფეხბურთის მმართველ ორგანოს სწორედ ბატონმა სულხანმა შესთავაზა.
„ეს წესი 20 წელზე დიდი ხანია, რაც დაინერგა. ამის საშუალებით სათამაშო ტემპი ნარჩუნდება. ფიფას ყოფილი და ამჟამინდელი პრეზიდენტებისგან – ჟოაო აველანჟისა და ზეპ ბლატერისგან მადლობის წერილებიც მაქვს მიღებული. 2006 წელს ბლატერმა წიგნი გამომიგზავნა ფიფას 100 წლიანი ისტორიის შესახებ. თბილისის „დინამოს“ ძველი გულშემატკივარი ვარ. თავის დროზე ფეხბურთს მეც ვთამაშობდი. თავისუფალ დროს საფეხბურთო სტატისტიკის მოძიებით ვარ დაკავებული“, – აღნიშნავს ბატონი სულხანი.
სულხან იაშვილმა გაგვანდო, რომ კიდევ აქვს შემუშავებული სხვადასხვა საფეხბურთო წესები.
„ერთ-ერთი წესის მიხედვით, თავით პასის დროს თამაშგარე მდგომარეობა არ უნდა დაფიქსირდეს. აღნიშნული იდეა ფიფას შევთავაზე, თუმცა იქიდან წერილი მოვიდა, რომ ეს ჯერ ეროვნულმა ფედერაციამ უნდა გამოსცადოს. სამწუხაროდ, ამას საქართველოს ფეხბურთის ფედერაციიდან დაინტერესება არ მოჰყოლია. მეორე წესიც მაქვს: კუთხურის ჩაწოდების, საჯარიმო და თავისუფალი დარტმების დროს მეკარის ბაქანზე მოედნის ფეხბურთელები არ უნდა შევიდნენ. ასეთ დროს მოთამაშეთა შორის ერთი გაწამაწია იმართება ხოლმე, თან მეკარესაც ხელს უშლიან. ეს წესი ამ პრობლემას შეძლებისდაგვარად მოაგვარებს“, – გვითხრა ბატონმა სულხანმა.
შესაძლოა, აღნიშნული წესების დანერგვა გამოსაცდელი ვადით მაინც ღირდეს.
სულხან იაშვილის თქმით, ის საფეხბურთო წიგნის – „მსოფლიოში ფეხბურთს ქართული წესითაც თამაშობენ“ გამოცემას აპირებს, რომელშიც განხილული იქნება სხვადასხვა საინტერესო საკითხები: ფეხბურთის ისტორია, ფეხბურთის როლი ეროვნულ მოძრაობაში, ფეარ-პლეის პრინციპი და სხვა. წიგნის გამოცემას გარკვეული თანხა სჭირდება. სამწუხაროდ, ამის დამფინანსებელი ჯერჯერობით არ გამოჩენილა, თუმცა იმედს ვიტოვებთ, რომ აღნიშნული წიგნი გამოიცემა, თუნდაც იმიტომ, რომ „მსოფლიოში ფეხბურთს ქართული წესითაც თამაშობენ“ და ეს არ არის ლიტონი სიტყვები, ეს ფაქტია.
