ჭდე: England

“ჰათაისფორი” ადასტურებს: “ჰალმა” ლობჟანიძის თაობაზე მოგვმართა”

Posted on by ბექა დოგრაშვილი

შოთა არველაძის “ჰალ სიტი” საქართველოს ნაკრებისა და “ჰათაისფორის” გარემარბ საბა ლობჟანიძეს ინგლისურ გუნდში იწვევს. ეს ინფორმაცია თურქული კლუბის ვიცეპრეზიდენტმა მუსტაფა ოზათმა დაადასტურა.

“ჰალ სიტიმ” საბა ლობჟანიძისა და აუბ ელ-ქააბის თაობაზე წინადადებით მოგვმართა. ჩვენ ეს საკითხი კლუბის დირექტორთა საბჭოსთან ერთად განვიხილეთ, თუმცა სატრანსფერო საფასური ჯერ არ დაგვიდგენია”, – ციტირებს ოზათის სიტყვებს Ajansspor-ი.

საბა ლობჟანიძემ 2021-2022 წლების სეზონში “ჰათაისფორის” ფორმით 40 მატჩი ჩაატარა, რვა გოლი გაიტანა და ცხრა შედეგიანი გადაცემა მიითვალა. მას თურქულ კლუბთან კონტრაქტი 2024 წლამდე აქვს გაფორმებული. სპეციალიზებული ინტერნეტპორტალი “ტრანსფერმარკტი” ქართველი ფეხბურთელის სატრანსფერო ღირებულებას ოთხ მილიონ ევროდ აფასებს.

სალაჰი: “იტალიაში ფანები მეტოქეს პატივს სცემენ, ინგლისში – არა”

Posted on by ბექა დოგრაშვილი

“ლივერპულის” თავდამსხმელმა მოჰამედ სალაჰმა იტალიური და ინგლისური სპორტული კულტურა ერთმანეთისგან განასხვავა.

“როდესაც “რომაში” ვთამაშობდი, ფანები ფრანჩესკო ტოტის აპლოდისმენტით შინაც ეგებებოდნენ და სტუმრადაც. ასე ხდებოდა დანიელე დე როსის, ჯანლუიჯი ბუფონისა და ალესანდრო დელ პიეროს შემთხვევაშიც. ინგლისში ასე არ არის. აქ ფანები მეტოქე გუნდის ფეხბურთელების მიმართ ყოველთვის საწინააღმდეგოდ არიან განწყობილნი. ბუფონი იტალიის რომელ ქალაქშიც არ უნდა წავიდეს, ყველგან დამსახურებულ პატივისცემას იღებს”, – ციტირებს სალაჰის სიტყვებს “კორიერე დელო სპორტი”.

ეგვიპტელმა საუკეთესო მეკარეებიც დაასახელა, რომელთა წინააღმდეგაც უთამაშია:

“ერთ კონკრეტულ მეკარეს ვერ გამოვარჩევ, ამიტომ ოთხს მათგანს დავასახელებ: კასილასი, ბუფონი, ალისონი და ნოიერი. ბევრი სხვა დიდებული კიპერი არსებობს, მაგრამ ამ მომენტში ისინი არ მახსენდება. ერთი მათგანის დასახელება რთულია. როდესაც იტალიაში ვთამაშობდი, ბუფონი შეუდარებელი იყო. საოცარი გრძნობაა მის წინააღმდეგ თამაში. მან კარიერაში ყველაფერი მოიგო და ეს წარმოუდგენელია”.

გარი ნევილი: “1966 წლის შემდეგ საუკეთესო ნაკრები გვყავს”

Posted on by ბექა დოგრაშვილი

ინგლისის ნაკრების ყოფილი მცველი გარი ნევილი თვლის, რომ “სამ ლომს” 1966 წლის შემდეგ საუკეთესო გუნდი ჰყავს.

“1966 წლის შემდეგ ეს ინგლისის ნაკრების საუკეთესო ვერსიაა. დღევანდელმა გუნდმა გაცილებით მეტს მიაღწია, ვიდრე ინგლისის ნაკრების წინა შემადგენლობებმა. საუკეთესო ფეხბურთელთა კრებულია, რომელსაც თანმიმდევრულად კარგად შეუძლია ტურნირებზე გამოსვლა. მათ კარგი სათამაშო დონე აქვთ, ჯერ კიდევ იზრდებიან და უკეთესები ხდებიან, გუნდს ტექნიკურად დიდებული მოთამაშეები დაემატა. მწვრთნელიც ფანტასტიკური გვყავს. მაინტერესებდა, რამდენად შეეძლო ამ გუნდს ინგლისის ნაკრების მწერვალზე დაბრუნება და 2020 წლის ევროპის ჩემპიონატზე ეს თითქმის მოახერხა.

ყატარის მსოფლიოს ჩემპიონატი ზედგამოჭრილი ტურნირია ინგლისის ნაკრებისთვის. ბოლო 30-40 წლის განმავლობაში ყოველთვის ამბობდნენ, რომ სეზონის ბოლოს ფეხბურთელები გადაღლილები არიან. ყატარში ნოემბერ-დეკემბერში ვითამაშებთ და ეს შესანიშნავი პერიოდია. ამ დროისთვის ინგლისელი ფეხბურთელები გაცილებით კარგ კონდიციებში უნდა იყვნენ. თუ გუნდი ზრდას გააგრძელებს, წარმატების იმედი უნდა გვქონდეს”, – თქვა გარი ნევილმა “სქაი სპორტსისთვის” მიცემულ ინტერვიუში.

შეგახსენებთ, რომ ინგლისის ნაკრები მსოფლიოს ჩემპიონატზე B ჯგუფში იასპარეზებს, სადაც მისი მეტოქეები ირანი, აშშ და ევროპის პლეიოფში გამარჯვებული იქნებიან.

ლამპარდი მისი შესაძლო გათავისუფლების შესახებ

Posted on by ბექა დოგრაშვილი

ლონდონის “ჩელსის” მთავარმა მწვრთნელმა ფრენკ ლამპარდმა გუნდიდან მისი შესაძლო გათავისუფლების შესახებ პრესაში გავრცელებულ ინფორმაციაზე კომენტარი გააკეთა.

“მე ჩემს საქმეში დარწმუნებული ვარ, მიუხედავად იმისა, რას ფიქრობს ხალხი. ფეხბურთს ფეხის ადგმის მომენტიდან ვთამაშობ, პროფესიონალურ დონეზე ოცი წელიწადი ვითამაშე და მაშინაც ისე ვცდილობდი, როგორც ახლა.

წაგება არ მიყვარს. “მანჩესტერ სიტისთან” მარცხმა დამამწუხრა. ჩვენ იმ დღეს უკეთეს გუნდთან დავმარცხდით, მაგრამ მომდევნო დღეს უკვე პროგრესისკენ ვიყავი მომართული. მე სიტუაციას ასე ვუყურებ.

ამ გამოწვევის მიღების სურვილი რომ არ მქონოდა, ტელეექსპერტად ვიმუშავებდი და გაცილებით იოლ საქმეს გავაკეთებდი. სხვების მსგავსად მეც შემეძლო ექსპერტად მუშაობა, მაგრამ არ ვისურვე”, – ციტირებს ლამპარდის სიტყვებს “გარდიანი”.

ინგლისის პრემიერლიგის მე-17 ტურის თავზე “ჩელსის” სატურნირო ცხრილში 26 ქულით მეცხრე ადგილი უკავია. ხვალ ლამპარდის გუნდი ინგლისის თასის მესამე რაუნდში მეორელიგელ “მორკამს” ეთამაშება.

სვენ-გორან ერიქსონი: “ფერგიუსონი მოკვლით მემუქრებოდა, თუ რუნის მუნდიალზე წავიყვანდი”

Posted on by ბექა დოგრაშვილი

ინგლისის ნაკრების ყოფილმა მთავარმა მწვრთნელმა სვენ-გორან ერიქსონმა გამოცემა “თაიმსს” საინტერესო ინტერვიუ მისცა, რომლის ერთ-ერთი მონაკვეთი “მანჩესტერ იუნაიტედის” ექსთავკაც ალექს ფერგიუსონთან მომხდარ ინციდენტს დაეთმო.

შვედმა სპეციალისტმა ინტერვიუში 2006 წელს მომხდარი ამბავი გაიხსენა. ამ პერიოდში “წითელი ეშმაკების” აწ უკვე ყოფილმა თავდამსხმელმა უეინ რუნიმ ტრავმა მიიღო და გამოჯანმრთელების პროცესი საკმაოდ გაეწელა. ინგლისელმა ფეხბურთელმა მსოფლიოს ჩემპიონატამდე ტრავმის მოშუშება ვერ მოასწრო, თუმცა უშუალოდ ტურნირის მიმდინარეობისას გამოჯამრთელებისა და თამაშის საშუალება ჰქონდა. ამის მიუხედავად, “მანჩესტერ იუნაიტედის” მთავარ მწვრთნელ ალექს ფერგიუსონს მუნდიალზე რუნის გაშვება არ სურდა, რასაც ერიქსონთან დაძაბული სატელეფონო საუბარი მოჰყვა.

შვედი სპეციალისტი იხსენებს:

“ალექსი უცნაური კაცი იყო. ასეთი ჩვევა ჰქონდა: დამირეკავდა დილის შვიდ საათზე ან უფრო ადრე და ყოველგვარი მისალმების გარეშე იწყებდა ყვირილით საუბარს. როდესაც ასეთი გაღიზიანებული იყო ხოლმე, მასთან კომუნიკაცია შეუძლებელი ხდებოდა.

მან ის დილაც ჩხუბით დაიწყო. ყვიროდა, რომ მომკლავდა, თუ რუნის მსოფლიოს ჩემპიონატზე წავიყვანდი.

მე მას ვკითხე: “რა ხდება ალექს, რაშია საქმე?” თუმცა, ის მე არ მისმენდა და განაგრძობდა ყვირილსა და მუქარას. საბოლოო ჯამში, ვუთხარი: “რუნის მსოფლიოს ჩემპიონატზე მაინც წავიყვან. კარგი შვებულება, ჩაო” და ტელეფონი გავუთიშე”.

უეინ რუნიმ 2006 წლის მსოფლიოს ჩემპიონატზე მართლაც ითამაშა, თუმცა “სამი ლომი” ტურნირს მეოთხედფინალურ ეტაპზე პორტუგალიის ნაკრებთან პენალტების სერიაში მარცხის შემდეგ გამოეთიშა.

ანანიძე: “ბეილი ჩემზე ძლიერია, მაგრამ ჩემზე ხშირად ტრავმიანობს, აღნაგობა არაფერ შუაშია”

Posted on by ბექა დოგრაშვილი

საქართველოს ნაკრებისა და მოსკოვის “სპარტაკის” ნახევარმცველმა ჯანო ანანიძემ რუსული კლუბის ოფიციალური ვებგვერდისთვის მიცემულ ინტერვიუში უარყო მოსაზრება, თითქოს მისი ხშირი ტრავმიანობა ფიზიკურ მონაცემებთან არის დაკავშირებული.

“სპარტაკის” ლიდერობა მსურს, თუმცა მესმის, რომ ეს ან ახლა მოხდება ან არასდროს. ვგრძნობ, რომ შემიძლია ისე ვითამაშო, როგორც ამას ჩემგან გულშემატკივრები მოელიან. სამწუხაროდ, ხშირად ტრავმები მიშლიდა ხელს. ფაქტობრივად ათი წლიდან სამი მკურნალობაში მაქვს გატარებული. ხშირად ვკითხულობ, თითქოს ყველაფერი ჩემი აღნაგობის ბრალია, მაგრამ შეხედეთ მადრიდის “რეალის” ფეხბურთელ გარეტ ბეილს. ის ჩემზე სამჯერ მეტს იწონის და კუნთებიც სამჯერ დიდი აქვს, თუმცა ჩემზე ხშირად ტრავმიანობს. მან “რეალში” ყოფნის ექვსი წლიდან მხოლოდ წელიწადნახევარი ითამაშა.

ალბათ, უფროსების წინააღმდეგ თამაში საკმაოდ ადრეულ ასაკში დავიწყე. გარდა ამისა, თავიდან სატრენაჟორო დარბაზებს ხშირად არ ვსტუმრობდი. ახლა გაცილებით ხშირად ვვარჯიშობ. იმას არ ვამბობ, რომ რობოტის დონემდე უნდა მიხვიდე, როცა ბურთსაც ვეღარ გრძნობ, მაგრამ პროფილაქტიკა აუცილებელია, რათა კუნთები და სახსრები კარგ მდგომარეობაში იყოს.

დეკემბრამდე უნდა ვაჩვენო, რა შემიძლია: გოლების გატანა, საგოლე გადაცემები. თამაშის მიმდინარეობის წაყვანა. მთავარი მწვრთნელისგან ნდობას ვგრძნობ და ეს მეხმარება”, – აღნიშნა ანანიძემ.

“ინტერმა” რაჯა ნაინგოლანი ტრანსფერზე დააყენა

Posted on by ბექა დოგრაშვილი

მილანის “ინტერმა” გუნდის ნახევარმცველ რაჯა ნაინგოლანის ტრანსფერზე დაყენება გადაწყვიტა.

მილანურ გუნდში ბელგიელი ფეხბურთელის პირველი სეზონი არაერთმნიშვნელოვანი გამოდგა: ნაინგოლანმა დიდი პერიოდი ლაზარეთში გაატარა, თუმცა ცალკეულ შემთხვევებში ჰქონდა საკმაოდ კარგი თამაშებიც.

“კორიერე დელო სპორტი” წერს, რომ “ნერაძურიმ” ფეხბურთელთან განშორების გადაწყვეტილება მიიღო. წყაროს თანახმად, “ინტერის” ხელმძღვანელობამ ნაინგოლანის აგენტ ალესანდრო ბელტრამის უკვე აცნობა, რომ ფეხბურთელი ტრანსფერზეა დაყენებული.

ბუფონს “ბრეშა” ეპატიჟება

Posted on by ბექა დოგრაშვილი

ლეგენდარული იტალიელი მეკარე ჯანლუიჯი ბუფონი პროფესიული კარიერის დასრულებას ჯერ არ აპირებს.

“პარი სენ-ჟერმენიდან” წამოსვლის შემდეგ 41 წლის კიპერი, სავარაუდოდ, სამშობლოს მიაშურებს. Football Italia წერს, რომ ბუფონის დამატებით “ბრეშა” არის დაინტერესებული, რომელმაც ვეტერანი მეკარისთვის წინადადება უკვე მოამზადა. შეგახსენებთ, რომ “ბრეშამ” იტალიის სერია B მოიგო და დამდეგ წელს სერია A-ში იასპარეზებს.

როგორც მოგეხსენებათ, ჯანლუიჯი ბუფონმა გასული სეზონი “პარი სენ-ჟერმენში” გაატარა, რომლის რიგებშიც ყველა ტურნირზე ერთად 25 მატჩი ჩაატარა და ამდენივე გოლი გაუშვა. იტალიელი კიპერი პარიზული კლუბის გარდა კარიერის განმავლობაში ტურინის “იუვენტუსისა” და “პარმას” ღირსებას იცავდა.

ჯეიმს მილნერი: “მესიმ ვირი მიწოდა”

Posted on by ბექა დოგრაშვილი

“ლივერპულის” ნახევარმცველმა ჯეიმს მილნერმა ჩემპიონთა ლიგის ნახევარფინალურ ეტაპზე “ბარსელონასთან” გამართული მატჩის მიმდინარეობისას ლიონელ მესისთან მომხდარი კონფლიქტის შესახებ ისაუბრა.

როგორც აღმოჩნდა, 33 წლის ინგლისელს ესპანური ენა ესმის. აღსანიშნავია, რომ ის შვილებს ხშირად სწორედ ესპანურ ენაზე ესაუბრება, სწორედ ასე გაიგო მან მესის ნათქვამი სიტყვები. მილნერმა “ენფილდზე”, “ლივერპულსა” და “ბარსელონას” შორის გამართული მატჩის პირველი ნახევრის შემდეგ არგენტინელთან საუბარი გაიხსენა.

“მესი უკმაყოფილო იყო. პირველი ტაიმის შემდეგ გასახდელისკენ მიმავალს ესპანურად საუბარი დამიწყო. მან მე მიწოდა “Burro”. ეს სიტყვა ითარგმნება, როგორც “ვირი”, თუმცა მგონია, რომ ამ ტერმინს ესპანურ ფეხბურთში უხეში ფეხბურთელების მიმართ იყენებენ.

მე მას ვკითხე, ყველაფერი რიგზე იყო თუ არა, თუმცა ყურადღება არ მომაქცია. ჩემი აზრით, ის ვერ მიხვდა, რომ ესპანური ენა მესმოდა. მან თქვა: “ასე უხეშად იმიტომ ითამაშე, რომ ბურთი ფეხებს შორის გაგიძვრინე.” მე საუბარი აღარ გამიგრძელებია და გასახდელში შევედი. მის მიმართ მხოლოდ აღტაცებას გამოვხატავ.

ამის მიუხედავად, მესის თამაშით აღფრთოვანებული ვარ. მას ყველაფრის თქმის უფლება აქვს. ცხადია, მის წინააღმდეგ თამაში რთულია. თუ მის შეჩერებას შეეცდები, შეიძლება, ისე მოხდეს, რომ სულელი გამოჩნდე. მეც ასე დამემართა – მან ბურთი ფეხებს შორის გამიძვრინა, ამ კადრს კი მილიონობით ნახვა აქვს. მე არც პირველი ვყოფილვარ და არც უკანასკნელი. ის შეუდარებელი ფეხბურთელია”, – აღნიშნა მილნერმა “დეილი მეილთან” საუბრისას.

ზინედინ ზიდანმა ფლორენტინო პერესს ექვსი მოთხოვნა წაუყენა

Posted on by ბექა დოგრაშვილი

“მარკას” ცნობით, მადრიდის “რეალის” მთავარმა მწვრთნელმა ზინედინ ზიდანმა კლუბის პრეზიდენტ ფლორენტინო პერესს მოლაპარაკების პროცესში ექვსი მოთხოვნა წაუყენა:

1. გუნდზე სრული კონტროლი;
2. იმ მოთამაშეების გაყიდვა, რომლებიც არ სჭირდება;
3. მარსელო და ისკო არ იყიდებიან;
4. გუნდი ნეიმარს არ შეიძენს;
5. ხამეს როდრიგესი არ დაბრუნდება;
6. გუნდი მბაპეს ყიდვას შეეცდება.

შეგახსენებთ, რომ გუშინ მადრიდის “რეალმა” გუნდის მთავარი მწვრთნელის პოსტიდან სანტიაგო სოლარი გაათავისუფლა, თავკაცის თანამდებობაზე კი ზინედინ ზიდანი დაბრუნდა. მხარეებს შორის გაფორმებულ შრომით ხელშეკრულებას ძალა 2022 წლის ზაფხულამდე ექნება.

როგორც მოგეხსენებათ, ფრანგი სპეციალისტი “სამეფო კლუბს” 2016 წლის იანვრიდან 2018 წლის მაისამდე თავკაცობდა. ამ არასრული სამი წლის განმავლობაში გუნდმა ცხრა ტიტული დაისაკუთრა, მათ შორის ზედიზედ სამჯერ ჩემპიონთა ლიგის გამარჯვებული გახდა, ერთხელ კი ესპანეთის პრიმერადივიზიონი მოიგო.

“რეალს” ესპანეთის პრიმერადივიზიონის 27-ე ტურის თავზე სატურნირო ცხრილში მესამე ადგილი უკავია და ლიდერ “ბარსელონას” 12 ქულით ჩამორჩება. გუნდმა ჩემპიონთა ლიგის მერვედფინალურ ეტაპზე ამსტერდამის “აიაქსის” ბარიერი ვერ დაძლია (ორი მატჩის ჯამში 3:5). “სამეფო კლუბი” ესპანეთის თასის გათამაშებასაც გამოეთიშა, სადაც “ბარსელონასთან” ნახევარფინალში დამარცხდა (ორი მატჩის ჯამში 1:4).

იკარდის მეუღლე: “მე საფეხბურთო რევოლუციონერი ვარ”

Posted on by ბექა დოგრაშვილი

მილანის “ინტერის” ფორვარდ მაურო იკარდის მეუღლემ ვანდა ნარამ, რომელიც ამავდროულად ფეხბურთელის აგენტიც გახლავთ, საკუთარ თავს საფეხბურთო რევოლუციონერი უწოდა.

“ყოველთვის ვამბობდი, რომ იკარდის აგენტად მუშაობა იოლი საქმეა, ვინაიდან ის ევროპის ერთ-ერთი საუკეთესო ფეხბურთელია. ბევრ მოთამაშეს ჰყავს აგენტად აყვანილი საკუთარი ნათესავი, მაგრამ მათ შორის ქალი არ არის. ფეხბურთის სამყაროში ქალები შინ სხედან და ჩუმად არიან. აი, ამიტომ ვარ მე რევოლუციონერი.

საკუთარი თავის წარდგენა არ მჭირდება, ვინაიდან მე ყველაზე წარმატებულ საფეხბურთო ტელეპროგრამაში ვმუშაობ, ვარ გავლენიანი ადამიანი. გარდა ამისა, გახლავართ დედა, მეუღლე, მეგობარი, ერთგული, მოკრძალებული, გულწრფელი, პირდაპირი და კარგი ადამიანი”, – ციტირებს ვანდა ნარას სიტყვებს Нару Gente.

შეგახსენებთ, რომ მაურო იკარდისა და მილანის “ინტერს” შორის ურთიერთობა გაფუჭებულია. კლუბმა ფეხბურთელს კაპიტნის სამკლაური ჩამოართვა, თავად იკარდი კი გუნდში თამაშზე უარს აცხადებს. ვანდა ნარას სურს, რომ იკარდის ხელფასის სახით წელიწადში ათი მილიონი ევრო ჰქონდეს, თუმცა მხარეები ამაზე ვერ თანხმდებიან.

ოლე გუნარ სულშერი: “ალექსის სანჩესი კეტჩუპის ბოთლს ჰგავს”

Posted on by ბექა დოგრაშვილი

“მანჩესტერ იუნაიტედის” მთავარმა მწვრთნელმა ოლე გუნარ სულშერმა გუნდის ფორვარდ ალექსის სანჩესის შესახებ ისაუბრა და ჩილელი ფეხბურთელი კეტჩუპის ბოთლს შეადარა.

“ალექსის სანჩესი კარგი მოთამაშეა. ის ძალზედ ნიჭიერია, მაგრამ გარკვეული ასპექტების გაუმჯობესება მართებს. თქვენ ეს კარგად დაინახეთ “ფულემის” წინააღმდეგ გამართულ მატჩში.

ალექსის სანჩესი აქტიური იყო, ბურთის მოპოვებასაც ცდილობდა და მთელი ენერგიაც გამოიყენა. თუ გოლების გატანასაც დაიწყებს, თავდაჯერება შეემატება. ვიცით, რომ მისი სახით ძალიან კარგი ფეხბურთელი გვყავს.

ალექსის სანჩესი კეტჩუპის ბოთლივით არის. თავიდან კეტჩუპი ბოთლიდან არ გამოდის, ცოტაოდენ შეანჯღრევ და ზედმეტი რაოდენობით გამოვა”, – ციტირებს სულშერის სიტყვებს “სქაი სპორტსი”.