ინგლისის ლიგის თასის ფინალური მატჩის შემდეგ, გამარჯვებული „მანჩესტერ სიტის“ მთავარი მწვრთნელი მანუელ პელეგრინი სატელევიზიო ინტერვიუში საკუთარი ემოციების შესახებ საუბრობდა, თუმცა შეცდომით თავი „მანჩესტერ იუნაიტედის“ თავკაცად მოიხსენია.
„მიყვარს ის ზეწოლა, რასაც განვიცდი ისეთი დიდი გუნდის ხელმძღვანელობისას, როგორიც „მანჩესტერ იუნაიტედია“. ძალიან კარგია, რომ ყველა ტურნირზე ვინარჩუნებთ შანსს“, – განაცხადა პელეგრინიმ.
გთავაზობთ ფაქტის ამსახველ ვიდეომასალას.
გამოვიდა Fanebi.com-ის ინტერნეტ-ჟურნალის მერვე ნომერი, რომელიც მთლიანად 2016 წლის ევროპის ჩემპიონატის შესარჩევი ეტაპის წილისყრის შედეგების შეფასებას ეხება.
ნომერში წაიკითხავთ:
ევრო-2016-ის შესარჩევი ეტაპი — გუნდების თავკაცების შეფასებები;
ევრო-2016-ის შესარჩევი ეტაპი — ჩვენი კალენდარი;
ისტორია, სტატისტიკა, შანსები.
კვლავინდებურად შეგახსენებთ, რომ გაიხსნა ჟურნალ Fanebi.com-ის ფეისბუქის გვერდი: www.facebook.com/Fanebi.Journal
2 მარტის ნომრის გაცნობა აქვე შეგიძლიათ.
ჟურნალის რედაქტორი: ბექა დოგრაშვილი
გამოვიდა Fanebi.com-ის ინტერნეტ-ჟურნალის მეშვიდე ნომერი, რომელშიც გაეცნობით შემდეგ მასალებს:
ნეიმარი: „არ ველოდი, თუ „ბარსელონასთან“ ადაპტაციას ასე მალე გავივლიდი“ (ინტერვიუ);
„ქართველი იბრაჰიმოვიჩი“ ევროჩემპიონატის შესარჩევი ეტაპის ყველაზე ახალგაზრდა მეგოლეთა შორის;
კვირის ახალი ამბები მოკლედ;
კვირის კარიკატურები;
ჟუნინინოს უმაღლესი სტანდარტი.
კვლავინდებურად შეგახსენებთ, რომ გაიხსნა ჟურნალ Fanebi.com-ის ფეისბუქის გვერდი: www.facebook.com/Fanebi.Journal
23 თებერვლის ნომრის გაცნობა აქვე შეგიძლიათ.
ჟურნალის რედაქტორი: ბექა დოგრაშვილი
სტაბილურობით გამორჩეული მეკარე, რომელმაც მსოფლიოს საფეხბურთო სამყაროს თავი „შალკეში“ კარგი თამაშით გააცნო, ახლა მიუნხენის „ბაიერნის“ ღირსებას იცავს. იმ გუნდის, რომლის შემადგენლობაში ყველა შესაძლო ტიტულის მოპოვება მოახერხა. ამჟამად, 27 წლის კარის დარაჯი გერმანიის ეროვნული ნაკრების პირველ მეკარედ ითვლება.
ფიფას ოფიციალურმა ვებ-გვერდმა მანუელ ნოიერს ინტერვიუ ჩამოართვა.
– გერმანიის ეროვნულ ნაკრებში ერთადერთი რგოლი, რომელშიც პრობლემა არ ყოფილა მეკარის პოზიციაა. რატომ არიან გერმანიაში ასეთი ძლიერი მეკარეები?
– გერმანიაში მეკარეებს ძალიან კარგად ავარჯიშებენ. ჩვენთან მხოლოდ ერთი კარგი მეკარის ყოლა საკმარისი არ არის. შესაძლოა, მოულოდნელად, ნომერ მეორე, მესამე ან მეოთხე მეკარემ შეგცვალოს. ვფიქრობ, ეს ჩვენი პლუსია და იმედი მაქვს, მომავალშიც ასე იქნება.
– რატომ მოისურვეთ მეკარეობა?
– სიმართლე გითხრათ, მეკარეობა არ მინდოდა. მსურდა, მინდვრის მოთამაშე ვყოფილიყავი. კარებში კი, ძალით ჩამაყენეს.
– ამის გამო, ხომ არ ბუზღუნებდით?
– პირველად, როცა კარებში ჩავდექი 4 წლის ვიყავი. მაშინ, მეკარეებს ბურთი ყველაზე ხშირად ხვდებოდა, ამიტომ კარებში ყოფნა არავის სურდა. თუმცა, ბოლოს კარებში დგომა მაინც მომეწონა.
– თქვენი აზრით, ვინ არის ყველა დროის საუკეთესო მეკარე?
– ძალიან რთული სათქმელია. ყველა ეპოქას ყავდა თავისი გამორჩეული მეკარე. ჩემს ბავშვობაში, საუკეთესოდ ედვინ ვან დერ სარი მიგვაჩნდა.
– თქვენი კარიერის განმავლობაში, რომელმა გაშვებულმა გოლმა გაგაღიზიანათ ყველაზე მეტად?
– ორი წლის წინ, ჩემპიონთა ლიგის ფინალში დროგბას თავით გატანილმა გოლმა ყველაზე მეტად გამაბრაზა. ეს რომ არ მომხდარიყო, 2012 წელს ჩემპიონთა ლიგას „ბაიერნი“ მოიგებდა.
– მსოფლიოს 2014 წლის ჩემპიონატის ჯგუფურ ეტაპზე, გერმანიის ნაკრებს განის, პორტუგალიისა და ამერიკის შეერთებული შტატების ნაკრებებთან მოუწევს დაპირისპირება. როგორ შეაფასებდით მეტოქეებს?
– რა თქმა უნდა, ვიცით, რომ ძალიან რთულ ჯგუფში მოვხვდით. თუმცა, ამავდროულად, ისიც ვიცით, რომ სამივე მეტოქის დამარცხება შეგვიძლია. ძლიერი მეტოქეები გვყავს, ამიტომ მაქსიმალურად ყურადღებით უნდა ვიყოთ.
– 2002 წელს, მეორე ადგილი. 2006 და 2010 წლებში კი – მესამე. ხომ არ მოვიდა დრო იმისა, რომ გერმანელებმა მსოფლიოს ჩემპიონატი მოიგონ?
– იმედი მაქვს, ასე მოხდება. ცხადია, ტურნირის ერთ-ერთი ფავორიტები ჩვენ ვართ. თუმცა, არსებობს რაღაც ცუდი დეტალები, რომლებიც ჩემპიონატის მიმდინარეობისას თავს იჩენენ.
– რას ელით მსოფლიოს 2014 წლის ჩემპიონატისგან?
– როდესაც რომელიმე ქვეყანაში ნამყოფი არ ხარ, იქ ყოველთვის დიდი მოლოდინით მიდიხარ. ვიცი, რომ ბრაზილია ფეხბურთით ცხოვრობს, იქ ეს სპორტის სახეობა სიგიჟემდე უყვართ. ვფიქრობ, მსოფლიოს 2014 წლის ჩემპიონატი ჩემი კარიერის განმავლობაში, ერთ-ერთი საუკეთესო ეპიზოდი იქნება.
დიტო ჭიჭინაძე
დღეს კვირა დღეა, შესაბამისად, გამოვიდა Fanebi.com-ის ინტერნეტ-ჟურნალის მეექვსე ნომერი, რომელიც ოდნავ სახეცვლილია. ვიფიქრეთ და გადავწყვიტეთ, რომ ჩვენი ჟურნალი ამიერიდან აღარ შემოგთავაზებთ ცნობილი ფეხბურთელების ფერად პოსტერებს. ორი ალტერნატივა გვქონდა: ან ეს შუა ორი გვერდი უნდა გაგვეუქმებინა და ჟურნალის ფორმატი შეგვემცირებინა, ან პოსტერის ნაცვლად თქვენთვის სხვა რუბრიკა შემოგვეთავაზებინა. ამ ეტაპზე გადაწყდა, რომ პოსტერის ნაცვლად ეს ორი გვერდი დაეთმობა კვირის საფეხბურთო ამბებსა და ომარ მომანის კვირის კარიკატურების განხილვას. საერთოდ კი, დღევანდელ ნომერში წაიკითხავთ:
მანუელ ნოიერი: „კარში დგომა არ მინდოდა“ (ინტერვიუ)
ქართული ფეხბურთის განვითარების პროგრამა
კვირის ამბები მოკლედ
კვირის კარიკატურები
ფეხბურთოლოგია
რამდენი წლისაა ჯოზეფ მინალა?
კიდევ ერთხელ შეგახსენებთ, რომ გაიხსნა ჟურნალ Fanebi.com-ის ფეისბუქის გვერდი: www.facebook.com/Fanebi.Journal
16 თებერვლის ნომრის გაცნობა აქვე შეგიძლიათ.
ჟურნალის რედაქტორი: ბექა დოგრაშვილი
კატალონიის „ბარსელონას“ თავდამსხმელს, ლიონელ მესის 2013 წლის ბოლო პერიოდში ტრავმები აწუხებდა, მაგრამ ის ახლა თავს კარგად გრძნობს და მოედანზე ძველებურად თამაშს ცდილობს.
16 იანვარს, ესპანეთის თასზე, „ხეტაფესთან“ გამართულ შეხვედრაში, 26 წლის არგენტინელმა დუბლის გაფორმება მოახერხა. მისი ერთ-ერთი გოლი გამორჩეული კი იმით იყო, რომ მესიმ გზად რამდენიმე მეტოქე ჩამოიტოვა და ბურთი კარში ზუსტად გადაგზავნა.
2013 წლის „ოქროს ბურთის“ ერთ-ერთმა ფინალისტმა ფიფას ოფიციალურ ვებ-გვერდს ინტერვიუ მისცა, რომელსაც ჩვენ აქვე გთავაზობთ.
– 2013 წლის განმავლობაში, წარმატებულთან ერთად, წარუმატებელი პერიოდებიც გქონდათ. არგენტინის ნაკრებმა მსოფლიოს 2014 წლის ჩემპიონატის საგზური მოიპოვა, თუმცა ცუდი ისაა, რომ თქვენ ტრავმა გქონდათ, რის გამოც გარკვეული დროის განმავლობაში უქმობა მოგიწიათ…
– დიახ, ნამდვილად უცნაური წელი გამოდგა. ტრავმა რამდენჯერმე მივიღე, რის გამოც ხშირად უქმობა მიწევდა. შეიძლება, ითქვას, 2013 წლიდან, ყველაზე ცუდი, რაც მახსენდება ისაა, რომ ტრავმებს ვიღებდი.
– მწვრთნელები, რომებსაც თქვენთან უმუშავიათ, ყოველთვის ორ რამეს ამბობენ: თქვენ ძალიან ნიჭიერი ხართ და გძულთ ის პერიოდი, როდესაც თამაში არ გიწევთ. როგორ უძლებთ უქმობის პერიოდს?
– გულწრფელად გეტყვით, უთამაშებლად ყოფნა ძალიან რთულია. როდესაც ტრავმა მქონდა, უმეტესად არგენტინაში ვიმყოფებოდი. ჩემსა და ჩემს თანაგუნდელებს შორის მანძილი კი ძალიან დიდი იყო. თუმცა ოპტიმისტი ვარ და რა თქმა უნდა, ყველაფერში ვეძებ რაღაც დადებითს.
– თქვენ როსარიოში დაიბადეთ. ყველაზე მეტად რა გენატრებათ მშობლიური ქალაქიდან?
– ყველაფერი. ჩემი ოჯახი, ჩემი მეგობრები. ტრავმის დროს, სამშობლოში გატარებული პერიოდი კარგად მახსენდება.
– ახერხებდით თუ არა მშობლიური ქალაქის ქუჩებში ისე გადაადგილებას, რომ თქვენს გარშემო ბევრი ადამიანი არ ყოფილიყო?
– (იღიმის) ისევე, როგორც ბარსელონაში… სიმართლე გითხრათ, ქუჩებში არ დავსეირნობდი, მხოლოდ მეგობრების და ნათესავების სახლში მივდიოდი.
– „ბარსელონას“ მატჩების ყურება ტელევიზორის საშუალებით გიხდებოდათ. ამ დროს, ჩვეულებრივზე უფრო მეტად ნერვიულობდით?
– რა თქმა უნდა, ამ დროს უფრო მეტად ვნერვიულობ, ვიდრე მოედანზე ყოფნისას.
– ცხადია, ძალიან ბევრ ადამიანს უნდა, რომ თქვენ 2014 წელს ტრავმა აღარ მიიღოთ, მითუმეტეს წელს, მსოფლიოს ჩემპიონატი უნდა გაიმართოს…
– ფიზიკურადაც და ფსიქოლოგიურადაც, თავს მშვენივრად ვგრძნობ და არა მგონია, ტრავმებმა შემაწუხონ.
– მსოფლიოს ჩემპიონატი ყველასათვის განსაკუთრებული ტურნირია, ხომ ასეა?
– რასაკვირველია. მსოფლიოს ჩემპიონატამდე კიდევ რამდენიმე თვეა დარჩენილი, მაგრამ ახლა მასზე ყველა ფიქრობს.
– არგენტინის ნაკრებში ბევრი გამოცდილი და ახალგაზრდა ფეხბურთელი თამაშობს, ამავდროულად, არგენტინელები მსოფლიოს წამყვანი კლუბების ღირსებას იცავენ. ამრიგად, თქვენი ქვეყნის ნაკრები მსოფლიოს ჩემპიონატის ერთ-ერთ ფავორიტად ითვლება.
– დიახ, მართალია. ამ დროისათვის, კარგ ფორმაში ვიმყოფებით და ვფიქრობ, სამართლიანიცაა, როდესაც მსოფლიოს ჩემპიონატის ფავორიტებს შორის გვასახელებენ. შესაძლოა, შესარჩევ ეტაპზე ყველა მატჩი ისე ვერ ჩავატარეთ, როგორც საჭირო იყო, თუმცა ნამდვილად ძლიერი გუნდი გვყავს. ცხადია, ტურნირის მოგება რთული იქნება, მაგრამ ჩვენ ბოლომდე დავიხარჯებით.
– მოდით, ბრაზილიის ნაკრებზეც ვისაუბროთ. ბრაზილიელების წინააღმდეგ არაერთხელ გითამაშიათ. მათთან გამართულ რომელ შეხვედრას გამოარჩევდით?
– 2005 წელს, მსოფლიოს 20-წლამდელთა ჩემპიონატის ნახევარფინალში ბრაზილიელები ანგარიშით 2:1 დავამარცხეთ. ამ მატჩში გოლის გატანა შევძელი, საბოლოოდ კი ტურნირი ჩვენ მოვიგეთ. აღსანიშნავია ისიც, რომ კარიერაში ერთ-ერთი პირველი ტიტული მოვიგე.
– რა ხდის მსოფლიოს ჩემპიონატის ერთ რიგით მატჩს განსაკუთრებულს?
– მსოფლიოს ჩემპიონატზე გამართული ნებისმიერი მატჩი გამორჩეულია. სტადიონზე განსაკუთრებული ატმოსფერო იქმნება. თუ ჩემპიონთა ლიგა დიდებულია, მსოფლიოს ჩემპიონატი განსაკუთრებულია.
– მსოფლიოს 2014 წლის ჩემპიონატზე, არგენტინის ნაკრებს ჯგუფურ ეტაპზე ბოსნია-ჰერცოგოვინის, ირანისა და ნიგერიის ნაკრებების წინააღმდეგ მოუწევს თამაში.
– ბევრმა თქვა, რომ ჩვენ ძალიან იოლ ჯგუფში მოვხვდით, მაგრამ მიმაჩნია, რომ მსოფლიოს ჩემპიონატზე მხოლოდ ძლიერები თამაშობენ. თუ ისინი ამ ტურნირზე მოხვდნენ, ეს დაიმსახურეს.
– ბოლოს, დაასრულეთ წინადადება: „2014 წელს, ლიონელ მესი იქნება…“
– არ ვიცი (იცინის). იმედი ვიქონიოთ, „ბარსელონასა“ და არგენტინის ნაკრებისათვის წარმატებული წელი იქნება. ასევე, ყველა ფეხბურთელს წარმატებას ვუსურვებ.
დიტო ჭიჭინაძე
2013 წელი კრიშტიანო რონალდუსათვის მართლაც ბრწყინვალე აღმოჩნდა. მადრიდის “რეალის” პორტუგალიელმა თავდამსხმელმა ოქროს ბურთისათვის ბრძოლაში, ფრანკ რიბერისა და ლიონელ მესის აჯობა.
2013 წლის მსოფლიოს საუკეთესო ფეხბურთელ ფიფას ოფიციალურმა ვებ-გვერდმა ინტერვიუ ჩამოართვა, რომელსაც ჩვენ აქვე გთავაზობთ.
– ოქროს ბურთის გადმოცემა ძალიან ემოციური გამოდგა. რა აზრმა გაიელვა თქვენს თავში, როდესაც ფურცელზე თქვენი სახელი და გვარი ამოიკითხეს?
– როდესაც მივხვდი, რომ ოქროს ბურთი მერგო, ძალიან ამაყი და ბედნიერი ვიყავი. ასეთი ჯილდოს მოპოვებას დიდი შრომა სჭირდება. რა თქმა უნდა, ოქროს ბურთის მეორედ მოგება ძალიან მინდოდა. იმედი მაქვს, მას მომავალ წელს, მესამედაც მივიღებ.
– გარდა იმისა, რომ ოქროს ბურთი მოიგეთ, კიდევ რითი გამოარჩევდით 2013 წელს?
– მსოფლიოს 2014 წლის ჩემპიონატზე მოხვედრამ ძალიან გამახარა. შვედეთის ნაკრების წინააღმდეგ გამართული შეხვედრები არასოდეს დამავიწყდება.
– პროფესიონალურ კარიერაში გატანილი 400 გოლიდან, რომელი იყო ყველაზე მნიშვნელოვანი?
– ჩემთვის, ყველა გოლი განსაკუთრებულია. შეიძლება, ითქვას, როდესაც ფინალში გაგაქვს, მას უფრო დიდი წონა აქვს. გოლების გატანა ნამდვილად მიყვარს – გოლი ჩემი ნაწილია.
– ბოლო დროს, პორტუგალიურ ფეხბურთში ბევრი მნიშვნელოვანი რამ მოხდა. მათ შორის გამორჩეული კი, ორი იყო: პორტუგალიის ნაკრების მსოფლიოს ჩემპიონატზე მოხვედრა და ლეგენდარული ეუსებიოს გარდაცვალება…
– ძალიან ვწუხვარ, რომ ეუსებიო გარდაიცვალა. ის ნამდვილი გენიოსი იყო, შესაბამისად, პორტუგალიამ მისი სახით, უდიდესი ადამიანი დაკარგა. თუმცა, ეს ცხოვრებაა და ერთ დღეს ჩვენც წავალთ. ეუსებიო ჩვენს გულებში მუდამ დარჩება.
– რა მიზნები გაქვთ მსოფლიოს 2014 წლის ჩემპიონატზე?
– იმედი მაქვს, ჩვენი გუნდი ამ ტურნირზე წარმატებას მიაღწევს. ცხადია, მსოფლიოს ჩემპიონატის მოგება რთულია, მაგრამ ყველაფერს გავაკეთებთ იმისათვის, რომ გულშემატკივრები გავახაროთ.
– ოქროს ბურთის მოგება ორ კლუბში – “მანჩესტერ იუნაიტედსა” და მადრიდის “რეალში” თამაშისას მოახერხეთ…
– მე რომ მკითხოთ, ახლა მსოფლიოს ორ უძლირესს კლუბზე ვსაუბრობთ, ამიტომ მემაყება, რომ ორივე გუნდის შემადგენლობაში წარმატებით მიასპარეზია. “მანჩესტერ იუნაიტედში” არაერთი ტიტული მოვიგე, მათ შორის ჩემპიონთა ლიგა, ახლა მინდა, იგივე მადრიდის “რეალშიც” მოვახერხო.
– “სამეფო კლუბის” გულშემატკივრები ჩემპიონთა ლიგის მეათეჯერ მოგებას ითხოვენ. ეს ყოველივე გუნდისათვის წნეხი ხომ არ არის?
– შესაძლოა, გარკვეული წნეხი მართლაც არის, მაგრამ ეს უფრო მოტივირებულებს გვხდის. ჩემპიონთა ლიგა ყველაზე მნიშვნელოვანი ტურინირია, ამიტომ “რეალს” მისი მოგება ყველა სეზონში სურს. ჩვენ ერთ-ერთი ფავორიტები ვართ. ვნახოთ, რა მოხდება.
– დღევანდელი ფეხბურთელებიდან, ვის გამოარჩევდით?
– ერთი ფეხბურთელის გამორჩევა არ მსურს. დღეს, ფეხბურთში ძალიან ბევრი ძლიერი მოთამაშეა, რომელთა წინააღმდეგაც დიდი სიამოვნებით ვთამაშობ. მომწონს “რეალის”, “ბარსელონას”, “მანჩესტერ იუნაიტედის”, “მანჩესტერ სიტისა” და “ბაიერნის” ფეხბურთელები. კონკრეტულად ერთს კი ვერ დავასახელებ.
– დაასრულეთ წინადადება: “2014 წელს, კრიშტიანო რონალდუ იქნება…”
– …იქნება ისეთივე, როგორიც 2013 წელს იყო.
დიტო ჭიჭინაძე
მადრიდის „რეალის“ ნახევარმცველ ჩაბი ალონსოს მომავალი ჯერაც გაურკვეველია. ბასკ ფეხბურთელს „სამეფო კლუბთან“ კონტრაქტი მიმდინარე წლის ზაფხულში ეწურება. მართალია, „სანტიაგო ბერნაბეუზე“ აცხადებენ, რომ მასთან ხელშეკრულება გახანგრძლივდება, თუმცა ახალ კონტრაქტზე ხელის მოწერას მხარეები არ ჩქარობენ. ჟურნალ „კლუბ დელ დეპორტისტას“ ჟურნალისტებმა საშობაო არდადეგებით დრო იხელთეს და ალონსოსთან ინტერვიუ ჩაწერეს, რომლის გარკვეულ მონაკვეთსაც Fanebi.Com-ი აქვე გთავაზობთ..
– განვლილი კარიერიდან რაიმე ცუდი მოგონება თუ გაქვთ?
– გულწრფელად გითხრათ, ცუდი მოგონებები არ მაქვს, მაგრამ ის კი სიმართლეა, რომ ფეხბურთში არის დიდებისა და ღრმა მწუხარების დროები. მახსოვს, როდესაც „რეალ სოსიედადში“ ვთამაშობდი, ლა ლიგას მოგების შანსი მქონდა, თუმცა ტურნირის დასასრულს „სელტასთან“ დავმარცხდით და შანსი ხელიდან გავუშვით. მაშინ ძალიან მძიმე წუთები გვქონდა. ბოლო წლებიდან ამგვარ მომენტად „რეალის“ ჩემპიონთა ლიგის ნახევარფინალური ეტაპებიდან გამოვარდნას დავასახელებდი. ეს ძალიან მტკივნეულად გადავიტანეთ. სწორედ ამიტომაც გვაქვს წელს მიზნად დასახული, რომ ფინალში გავიდეთ და ცუდი მოგონებები უკან მოვიტოვოთ.
– ფეხბურთელების გარდა, თუ გყავთ სპორტსმენები, რომლებიც თქვენზე დიდ შთაბეჭდილებას ახდენენ?
– მიგელ ინდურაინის (ველორბოლა), მაიკლ ჯორდანის (კალათბურთი), რაფაელ ნადალის (ჩოგბურთი) და როჯერ ფედერერის (ჩოგბურთი) დიდი თაყვანისმცემელი ვარ. ჩემს მიერ ჩამოთვლილ სპორტსმენებს განსაკუთრებული ქარიზმა აქვთ და ამას არა მათ მიერ ნაჩვენები შედეგების გამო ვამბობ, არამედ მათი ქცევიდან გამომდინარე.
– თქვენს მიერ ჩამოთვლილი ადამიანები ლიდერები არიან. როგორ ფიქრობ – ლიდერებად იბადებიან თუ ცხოვრების განმავლობაში ხდება ადამიანი ლიდერი?
– ჩემი აზრით, ლიდერებად იბადებიან. კი ბატონო, გამოცდილება და პრესტიჟი ნამდვილად დასაფასებელია, ეს ლიდერობას ხელს უწყობს, მაგრამ ბუნებრივად ლიდერობა უფრო ადვილია. ლიდერად დაბადებული ხალხის მჯერა და არა – მოჩვენებითი ლიდერების.
– ვისთან გაქვთ განსაკუთრებული ურთიერთობა „რეალში“ და ესპანეთის ნაკრებში?
– ალვარო არბელოას დიდი მეგობარი ვარ. მასთან ერთად კარიერის დიდი ნაწილი განვვლე: ერთად ვიყავით „ლივერპულში“ და ერთად ვართ „რეალშიც“, ასევე ორივენი ვთამაშობთ ესპანეთის ნაკრებში.
ბექა დოგრაშვილი
მადრიდის “რეალისა” და პორტუგალიის ეროვნული ნაკრების თავდამსხმელი, კრიშტიანო რონალდუ აცხადებს, რომ მას კარიერის დასრულება “სამეფო კლუბში” სურს.
28 წლის ფეხბურთელმა, რომელმაც ჩატარებულ ბოლო 6 მატჩში, 13 გოლის გატანა მოახერხა, ინტერვიუ ერთ-ერთ ესპანურ რადიოს მისცა.
– ამჟამად საუკეთესო ფორმაში იმყოფებით.
– მართალია. ვცდილობ, კლუბსაც და ეროვნულ ნაკრებსაც წარმატების მიღწევაში დავეხმარო.
– “რეალის” გულშემატკივრების მხრიდან სიყვარულს გრძნობთ?
– “სამეფო კლუბში” უკვე მეხუთე სეზონს ვატარებ და მინდა, გითხრათ, რომ გულშემატკივრების მხრიდან სიყვარულს კარგა ხანია ვგრძნობ. ვფიქრობ, “რეალში” ჩემი თავი ვიპოვე. აქ თავს ძალიან კარგად ვგრძნობ და არსად წასვლის სურვილი არ გამაჩნია.
– გინდათ, თქვათ, რომ კარიერის დასრულება “რეალში” გსურთ?
– დიახ, ეს შესაძლებელია. როდესაც ყველაფერი კარგადაა, მოტივაციაც უფრო მაღალი გაქვს. ამჟამინდელი სიტუაციიდან გამომდინარე კი, კარიერის დასრულება “რეალში” მსურს. მადრიდი ბრწყინვალე ქალაქია. მსოფლიოს საუკეთესო გუნდში ვთამაშობ, მეტს ვერაფერს ვიტყვი.
დიტო ჭიჭინაძე
ევროპის ზონიდან საფრანგეთისა და უკრაინის ნაკრებების ბრძოლა მსოფლიოს ჩემპიონატის საგზურისთვის დიდ ინტერესს იწვევს. როგორც მოგეხსენებათ, პირველი მატჩი კიევში შედგა და ის მასპინძლების გამარჯვებით, ანგარიშით 2:0 დასრულდა, რამაც „მამლები“ მძიმე მდგომარეობაში ჩააგდო. ფრანგი გულშემატკივრების დიდ ნაწილს უკვე აღარ სჯერა, რომ მისი ქვეყნის ნაკრები უკრაინულ ბარიერს დაძლევს, თუმცა სხვა პოზიციაზეა დიდიე დეშამი. საფრანგეთის ნაკრების მთავარი მწვრთნელი დარწმუნებულია, რომ მისი გუნდი სასურველი ანგარიშით გაიმარჯვებს და ბრაზილიის მუნდიალის საგზურს მოიპოვებს.
„ვეცდებით, სასურველ შედეგს მივაღწიოთ. პირველ რიგში, ფსიქოლოგიურად ვართ მზად. ვთვლი, რომ გამარჯვება შეგვიძლია“, – თქვა მატჩისწინა პრესკონფერენციაზე დეშამმა.
– თუ მატჩის ძირითადი დრო ანგარიშით 2:0 დასრულდება, უკვე იცით, ვინ შეასრულებს თერთმეტმეტრიანებს?
– ჯერ არ ვიცი. თუ საქმე პენალტების სერიამდე მივა, დაარტყამს ის, ვინც იმ მომენტში იქნება მზად ამისთვის.
– რას ეტყოდით საფრანგეთის ნაკრების ქომაგებს?
– ვიცი, რომ მთელი სტადიონი ჩვენ გვიქომაგებს, თუმცა შედეგი მხოლოდ ფეხბურთელებზე იქნება დამოკიდებული და არა – გულშემატკივრებზე.
– პოსტიდან გათავისუფლებაზე თუ გიფიქრიათ?
–არა. დარწმუნებული ვარ, რომ ჩვენ გავიმარჯვებთ. ამაში 1 პროცენტითაც არ მეპარება ეჭვი.
– ვარანი არის მზად იმისთვის, რომ უკრაინის ნაკრების წინააღმდეგ გასამართ მატჩში სრულად ითამაშოს?
– ვფიქრობ, ის ფიზიკურად მზად არის, თუმცა ვერც იმას გამოვრიცხავს, რომ მას მუხლთან დაკავშირებით შეიძლება გარკვეული სახის პრობლემები ჰქონდეს.
– რიბერის კიევში ორი-სამი ფეხბურთელი მეურვეობდა. ექნება მას პარიზში მეტი სივრცე?
– ვფიქრობ, მას აქაც ეყოლება რამდენიმე მეურვე. ასეთ მომნტში დანარჩენ ფეხბურთელებს მეტი პასუხისმგებლობა ეკისრებათ, ისინი უფრო მეტად უნდა დაეხმარნონ ფრანკს.
– როგორც ფეხბურთელი, ისურვებდით ასეთ მატჩში მონაწილეობის მიღებას?
– დიახ, წინააღმდეგი არ ვიქნებოდი. ძალზედ საინტერესო დაპირისპირებაა.
ცნობისთვის, მატჩი საფრანგეთისა და უკრაინის ნაკრებებს შორის 20 ნოემბერს, ჩვენი დროით 00:00 საათზე დაიწყება.
ბექა დოგრაშვილი
საქართველოსა და საფრანგეთის ეროვნულ ნაკრებთა შორის „დინამო არენაზე“ გამართული მატჩის (0:0) მიმდინარეობისას მოედანზე ახალგაზრდა გულშემატკივარი შეიჭრა, რომელიც გიორგი ლორიას ჩაეხუტა და მოედანი თავისივე ნებით დატოვა.
გთავაზობთ აღნიშნული ფაქტის ამსახველ ვიდეომასალას.
საფრანგეთის ეროვნული ნაკრების მთავარმა მწვრთნელმა დიდიე დეშამმა გუშინ, თბილისში დაფიქსირებული შედეგის (0:0) გამო სინანული გამოხატა და ჟურნალისტის კითხვას, თუ რატომ ვერ იტანს კარიმ ბენზემა გოლს 20 საათის განმავლობაში, ფეხბურთის ფრანგმა სპეციალისტმა უპასუხა, რომ პრობლემა „მამლების“ მე-10 ნომერში არ მდგომარეობს.
„პრობლემა ბენზემა კი არა, ის არის, რომ ყოველი მატჩის წინ 11 ფეხბურთელი უნდა შევარჩიო. ბენზემა მარტო არ თამაშობს, ბევრი რამ არის დამოკიდებული მოედანზე მის გვერდით მყოფ მოთამაშეებზეც. მე მათ სიტუაციის განხილვა შევთავაზე. ბენზემა და ჟირუ ერთად ცუდად არ გამოიყურებიან, მაგრამ აღნიშნული ფეხბურთელები თავიანთ კლუბებში 4-4-2 სქემით არ თამაშობენ, ამიტომ ამ ყველაფერს დრო დასჭირდება“, – ამბობს საფრანგეთის ნაკრების თავკაცი.
„ვერ ვიტყოდი, რომ საფრანგეთის ნაკრებს ახლა ყველაზე ცუდი გუნდი ჰყავს. თაობებს არ ვადარებ. ეს ფეხბურთელები კლუბებში გოლებს იტანენ, თუმცა ამას ნაკრებში ვერ ახერხებენ. პრობლემები უნდა გადავჭრათ, თუმცა სასწაულმოქმედი წამალი არ მაქვს. ესპანეთის ნაკრებს თბილისში უფრო ნაკლები შესაძლებლობა მიეცა, თუმცა მათ 86-ე წუთზე გატანილი გოლის წყალობით მაინც გაიმარჯვეს. ჩემს გუნდს ეფექტურობის გაუმჯობესება მართებს“, – განაცხადა დეშამმა.
ბექა დოგრაშვილი
