გერმანიაში, „ბიობლინგენსა“ და „გიოპინგერს“ შორის გამართული მატჩის მიმდინარეობისას, მთავარი არბიტრი სტუმართა გუნდის ფეხბურთელის სიმულაციას წამოეგო და მასპინძელთა კარის მიმართულებით თერთმეტმეტრიანი დარტყმა დანიშნა, არადა, შემტევ მოთამაშეს იმ ეპიზოდში არავინ შეხებია.
სექსისტები არ ვართ, თუმცა შეხვედრის მთავარი არბიტრი მდედრობითი სქესისა გახლდათ.
გთავაზობთ ფაქტის ამსახველ ვიდეომასალას.
ფერენც პუშკაშის ჯილდო წლის ყველაზე ლამაზი გოლის ავტორს გადაეცემა. დღეს ფიფამ იმ ათი ფეხბურთელის ვინაობა გაამხილა, ვისაც ამ პრიზის მოგების შანსი ექნება. ნეიმარმა, რომელმაც 2011 წელს უკვე გახდა ყველაზე ლამაზი გოლის ავტორი, წელს გამართულ კონფედერაციის თასზე იაპონიის ნაკრებს მართლაც თვალსასეირო გოლი გაუტანა. ზლატან იბრაჰიმოვიჩმა გასული წლის 13 ნოემრებს, ინგლისის ნაკრების წინააღმდეგ გამართულ მატჩში იშვიათი სილამაზის გოლი გაიტანა. მიუხედავად იმისა, რომ შვედმა ფეხბურთელმა ეს გოლი შარშან გაიტანა, 2013 წლის საუკეთესო გოლების სიაშია, რადგან გასულ წელს ამ გოლის გათვალისწინება დროში ვერ მოესწრო.
ჯილდოსთვის იბრძოლებენ: პეტერ ანკერსენი („ესბიორგი“, დანია), ლიზა დე ვანა („სკაი ბლუ“, ახალი ზელანდია), ანტონიო დი ნატალე („უდინეზე“, იტალია), პანაიოტის კონე („ბოლონია“, იტალია), დანიელ ლუდუენია („პაჩუკა“, მექსიკა), ნემანია მატიჩი („ბენფიკა“, პორტუგალია), ლუიზა ნესიბი („ლიონი“, საფრანგეთი), ხუან მანუელ ოლივეირა („ნაუტიკო“, ბრაზილია), ნეიმარი („ბარსელონა“, ბრაზილიის ნაკრები), ზლატან იბრაჰიმოვიჩი („პსჟ“, შვედეთის ნაკრები).
ხმის მიცემა გულშემატკივრებს ფიფასა და „ფრანს ფუტბოლის“ ვებ-გვერდებზე შეუძლიათ. 9 დეკემბერს კანდიდატთა რაოდენობა ათიდან სამამდე შემცირდება.
წლის საუკეთესო გოლის ავტორის ვინაობა 2014 წლის 13 იანვარს, ციურიხში, „ოქროს ბურთის“ დაჯილდოების ცერემონიალზე გახდება ცნობილი.
ბექა დოგრაშვილი
იტალიის სერია A-ს მე-12 ტურის ცენტრალური მატჩი ტურინში შედგა, სადაც ადგილობრივმა „იუვენტუსმა“ სატურნირო ცხრილში მეზობლად მყოფი „ნაპოლი“ მიიღო. შეხვედრა მასპინძლებმა აქტიურად დაიწყეს და უკვე მეორე წუთზე ფერნანდო ლორენტემ ანგარიში გახსნა, თუმცა მომენტის განმეორებით ჩვენებაზე ნათელი გახდა, რომ მსაჯები შეცდნენ – ბასკი ფორვარდი თამაშგარე მდგომარეობაში იყო. ასეა თუ ისე, „ბიანკონერი“ დებიუტშივე დაწინაურდა. მაყურებლებს მეორე გოლის სანახავდ საკმაო ლოდინი მოუხდათ, თუმცა ამ დროის გახარჯვა დანარჩენ ორ გოლად ღირდა. 74-ე წუთზე ანდრეა პირლომ ანგარიშში სხვაობა საჯარიმო დარტყმით გაზარდა. საბოლოო შედეგი პოლ პოგბამ დააფიქსირა, რომელმაც მატჩის მე-80 წუთზე იშვიათი სილამაზის გოლი გაიტანა – 3:0. ახალგაზრდა ფრანგმა ფეხბურთელმა პეპე რეინას კარის მიმართულებით ბურთი 101 კმ/სთ სიჩქარით გაგზავნა.
აღსანიშნავია ისიც, რომ მასპინძლები 83-ე წუთის შემდეგ რიცხობრივ უმცირესობაში იყვნენ, რადგან სწრაფი კონტშეტევის ჩაშლისთვის მთავარმა არბიტრმა ტურინელთა მცველ ანჯელო ოგბონას მეორე ყვითელი ბარათი უჩვენა და მოედნიდან გააძევა.
ამ გამარჯვებით „იუვენტუსმა“ სატურნირო ცხრილის მეორე ადგილზე პოზიციები გაიმყარა და ლიდერ „რომასთან“ სხვაობა 1 ქულამდე შეამცირა. რაც შეეხება „ნაპოლის“, რაფაელ ბენიტესის გუნდი 28 ქულით მესამე პოზიციაზე დარჩა.
იტალიის სერია A
XII ტური
„იუვენტუსი“–„ნაპოლი“ 3:0 (1:0)
გოლები: ლორენტე 2′, პირლო 74′, პოგბა 80′.
გაფრთხილებები: ბონუჩი 51′, ოგბონა 57′, ვიდალი 72′ – ჰამშიკი 61′.
გაძევება: ოგბონა 83′.
ბექა დოგრაშვილი
ინგლისის პრემიერლიგის მე-12 ტურის ცენტრალური მატჩი „ოლდ ტრაფორდზე“ შედგა, სადაც „მანჩესტერ იუნაიტედმა“ ლონდონის „არსენალი“ მიიღო. შეხვედრას ინგლისის ეროვნული ნაკრების მთავარი მწვრთნელი როი ჰოჯსონიც დაესწრო. რა თქმა უნდა, მატჩს ტრიბუნიდან ადევნებდა თვალყურს „წითელი ეშმაკების“ ყოფილი თავკაცი სერ ალექს ფერგიუსონი. შეხვედრა მასპინძლებმა უფრო აქტიურად დაიწყეს, სტუმრები კი თავიანთ შანსს კონტრშეტევებზე ელოდნენ.
ანგარიში 27-ე წუთზე გაიხსნა: მასპინძელთა მიერ შეტევის მარცხენა ფლანგიდან კუთხურის შესრულებისას, რობინ ვან პერსი „არსენალის“ ფეხბურთელებმა უყურადღებოდ დატოვეს, რითაც ჰოლანდიელმა თავდამსხმელმა ისარგებლა და თავური დარტყმით თავის ყოფილი გუნდს გოლი გაუტანა, რაც ემოციურადაც აღნიშნა.
გატანილი გოლის შემდეგ, გარკევული პერიოდის განმავლობაში მასპინძლებმა ტერიტორიული უპირატესობა დათმეს და საკუთარი საჯარიმოს მისადგომები საიმედოდ გადაკეტეს, მიმართავდნენ აქტიურ პრესინგს და ლონდონელებს მატჩის სადავეების ხელთ გდების საშუალებას არ აძლევდნენ, მეტიც – მთელი პირველი ტაიმის განმავლობაში სტუმრებს მეტოქის კარში არ დაურტყამთ, „არსენალის“ ფეხბურთელები მათთვის დამახასიათებელ ლაღ ფეხბურთს ვერ გვიჩვენებდნენ. პირველი 45 წუთი „წითელი ეშმაკების“ მინიმალური უპირატესობით დასრულდა – 1:0.
შეხვედრის მეორე ნახევარში საერთო სურათი შეიცვალა. ლონდონელები გააქტიურდნენ, ტერიტორიულ უპირატესობას დაეუფლნენ, თუმცა ამან შედეგი ვერ გამოიღო, პირიქით – გოლის გატანის კარგი შანსი მასპინძლებს მიეცათ: მე-60 წუთზე მეტოქის საჯარიმო მოედანზე მყოფმა უეინ რუნიმ ცრუ მოძრაობით ერთი მცველი ჩამოიშორა და ფაქტობრივად მეკარესთან პირისპირ აღმოჩნდა, მაგრამ ხელსაყრელი ადგილიდან ბურთი კარს ააცილა. დარჩენილ დროში „არსენალი“ ქულის გადარჩენას ეცადა, თუმცა ამაოდ.
საბოლოო ჯამში, „მანჩესტერ იუნაიტედმა“ მოახერხა პირველ ტაიმში დაფიქსირებული შედეგის შენარჩუნება და საჭირო 3 ქულა ჩაიწერა. სატურნირო ცხრილის ლიდერი დამარცხდა და შეწყდა ლონდონელთა კიდევ ერთი სერია – აქამდე პრემიერლიგის მიმდინარე სეზონის ყველა შეხვედრაში ჰქონდა „არსენალს“ გოლი გატანილი.
რაც შეეხება სატურნირო ცხრილში მდგომარეობას, „არსენალი“ 25 ქულით პირველ ადგილზე დარჩა, თუმცა მეორეადგილოსან „ლივერპულთან“ სხვაობა 2 ქულამდე შემცირდა. „მანჩესტერ იუნაიტედის“ აქტივში 20 ქულაა, რითაც ის „ევერტონთან“ და „ტოტენჰემ ჰოთსპურთან“ მეხუთე-მეშვიდე პოზიციებს ინაწილებს.
ინგლისის პრემიერლიგა
XII ტური
„მანჩესტერ იუნაიტედი“–„არსენალი“ 1:0 (1:0)
„მანჩესტერ იუნაიტედი“: დე ხეა, ვიდიჩი (კლევერლი 46′), ევრა, ევანსი, სმოლინგი, ჯონსი, კერიკი, კაგავა (გიგზი 78′), ვალენსია, ვან პერსი (ფელაინი 85′), რუნი.
მთავარი მწვრთნელი: დევიდ მოიესი.
„არსენალი“: შჩესნი, სანია, ვერმალენი, გიბსი, კოსელნი, არტეტა (გნაბრი 82′), ფლამინი (უილშირი 61′), რემსი, კაზორლა (ბენდტნერი 78′), იოზილი, ჟირუ.
მთავარი მწვრთნელი: არსენ ვენგერი.
გოლი: ვან პერსი 27′.
გაფრთხილებები: ჯონსი 41′, რუნი 75′ – სანია 31′, ფლამინი 44′, უილშირი 81′.
მთავარი მსაჯი: მაიკლ ოლივერი.
ბექა დოგრაშვილი
ლიტვის თასის მეოთხედფინალურ ეტაპზე, „კრუოიასა“ და „ჟალგირისს“ შორის გამართულ მატჩში ერთი კურიოზული ეპიზოდი მოხდა. თამაში იმდენად ცუდ მოედანზე გაიმართა, რომ „ჟალგირისი“ გარდაუვალი გოლისგან ტალახის გუბემ იხსნა.
გთავაზობთ ფაქტის ამსახველ ვიდეომასლას.
ინგლისის პრემიერლიგის მე-10 ტური „ნიუკასლ იუნაიტედსა“ და ლონდონის „ჩელსის“ შორის შემდგარი მატჩით გაიხსნა. „სენტ ჯეიმს პარკზე“ გამართული სეხვედრა საინტერესოდ წარიმართა და ის, ბევრისთვის მოულოდნელად, მასპინძელთა გამარჯვებით, ანგარიშით 2:0 დასრულდა.
მატჩის პირველი ნახევარი უგოლოდ მიილია.
მეორე ტაიმში „ნიუკასლმა“ მეტოქეს ორი უპასუხო გოლი გაუტანა: ანგარიში 68-ე წუთზე იოან გუფრანმა გახსნა, 89-ე წუთზე კი „კაჭკაჭების“ უპირატესობა ლოიკ რემიმ გაზარდა.
მეორე ადგილზე მყოფ „ჩელსის“ აქტივში 20 ქულა დარჩა, „ნიუკასლმა“ კი 14 ქულით სატურნირო ცხრილის მე-9 პოზიციაზე გადაინაცვლა. აღსანიშნავია, რომ ტურის დარჩენილი მატჩები ჯერ კიდევ ჩასატარებელია. ასე რომ, სატურნირო მდგომარეობის შეცვლა მოსალოდნელია.
ინგლისის პრემიერლიგა
მე-10 ტური
„ნიუკასლი“-„ჩელსი“ 2:0 (0:0)
გოლები: გუფრანი 68′, რემი 89′.
გაფრთხილებები: სისოკო 42′, რემი 90′ – დავიდ ლუისი 75′, რამირესი 77′.
ლეგენდარულმა გერმანელმა ფეხბურთელმა ფრანც ბეკენბაუერმა საზოგადოებას ვიდეომიმართვა გაუგზავნა.
კაიზერ ფრანცს ასეთი კითხვა დაუსვეს: „ნება მომეცით, გკითხოთ: როგორ ფიქრობთ, არსებობენ უცხოპლანეტელები? თამაშობენ ისინი სპორტულ სახეობებს?“
ბეკენბაუერმა ასე უპასუხა: „დიახ! წუხელ ისინი ჩემთან მოვიდნენ. მათ ჩვენს წინააღმდეგ ფეხბურთის თამაში უნდათ, თუმცა პრობლემა ის არის, რომ თუ წავაგებთ, ჩვენს პლანეტას გაანადგურებენ. ჩვენი ამოცანა გუნდის შეკრებაა. მხოლოდ ფეხბურთელებს შეუძლიათ პლანეტის გადარჩენა“.
ვითომ, ბეკენბაუერი ჭკუიდან შეიშალა? ალბათ, არა. შესაძლოა, მსოფლიო ფეხბურთის ლეგენდარული ფიგურა სარეკლამო კამპანიაში მონაწილეობდა, თუმცა რა შუაშია უცხოპლანეტელები, ეს ჯერჯერობით უცნობია. ბეკენბაუერი კავშირზე გამოსვლას ნოემბრის დასაწყისში აპირებს.
ბექა დოგრაშვილი
დორტმუნდის „ბორუსიას“ მთავარი მწვრთნელი იურგენ კლოპი, რომელიც მსაჯებთან აგრესიული ქმედებებით არის ცნობილი, მეოთხე არბიტრის „დატერორებას“ განაგრძობს.
გელზენკირხენის „შალეკსა“ და დორტმუნდის „ბორუსიას“ შორის გუშინ გამართული მატჩის (1:3) მიმდინარეობისას ერთი კურიოზული ფაქტი მოხდა: მწვრთნელის სკამზე მჯდომმა კლოპმა მისკენ წამოსულ ბურთს მიმართულება ისე შეუცვალა, რომ პირდაპირ მეოთხე მსაჯს მოხვდა თავში. მსაჯმა ეს ინციდენტი არ შეიმჩნია და ჩვეულად განაგრძო წერა თავის წიგნაკში. ალბათ, მიხვდა კიდეც, ვისგან მოხვდა ბურთი.
გთავაზობთ ფაქტის ამსახველ ვიდეომასალას.
საქართველოს ჩემპიონატის უმაღლესი ლიგის მეათე ტურის ცენტრალური მატჩი „დინამო არენაზე“ შედგა, სადაც გათამაშების ერთპიროვნულმა ლიდერმა „დინამო თბილისმა“ ცხრილის მეორეადგილოსან ქუთაისის „ტორპედოს“ უმასპინძლა. შეხვედრა დრამატულ ბრძოლაში წარიმართა და მასპინძელტა გამარჯვებით, ანგარიშით 2:1 დასრულდა. მატჩის შემდეგ, სტადიონის მედია დარბაზში ტრადიციული მატჩისშემდგომი პრესკონფერენცია გაიმართა.
დუშან უჰრინი: „ჩვენთვის ძალიან რთული მატჩი გამოდგა. მსაჯმა დაპირისპირების დებიუტში კაცი გაგვიგდო და ათი კაცით გავაგრძელეთ თამაში. პირველივე წუთებიდან გუნდს ტაქტიკურად გადაწყობა სჭირდებოდა ისეთ სქემაზე, რომ გუნდს ნაყოფიერად შეეტია და დაცვაშიც რიგიანად ეთამაშა. მეორე ნახევარი არც თუ ისე ცუდად დავიწყეთ, თუმცა ბოლო ოცი წუთი ბევრად უკეთესი თამაში ვაჩვენეთ. შეიძლება ითქვას, რომ ჩვენი თამაში ვაჩვენეთ და საჭირო შეხვედრა მოვიგეთ. შეხვედრის მიწურულს მოედანზე „დინამო“ ათი კაცით დომინირებდა, კმაყოფილი ვარ ამ მოგებით. დღევანდელი საღამო ჩვენთვის სასიამოვნო რეზულტატით დასრულდა“.
ჟერარდ სარაგოსა: „პირველ რიგში ტორპედოს გულშემატკივარს მინდა მოვუბოდიში, ვინაიდან ისეთი თამაში ვერ ვაჩვენეთ, როგორიც გვინდოდა. დღევნდელ დაპირისპირებაში არა თუ სამი ქულა, არამედ ქულის აღებაც ვერ მოვახერხეთ. სამი–ოთხი თვეა რაც ტორპედოს ვხელმძრვანელობ და მგონი, უკვე ჩამოყალიბდა ძირითადი ბირთვი. გუნდის საშუალო ასაკი 21 წელი არის და დინამოსთან ტოლ–სწორად თამაში იმის დასტურია, რომ ჩვენი დაწყებული საქმე ნაყოფიერია. პირველი სამოცი წუთი კარგად ვითამაშეთ, ბოლოს კი დინამომ გამოცდილების ხარჯზე წარმატებას მიაღწია. ახლა ყველანი სპარტაკთან შეხვედრისთვის ვიფიქრებთ“.
მატჩის რევიუსა და ვიდეომიმოხილვის სანახავად გადადით ბმულზე: ქართული „კლასიკო“ „დინამომ“ დრამატულ ბრძოლაში მოიგო
საქართველოს ჩემპიონატის უმაღლესი ლიგის მეათე ტურის ცენტრალური მატჩი „დინამო არენაზე“ შედგა, სადაც გათამაშების ერთპიროვნულმა ლიდერმა „დინამო თბილისმა“ ცხრილის მეორეადგილოსან ქუთაისის „ტორპედოს“ უმასპინძლა.
მატჩი ძალიან საინტერესოდ დაიწყო. შეხვედრის მე-3 წუთზე ქუთათურთა თავდამსხმელ გიორგი ფანცულაიას მეკარესთან ერთი ერთზე გასვლის შესაძლებლობა მიეცა, თუმცა მასპინძელთა ცენტრალურმა მცველმა უსტარიცმა ოპონენტი საჯარიმოს გარე პერიმეტრზე ხელით დაიჭირა და წინსვლის საშუალება არ მისცა. მთავარმა არბიტრმა გიორგი ვადაჭკორიამ ეპიზოდი ბოლო იმედის ჯარიმად შეაფასა და „დინამოს“ ბასკ მცველს პირდაპირ წითელი ბარათი უჩვენა. თბილისური გუნდი მოედანზე ათი კაცის შემადგენლობით დარჩა, რამაც ბუნებრივია, „დინამოს“ გეგმები გარკვეულწილად შეცვალა.
კარგი მომენტი მიეცა „დინამოს“ მე-18 წუთზე: შეტევის მარჯვენა ფლანგიდან ჯაბა დვალმა წამოიწყო შეტევა, რომელმაც საჯარიმოს მისადგომებთან ჩისკო მოძებნა, ამ უკანასკნელმა თავით ბურთი ხელსაყრელ პოზიციაზე მყოფ დორინ გოგას დაუგდო, რუმინელის დარტყმულს მეკარე ადგილზე დახვდა.
შეხვედრის 22-ე ანგარიში გაიხსნა, სტუმრები დაწინაურდნენ: მერაბ გიგაურმა მეტოქის საჯარიმოში ჩააწოდა, მართალია სტუმრებმა მეორე სართულზე ბრძოლა წააგეს, თუმცა ბურთი დავით უბილავას მიუვიდა, რომელმაც საჯარიმოში ჩააბრუნა, იქ კი თორნიკე კაპანაძემ ერთი შეხებით, ძლიერი დარტყმით გაგზავნა ბურთი გიორგი ლორიას კარში და გაიტანა კიდეც. ეს მიმდინარე ჩემპიონატში კაპანაძის რიგით მეხუთე გოლი გახლავთ.
უნდა ითქვას, რომ მატჩის პირველ ტაიმში ტერიტორიულ უპირატესობას ქუთაისელი ფეხბურთელები ფლობდნენ, მეტოქეს უბურთოდ ტოვებდნენ და დროსაც მშვიდ რითმში აკონტროლებდნენ, თუმცა გასახდელში გასვლის წინ „ტორპედომ“ ცივი შხაპი მიიღო. მთავარმა არბიტრმა საჯარიმოში ხელით თამაშის გამო სტუმართა კარის მიმართულებით თერთმეტმეტრიანი დარტყმა დანიშნა. პენალტის შესრულება დვალმა ითავა, თუმცა მისი დარტყმის შემდეგ ბურთი კარს ზემოდან გადასცდა.
მატჩის პირველი ნახევარი „ტორპედომ“ ანგარიშით 1:0 მოიგო.
მეორე ტაიმი პირველი ნახევარი შედარებით მონოტონურ რითმში წარიმართა, მოედანზე ბევრი არც არაფერი ხდებოდა საინტერესო.
მეორე ტაიმის შუაწელს ორივე გუნდის ქომაგებმა პირო-ტექნიკითა და ფოიერვერკებით ლამაზი წარმოდგენა გვიჩვენეს, თუმცა კიდევ ერთხელ სათქმელია, რომ ეს ჩვენს ჩემპიონატში აკრძალულია.
77-ე წუთზე მთავარმა არბიტრმა „ტორპედოს“ კარის მიმართულებით კიდევ ერთი პენალტი დანიშნა. ამ ეპიზოდში ქუთაისელთა კიპერმა მაქსიმე ქვილითაიამ საკუთარ საჯარიმოში თბილისელთა ნახევარმცველი ელგუჯა გრიგალაშვილი წააქცია. თერთმეტმეტრიანის ნიშნულთან ამჯერად ლევან ხმალაძე მივიდა, რომელმაც ანგარიში გაათანაბრა კიდეც.
მატჩის ბოლოს „ტორპედოს“ კიდევ ერთი კარგი შანსი მიეცა, როცა ლორიას კარის მიმართულებით ნიკა ახვლედიანმა „გაისროლა“, თუმცა მეკარემ ლამაზ ნატომში ბურთის მოგერიება მოახერხა.
მომენტი „დინამოსაც“ ჰქონდა: ხელსაყრელი პოზიციიდან შეცვლაზე სემოსული პატრიკ ვუო ურტყამდა, თუმცა ბურთს ადგილზე დახვდა დახვდა ქვილითაია.
მატჩის კულმინაცია კი 91-ე წუთზე მოხდა, როდესაც შეცვლაზე შემოსულმა გიორგი გველესიანმა მარჯვენა ფლანგიდან მოწოდებული კუთხურის შემდეგ თავით დაარტყა და „დინამო“ დააწინაურა – 2:1.
ასე დრამატულ ბრძოლაში გაიმარჯვა „დინამომ“, რომელმაც ლიდერის პოზიციები კიდევ უფრო გაიმყარა: თბილისურ გუნდს აქტივში 25 ქულა მოუგროვდა, მეორეადგილოსან „ტორპედოს“ კი 19 ქულა დარჩა. სატურნირო ცხრილის სრული ვერსიისა და მე-10 ტურის დანარჩენი მატჩების შედეგების ხილვა Fanebi.Com-ის საქართველოს განყოფილების გვერდზე შეგიძლიათ.
„დინამო“-„ტორპედო“ 2:1 (0:1)
„დინამო“: ლორია, უსტარიცი, კვარაცხელია, სეთურიძე, კვირკველია, ხმალაძე, ძარია (ვუო 77′), გოგა, მერებაშვილი, ჩისკო (გველესიანი 42′), დვალი (გრიგალაშვილი 58′).
მთავარი მწვრთნელი: დუშან უჰრინი.
„ტორპედო“: ქვილითაია, მთივლიშვილი (გაბაძე 90′), ხიდეშელი, ჭელიძე, უბილავა, ცინცაძე, გიგაური, კუხიანიძე (ახვლედიანი 77′), საბანაძე, ფანცულაია, კაპანაძე (გოროზია 69′).
მთავარი მწვრთნელი: ჟერარდ სარაგოსა.
გოლები: ხმალაძე 78′ (პენ), გველესიანი 90+1′ კაპანაძე 22′.
გაფრთხილებები: სეთურიძე 51′ – მთივლიშვილი 45′, გიგაური 50′, ქვილითაია 78′, გოროზია 90+1.
გაძევება: უსტარიცი 3′.
გამოუყენებელი პენალტი: დვალი 45+1′.
მთავარი მსაჯი: გიორგი ვადაჭკორია (თბილისი).
აქვე გთავაზობთ დღევანდელი მატჩის ვიდეომიმოხილვას.
ბექა დოგრაშვილი
იტალიის სერია А-ს მერვე ტური „ტორინოსა“ და მილანის „ინტერს“ შორის გამართული მატჩით დაიხურა. შეხვედრა საკმაოდ საინტერესოდ წარიმართა და ანგარიშით 3:3 დასრულდა. სტუმართაგან გოლები ფრედი გუარინმა და ორჯერ როდრიგო პალასიომ გაიტანეს. „ტორინოს“ მხრიდან გატანილი გოლებით თავი ალექსანდრ ფერნერუდმა, ჩირო იმობილემ და ნიკოლა ბელომომ გამოიჩინეს.
აღსანიშანვია, რომ მატჩის მე-5 წუთზე „ინტერი“ მოედანზე ათი კაცით დარჩა, რადგან მთავარმა მსაჯმა მილანელთა მეკარე სამირ ჰანდანოვიჩი გააძევა. მე-7 წუთზე მასპინძელთა თავდამსხმელმა ალესიო ჩერჩიმ თერთმეტმეტრიანი დარტყმა ვერ გამოიყენა.
სერია А
მერვე ტური
„ტორინო“-„ინტერი“ 3:3 (1:1)
გოლები: ფერნერუდი 21′, იმობილე 53′, ბელომო 90′ – გუარინი 45+1′, პალასიო 55′, 71′.
გამოუყენებელი პენალტი: ჩერჩი 7′.
გაფრთხილებები: გაცი 32′, ფერნერუდი 37′, იმობილე 80′ – ტაიდერი 26′, კამბიასო 78′.
გაძევება: ჰანდანოვიჩი 5′.
„ლივერპულის“ ნახევარმცველმა სტივენ ჯერარდმა ინგლისის პრემიერლიგაში თავისი რიგით მე-100 გოლი გაიტანა. „ნიუკასლ იუნაიტედის“ წინააღმდეგ გამართულ მატჩში მერსისაიდული გუნდის 33 წლის კაპიტანმა თერთმეტმეტრიანი დარტყმა ზუსტად შეასრულა.
როგორც მოგეხსენებათ, სტივ ჯერარდი „ლივერპულის“ აღზრდილია და პირველ გუნდში 1998 წლიდან გამოდის. მერსისაიდულ გუნდში ჯერარდის დებიუტი 1998 წლის 29 ნოემბერს შედგა. ის „ბლექბერნ როვერსის“ წინააღმდეგ გამართული მატჩის უკანასკნელ წუთზე მოედანზე პირველად გამოჩნდა. ამ ხნის განმავლობაში მან 640 მატჩი ჩაატარა და 161 გოლი გაიტანა.
გთავაზაობთ გოლის ამსახველ ვიდეომასალას.
