Mauro Icardi – Fanebi.Com – ფეხბურთი, კალათბურთი, რაგბი, სხვა

ბერგომი იკარდის ტრანსფერზე: “პსჟ”-ს “ინტერის” პრესტიჟი არ აქვს”

Posted on ივნისი 1, 2020 by ბექა დოგრაშვილი

როგორც მოგეხსენებათ, “პარი სენ-ჟერმენმა” მილანის “ინტერისგან” 58 მილიონ ევროდ მაურო იკარდის კონტრაქტი გამოისყიდა. აღნიშნულ ტრანსფერზე კომენატრი გააკეთა ლეგენდარულმა იტალიელმა ფეხბურთელმა, 1982 წლის მსოფლიოს ჩემპიონმა ჯუზეპე ბერგომიმ.

“ინტერმა” იკარდისთან დაკავშირებით გადაწყვეტილება ჯერ კიდევ გასულ წელს მიიღო. განვითარებული სიტუაციიდან გამომდინარე, ვფიქრობ, “პარი სენ-ჟერმენმა” ყველა დაინტერესებული მხარისთვის საუკეთესო გადაწყვეტილება მიიღო. იკარდი გადავიდა კლუბში, რომელსაც “ინტერის” პრესტიჟი არ გააჩნია, თუმცა მოგებული აქვს საფრანგეთის ჩემპიონატი და თეორიულად ჩემპიონთა ლიგის მოგებაც შეუძლია.

რომელუ ლუკაკუმ იკარდის შესაცვლელად ფანტასტიური სამუშაო გასწია. ასე რომ, ყველა კმაყოფილია”, – ციტირებს ბერგომის სიტყვებს “სქაი სპორტ იტალია”.

სვენ-გორან ერიქსონი: “ფერგიუსონი მოკვლით მემუქრებოდა, თუ რუნის მუნდიალზე წავიყვანდი”

Posted on ოქტომბერი 14, 2019ოქტომბერი 14, 2019 by ბექა დოგრაშვილი

ინგლისის ნაკრების ყოფილმა მთავარმა მწვრთნელმა სვენ-გორან ერიქსონმა გამოცემა “თაიმსს” საინტერესო ინტერვიუ მისცა, რომლის ერთ-ერთი მონაკვეთი “მანჩესტერ იუნაიტედის” ექსთავკაც ალექს ფერგიუსონთან მომხდარ ინციდენტს დაეთმო.

შვედმა სპეციალისტმა ინტერვიუში 2006 წელს მომხდარი ამბავი გაიხსენა. ამ პერიოდში “წითელი ეშმაკების” აწ უკვე ყოფილმა თავდამსხმელმა უეინ რუნიმ ტრავმა მიიღო და გამოჯანმრთელების პროცესი საკმაოდ გაეწელა. ინგლისელმა ფეხბურთელმა მსოფლიოს ჩემპიონატამდე ტრავმის მოშუშება ვერ მოასწრო, თუმცა უშუალოდ ტურნირის მიმდინარეობისას გამოჯამრთელებისა და თამაშის საშუალება ჰქონდა. ამის მიუხედავად, “მანჩესტერ იუნაიტედის” მთავარ მწვრთნელ ალექს ფერგიუსონს მუნდიალზე რუნის გაშვება არ სურდა, რასაც ერიქსონთან დაძაბული სატელეფონო საუბარი მოჰყვა.

შვედი სპეციალისტი იხსენებს:

“ალექსი უცნაური კაცი იყო. ასეთი ჩვევა ჰქონდა: დამირეკავდა დილის შვიდ საათზე ან უფრო ადრე და ყოველგვარი მისალმების გარეშე იწყებდა ყვირილით საუბარს. როდესაც ასეთი გაღიზიანებული იყო ხოლმე, მასთან კომუნიკაცია შეუძლებელი ხდებოდა.

მან ის დილაც ჩხუბით დაიწყო. ყვიროდა, რომ მომკლავდა, თუ რუნის მსოფლიოს ჩემპიონატზე წავიყვანდი.

მე მას ვკითხე: “რა ხდება ალექს, რაშია საქმე?” თუმცა, ის მე არ მისმენდა და განაგრძობდა ყვირილსა და მუქარას. საბოლოო ჯამში, ვუთხარი: “რუნის მსოფლიოს ჩემპიონატზე მაინც წავიყვან. კარგი შვებულება, ჩაო” და ტელეფონი გავუთიშე”.

უეინ რუნიმ 2006 წლის მსოფლიოს ჩემპიონატზე მართლაც ითამაშა, თუმცა “სამი ლომი” ტურნირს მეოთხედფინალურ ეტაპზე პორტუგალიის ნაკრებთან პენალტების სერიაში მარცხის შემდეგ გამოეთიშა.

იკარდი “ინტერს” სასამართლოში უჩივის

Posted on აგვისტო 31, 2019 by ბექა დოგრაშვილი

მილანის “ინტერის” თავდამსხმელი მაურო იკარდი მეტად არასახარბიელო მდგომარეობაში აღმოჩნდა. კლუბში ანტონიო კონტეს მოსვლის შემდეგ არგენტინელი ფეხბურთელი გუნდისთვის იმდენად არასაჭირო ფიგურა გახდა, რომ 26 წლის თავდამსხმელს არც საწვრთნელ პროცესში მონაწილეობის მიღების ნება ეძლევა. იკარდიმ მიმდინარე სატრანსფერო პერიოდში ვერც ახალ კლუბში გადასვლა მოახერხა.

ავტორიტეტული იტალიური გამოცემები იუწყებიან, რომ შექმნილი მდგომარეობიდან გამომდინარე მაურო იკარდი მილანის “ინტერს” სასამართლოში უჩივის და ვარჯიშებზე არდაშვების გამო კლუბისგან 1,5 მილიონ ევროს მოითხოვს. არგენტინელი ფეხბურთელი მთელი ზაფხულის განმავლობაში ინდივიდუალური პროგრამით ვარჯიშობდა.

შეგახსენებთ, რომ “ინტერმა” მიმდინარე სატრანსფერო პერიოდში რომელუ ლუკაკუ და ალექსის სანჩესი დაიმატა.

ანანიძე: “ბეილი ჩემზე ძლიერია, მაგრამ ჩემზე ხშირად ტრავმიანობს, აღნაგობა არაფერ შუაშია”

Posted on აგვისტო 14, 2019 by ბექა დოგრაშვილი

საქართველოს ნაკრებისა და მოსკოვის “სპარტაკის” ნახევარმცველმა ჯანო ანანიძემ რუსული კლუბის ოფიციალური ვებგვერდისთვის მიცემულ ინტერვიუში უარყო მოსაზრება, თითქოს მისი ხშირი ტრავმიანობა ფიზიკურ მონაცემებთან არის დაკავშირებული.

“სპარტაკის” ლიდერობა მსურს, თუმცა მესმის, რომ ეს ან ახლა მოხდება ან არასდროს. ვგრძნობ, რომ შემიძლია ისე ვითამაშო, როგორც ამას ჩემგან გულშემატკივრები მოელიან. სამწუხაროდ, ხშირად ტრავმები მიშლიდა ხელს. ფაქტობრივად ათი წლიდან სამი მკურნალობაში მაქვს გატარებული. ხშირად ვკითხულობ, თითქოს ყველაფერი ჩემი აღნაგობის ბრალია, მაგრამ შეხედეთ მადრიდის “რეალის” ფეხბურთელ გარეტ ბეილს. ის ჩემზე სამჯერ მეტს იწონის და კუნთებიც სამჯერ დიდი აქვს, თუმცა ჩემზე ხშირად ტრავმიანობს. მან “რეალში” ყოფნის ექვსი წლიდან მხოლოდ წელიწადნახევარი ითამაშა.

ალბათ, უფროსების წინააღმდეგ თამაში საკმაოდ ადრეულ ასაკში დავიწყე. გარდა ამისა, თავიდან სატრენაჟორო დარბაზებს ხშირად არ ვსტუმრობდი. ახლა გაცილებით ხშირად ვვარჯიშობ. იმას არ ვამბობ, რომ რობოტის დონემდე უნდა მიხვიდე, როცა ბურთსაც ვეღარ გრძნობ, მაგრამ პროფილაქტიკა აუცილებელია, რათა კუნთები და სახსრები კარგ მდგომარეობაში იყოს.

დეკემბრამდე უნდა ვაჩვენო, რა შემიძლია: გოლების გატანა, საგოლე გადაცემები. თამაშის მიმდინარეობის წაყვანა. მთავარი მწვრთნელისგან ნდობას ვგრძნობ და ეს მეხმარება”, – აღნიშნა ანანიძემ.

“ინტერმა” რაჯა ნაინგოლანი ტრანსფერზე დააყენა

Posted on ივნისი 7, 2019ივნისი 7, 2019 by ბექა დოგრაშვილი

მილანის “ინტერმა” გუნდის ნახევარმცველ რაჯა ნაინგოლანის ტრანსფერზე დაყენება გადაწყვიტა.

მილანურ გუნდში ბელგიელი ფეხბურთელის პირველი სეზონი არაერთმნიშვნელოვანი გამოდგა: ნაინგოლანმა დიდი პერიოდი ლაზარეთში გაატარა, თუმცა ცალკეულ შემთხვევებში ჰქონდა საკმაოდ კარგი თამაშებიც.

“კორიერე დელო სპორტი” წერს, რომ “ნერაძურიმ” ფეხბურთელთან განშორების გადაწყვეტილება მიიღო. წყაროს თანახმად, “ინტერის” ხელმძღვანელობამ ნაინგოლანის აგენტ ალესანდრო ბელტრამის უკვე აცნობა, რომ ფეხბურთელი ტრანსფერზეა დაყენებული.

ბუფონს “ბრეშა” ეპატიჟება

Posted on ივნისი 6, 2019 by ბექა დოგრაშვილი

ლეგენდარული იტალიელი მეკარე ჯანლუიჯი ბუფონი პროფესიული კარიერის დასრულებას ჯერ არ აპირებს.

“პარი სენ-ჟერმენიდან” წამოსვლის შემდეგ 41 წლის კიპერი, სავარაუდოდ, სამშობლოს მიაშურებს. Football Italia წერს, რომ ბუფონის დამატებით “ბრეშა” არის დაინტერესებული, რომელმაც ვეტერანი მეკარისთვის წინადადება უკვე მოამზადა. შეგახსენებთ, რომ “ბრეშამ” იტალიის სერია B მოიგო და დამდეგ წელს სერია A-ში იასპარეზებს.

როგორც მოგეხსენებათ, ჯანლუიჯი ბუფონმა გასული სეზონი “პარი სენ-ჟერმენში” გაატარა, რომლის რიგებშიც ყველა ტურნირზე ერთად 25 მატჩი ჩაატარა და ამდენივე გოლი გაუშვა. იტალიელი კიპერი პარიზული კლუბის გარდა კარიერის განმავლობაში ტურინის “იუვენტუსისა” და “პარმას” ღირსებას იცავდა.

ჯეიმს მილნერი: “მესიმ ვირი მიწოდა”

Posted on მაისი 26, 2019მაისი 26, 2019 by ბექა დოგრაშვილი

“ლივერპულის” ნახევარმცველმა ჯეიმს მილნერმა ჩემპიონთა ლიგის ნახევარფინალურ ეტაპზე “ბარსელონასთან” გამართული მატჩის მიმდინარეობისას ლიონელ მესისთან მომხდარი კონფლიქტის შესახებ ისაუბრა.

როგორც აღმოჩნდა, 33 წლის ინგლისელს ესპანური ენა ესმის. აღსანიშნავია, რომ ის შვილებს ხშირად სწორედ ესპანურ ენაზე ესაუბრება, სწორედ ასე გაიგო მან მესის ნათქვამი სიტყვები. მილნერმა “ენფილდზე”, “ლივერპულსა” და “ბარსელონას” შორის გამართული მატჩის პირველი ნახევრის შემდეგ არგენტინელთან საუბარი გაიხსენა.

“მესი უკმაყოფილო იყო. პირველი ტაიმის შემდეგ გასახდელისკენ მიმავალს ესპანურად საუბარი დამიწყო. მან მე მიწოდა “Burro”. ეს სიტყვა ითარგმნება, როგორც “ვირი”, თუმცა მგონია, რომ ამ ტერმინს ესპანურ ფეხბურთში უხეში ფეხბურთელების მიმართ იყენებენ.

მე მას ვკითხე, ყველაფერი რიგზე იყო თუ არა, თუმცა ყურადღება არ მომაქცია. ჩემი აზრით, ის ვერ მიხვდა, რომ ესპანური ენა მესმოდა. მან თქვა: “ასე უხეშად იმიტომ ითამაშე, რომ ბურთი ფეხებს შორის გაგიძვრინე.” მე საუბარი აღარ გამიგრძელებია და გასახდელში შევედი. მის მიმართ მხოლოდ აღტაცებას გამოვხატავ.

ამის მიუხედავად, მესის თამაშით აღფრთოვანებული ვარ. მას ყველაფრის თქმის უფლება აქვს. ცხადია, მის წინააღმდეგ თამაში რთულია. თუ მის შეჩერებას შეეცდები, შეიძლება, ისე მოხდეს, რომ სულელი გამოჩნდე. მეც ასე დამემართა – მან ბურთი ფეხებს შორის გამიძვრინა, ამ კადრს კი მილიონობით ნახვა აქვს. მე არც პირველი ვყოფილვარ და არც უკანასკნელი. ის შეუდარებელი ფეხბურთელია”, – აღნიშნა მილნერმა “დეილი მეილთან” საუბრისას.

ზინედინ ზიდანმა ფლორენტინო პერესს ექვსი მოთხოვნა წაუყენა

Posted on მარტი 12, 2019 by ბექა დოგრაშვილი

“მარკას” ცნობით, მადრიდის “რეალის” მთავარმა მწვრთნელმა ზინედინ ზიდანმა კლუბის პრეზიდენტ ფლორენტინო პერესს მოლაპარაკების პროცესში ექვსი მოთხოვნა წაუყენა:

1. გუნდზე სრული კონტროლი;
2. იმ მოთამაშეების გაყიდვა, რომლებიც არ სჭირდება;
3. მარსელო და ისკო არ იყიდებიან;
4. გუნდი ნეიმარს არ შეიძენს;
5. ხამეს როდრიგესი არ დაბრუნდება;
6. გუნდი მბაპეს ყიდვას შეეცდება.

შეგახსენებთ, რომ გუშინ მადრიდის “რეალმა” გუნდის მთავარი მწვრთნელის პოსტიდან სანტიაგო სოლარი გაათავისუფლა, თავკაცის თანამდებობაზე კი ზინედინ ზიდანი დაბრუნდა. მხარეებს შორის გაფორმებულ შრომით ხელშეკრულებას ძალა 2022 წლის ზაფხულამდე ექნება.

როგორც მოგეხსენებათ, ფრანგი სპეციალისტი “სამეფო კლუბს” 2016 წლის იანვრიდან 2018 წლის მაისამდე თავკაცობდა. ამ არასრული სამი წლის განმავლობაში გუნდმა ცხრა ტიტული დაისაკუთრა, მათ შორის ზედიზედ სამჯერ ჩემპიონთა ლიგის გამარჯვებული გახდა, ერთხელ კი ესპანეთის პრიმერადივიზიონი მოიგო.

“რეალს” ესპანეთის პრიმერადივიზიონის 27-ე ტურის თავზე სატურნირო ცხრილში მესამე ადგილი უკავია და ლიდერ “ბარსელონას” 12 ქულით ჩამორჩება. გუნდმა ჩემპიონთა ლიგის მერვედფინალურ ეტაპზე ამსტერდამის “აიაქსის” ბარიერი ვერ დაძლია (ორი მატჩის ჯამში 3:5). “სამეფო კლუბი” ესპანეთის თასის გათამაშებასაც გამოეთიშა, სადაც “ბარსელონასთან” ნახევარფინალში დამარცხდა (ორი მატჩის ჯამში 1:4).

იკარდის მეუღლე: “მე საფეხბურთო რევოლუციონერი ვარ”

Posted on თებერვალი 27, 2019 by ბექა დოგრაშვილი

მილანის “ინტერის” ფორვარდ მაურო იკარდის მეუღლემ ვანდა ნარამ, რომელიც ამავდროულად ფეხბურთელის აგენტიც გახლავთ, საკუთარ თავს საფეხბურთო რევოლუციონერი უწოდა.

“ყოველთვის ვამბობდი, რომ იკარდის აგენტად მუშაობა იოლი საქმეა, ვინაიდან ის ევროპის ერთ-ერთი საუკეთესო ფეხბურთელია. ბევრ მოთამაშეს ჰყავს აგენტად აყვანილი საკუთარი ნათესავი, მაგრამ მათ შორის ქალი არ არის. ფეხბურთის სამყაროში ქალები შინ სხედან და ჩუმად არიან. აი, ამიტომ ვარ მე რევოლუციონერი.

საკუთარი თავის წარდგენა არ მჭირდება, ვინაიდან მე ყველაზე წარმატებულ საფეხბურთო ტელეპროგრამაში ვმუშაობ, ვარ გავლენიანი ადამიანი. გარდა ამისა, გახლავართ დედა, მეუღლე, მეგობარი, ერთგული, მოკრძალებული, გულწრფელი, პირდაპირი და კარგი ადამიანი”, – ციტირებს ვანდა ნარას სიტყვებს Нару Gente.

შეგახსენებთ, რომ მაურო იკარდისა და მილანის “ინტერს” შორის ურთიერთობა გაფუჭებულია. კლუბმა ფეხბურთელს კაპიტნის სამკლაური ჩამოართვა, თავად იკარდი კი გუნდში თამაშზე უარს აცხადებს. ვანდა ნარას სურს, რომ იკარდის ხელფასის სახით წელიწადში ათი მილიონი ევრო ჰქონდეს, თუმცა მხარეები ამაზე ვერ თანხმდებიან.

ოლე გუნარ სულშერი: “ალექსის სანჩესი კეტჩუპის ბოთლს ჰგავს”

Posted on თებერვალი 18, 2019 by ბექა დოგრაშვილი

“მანჩესტერ იუნაიტედის” მთავარმა მწვრთნელმა ოლე გუნარ სულშერმა გუნდის ფორვარდ ალექსის სანჩესის შესახებ ისაუბრა და ჩილელი ფეხბურთელი კეტჩუპის ბოთლს შეადარა.

“ალექსის სანჩესი კარგი მოთამაშეა. ის ძალზედ ნიჭიერია, მაგრამ გარკვეული ასპექტების გაუმჯობესება მართებს. თქვენ ეს კარგად დაინახეთ “ფულემის” წინააღმდეგ გამართულ მატჩში.

ალექსის სანჩესი აქტიური იყო, ბურთის მოპოვებასაც ცდილობდა და მთელი ენერგიაც გამოიყენა. თუ გოლების გატანასაც დაიწყებს, თავდაჯერება შეემატება. ვიცით, რომ მისი სახით ძალიან კარგი ფეხბურთელი გვყავს.

ალექსის სანჩესი კეტჩუპის ბოთლივით არის. თავიდან კეტჩუპი ბოთლიდან არ გამოდის, ცოტაოდენ შეანჯღრევ და ზედმეტი რაოდენობით გამოვა”, – ციტირებს სულშერის სიტყვებს “სქაი სპორტსი”.

ნიკოლო ძანიოლო: “მინდა, რომ “რომას” ლეგენდად ვიქცე”

Posted on თებერვალი 18, 2019 by ბექა დოგრაშვილი

უეფას ჩემპიონთა ლიგის მერვედფინალურ ეტაპზე “რომასა” და “პორტუს” შორის გამართული პირველი შეხვედრა იტალიელთა გამარჯვებით, ანგარიშით 2:1 დასრულდა. მატჩის გმირი რომაელთა 19 წლის ნახევარმცველი ნიკოლო ძანიოლო გახდა, რომელმაც დუბლი გაიფორმა.

პრესაში სულ უფრო ხშირად იწერება იმის შესახებ, რომ ძანიოლოთი წამყვანი ევროპული კლუბები დაინტერესდნენ. ზოგიერთი მედიასაშუალება ფეხბურთელის სატრანსფერო ღირებულებად მინიმუმ 50 მილიონ ევროსაც ასახელებს.

თავად ნიკოლო ძანიოლო აცხადებს, რომ არსად წასვლას არ აპირებს და “რომას” ლეგენდად ქცევა სურს.

“მინდა, რომ “რომას” სიმბოლოდ ვიქცე. ჩემი მიზანი აქ სამუდამოდ დარჩენაა. არ ვფიქრობ, რომ რამით ფრანჩესკო ტოტის ვგავარ, თუმცა მის მსგავსად მეც მინდა, რომ მთელი კარიერა აქ გვატარო”. თქვა ძანიოლომ ტელეშოუში Le Iene.

ძანიოლომ ისიც აღნიშნა, რომ მართვის მოწმობას არ ფლობს და ვარჯიშებზე დედას დაჰყავს. ცოტა ხნის წინ ფეხბურთელმა დედამისს სოციალურ ქსელში გამომწვევი ფოტოების გამოქვეყნებისგან თავის შეკავებაც სთხოვა.

მაურო იკარდიმ “იუვენტუსთან” წინასწარი შეთანხმება გააფორმა?

Posted on თებერვალი 16, 2019 by ბექა დოგრაშვილი

იტალიელი ჟურნალისტი ვალერ დე მაჯიო ირწმუნება, რომ მილანის “ინტერის” თავდამსხმელმა მაურო იკარიდმ ტურინის “იუვენტუსთან” წინასწარი შეთანხმება გააფორმა.

“ვფიქრობ, “ინტერში” უკვე იციან, რომ იკარდიმ “იუვენტუსთან” შეთანხმება გააფორმა. ჯუზეპე მაროტა (“ინტერის” გენერალური დირექტორი) უმაღლესი დონის მენეჯერია”, – ციტირებს იტალიელი ჟურნალისტის სიტყვებს “სქაი სპორტსი”.

შეგახსენებთ, რომ “ინტერმა” მაურო იკარდის გუნდის კაპიტნის სამკლაური ჩამოართვა. არგენტინელ ფეხბურთელს არც ევროპის ლიგის მეთექვსმეტედფინალურ ეტაპზე ვენის “რაპიდთან” გუშინ გამართულ მატჩში (1:0) მიუღია მონაწილეობა. მხარეები კონტრაქტის გახანგრძლივების თაობაზე მოლაპარაკებებს აწარმოებდნენ, თუმცა ამ დრომდე ვერ მორიგდნენ.

მაურო იკარდიმ მიმდინარე სეზონში “ინტერის” ფორმით 28 მატჩი ჩაატარა, 15 გოლი გაიტანა და ორი შედეგიანი გადაცემა მიითვალა.