Carlo Ancelotti – გვერდი 4 – Fanebi.Com – ფეხბურთი, კალათბურთი, რაგბი, სხვა

2014 წლის მწვრთნელად იოახიმ ლიოვი დასახელდა

Posted on იანვარი 12, 2015 by ბექა დოგრაშვილი

შვეიცარიის ქალაქ ციურიხში მიმდინარე “ოქროს ბურთის” დაჯილდოების ცერემონიაზე 2014 წლის საუკეთესო მთავარი მწვრთნელი დაასახელეს. ეს წოდება გერმანიის ნაკრების თავკაცმა იოახიმ ლიოვმა მოიპოვა, რომელიც “ბუნდესთიმთან” ერთად მსოფლიოს ჩემპიონი გახდა. გამოკითხვაში ფეხბურთის გერმანელმა სპეციალისტმა ხმათა 36,23 პროცენტი მიიღო. მეორე ადგილზე გავიდა მადრიდის “რეალის” მთავარი მწვრთნელი კარლო ანჩელოტი (22,06%). საუკეთესო სამეულს “ატლეტიკოს” თავკაცი დიეგო სიმეონე ხურავს (19,02%).

“არ ვთვლი, რომ ეს ჯილდო მხოლოდ მე მეკუთვნის, ეს მთელი ნაკრების საკუთრებაა. გერმანულ ფეხბურთში წლების განმავლობაში შეიქმნა ისეთი პირობები, რამაც ბრაზილიაში გამარჯვების შესაძლებლობა მოგვცა. ეს წოდება იმაზე მიუთითებს, რომ მეც და სამწვრთნელო შტაბის დანარჩენი წევრებიც სწორი მიმართულებით მივდიოდით. 2014 წლის მწვრთნელებად გერმანიის ახალგაზრდული გუნდის თავკაცებსაც დავასახელებდი. მათაც დიდი წვლილი მიუძღვით ამ გამარჯვებაში. ლომის წილი დაიდეს იმათმაც, ვინც ჩვენს ქვეყანაში საფეხბურთო სტრუქტურა შექმნეს. არ შეიძლება, არ აღვნიშნო ბუნდესლიგა, რომლის გარეშეც განვითარება შეუძლებელი იქნებოდა. თანაშემწეების დახმარების გარეშე ეს ყველაფერი მიუღწეველი დარჩებოდა. ვთვლი, რომ ამ ჯილდოს ანჩელოტი და სიმეონეც იმსახურებენ”, – განაცხადა ლიოვმა.

ფიფამ “წლის მწვრთნელის” ჯილდოს პრეტენდენტები დაასახელა

Posted on დეკემბერი 2, 2014 by ბექა დოგრაშვილი

ფიფამ “წლის მწვრთნელის” პრეტენდენტები დაასახელა.

წლის საუკეთესო მწვრთნელის ჯილდოზე წარდგენილნი არიან: მადრიდის “რეალის” თავკაცი კარლო ანჩელოტი, გერმანიის ეროვნული ნაკრების მთავარი მწვრთნელი იოახიმ ლიოვი და მადრიდის “ატლეტიკოს” დამრიგებელი დიეგო სიმეონე.

შეგახსენებთ, რომ ანჩელოტი “რეალთან” ერთად ესპანეთის სამეფო თასის, ჩემპიონთა ლიგის თასისა და უეფას სუპერთასის მფლობელი გახდა. ლიოვმა გერმანიის ნაკრებთან ერთად მსოფლიოს ჩემპიონატი მოიგო. სიმეონე “ატლეტიკოსთან” ერთად ესპანეთის ჩემპიონატის გამარჯვებული გახდა, მოიგო ქვეყნის სუპერთასიც და გავიდა ჩემპიონთა ლიგის ფინალში.

წლის საუკეთესო მწვრთნელის ვინაობა 2015 წლის 12 იანვარს, “ოქროს ბურთის” დაჯილდოების ცერემონიაზე გახდება ცნობილი.

ანჩელოტი: “ბალოტელის შეძენა შეგვეძლო, მაგრამ ზლატანი ვიყიდეთ”

Posted on ნოემბერი 25, 2014 by ბექა დოგრაშვილი

მადრიდის “რეალის” მთავარი მწვრთნელი კარლო ანჩელოტი გამოტყდა, რომ 2012 წელს “პარი სენ-ჟერმენში” მუშაობის დროს მარიო ბალოტელის შეძენის შესაძლებლობა ჰქონდა.

“როდესაც “პარი სენ-ჟერმენში” ვმუშაობდი, ბალოტელის შეძენის მცდელობა მქონდა. ევროპის 2012 წლის ჩემპიონატზე მან საკმაოდ კარგად წარმოაჩინა თავი. თუმცა, შემდეგ ზლატან იბრაჰიმოვიჩის შეძენის შესაძლებლობა გაჩნდა და გადავწყვიტეთ, რომ შვედი ფეხბურთელი გვეყიდა. ეს უფრო უსაფრთხო ვარიანტი იყო”, – აღნიშნა ანჩელოტიმ “ლა რეპუბლიკასთვის” მიცემულ ინტერვიუში.

ანჩელოტი: „იტალიაში მხოლოდ „მილანის“ გულისთვის დავბრუნდებოდი“

Posted on ნოემბერი 24, 2014 by Alix

„რეალის“ მთავარმა მწვრთნელმა კარლო ანჩელოტიმ თავისი ყოფილი გუნდის „მილანის“ წევრებთან ურთიერთობებზე ისაუბრა.

„როდესაც „მილანს“ ვწრთვნიდი, არც კი ვიფიქრებდი, რომ ოდესმე ინძაგი, ზეედორფი და გატუზო ჩემი კოლეგები გახდებოდნენ. გატუზო ჩემთვის როგორც ძმა იყო, მიუხედავად იმისა, რომ მისი მწვრთNელი ვიყავი. ჩვენ ერთმანეთის კარგად გვესმოდა. მე მას იმას ვეუბნებოდი, რასაც სხვას არავის ვეტყოდი.

გამიხარდება, თუ მეტყვიან, რომ ჩემგან პიპომ, კლარენსმა და ჯენარომ რაღაც ისწავლეს და სამწვრთნელო საქმიანობაში გამოიყენეს.

„მილანის“ ამჟამინდლეი მდგომარეობა? კლუბის ცვლილებების პროცესშია. „როსონერი“ ძველ დიდებას აუცილებლად დაიბრუნებს.

თუ იტალიაში დაბრუნებას გადავწყვიტავ, მაშნ მხოლოდ „მილანში“ ვიმუშავებ“, – განაცხადა ანჩელოტიმ.

ანჩელოტი: “გავიმარჯვეთ იმიტომ, რომ ეს ძალიან გვინდოდა”

Posted on ოქტომბერი 26, 2014 by ბექა დოგრაშვილი

სეზონის პირველი “ელ კლასიკო” მადრიდელთა გამარჯვებით დასრულდა. “რეალმა” “ბარსელონა” ანგარიშით 3:1 დაამარცხა.

“სამეფო კლუბის” მთავარი მწვრთნელი კარლო ანჩელოტი ფეხბურთელების მოქმედებებით კმაყოფილი დარჩა. იტალიელმა სპეციალისტმა აღნიშნა, რომ გუნდი მატჩს კარგი განწყობით შეხვდა, რამაც შედეგიც გამოიღო.

“კარგია, რომ გაშვებული გოლის შემდეგ ხელები არ ჩამოვუშვით. არსებულ გეგმას მივყევით და ამან გაამართლა.
კარგი თამაში გამოვიდა, საკმაოდ მაღალი ტემპი იყო. ოთხშაბათს ჩემპიონთა ლიგაზე გამართული შეხვედრის შემდეგ ძალები აღვიდგინეთ.
ყოველთვის მიმაჩნდა, რომ დაცვაში ჩემი გუნდის პრობლემები კლასის ნაკლებობით არ იყო გამოწვეული, უბრალოდ ამ ნაკლის გამოსწორებაზე თავდაუზოგავი მუშაობა გვმართებდა.
პროფესიონალების გუნდი მყავს. ფეხბურთელებს ესმით, რას ნიშნავს “რეალში” თამაში.
შემტევი ფეხბურთის თამაში გვსურდა, ბურთს ვფლობდით და ფლანგებს ვიყენებდით. გავიმარჯვეთ იმიტომ, რომ ეს ძალიან გვინდოდა”, – ციტირებს ანჩელოტის სიტყვებს “ასი”.

ანჩელოტი: “რონალდუ კარიერას “რეალში” დაასრულებს”

Posted on ოქტომბერი 20, 2014 by ბექა დოგრაშვილი

“რეალის” მთავარმა მწვრთნელმა კარლო ანჩელოტიმ მადრიდული ინჩადა დაარწმუნა იმაში, რომ კლუბის ლიდერი კრიშტიანუ რონალდუ “მანჩესტერ იუნაიტედში” დაბრუნებას არ აპირებს.

“ნებისმიერი ფეხბურთელის შეცვლა შეიძლება, თუმცა დღესდღეობით რონალდუ მსოფლიოს მასშტაბით საუკეთესო მოთამაშეა და მისი წასვლით ნომერ პირველ ფეხბურთელს დავკარგავთ, რაც სეროზული დანაკლისი იქნება.

თუმცა, ეს არ მოხდება, რადგან რონალდუ კარიერის ბოლომდე “რეალში” დარჩენას აპირებს. ასი პროცენტით დარწმუენებული ვარ, რომ რონალდუ მომდევნო სეზონში “მანჩესტერ იუნაიტედში” არ გადავა.

აქ მისით ყველა კმაყოფილია, აქ ის ყველას უყვარს. მას კლუბთან შესანიშნავი ურთიერთობა აქვს და არა მგონია, ამ მხრივ რაიმე შეიცვალოს. რონალდუ კარიერას აქ დაასრულებს”, – ციტირებს ანჩელოტის სიტყვებს ბრიტანული გამოცემა “სანი”.

ანჩელოტი ჯერარდს “მილანში” უხმობდა

Posted on ოქტომბერი 20, 2014ოქტომბერი 20, 2014 by ბექა დოგრაშვილი

მადრიდის “რეალის” მთავარმა მწვრთნელმა კარლო ანჩელოტიმ ჩემპიონთა ლიგის ჯგუფურ ეტაპზე “ლივერპულის” წინააღმდეგ გასამართ მატჩამდე მერსისაიდული გუნდის ლიდერ სტივენ ჯერარდთან დაკავშირებული ერთი ისტორია გაიხსენა. თურმე, იტალიელი სპეციალისტი “მილანის” თავკაცის პოსტზე მუშაობის პერიოდში ჯერარდის გადაბირებას ცდილობდა.

“ჯერარდი ლიდერია. ის დიდებულ ფეხბურთელია, “ლივერპულის” ყველაზე მნიშვნელოვანი ფიგურაა. ჯერარდი მერსისაიდელი პაოლო მალდინია.

ის ერთ-ერთი ფეხბურთელია, ვის ყოლასაც ვისურვებდი ჩემს გუნდში. “მილანში” მუშაობის პერიოდში მის მოწვევაზე ბევრი მიფიქრია, თუმცა ამ ტრანსფერის განხორციელება შეუძლებელი იყო, რადგან ჯერარდი “ლივერპულთან” მჭიდროდ არის დაკავშირებული. მაშინ ჩვენ მას დავუკავშირდით, თუმცა მისი დარწმუნება შეუძლებელი აღმოჩნდა.

არ მახსოვს, ეს რომელ წელს იყო, თუმცა მის გადმობირებას ნამდვილად ვცდლობდით. მინდოდა, რომ მოედნის ცენტრში სტივენ ჯერარდი და ანდრეა პირლო შემეწყვილებინა. ეს ფანტასტიური დუეტი იქნებოდა”, – ციტირებს ანჩელოტის სიტყვებს “სქაი სპორტსი”.

ცნობისათვის, “ლივერპულსა” და “რეალს” შორის მატჩი 22 ოქტომბერს გაიმართება და თბილისის დროით 22:45 საათზე დაიწყება.

ანჩელოტიმ სკუდეტოს მთავარი ფავორიტი დაასახელა

Posted on ოქტომბერი 4, 2014 by ბექა დოგრაშვილი

მადრიდის “რეალის” მთავარმა მწვრთნელმა კარლო ანჩელოტიმ იტალიის სერია A-ს VI ტურის ცენტრალური მატჩის შესახებ ისაუბრა, რომელიც ტურინის “იუვენტუსსა” და “რომას” შორის გაიმართება. გარდა ამისა, იტალიელმა სპეციალისტმა სკუდეტოს მოპოვების მთავარი პრეტენდენტიც დაასახელა.

“რთული სათქმელია, რა შედეგით დასრულდება მატჩი, თუმცა ვიმედოვნებ, კარგი თამაში გამოვა და საზღვრებს გარეთ იტალური ფეხბურთის იმიჯს გამოასწორებს. რომელი გუნდი მოიგებს სკუდეტოს? თავს უფლებას მივცემ და ვიტყვი, რომ ჩემპიონი “რომა” გახდება”, – განაცხადა ანჩელოტიმ, რომელსაც როგორც “იუვენტუსში”, ასევე “რომაშ” უმუშავია.

მატჩი “იუვენტუსსა” და “რომას” შორის კვირას, თბილისის დროით 20:00 საათზე დაიწყება.

ანჩელოტიმ მიანიშნა, რატომ გადავიდა დი მარია “მანჩესტერ იუნაიტედში”

Posted on სექტემბერი 2, 2014სექტემბერი 1, 2014 by ბექა დოგრაშვილი

მადრიდის “რეალის” მთავარმა მწვრთნელმა კარლო ანჩელოტიმ მიანიშნა, რომ ანხელ დი მარია “სამეფო კლუბიდან” “მანჩესტერ იუნაიტედში” მხოლოდ უკეთესი ფინანსური შემოთავაზების გამო გადავიდა.

“ზოგ ფეხბურთელს ბრძოლა უყვარს, ზოგს კი მეტი თანხის გამომუშავება ურჩევნია. თუ მოთამაშეს მსოფლიოს საუკეთესო კლუბში სათამაშოდ მოტივაცია სჭირდება, პრობლემას ვერ ვხედავ, რომ ის სხვა გუნდში გავუშვა”, – ციტირებს ანჩელოტის სიტყვებს “ევროსპორტი”.

შეგახსენებთ, რომ დი მარიამ “წითელ ეშმაკებთან” ხუთწლიანი კონტრაქტი გააფორმა. ინგლისურმა კლუბმა მის სანაცვლოდ 59.7 მილიონი ფუნტ სტერლინგი გაიღო.

უეფას სუპერთასი — ანჩელოტის წინასამატჩო სიტყვა

Posted on აგვისტო 12, 2014 by ბექა დოგრაშვილი

დღეს უეფას სუპერთასის მატჩში ჩემპიონთა ლიგის გამარჯვებული მადრიდის “რეალი” ევროპის ლიგის ჩემპიონ “სევილიას” უელსის დედაქალაქ კარდიფში დაუპირისპირდება. “სამეფო კლუბის” მთავარი მწვრთნელი კარლო ანჩელოტი პოზიტიურად არის განწყობილი და ამბობს, რომ გუნდს ახალ სეზონში შარშანდელი წარმატების გამეორება შეუძლია.

“არსებული შემადგენლობით კმაყოფილი ვარ და პირდაპირ გეტყვით, რომ ამ გუნდს ყველაფერი აქვს გამარჯვებისთვის. “რეალის” დონის კლუბისთვის ეს ლოგიკურიც გახლავთ. გუნდი მნიშვნელოვნად გაძლიერდა, ახლა უფრო ძლიერები ვართ, ვიდრე გასულ სეზონში. ეჭვი არ გვეპარება იმაში, რომ შარშანდელი სეზონის წარმატების გამეორება შეგვიძლია. “სევილია” ისე ითამაშებს, როგორც წინა სეზონში თამაშობდა. მეტოქე ოდნავ შეიცვალა, შუა ხაზში ახალი ფეხბურთელები მივიდნენ, თუმც საერთო სურათი უცვლელია.

კრიშტიანუ რონალდუ მზად არის, არანაირი პრობლემა არ აქვს. ყველაფერს აკეთებს იმისთვის, რომ დამდეგ მატჩში მაქსიმუმი გაიღოს, პრობლემები წარსულს ჩაბარდა. ტონი კროოსი დაახლოებით ხუთი დღეა, ვარჯიშობს, კარგ ფორმაშია. ვფიქრობ, რომ მას და ხამეს როდრიგესს “სევილიასთან” დებიუტი ექნებათ. მოედანზე იკერ კასილასიც იქნება. ის მუყაითად მუშაობს და ძირითად შემადგენლობაში ადგილს იმსახურებს. ეს ჩვეულებრივი მოვლენა იყო ჩემპიონთა ლიგის გასულ გათამაშებაშიც.

გარეტ ბეილს საოცარი სეზონი ჰქონდა. მან ჩემპიონატი წინასასეზონო მზადების გარეშე დაიწყო. გარკვეული დრო დასჭირდა ფორმის დასაბრუნებლად. ახლა ყველაფერი სხვაგვარადაა. ის უკვე იცნობს გუნდის ატმოსფეროს და თანაგუნდელებს. დარწმუნებული ვარ, ბეილი ამ სეზონშიც შესანიშნავად ითამაშებს. წინასასეზონო მომზადება ძალიან კარგად გაიარა. ის სასურველ კონდიციებშია როგორც ფიზიკურად, ასევე ფსიქოლოგიურად. გასულ სეზონთან შედარებით, მან უფრო დიდ წარმატებას უნდა მიაღწიოს”, – ანჩელოტის სიტყვები უეფას ოფიციალურ ვებგვერდზე გამოქვეყნდა.

მატჩი “რეალსა” და “სევილიას” შორის დღეს, თბილისის დროით 22:45 საათზე დაიწყება. შეხვედრას მარკ კლატენბურგის ხელმძღვანელობით ინგლისელ არბიტრთა ბრიგადა განსჯის.

ფერნანდო იერო ანჩელოტის თანაშემწედ იმუშავებს

Posted on ივლისი 11, 2014 by ბექა დოგრაშვილი

მადრიდის „რეალის“ მთავარი მწვრთნელის, კარლო ანჩელოტის თანაშემწის პოსტზე „სამეფო კლუბის“ ყოფილი კაპიტანი ფერნანდო იერო იმუშავებს.

აღნიშნულ პოზიციაზე იერო ზინედინ ზიდანს შეცვლის, რომელიც თავის მხრივ, „რეალის“ სარეზერვო გუნდს ჩაუდგება სათავეში.

ფერნანდო იერო „სამეფო კლუბში“ 1989-დან 2003 წლამდე გამოდიოდა. „რეალის“ რიგებში ჩატარებულ 601 მატჩში 127 გოლი აქვს გატანილი.

იერომ კარიერა 2005 წელს დაასრულა, რის შემდეგაც ესპანეთის ფეხბურთის ფედერაციაში სპორტული დირექტორის თანამდებობაზე მუშაობდა. ერთხანს იყო „მალაგას“ დირექტორიც.

კარლო ანჩელოტი — მატჩის შემდეგ თქმული

Posted on მაისი 26, 2014 by ბექა დოგრაშვილი

მადრიდის „რეალის“ მთავარმა მწვრთნელმა კარლო ანჩელოტიმ განაცხადა, რომ სეზონის დაწყებამდე კლუბის პრეზიდენტს ჩემპიონტა ლიგის თასს შეპირდა და სიტყვა სეასრულა კიდეც.

„უზომოდ ბედნიერი ვარ. როგორც იქნა, „რეალთან“ ერთად ეს ტიტული მოვიგეთ. თითოეული ჩვენგანი მთელი სეზონის განმავლობაში მუყაითად მუშაობდა, ვამაყობთ მიღწეულით. ბედნიერია ყველა, ვინც ყოველდღიურად გვიჭერდა მხარს. „რეალის“ ქომაგები უზომოდ ბედნიერები არიან, რაც ჩვენ გვახარებს.

ყველაზე რთული ანგარიშის გათანაბრება იყო. თავისუფალი ზონა არ გვქონდა, „ატლეტიკო“ თავს ძალიან კარგად იცავდა, თუმცა ჩვენ ყველა შესაძლებლობის გამოყენებას ვცდილობდით და მიზანს მივაღწიეთ კიდეც, შემდეგ კი თამაში მთლიანად შევცვალეთ. გატანილმა გოლმა დიდი ენერგია შეგვძინა და გამარჯვების წყურვილი გაგვიძლიერა.

გამიმართლა, თუმცა არა ამ მატჩის გამო. შეიძლება თქვათ, რომ გამიმართლა, შეიძლება სხვამ თქვას, რომ ბოლო წამამდე ძალ-ღონეს არ ვიშურებდით. ეს ფეხბურთია. ხან გაგიმართლებს, ხანაც – არა.

შესვენებაზე ვთქვი, რომ უფრო სწრაფად უნდა გვეთამაშა, შეტევითი პოტენციალი უფრო მეტად უნდა გამოგვეყენებინა. იგივე გავიმეორე 90 წუთის შემდეგ, რათა მეტოქე გუნდს შეტევის საშუალება არ მისცემოდა. ასე შევუქმნიდით „ატლეტიკოს“ უსიამოვნებებს.

პირველივე დღეს, როდესაც „სანტიაგო ბერნაბეუს“ სატიტულო ოთახში შევაბიჯე, კლუბის პრეზიდენტს ვუთხარი, რომ იქაურობას ერთი თასი აკლდა და მის მოგებას ამავე სეზონში ვეცდებოდით. ჩვენ ეს გამოგვივიდა. ნდობას მთელი კლუბისგან ვგრძნობდი, რაც გამარჯვებებში დაგვეხმარა.

ყველა ფინალი რთულია და არც ეს იყო გამონაკლისი. მძიმე სეზონი გამოვიდა, თუმცა ამავე დროს – კარგი. ეს „რეალში“ ჩემი პირველი წელი იყო, სტილის შეცვლას შევეცადეთ, გუნდმა თავი ფანტასტრიურად წარმოაჩინა: მოთამაშეები დიდ პროფესიონალიზმს და თამაშის სურვილს ავლენდნენ. მარსელო უკმაყოფილო იყო იმით, რომ სათადარიგოთა სკამზე დარჩა, თუმცა მოედანზე გავიყვანეთ და ერთ-ერთი გადამწყვეტი როლიც შეასრულა.

მსოფლიოს მასშტაბით ყველაზე მნიშვნელოვანი ტიტული მოვიგეთ. ძალიან გრძელი სეზონი გამოვიდა, „ბაიერნთან“ ნახევარფინალური მატჩის შემდეგ გამარჯვების სურვილი კიდევ უფრო გაგვიძლიერდა. ფანტასტიური სეზონი გვქონდა.

სიმეონეს ვესაუბრე. ამ მატჩამდე ჩემპიონატში გამარჯვება მივულოცე, იგივე გავაკეთე მატჩის შემდეგ. გუნდი, რომელიც ვერ იგებს, თუმცა ბოლომდე იბრძვის, დასაფასებელია. ჩემი აზრით, ეს გამარჯვება დავიმსახურეთ“, – განაცხადა ანჩელოტიმ.

ბექა დოგრაშვილი
ჟურნალი Fanebi.com